வெளியிடப்பட்ட நேரம்: 05:30 (08/08/2018)

கடைசி தொடர்பு:19:44 (08/08/2018)

Live update: மெரினாவில் விதைக்கப்பட்டார் கலைஞர்! #Karunanidhi

மெரினாவில் விதைக்கப்பட்டார் கலைஞர்!

குடும்ப உறுப்பினர்கள் மரியாதைக்கு பின் ராணுவ வீரர்களின் 21 குண்டுகள் முழங்க அரசு மரியாதையுடன் அண்ணா சமாதி அருகே கருணாநிதி புதைக்கப்பட்டார். பிறகு அனைவரும் மணல் தூவி உடலை நல்லடக்கம் செய்தனர்.

அனைவரும் இறுதி அஞ்சலி செலுத்தியபின் சந்தனப்பேழையில் கருணாநிதி உடல் வைக்கப்பட்டது. ஸ்டாலின், தமிழரசு, அழகிரி மூவரும் சேர்ந்து கருணாநிதியின் உடலை சந்தனப்பேழையில் வைத்தனர். அப்போது ஸ்டாலின், அழகிரி ஆகியோர் கதறி அழுதனர். பின்னர் கருணாநிதி உடல் வைக்கப்பட்டுள்ள சந்தனப்பேழையில் குடும்ப உறுப்பினர்கள் உப்பு வைத்தனர். அதன்பிறகு சந்தனப்பேழை மூடப்பட்டது. இதனையடுத்து ராணுவ வீரர்களின் 26 குண்டுகள் முழங்க கருணாநிதி புதைக்கப்பட்டார். 

பேராசிரியர் க.அன்பழகன் அஞ்சலி

குடும்ப உறுப்பினர்கள் அஞ்சலிக்கு பின் கருணாநிதியின் நண்பரும், திமுக பொதுச்செயலாளருமான பேராசிரியர் க.அன்பழகன் அவரது உடலுக்கு இறுதி அஞ்சலி செலுத்தினார். 

குடும்ப உறுப்பினர்கள் இறுதி அஞ்சலி!

மூவர்ணக் கொடி முக ஸ்டாலினிடம் ஒப்படைக்கப்பட்ட பின்னர் அழகிரி மலர்தூவி இறுதி அஞ்சலி செலுத்தினார். இதேபோல் ராஜாத்தியம்மாள் கண்ணீர் மல்க அஞ்சலி செலுத்தினார். அவரைத் தொடர்ந்து செல்வி, கனிமொழி, முக தமிழரசு, துர்கா ஸ்டாலின், உதயநிதி, அருள்நிதி உள்ளிட்ட குடும்ப உறுப்பினர்களும் மலர்தூவி இறுதி அஞ்சலி செலுத்தினர்

மூவர்ணக் கொடி ஸ்டாலினிடம் ஒப்படைக்கப்பட்டது

தலைவர்கள் அஞ்சலிக்கு பின் முப்படை வீரர்கள் இசை வாத்தியங்களை இசைத்து கருணாநிதிக்கு இறுதி மரியாதை செலுத்தினர். இதன்பின் ஸ்டாலின் இறுதி அஞ்சலி செலுத்தினார். அப்போது கருணாநிதியின் உடல் மீது போர்த்தப்பட்டிருந்த மூவர்ணக் கொடி முக ஸ்டாலினிடம் ஒப்படைக்கப்பட்டது.

தலைவர்கள் இறுதி அஞ்சலி!

அண்ணா நினைவிடம் வந்த கருணாநிதி உடலுக்கு காங்கிரஸ் தலைவர் ராகுல்காந்தி, ஆளுநர் பன்வாரிலால் குலாம் நபி ஆசாத், சந்திரபாபு நாயுடு, நாராயணசாமி, பொன்.ராதாகிருஷ்ணன், தேவ கௌடா உள்ளிட்டோர் இறுதி அஞ்சலி செலுத்தினர்.  

அண்ணா நினைவிடம் வந்த கருணாநிதியின் உடல் முப்படைகளின் பேண்டு வாத்தியம் முழங்க நல்லடக்கம் செய்யும் இடத்துக்கு கொண்டுவரப்பட்டது. இதனையடுத்து இறுதிச் சடங்கு செய்யும் பணிகள் தொடங்கும்.

அண்ணா நினைவிடம் வந்தார் முக ஸ்டாலின்

இறுதிச் சடங்கு நடைபெறும் அண்ணா நினைவிடத்துக்கு முக ஸ்டாலின் வந்தார். அவருக்கு முன்னாள் பிரதமர் தேவ கௌடா, புதுச்சேரி முதல்வர் நாராயணசாமி உள்ளிட்டோர் ஆறுதல் தெரிவித்தனர். முன்னாஹ்தாக ஸ்டாலினுடன் முன்னாள் மத்திய அமைச்சர் தயாநிதி மாறன் உள்ளிட்ட நிர்வாகிகளும் வந்தனர். 

காமராஜர் சாலை வந்தடைந்தது

கருணாநிதியின்  இறுதி ஊர்வலம் காமராஜர் சாலை வந்தடைந்தது. மெரினா முழுவதும் உள்ள மக்கள் கூட்டத்தில் கருணாநிதியின் உடல் செல்கிறது. 
 

மெரினா வந்தடைந்தார் கனிமொழி 

தந்தைக்கு இறுதிச் சடங்கு செய்வதற்காக கனிமொழி அண்ணா நினைவிடம் வந்தார். உதயநிதி, அருள்நிதி போன்ற குடும்ப உறுப்பினர்களும் அண்ணா நினைவிடம் வந்தனர்.

தயார் நிலையில் முப்படைகள் 

கருணாநிதியின் இறுதி ஊர்வலம் கலைவாணர் அரங்கத்தை தாண்டி மெரினாவை நெருங்கி சென்றுகொண்டிருக்கிறது. அவருக்கு இறுதி அஞ்சலி செலுத்துவதற்காக அரசியல் தலைவர்கள், குடும்பத்தினர் மெரினாவில் குவிந்துள்ளனர். இதற்கிடையே, அவருக்கு ராணுவ மரியாதை செய்வதற்காக முப்படை வீரர்கள் தயார் நிலையில் உள்ளனர்.

சந்திரபாபு நாயுடு, பன்வாரிலால் புரோகித் வருகை 

கருணாநிதியின் இறுதி சடங்கில் கலந்துகொள்ள ஆந்திர முதல்வர் சந்திரபாபு நாயுடு மெரினாவில் உள்ள அண்ணா சமாதி வந்துள்ளார். இதேபோல் தமிழக ஆளுநர் பன்வாரிலால் புரோகித் உள்ளிட்டோரும் அண்ணா சமாதி வந்துள்ளனர். 

அண்ணா சிலையை கடந்தது

அண்ணா சிலையை கடந்தது வாலாஜா சாலையில் கருணாநிதியின் இறுதி ஊர்வலம் செல்கிறது. தொண்டர்கள் கூட்டத்துக்கு இடையே மெதுவாக ஊர்ந்தபடி கருணாநிதியின் இறுதி ஊர்வலம் செல்கிறது. இறுதி ஊர்வலத்தைக் காண பொதுமக்கள் கூட்டம் அதிகரித்த வண்ணம் உள்ளன.

மெரினா வந்தடைந்தது சந்தனப்பேழை

கருணாநிதி உடல் நல்லடக்கம் செய்யப்படவுள்ள சந்தனப்பேழை மெரினா வந்தடைந்தது. ``ஓய்வெடுக்காமல் உழைத்தவன் இதோ ஓய்வு கொண்டிருக்கிறான்" எனப் பொறிக்கப்பட்டுள்ள சந்தனப்பேழையில் வைத்து கருணாநிதியின் உடல் நல்லடக்கம் செய்யப்படவுள்ளது.

 

இறுதி சடங்கில் கலந்துகொள்ளும் ராகுல்காந்தி

கருணாநிதியின் இறுதிச் சடங்கில் கலந்துகொள்வதற்காக மெரினா கடற்கரை வந்துள்ளார் காங்கிரஸ் தலைவர் ராகுல்காந்தி. அவருடன் காங்கிரஸ் மூத்த தலைவர் குலாம் நபி ஆசாத், வீரப்ப மொய்லி, திருநாவுக்கரசர் மற்றும் குஷ்பு, தங்கபாலு ஆகியோர் வந்துள்ளனர்.

பெரியார் சிலையை கடந்தது இறுதி ஊர்வலம்

பெரியார் சிலையை கடந்து அவரது அன்பு தொண்டர் கருணாநிதியின் இறுதி ஊர்வலம் செல்கிறது. தொண்டர்களின் `எழுந்து வா தலைவா' கோஷத்துக்கு இடையே மெரினாவை நோக்கி கருணாநிதியின் இறுதி ஊர்வலம் நடைபெறுகிறது. இருமருங்கிலும் நின்று தொண்டர்கள் பூக்களை தூவி மரியாதையை செலுத்தி வருகின்றனர்.

நடந்து செல்லும் ஸ்டாலின்

கருணாநிதியின் உடல் வைக்கப்பட்டுள்ள ராணுவ வாகனத்துக்கு பின்பு ஸ்டாலின், தயாநிதி மாறன் முத்தரசன் உள்ளிட்டோர் நடந்து செல்கின்றனர்.

மெரினா வந்தார்கள் குடும்ப உறுப்பினர்கள் 

கருணாநிதியின் இறுதி ஊர்வலம் சிவானந்த சாலை கடந்துள்ளது. சாலையின் இருமருங்கிலும் தொண்டர்கள் முழக்கங்களை எழுப்பி வருகின்றனர். இதற்கிடையே, ராஜாத்தியம்மாள், அழகிரி, அவரது மனைவி, க.அன்பழகன் உள்ளிட்ட குடும்பத்தினர், கட்சி நிர்வாகிகள் மெரினா வந்துள்ளனர். இதேபோல், பொன்.ராதாகிருஷ்னன், அமைச்சர் ஜெயக்குமார், வைகோ உள்ளிட்டோர் மெரினா வந்துள்ளனர். அங்கு அவர்களுக்கென அமைக்கப்பட்டுள்ள தனி இடத்தில் அனைவரும் அமர்ந்துள்ளனர்.

அண்ணா சாலை நோக்கி கருணாநிதியின் இறுதி ஊர்வலம்

தேசியக்கொடி போர்த்தப்பட்டு ராணுவ மரியாதையுடன் கருணாநிதியின் இறுதி ஊர்வலம் நடந்து வருகிறது. சிவானந்தா சாலையை கடந்து அண்ணா சாலை நோக்கி கருணாநிதியின் இறுதி ஊர்வலம் நடைபெற்று வருகிறது. 

அண்ணா சமாதிக்கு வைகோ, திருமாவளவன் வருகை

இறுதி ஊர்வலம் தொடங்கிய நிலையில் மதிமுக பொதுச்செயலாளர் வைகோ, விசிக தலைவர் திருமாவளவன், சன் குழும நிறுவனர் கலாநிதி மாறன் உள்ளிட்டோர் அண்ணா சமாதிக்கு வந்துள்ளனர். 
 

கருணாநிதியின் இறுதி ஊர்வலம் தொடங்கியது

குடும்ப உறுப்பினர்கள் இறுதி மரியாதை செலுத்திய பின் திமுக தலைவர் கருணாநிதியின் இறுதி ஊர்வலம் தொடங்கியது. முப்படை வீரர்கள் அணிவகுக்க ராணுவ வாகனத்தில் கருணாநிதியின் உடல் வைக்கப்பட்டுள்ளது. பெரியாரையும், அண்ணாவையும் கடந்து காயிதே மில்லத் சாலையில் பயணித்து, காமராஜர் சாலையை அடைந்து எம்ஜிஆர் சதுக்கத்தை கடந்து அண்ணனின் அருகில் உறங்கச்செல்கிறார் கருணாநிதி.
 

கருணாநிதியின் உடல் ராணுவ வாகனத்தில்....

குடும்பத்தினர் இறுதி மரியாதைக்கு பின் கருணாநிதியின் உடலை அலங்கரிக்கப்பட்ட ராணுவ வாகனத்தில் முப்படை வீரர்கள் எடுத்துச் சென்றனர். கருணாநிதியின் உடல் ராஜாஜி ஹாலில் இருந்து எடுக்கப்பட்டவுடன் `தலைவா, தலைவா' என தொண்டர்கள் முழக்கம் எழுப்பி வருகின்றனர். இதையடுத்து இன்னும் சிறிது நேரத்தில் இறுதி ஊர்வலம் தொடங்கவுள்ளது.
 

சரத்பவார், கபில்சிபில் இறுதி மரியாதை 

தேசியவாத காங்கிரஸ் தலைவர் சரத்பவார், அக்கட்சியின் மூத்த தலைவர் பிரபுல் படேல் மற்றும் முன்னாள் அமைச்சர் கபில்சிபில் உள்ளிட்டோர் ராஜாஜி ஹாலில் வைக்கப்பட்டுள்ள கருணாநிதி உடலுக்கு இறுதி மரியாதை செலுத்தினார். இன்னும் சில மணித்துளிகளில் கருணாநிதியின் இறுதி ஊர்வலம் புறப்படவுள்ளது. 

குடும்பத்தினர் கதறல் 

கருணாநிதியின் இறுதி ஊர்வலம் இன்னும் சில நொடிகளில் தொடங்கவுள்ள நிலையில், பொதுமக்கள் அஞ்சலி செலுத்துவது நிறுத்தி வைக்கப்பட்டுள்ளது. தற்போது குடும்பத்தினர் இறுதி மரியாதை செலுத்தி வருகின்றனர். மு.க.தமிழரசு, செல்வி, கனிமொழி என குடும்ப உறுப்பினர்கள் கருணாநிதி உடல்முன் கண்ணீர் மல்க கதறி அழுதனர். 

இறுதி ஊர்வலத்திற்கான ஏற்பாடுகள் தீவிரம்

தி.மு.க தலைவர் கருணாநிதி இறுதி ஊர்வலத்திற்கான ஏற்பாடுகள் தீவிரமாக மேற்கொள்ளப்பட்டு வருகிறது. ராணுவ வாகனத்தில் அவரது உடலை வைப்பதற்காக மலர் அலங்காரங்கள் உள்ளிட்டவைகள் செய்யப்பட்டு வருகின்றன. மேலும் முப்படை வீரர்கள் அவரது உடலை எடுத்துச் செல்ல வந்துள்ளனர். அனைவரும் இன்னும் சிறிது நேரத்தில் அவரது இறுதி ஊர்வலம் தொடங்கவுள்ளது.

முழுவீச்சில் கட்டட பணிகள்

தி.மு.க தலைவர் கருணாநிதி உடல் நல்லடக்கம் செய்வதற்காக அண்ணா சமாதியில் கட்டடம் கட்டும் பணிகள் முழுவீச்சில் நடந்து வருகிறது. சமாதி கட்டடம் கட்டும் பணிகளை தி.மு.க முதன்மை செயலாளர் துரைமுருகன் பார்வையிடுகிறார்.

ராணுவ வாகனம் வருகை 

தி.மு.க தலைவர் கருணாநிதி உடல் எடுத்து செல்லப்படவுள்ள ராணுவ வாகனம் ராஜாஜி ஹாலுக்கு வந்துள்ளது.  மலர் அலங்காரத்துடன் வாகனம் அலங்கரிக்கப்பட்டுள்ளது.

டெல்லி சட்டப்பேரவையில் மவுன அஞ்சலி 

தி.மு.க தலைவர் கருணாநிதி மறைவையொட்டி டெல்லி சட்டப்பேரவையில் அவருக்கு மவுன அஞ்சலி செலுத்தப்பட்டது. முன்னதாக அவரது மறைவுக்கு இரங்கல் தெரிவிக்கப்பட்டது. இதேபோல் டெல்லி முதல்வர் கெஜ்ரிவால் நேரில் வந்து கருணாநிதி உடலுக்கு அஞ்சலி செலுத்தினார். 

கேரள முதல்வர், ஆளுநர் அஞ்சலி 

தி.மு.க தலைவர் கருணாநிதி உடலுக்கு கேரள முதல்வர் பினராயி விஜயன் மற்றும் ஆளுநர் சதாசிவம் உள்ளிட்டோர் அஞ்சலி செலுத்தினர். இதேபோல் எதிர்க்கட்சித் தலைவர் ரமேஷ் சென்னிதாலா அஞ்சலி செலுத்தினார்.

அஞ்சலிக்குப் பின் பேசிய கேரள ஆளுநர் சதாசிவம், ``விவசாயிகளுக்காக பல்வேறு நலத்திட்டங்களை கொண்டுவந்தவர். தாழ்த்தப்பட்ட மக்களுக்காக நலத்திட்டங்களை செயல்படுத்தி அவர்களை முன்னேற்றமடையச் செய்தவர் கருணாநிதி. அவரின் இழப்பு தமிழகத்த்திற்கு மட்டுமில்லாமல் நாட்டிற்கே பேரிழப்பு" என்றார்.

கருணாநிதி உடலுக்கு கெஜ்ரிவால் அஞ்சலி

தி.மு.க தலைவர் கருணாநிதிக்கு டெல்லி முதல்வர் கெஜ்ரிவால் மற்றும் காங்கிரஸ் மூத்த தலைவர் குலாம் நபி ஆசாத் அஞ்சலி செலுத்தினர். அஞ்சலி செலுத்தியப் பின் பேசிய குலாம் நபி ஆசாத், ``நாட்டின் சிறந்த தலைவர், எழுத்தாளர் என பன்முகம் கொண்டவர் கருணாநிதி. நாடு முழுவதும் அறியப்பட்ட அவர் தற்போது நம்முடன் இல்லை. அவரின் மறைவு நாட்டுக்கும் திமுகவுக்கும் மிகப்பெரிய இழப்பு'' என்றார்.

ஒத்திகையில் ராணுவ வீரர்கள்

கருணாநிதிக்கு இறுதிமரியாதை செலுத்துவதற்கான ஒத்திகையில் ராணுவ வீரர்கள் ஈடுபட்டுள்ளனர். மெரினாவில் இதற்கான ஒத்திகையில் ராணுவ வீரர்கள் ஈடுபட்டுள்ளனர். கருணாநிதி உடல் எடுத்து செல்லப்படவுள்ள ராணுவ வாகனம் தயார் நிலையில் உள்ளது. 

டிராபிக் ராமசாமி உச்ச நீதிமன்றத்தில் திடீர் வழக்கு!

சென்னை உயர் நீதிமன்ற உத்தரவையடுத்து மெரினாவில் கருணாநிதியின் உடல் அடக்கம் செய்யப்படுகிறது. இந்த நிலையில், கருணாநிதியின் இறுதிச் சடங்கை நிறுத்திவைக்க உத்தரவிடக்கோரி டிராபிக் ராமசாமி, உச்ச நீதிமன்றத்தில் திடீரென மேல்முறையீடு செய்துள்ளார். இந்த மனுவை விசாரித்த உச்ச நீதிமன்றம், கருணாநிதியின் இறுதிச் சடங்கை நிறுத்த முடியாது என்றும் மெரினாவில் அடக்கம் செய்ய பிறப்பிக்கப்பட்ட உத்தரவை ரத்து செய்ய முடியாது என்றும் உத்தரவிட்டுள்ளதோடு, தலைமை நீதிபதி அமர்வில் முறையிட கேட்டுக்கொண்டுள்ளது.

ராகுல் காந்தி, அகிலேஷ் அஞ்சலி

காங்கிரஸ் கட்சித் தலைவர் ராகுல் காந்தி, உத்தரப்பிதேச முன்னாள் முதல்வர் அகிலேஷ் யாதவ், தெலுங்கானா முதல்வர் சந்திரசேகர ராவ், டெல்லி முதல்வர் அரவிந்த் ஜெக்ரிவால், பீகார் முன்னாள் முதல்வர் லாலு பிரசாத்தின் மகன் தேஜஸ்வி ஆகியோர் மலர்வளையம் வைத்து கருணாநிதி உடலுக்கு அஞ்சலி செலுத்தினர்.

ராகுல் காந்தி- அகிலேஷ்

கூட்ட நெரிசலில் இருவர் பலி?

தி.மு.க தலைவர் கருணாநிதிக்கு அஞ்சலி செலுத்துவதற்காக ராஜாஜி ஹாலில் பொதுமக்கள் முண்டியடித்ததால் கூட்ட நெரிசல் ஏற்பட்டது. கூட்ட நெரிசலில் ஒரு பெண் உட்பட இருவர் பலியாகியுள்ளார். மேலும் 25க்கும் மேற்பட்டோர் காயமடைந்துள்ளனர்.

குமாரசாமி அஞ்சலி

தி.மு.க தலைவர் கருணாநிதிக்கு கர்நாடக முதல்வர் குமாரசாமி, முன்னாள் முதல்வர் சித்தராமையா மற்றும் உத்தரபிரதேச முன்னாள் முதல்வர் அகிலேஷ் யாதவ் உள்ளிட்டோர் அஞ்சலி செலுத்தினர்.

தொண்டர்கள் மத்தியில் பேசிய மு.க ஸ்டாலின்

ராஜாஜி ஹாலில் பொதுமக்கள் கூட்டம் அதிகரித்துள்ள நிலையில், தொண்டர்கள் முன் ஸ்டாலின் பேசினார். அப்போது, ``இடஒதுக்கீட்டிற்காக போராடிய கருணாநிதி இறந்தபிறகும் இடஒதுக்கீட்டில் வெற்றிபெற்றுள்ளார். முதல்வரை நேரில் சந்தித்து இடம் ஒதுக்க கோரியும் அவர் செவிசாய்க்கவில்லை. அரசு மறுத்தபோதும் நீதிமன்றம் சென்று அதனை தவிடுபொடியாக்கி இருக்கிறோம். கருணாநிதியின் உணர்வை நாம் வென்றெடுத்திருக்கிறோம். தொண்டர்கள் கலைந்து சென்றால் தான் திட்டமிட்டபடி கருணாநிதியின் இறுதி ஊர்வலம் நடக்கும். உங்கள் சகோதரனாக இதனை கேட்கிறேன். தயவு செய்து கலைந்துசெல்லுங்கள். அஞ்சலி செலுத்துவற்காக சுவர் ஏறி வருவதை தொண்டர்கள் தவிர்க்க வேண்டும்" என தொண்டர்களுக்கு வேண்டுகோள் விடுத்துள்ளார். 

தயார்நிலையில் சந்தனப்பேழை

தி.மு.க தலைவர் கருணாநிதி நல்லடக்கம் செய்யப்படவுள்ள சந்தனப்பேழை தயார்நிலையில் உள்ளது. அதில், ``ஓய்வெடுக்காமல் உழைத்தவன் இதோ ஓய்வு கொண்டிருக்கிறான்" என்ற வாசகம் பொறிக்கப்பட்டுள்ளது.

மாலை 4 மணிக்கு கருணாநிதியின் இறுதிஊர்வலம்

திமுக தலைவர் கருணாநிதியின் இறுதி ஊர்வலம் மாலை 4 மணிக்கு தொடங்கும் என தி.மு.க தலைமைக்கழகம் அறிவித்துள்ளது. ராஜாஜி ஹாலில் இருந்து சிவானந்தா சாலை, வாலாஜா சாலை வழியாக மெரினாவுக்கு இறுதி ஊர்வலம் நடைபெறும் என தெரிவிக்கப்பட்டுள்ளது. 

சிறந்த ராஜதந்திரியை இனி நாடு பார்க்க முடியாது

தி.மு.க தலைவர் கருணாநிதியின் மறைவுக்கு சோனியா காந்தி இரங்கல் கடிதம் எழுதியுள்ளார். அதில், கருணாநிதி இந்திய அளவிலும், தமிழக அளவிலும் மிகப்பெரிய அரசியல் தலைவர். அவர் போன்ற சிறந்த ராஜதந்திரியை நாடு இனி பார்க்க முடியாது. தந்தையைப் போன்ற கருணாநிதி இல்லாதது தனிப்பட்ட முறையில் எனக்கு பேரிழப்பு" எனக் கூறியுள்ளார்.

சந்திரபாபு நாயுடு மவுன அஞ்சலி!

அமராவதியில் நடந்த அரசு அதிகாரிகள் கூட்டத்தில் தி.மு.க தலைவர் கருணாநிதிக்கு மவுன அஞ்சலி செலுத்தப்பட்டது. இதில் ஆந்திர முதல்வர் சந்திரபாபு நாயுடு கலந்துகொண்டு அஞ்சலி செலுத்தினார்.

கோடானு கோடி மக்களின் இதயத்திலும் வாழ்வார் - மோடி

கருணாநிதிக்கு அஞ்சலி செலுத்தியது குறித்து கூறியுள்ள மோடி, ``தன்னிகரற்ற தலைவரும், பழுத்த நிர்வாகியும், மக்கள் நலனுக்காகவும் சமூக நீதிக்காகவும் தன் வாழ்நாளை அர்ப்பணித்த தலைவருக்கு சென்னையில் அஞ்சலி செலுத்தினேன். கலைஞர் கருணாநிதியால் தங்கள் வாழ்க்கையில் மாற்றம் கண்ட கோடானு கோடி மக்களின் எண்ணங்களிலும் இதயத்திலும் அவர் வாழ்வார்" என்றார்.

தமிழ்நாடு முதல்வரை தொடர்பு கொண்டேன்! - மம்தா

கருணாநிதிக்கு மெரினாவில் இடம் ஒதுக்கவில்லை என நேற்று வெளியான தகவல் வருத்தமடைந்தேன். இதற்காக தமிழ்நாடு முதல்வரை தொடர்பு கொண்டேன். ஆனால் முடியவில்லை. இதுதொடர்பாக பிரதமரிடம் பேசினேன். தற்போது வந்துள்ள தீர்ப்பு மகிழ்ச்சி அளிக்கிறது. 

கருணாநிதி உடலுக்கு பொதுமக்கள் அஞ்சலி

தலைவர்கள் அஞ்சலி செலுத்தியதைத் தொடர்ந்து தற்போது பொதுமக்கள் அஞ்சலி செலுத்த அனுமதிக்கப்பட்டு வருகின்றனர். இதற்கிடையே, திருவாரூரில் கருணாநிதி இல்லம் அருகே பெண்கள் ஒப்பாரி வைத்து அஞ்சலி செலுத்தி வருகின்றனர்.

பணிகள் தொடக்கம்

அண்ணா நினைவிடத்தில் கருணாநிதி உடலை நல்லடக்கம் செய்வதற்கான பணிகள் தொடங்கியுள்ளது. இதற்காக ஜேசிபி இயந்திரங்கள் உள்ளிட்டவைகள் வரவழைக்கப்பட்டுள்ளன. இதேபோல் துரைமுருகன் உள்ளிட்ட நிர்வாகிகள் அங்கு சென்று பணிகளை மேற்பார்வையிட்டு வருகின்றனர்.

அண்ணா சமாதியில் துரைமுருகன்  ஆய்வு

அண்ணா சமாதியில் தி.மு.க முதன்மைச் செயலாளர் துரைமுருகன் பொதுப்பணித்துறை அதிகாரிகளுடன் சென்று ஆய்வு மேற்கொண்டு வருகிறார். சென்னை உயர் நீதிமன்ற தீர்ப்பை அடுத்து நல்லடக்கம் செய்யப்படவுள்ள இடத்தை தேர்ந்தெடுப்பதற்காக துரைமுருகன் ஆய்வு செய்து வருகிறார். அண்ணா நினைவிடத்தில் வலதுபுறத்தில் கருணாநிதி உடல் அடக்கம் செய்ய இடம் தேர்வு செய்யப்பட்டு வருகிறது.

பிரதமர் மோடி அஞ்சலி

தி.மு.க தலைவர் கருணாநிதிக்கு பிரதமர் மோடி மலர்வளையம் வைத்து அஞ்சலி செலுத்தினார். பின்னர் மோடி ஸ்டாலின், கனிமொழி உள்ளிட்டோருக்கு ஆறுதல் தெரிவித்தார். அவருடன் மத்திய அமைச்சர்கள் நிர்மலா சீதாராமன், பொன்.ராதாகிருஷ்ணன் மற்றும் தமிழிசை சவுந்தரராஜன் உள்ளிட்டோரும் அஞ்சலி செலுத்தினர். அவர்களுடன் தமிழக அமைச்சர் ஜெயக்குமாரும் அஞ்சலி செலுத்தினார்.

 

இதேபோல் ராஜாத்தியம்மாள், மு.க தமிழரசு உள்ளிட்ட குடும்ப உறுப்பினர்களுக்கும் பிரதமர் மோடி ஆறுதல் கூறினார்.

நாடாளுமன்றத்தில் இரங்கல்

தி.மு.க தலைவர் மறைவை அடுத்து நாடாளுமன்ற இரு அவைகளிலும் அவருக்கு இரங்கல் தெரிவிக்கப்பட்டது. மக்களவையில் சபாநாயகர் சுமித்ரா மகாஜனும், மாநிலங்களைவையில் வெங்கையா நாயுடுவும் இரங்கல் தீர்மானத்தை வாசித்தனர். அப்போது மறைந்த கருணாநிதி மிகச் சிறந்த தலைவர் என வெங்கைய நாயுடு புகழாரம் சூட்டினார். பின்னர் மவுன அஞ்சலி செலுத்தப்பட்டு நாடாளுமன்ற இரு அவைகளும் ஒத்திவைக்கப்பட்டது. 

தொண்டர்கள் முழக்கம்!

தி.மு.க தொடர்ந்த வழக்கில் அண்ணா சமாதியில் தி.மு.க தலைவர் கருணாநிதிக்கு இடம் ஒதுக்க வேண்டும் என தமிழக அரசுக்கு உயர் நீதிமன்றம் உத்தரவு பிறப்பித்தைத் தொடர்ந்து ராஜாஜி மஹாலில் உள்ள தொண்டர்கள் உற்சாகமாக முழக்கம் எழுப்பி வருகின்றனர். வாழ்க வாழ்க வாழ்கவே உள்ளிட்ட கோஷங்களை எழுப்பி தங்கள் தலைவருக்கு கிடைத்துள்ள தீர்ப்பை வரவேற்றுள்ளனர்.

இறந்தபிறகும் கருணாநிதிக்கு வெற்றி

``உயிரோடு இருந்தபோது மட்டுமல்ல; இறந்தபிறகும் கருணாநிதிக்கு வெற்றி கிடைத்துள்ளது'' என ராஜாஜி மஹாலில் பேசிய தி.மு.க முதன்மைச் செயலாளர் துரைமுருகன் தெரிவித்தார்.

கருணாநிதிக்கு மெரினாவில் இடம் ஒதுக்க வேண்டும்

கருணாநிதி உடலை நல்லடக்கம் செய்ய மெரினாவில் இடம் ஒதுக்க வேண்டும் என தமிழக அரசு சென்னை உயர் நீதிமன்றம் உத்தரவு பிறப்பித்துள்ளது. இருதரப்பு வாதங்களை கேட்ட நீதிபதிகள் மெரினாவில் இடம் ஒதுக்க கோரி உத்தரவிட்டார்.

கண்ணீர்விட்டு கதறிய ஸ்டாலின்

கண்ணீர்விட்ட ஸ்டாலின், கனிமொழி

நீதிபதிகள் உத்தரவை தெரிந்தவுடன் முக ஸ்டாலின், கனிமொழி, உள்ளிட்ட குடும்பத்தினர் கண்ணீர் விட்டு அழுதனர். அதேபோல் மக்களைப் பார்த்து கைகூப்பி கும்பிட்டார் மு.க.ஸ்டாலின்.

வைகோ, திருநாவுக்கரசர் அஞ்சலி 

ம.தி.மு.க பொதுச்செயலாளர் வைகோ தி.மு.க தலைவர் கருணாநிதிக்கு அஞ்சலி செலுத்தினார். அதேபோல் தமிழ்நாடு காங்கிரஸ் கமிட்டியின் தலைவர் திருநாவுக்கரசரும் அஞ்சலி செலுத்தினார்.

பிரதமர் மோடி சென்னை வந்தார் - இன்னும் சற்று நேரத்தில் கருணாநிதிக்கு அஞ்சலி !

திமுக தலைவர் கருணாநிதிக்கு அஞ்சலி செலுத்த பிரதமர் மோடி சென்னை வந்துள்ளார். அவரை ஆளுநர் பன்வாரிலால் புரோகித், முதல்வர், துணை முதல்வர் வரவேற்றனர். அவர் இன்னும் சற்று நேரத்தில் கருணாநிதிக்கு அஞ்சலி செலுத்தவுள்ளார்.

photo credit:@ani

கருணாநிதிக்கு விஷால் விஜய் சேதுபதி இறுதி மரியாதை

நடிகர்கள் வடிவேலு, விஜய் சேதுபதி ஆகியோர் கருணாநிதி உடலுக்கு மலர்வளையம் வைத்து அஞ்சலி செலுத்தினர். நடிகர் சங்க பொதுச் செயலாளர் விஷால் திமுக தலைவர் கருணாநிதிக்கு இறுதி மரியாதை செலுத்தினார். 

கமல்ஹாசன் அஞ்சலி 

தி.மு.க தலைவர் கருணாநிதிக்கு மக்கள் நீதி மய்யம் கட்சித் தலைவர் கமல்ஹாசன், ஸ்ரீபிரியா மற்றும் கட்சி நிர்வாகிகளுடன் வந்து அஞ்சலி செலுத்தினார். 

ராமதாஸ் அஞ்சலி 

தி.மு.க தலைவர் கருணாநிதிக்கு பா.ம.க நிறுவனர் ராமதாஸ் மற்றும் அவரின் மகன் அன்புமணி ராமதாஸ் ஆகியோர் குடும்பத்துடன் அஞ்சலி செலுத்தினர். அவர்களுடன் பா.ம.க முக்கிய நிர்வாகிகள் உடனிருந்தனர்.

பாமக நிறுவனர் ராமதாஸ், ``எனது உற்ற நண்பர் கருணாநிதி மறைந்தது நம்ப முடியவில்லை. அவரின் மறைவு மிகுந்த வேதனை அளிக்கிறது. தமிழ் மக்களுக்கு அயராத பாடுபட்டவர் கருணாநிதி" என்றார்.

பாமக இளைஞரணி தலைவர் அன்புமணி, ``சமூக நீதிக்காக தொடர்ந்து பாடுபட்டவர் கருணாநிதி. தமிழகத்தில் 19 ஆண்டுகள் முதல்வராக இருந்தவர்." என்றார் .

திரையுலகினர் அஞ்சலி 

தி.மு.க தலைவர் கருணாநிதிக்கு நடிகர்கள் கவுண்டமணி, சத்யராஜ், சிபிராஜ், பாக்யராஜ், சாந்தனு, இசையமைப்பாளர் தீனா உள்ளிட்டோர் அஞ்சலி செலுத்தினர். சத்யராஜ், கவுண்டமணி உள்ளிட்டோர் அழுதுகொண்டே அஞ்சலி செலுத்தினர். 

நடிகர் சங்கத்தின் தலைவர் நாசர், ``ஒரு சகாப்தம் முடிவுற்றிருக்கிறது. அவர் எங்கள் சங்கத்தின் மூத்த தலைவர். அவர் செய்த நல்ல காரியங்களை தொடர்வதுதான் அவருக்கு நாங்கள் செய்கிற நல்ல மரியாதை.  நடிகர் சங்கம் அவர் மீது அதிக அன்பு கொண்டுள்ளது, அவரின் குடும்பத்தினருக்கு ஆழ்ந்த இரங்கல்களைத் தெரிவித்துக் கொள்கிறோம்” என்றார். 

திரண்டு வந்த திரையுலகம்!

ராஜாஜி அரங்கத்தில் வைக்கப்பட்டுள்ள கருணாநிதியின் உடலுக்கு நடிகர் சங்கத் தலைவர் நாசர் தலைமையில் திரையுலகினர் திரண்டு வந்து அஞ்சலி செலுத்தினர். 

ராஜாஜி அரங்கத்தில் வைக்கப்பட்டுள்ள கருணாநிதியின் உடலுக்கு ஜெ. தீபா மற்றும் அவரது கணவர் மாதவன் ஆகியோர் அஞ்சலி செலுத்தினர். 

காங்கிரஸ் கட்சியின் தலைவர் ஈ.வி.கே.எஸ் இளங்கோவன் ராஜாஜி அரங்கம் வந்து தி.மு.க தலைவர் கருணாநிதியின் உடலுக்கு அஞ்சலி செலுத்தினார். 

தொல். திருமாவளவன் அஞ்சலி!

ராஜாஜி அரங்கத்தில் வைக்கப்பட்டுள்ள கருணாநிதியின் உடலுக்கு விடுதலைச் சிறுத்தை கட்சிகளின் தலைவர் தொல். திருமாவளவன் அஞ்சலி செலுத்தினார். தி.மு.க செயல் தலைவர் ஸ்டாலின் மற்றும் கருணாநிதியின் குடும்பத்தாருக்கு ஆறுதல் தெரிவித்தார். 

கவிஞர் வைரமுத்து கண்ணீர் பேட்டி!

செய்தியாளர்களிடம் பேசிய கவிஞர் வைரமுத்து, “எங்கள் கவியரங்க தலைவர் மறந்து போனான். வயது முதிர்வு தானே. 95 வயது தானே, இது இயற்கை தானே என சிலர் கருதலாம். பெரியார் மறைந்த போது கருணாநிதி ஒரு இரங்கல் கடிதம் எழுதினார். தாஜ்மஹால் வயதானதென்று, பூமிக்குள் மறைந்து போனால் பொறுத்துக் கொள்வோமா? அப்படி தான் பெரியார் என்றார். அதுபோது தான் கருணாநிதி மறைந்ததை ஏற்றுக்கொள்ள முடியவில்லை. கருணாநிதியின் வரலாற்றை இளைய சமூகம் மனத்தில் வைத்துக்கொள்ள வேண்டும். பள்ளிப் படிப்பை தாண்டவில்லை அவர். ஆனால், பல பல்கலைக்கழகங்களை தொடங்கினார். அண்ணாவுக்கு மறுக்கப்பட்ட ஆயுள், பெரியார் மறுத்த ஆட்சி பொறுப்பு, இரண்டும் கிடைக்கப்பட்டவர் கருணாநிதி" என கண்ணீர் மல்க பேசினார்.

மெரினாவில் குவியும் தொண்டர்கள்!

திமுக தலைவர் கருணாநிதியின் உடல் ராஜாஜி அரங்கத்தில் வைக்கப்பட்டுள்ளது. அவரது உடலுக்கு அஞ்சலி செலுத்த திமுக தொண்டர்கள், பொதுமக்கள் என பலர் திரண்டு வந்த வண்ணம் உள்ளனர். 
 

கண்ணீர் விட்டு அழுத வைரமுத்து!

ராஜாஜி அரங்கத்தில் வைக்கப்பட்டுள்ள கருணாநிதியின் உடலுக்குக் கவிஞர் வைரமுத்து நேரில் வந்து அஞ்சலி செலுத்தினார். அப்போது அவர் துக்கம் தாளாமல் அழுதார். 

நடிகர் அஜித் அஞ்சலி!

ராஜாஜி அரங்கத்தில் வைக்கப்பட்டுள்ள கருணாநிதியின் உடலுக்கு நடிகர் அஜித், தன் மனைவி ஷாலினியுடன் வந்து அஞ்சலி செலுத்தினார்.

ஆளுநர் பன்வாரிலால் புரோகித் அஞ்சலி! 

திமுக தலைவர் கருணாநிதி உடலுக்குத் தமிழக ஆளுநர் பன்வாரிலால் புரோகித் மலர் வளையம் வைத்து அஞ்சலி செலுத்தினார். அதன் பின்னர் திமுக செயல் தலைவர் ஸ்டாலின், கனிமொழி எம்.பி மற்றும் மற்ற குடும்பத்தினருக்கு ஆறுதல் தெரிவித்தார். 

நடிகர் சிவகுமார் அஞ்சலி செலுத்தினார்:

திமுக தலைவர் கருணாநிதி உடலுக்கு நடிகர் சிவகுமார் அஞ்சலி செலுத்தினார். அதன் பின்னர் அவர், “சமூகத்தில் என்ன மாற்றம் எல்லாம் செய்ய வேண்டும் எனப் பெரியார் ஆசைப்பட்டாரோ, அதை ஆட்சிக்கு வந்தது செய்தவர் கருணாநிதி. கலை, இலக்கியம், அரசியல் ஆகிய துறையில் அவர் தொட்டத்தை யாரும் தொட முடியாது” என்றார். 

அழுதுகொண்டே பேசும் கேப்டன் விஜயகாந்த்

``அமெரிக்காவில் இருந்தாலும் என் எண்ணம் எல்லாம் கலைஞரிடம் தான் இருக்கிறது” - கருணாநிதி மறைவுக்கு அழுதுகொண்டே பேசும் கேப்டன் விஜயகாந்த்

 

 

 

தமிழக முதல்வர் பழனிசாமி, “தமிழகத்தின் முன்னாள் முதல்வர், தி.மு.க-வின் மூத்த தலைவர், 50 ஆண்டு காலம் தி,மு,க-வின் தலைவராக இருந்தவர், தற்போது வயது முதிர்வின் காரணமாக இயற்கை எய்தியுள்ளார். அவரது இழப்பு, தமிழகத்துக்கு  பெரும் இழப்பு. அவரை இழந்து வாடும், அவரது குடும்பத்தினர், தி.மு.க செயல் தலைவர் ஸ்டாலினுக்கும், கட்சித் தொண்டர்களுக்கும் எனது ஆழ்ந்த இரங்கலைத் தெரிவித்துக்கொள்கிறேன்” என்றார். செய்தியாளர்கள் கருணாநிதிக்கு மெரினாவில் இடம் ஒதுக்காதது தொடர்பாக கேள்வி எழுப்பினர், ஆனால் அதற்குப் பதிலளிக்காமல் சென்றுவிட்டார்  முதல்வர் பழனிசாமி

அஞ்சலி செலுத்திய முதல்வர் துணை முதல்வர்:

ராஜாஜி அரங்கத்தில் வைக்கப்பட்டுள்ள கருணாநிதியின் உடலுக்குத் தமிழக முதல்வர் எடப்பாடி பழனிசாமி மற்றும் துணை முதல்வர்  ஓ பன்னீர்செல்வம் ஆகியோர் அஞ்சலி செலுத்தினர். அவர்களுடன் எம்.பி தம்பிதுரை மற்றும் அமைச்சர்களும் வந்து மலர் வளையம் வைத்து அஞ்சலி செலுத்தினர். 

 

 

நடிகர் சிவகார்த்திகேயன், தமிழகம் மட்டுமல்லாது இந்திய அளவில் ஒப்பற்ற தலைவர். அவர்களின் சாதனைகள் இனியும் யாரும் செய்ய முடியாது. அரசியல், கலை, இலக்கியம் எல்லம் இருக்கும் வரை அவர் புகழ் இருக்கும்” என்றார், 

ராஜாஜி அரங்கத்தில் வைக்கப்பட்டுள்ள கருணாநிதியின் உடலுக்கு நடிகர் சிவகார்த்திகேயன் தனது மனைவியுடன் வந்து அஞ்சலி செலுத்தினார். 

கருணாநிதிக்கு ரஜினிகாந்த் மலர் அஞ்சலி:

ராஜாஜி அரங்கத்தில் வைக்கப்பட்டுள்ள கருணாநிதியின் உடலுக்கு ரஜினிகாந்த் மலர்வளையம் வைத்து அஞ்சலி செலுத்தினார். அவருடன், அவர் மனைவி லதா , மகள் ஐஸ்வர்யா மற்றும் நடிகர் தனுஷ் ஆகியோரும் அஞ்சலி செலுத்தினர். அஞ்சலி செலுத்திய பின், மு.க.ஸ்டாலினுக்கு ஆறுதல் கூறினார்.

கருணாநிதிக்கு ராணுவ மரியாதை:

பொதுமக்கள் அஞ்சலிக்காக ராஜாஜி அரங்கத்தில் வைக்கப்பட்டுள்ள கருணாநிதியின் உடல்மீது முப்படை வீரர்கள் தேசியக்கொடியைப்  போர்த்தி சல்யூட் அடித்து ராணுவ மரியாதை செலுத்தினர்.

டி.டி.வி.தினகரன் வருகை:

கருணாநிதியின் உடலுக்கு அஞ்சலி செலுத்துவதற்கு, அம்மா மக்கள் முன்னேற்றக் கழகத்தின் துணைப் பொதுச்செயலாளர் டி.டி.வி.தினகரன் வருகைதந்தார். அவருடன் முன்னாள் அமைச்சர் செந்தில் பாலாஜி உள்ளிட்ட ஆதரவாளர்கள் உடனிருந்தனர்.

கருணாநிதியின் உடல் வைக்கப்பட்டுள்ள பேழையில் முரசொலி நாளிதழ் வைக்கப்பட்டுள்ளது. ராஜாஜி அரங்கத்தில் வைக்கப்பட்டுள்ள கருணாநிதியின் உடலுக்கு அருகில் மு.க.ஸ்டாலின், மு.க.அழகிரி, ஆ.ராசா, கனிமொழி, தயாநிதி அழகிரி உள்ளிட்டோர் உள்ளனர். 

தி.மு.க தலைவர் கருணாநிதியின் உடல், சி.ஐ.டி காலனியிலிருந்து ஆம்புலன்ஸ் மூலம் ராஜாஜி அரங்கத்துக்குக் கொண்டுசெல்லப்பட்டது. ஆம்புலன்ஸின் முன்னே,  'வேண்டும்... வேண்டும்... மெரினா வேண்டும்' என்று தொண்டர்கள் கோஷங்களை எழுப்பினர். 

தி.மு.க தலைவர் கருணாநிதியின் உடல்நிலையில் ஏற்பட்ட பாதிப்பின் காரணமாக, காவேரி மருத்துவமனையில் அனுமதிக்கப்பட்டிருந்த அவர், நேற்று மாலை 6.10 மணிக்கு காலமானர். அவரது உடல், 11 மணியிலிருந்து 1 மணிவரை கோபாலபுரம் இல்லத்தில் பொதுமக்கள் மற்றும் உறவினர்கள் அஞ்சலி செலுத்துவதற்காக வைக்கப்பட்டிருந்தது.

அதையடுத்து, 1 மணியிலிருந்து 5 மணிவரை சி.ஐ.டி காலனியிலுள்ள அவரது இல்லத்தில் அஞ்சலிக்காக வைக்கப்பட்டிருந்தது. அதன்பின்னர், அவரது உடல் சி.ஐ.டி காலனியிலிருந்து தொண்டர்கள் முழக்கத்துடன் ஆம்புலன்ஸ் மூலம் ராஜாஜி அரங்கத்துக்குக் கொண்டுசெல்லப்பட்டது. ஆம்புலன்ஸுக்கு முன்னே மு.க.ஸ்டாலின் காரில் சென்றார்.

ஆம்புலன்ஸுக்கு முன் சிறிது தூரத்தில் தி.மு.க தொண்டர்கள் 'வேண்டும்... வேண்டும்.. மெரினா வேண்டும்' என்று கோஷங்களை எழுப்பியபடியே தொண்டர்கள் நடந்து சென்றனர். 

ராஜாஜி அரங்கத்தில் ஆயிரக்கணக்கானோர் அஞ்சலி செலுத்துவதற்காக காத்திருக்கிறார்கள். தி.மு.க எம்.எல்.ஏ-க்கள் அனைவரும் கருணாநிதியின் உடல் வைக்கப்பட்டுள்ள இடத்துக்கு அருகில் அமர்ந்துள்ளனர். காவல் துறையினர், பொதுமக்களைக் கட்டுப்படுத்தும் பணியில் ஈடுபட்டுள்ளனர்.