வெளியிடப்பட்ட நேரம்: 20:50 (05/07/2018)

கடைசி தொடர்பு:20:50 (05/07/2018)

`எம்.எல்.ஏ-வாக இருக்கிறது எவ்வளவு கஷ்டம் தெரியுமா?’ - எம்.எல்.ஏ நேருவின் புலம்பல்

எம்.எல்.ஏ-வாக இருந்தால்தான், அதன் கஷ்டம் புரியும் எனத் திமுக எம்.எல்.ஏ கே.என்.நேரு சட்டப்பேரவையில் பேசியது சிரிப்பலையை ஏற்படுத்தியது.

நேரு

வழக்கமான சட்டப்பேரவை கூட்டத்தொடர் இந்த ஆண்டு சற்று மாற்றத்துடன் காணப்படுகிறது. இதற்குக் காரணம் எம்.எல்.ஏ-க்களின் சுவாரஸ்யமான பேச்சுகள்தான். சட்டமன்ற எதிர்க்கட்சித் துணைத்தலைவர் துரைமுருகனின் கலகலப்பான பேச்சுகள், முதலமைச்சருக்கு அ.தி.மு.க-வினர் சூட்டும் வித்யாசமான பட்டங்கள் எனப் பேரவையில் தினசரி சுவாரஸ்ய நிகழ்வுகள் பல அரங்கேறி வருகின்றன. அந்த வகையில் இன்றைய விவாதத்தின்போது பேசிய காங்கிரஸ் எம்.எல்.ஏ பாண்டி, `எம்.எல்.ஏ-க்கள் எங்கு சென்றாலும் மரியாதையில்லை; அவர்களுக்கென தனி அதிகாரம் வழங்க வேண்டும்’ எனத் தெரிவித்தார். தி.மு.க எம்.எல்.ஏ கே.என்.நேரு பேசுகையில் `சட்டமன்ற உறுப்பினராக இருப்பது அவ்வளவு எளிதல்ல. எம்.எல்.ஏ-க்களின் ஊதியத்தை அனைவரும் விமர்சித்து வருகின்றனர்.

ஓபிஎஸ்

தொகுதி பிரச்னை, கல்யாணம், பொதுநிகழ்ச்சி, கிரிக்கெட், சடுகுடு என நாங்கள் கலந்துகொள்ளும் நிகழ்ச்சிக்கு ஆகும் செலவுக்கான பில்லை கொடுக்கிறோம். எங்களுக்கு சம்பளம் வேண்டாம்; மாறாகப் பில்லின் தொகையைக் கொடுத்தாலே போதும். எம்.எல்.ஏ-வாக இருந்தால்தான் அதன் கஷ்டம் புரியும்’ என பேசியது பேரவையில் அனைவரிடத்திலேயும் சிரிப்பை வரவழைத்தது. தொடர்ந்து பேசிய அவர், தமிழகத்தின் கடன் 3.56 லட்சம் கோடியாக உயர்ந்திருப்பதைச் சுட்டிக்காட்டினார். இதற்குப் பதிலளித்துப் பேசிய துணை முதல்வர் ஓ.பன்னீர் செல்வம், `செலவுகளால் ஏற்பட்ட உயர்வைச் சமாளிக்கக்கூடிய அளவுக்கு வருவாயில் உயர்வில்லை. மதுக்கடை வருமானம் கணிக்கப்பட்ட அளவு கிடைக்காததால் கடன்சுமை அதிகரித்துள்ளது. கடனைத் திருப்பிச் செலுத்தும் திறன் அதிகரித்த காரணத்தால், எந்தப் பிரச்னையும் இல்லை, யாரும் கவலைப்பட வேண்டாம்’ எனத் தெரிவித்தார்.