வெளியிடப்பட்ட நேரம்: 12:40 (24/09/2018)

கடைசி தொடர்பு:12:08 (25/09/2018)

"அவர் பேசுனது தப்புதான்; ஆனா, அரசை விமர்சிக்க உரிமையில்லையா?!" கிரேஸ் கருணாஸ்

மிழக முதலமைச்சர் மற்றும் காவல் துறையினர் பற்றி சர்ச்சைக்குரிய வகையில் பேசியதாக, நடிகரும் சட்டமன்ற உறுப்பினருமான கருணாஸ் மீது வழக்குப்பதிவு செய்யப்பட்டிருந்தது. அதற்காக அவர் கைதுசெய்யப்பட்டு, தற்போது வேலூர் மத்திய சிறையில் வைக்கப்பட்டிருக்கிறார். கருணாஸின் சர்ச்சைக்குரிய பேச்சு மற்றும் கைது விவகாரம் தொடர்பாக, அவரின் மனைவி கிரேஸ் கருணாஸிடம் பேசினோம்.

"கடந்த வாரம் நடந்த ஒரு கண்டன ஆர்ப்பாட்டத்தில் அவர் பேசியதுதான் தற்போது பரபரப்பாக்கப்பட்டிருக்கு. அன்றைய கூட்டம் முடிந்து அவர் வீட்டுக்கு வந்ததுமே, 'இன்னைக்கு கொஞ்சம் உணர்ச்சிவசப்பட்டுப் பேசிட்டேன். நான் கொஞ்சம் கவனமா இருந்திருக்கணும்'னு வருத்தப்பட்டார். 'இனி அப்படிப் பேச வேண்டாம்; நீங்க பொறுப்பான இடத்தில் இருக்கீங்க'னு சொன்னேன். அடுத்த சில நாள்கள் கழிச்சு அவரின் பேச்சுகள் அரசியல் காரணங்களால் பெரிதுபடுத்தப்பட்டுச்சு.  என் கணவர் பேசிய முழு வீடியோவையும் பார்த்தேன் . ஆளும்கட்சியினர், அமைச்சர் உள்ளிட்டோரின் சப்போர்ட் கிடைக்காததால், என் கணவரால் சட்டமன்ற உறுப்பினராக நிறைவா பணிசெய்ய முடியலை. அவர் தொகுதி மக்களுக்கும் பெரிசா நல்லது பண்ண முடியலை. அந்த வருத்தத்தை முதல்வர் கவனத்துக்கும் கொண்டுபோனார். எதுவும் சரியாகலை. அதனாலும், தமிழக மக்கள் பல விஷயங்களுக்காகப் பாதிக்கப்படுவதை இந்த மாநில அரசு வேடிக்கை பார்த்துகிட்டு இருப்பதை எதிர்த்தும்தான் அவர் அப்படிப் பேசினார். அப்போது, கோபத்தில் அவர் பேசிய சில கருத்துகள் தவறானதுதான். அதை அவரே ஒப்புக்கொண்டு, அதற்கு வருத்தமும் தெரிவிச்சுட்டாரே! அதை நானும் ஒத்துகிறேன். அவர் பேசினது பிறரைப் புண்படுத்தியிருந்தால், அதற்கு என் கணவருடன் சேர்ந்து நானும் வருந்துறேன். 

கடந்த சில நாள்களாகவே இந்த விவகாரம் பெரிசா பேசப்படுது. அவரைப் பழிவாங்கும் நடவடிக்கைகளும் நடக்க ஆரம்பிச்சது. அப்போகூட, 'இனி கொஞ்சம் கவனத்துடன் பேசுங்க. நீங்க பேசுறது எக்காரணம் கொண்டும் யாரையும் காயப்படுத்தும்படி இருக்காமல் பார்த்துக்குங்க'னு என் கணவர்கிட்ட சொன்னேன். அவரும் கவனமுடன் இருப்பேன்னு சொன்னார். அவர் பேசிய முழு வீடியோவையும் ஒளிபரப்பாம, சில பகுதிகளை மட்டும் ரொம்பவே சர்ச்சையாக்கணும்னு பெரிதுபடுத்தியிருக்காங்க. அவர் பேச்சிலேயே எந்தச் சாதி மற்றும் அமைப்புகளைக் குறிப்பிட்டு ஒரு வார்த்தைகூட தவறா பேசலை; இனியும் பேச மாட்டார். அதேநேரம், மக்களுக்கு எதிரான அரசின் செயல்பாடுகளை நிச்சயம் விமர்சனம் செய்தே ஆகணும். அது, அவரின் கடமையும்கூட. அதைத் தொடர்ந்து செய்வார். திண்டுக்கல்ல ஓர் இசைநிகழ்ச்சியில கலந்துக்க, கடந்த வெள்ளிக்கிழமை இரவு சென்னையிலிருந்து கிளம்பினேன். நேற்று என் கணவர் கைதுசெய்யப்பட்ட விவகாரம் பற்றி சென்னையிலுள்ள என் பொண்ணு சொல்லித்தான் எனக்குத் தெரியும். உடனே எங்க வழக்கறிஞரைத் தொடர்புகொண்டு, விவரங்களைக் கேட்டேன். சில பாதுகாப்பு காரணங்களுக்காக அவரை வேலூர் சிறைக்கு மாத்தியிருக்கிறதாவும் கேள்விபட்டேன். என் கணவர்மீது அரசு மேற்கொண்டிருக்கிற கைது நடவடிக்கையைச் சட்டப்படி எதிர்கொள்வோம். திண்டுக்கல்ல இருந்து நேரா வேலூருக்குப் போய், இன்னைக்கு அவரைச் சந்திச்சுப் பேசப்போறேன்" என்றார், கிரேஸ் கருணாஸ்.