வெளியிடப்பட்ட நேரம்: 15:20 (09/07/2018)

கடைசி தொடர்பு:15:20 (09/07/2018)

`தமிழகத்தில் முழு கருத்து சுதந்திரம் உள்ளது'- முதல்வர் பழனிசாமி

தமிழகத்தில் முழு கருத்து சுதந்திரம் உள்ளதாக முதலமைச்சர் எடப்பாடி பழனிசாமி சட்டப்பேரவையில் தெரிவித்துள்ளார்.

முதல்வர்  பழனிசாமி

சட்டப்பேரவை இறுதிநாளான இன்று எதிர்க்கட்சித் தலைவர் மு.க.ஸ்டாலின் கவன ஈர்ப்புத் தீர்மானம் ஒன்றைக் கொண்டு வந்தார். அப்போது பேசிய அவர், `சேலம் டு சென்னை 8 வழிச்சாலை குறித்து அரசியல் கட்சியினர் பொதுக்கூட்டம் நடத்த அனுமதியளிக்க மறுப்பது ஏன்? பசுமை வழிச்சாலை திட்டம் குறித்து அரசியல் கட்சியினரும், மக்களும் கருத்து சொல்லக்கூடாது என்பதுபோல் காவல்துறை செயல்பட்டு வருகிறது. மக்களுக்குப் பாதிப்பு ஏற்படாத வகையில் 8 வழிச்சாலை திட்டத்தை மாற்றுப்பாதையில் செயல்படுத்த வேண்டும்' என்று தெரிவித்தார்.

ஸ்டாலின்

இதற்குப் பதிலளித்த முதல்வர், `சிலர் வேண்டுமென்றே சேலம் டு சென்னை பசுமை வழிச்சாலையை எதிர்த்து வருகின்றனர். தமிழகத்தில் கருத்து சொல்ல அனைவருக்கும் முழு அனுமதி வழங்கப்பட்டுள்ளது. நாட்டிலே அதிக போராட்டங்கள் நடப்பது தமிழகத்தில்தான். அதற்கான பாதுகாப்பை தமிழக அரசு கொடுத்துள்ளது. 8 வழிச்சாலை திட்டத்தால் விபத்துகள் குறையும்; எரிபொருள் செலவும் குறையும். எதிர்காலத்தில் பெருகும் வாகன பயன்பாட்டுக்கு தகுந்தாற்போல் சாலையை விரிவாக்கம் செய்வது அரசின் கடமை. இந்தத் திட்டத்தால் ஒரு விவசாயியின் நிலம் முழுமையாக எடுக்கப்படும் நிலை வந்தால் அவருக்கு பசுமை வீடு கட்டித்தரப்படும்' என அவர் கூறினார்.