ஜீரோ டிகிரியைத் தொட்டது... உறைந்தது கொடைக்கானல்! | Kodaikanal reach zero degree

வெளியிடப்பட்ட நேரம்: 17:40 (02/01/2019)

கடைசி தொடர்பு:19:44 (03/01/2019)

ஜீரோ டிகிரியைத் தொட்டது... உறைந்தது கொடைக்கானல்!

மலைகளின் இளவரசி என அழைக்கப்படும் கொடைக்கானல் தற்போது காஷ்மீரைப்போல காட்சியளிக்கிறது. இப்போது நீங்கள் கொடைக்கானலுக்குப் போனால் புது வெள்ளை மழை இங்குப் பொழிகின்றது என பாடத் தொடங்கிவிடுவீர்கள். அந்தளவுக்குப் பனிப் பொழிவு இருக்கிறது.


பனிப்பொழிவு

வழக்கமாக டிசம்பர் மாதத்தில் பனிப்பொழிவு இருக்கும். கடந்த ஆண்டு இதே நாளில் 7 டிகிரி வரை வெப்பநிலை குறைந்தது. ஆனால், தற்போது ஜீரோவைத் தொட்டிருக்கிறது. 

பனிப்பொழிவு

 அப்சர்வேட்டரி பகுதியில் இன்று ஜீரோ டிகிரி பதிவாகியுள்ளது. இன்று இரவு மைனஸ் டிகிரிக்கு செல்ல வாய்ப்பிருக்கிறது. புல்வெளிகள்  வெண்மையாகப் பனி படர்ந்து உறைந்து கிடக்கின்றன. கடுமையான குளிர் காரணமாகச் சுற்றுலாப் பயணிகள் கடுமையாகப் பாதிக்கப்பட்டுள்ளனர். ஆனால், வெளிநாட்டு சுற்றுலாப் பயணிகள் இந்தச் சூழலை மிகவும் ரசிக்கின்றனர். மதியம் 2 மணி வரை வெயில் அடிக்கிறது. அதற்குப் பிறகு கொஞ்சம் கொஞ்சமாக அதிகரிக்கும் குளிர் நள்ளிரவில் எலும்புகளை ஊடுருவத் தொடங்கிவிடுகிறது. 

பனிப்பொழிவு 

இது தொடர்பாகப் பேசிய கொடைக்கானல் வாய்ஸ் அமைப்பைச் சேர்ந்த மைக்கேல், ``கடுமையான பனிப்பொழிவு காரணமாகப் பயிர்கள் ரொம்ப பாதிக்கப்படுது. இந்தக் குளிர் தாங்காமல் இலை எல்லாம் கருக ஆரம்பிச்சிருக்கு. இதே நிலை நீடித்தால் விவசாயம் மிகப்பெரிய இழப்பைச் சந்திக்கும்.

பனிப்பொழிவு

இப்பவே குளிர் தாங்க முடியல. பாத்திரங்கள்ல பிடிச்சு வெளியில வெச்சா தண்ணி உறைஞ்சுடுது. செடிகள்ல பனிக்கட்டியா நிக்குது. இன்னும் மைனஸ் டிகிரி போச்சுன்னா ரொம்ப கஷ்டம் ஆயிடும். ஜனவரி பாதி வரைக்கும் குளிர் கடுமையாக இருக்கும்" என்றார்.

பனிப்பொழிவு 

கொடைக்கானலைச் சேர்ந்த சமூக ஆர்வலர் வீரா, ``போன வருஷம் சரியா மழையில்லை. அதனால பனியும் பெருசா இல்ல. ஆனா, இந்த வருஷம் நல்ல மழை கிடைச்சிருக்கு. அதனால இப்போ பனியும் ஆரம்பிச்சிருக்கு. கிட்டத்தட்ட 15 வருஷத்துக்கு முன்ன இதேபோல சூழ்நிலை இருந்துச்சு.

பனிப்பொழிவு 

இந்த வருஷம் குளிர் ரொம்ப அதிகமா இருக்கு. 5 மணிக்கு மேல வெளியே போக முடியல. நெருப்பைவிட்டு மூன்றடிகூட தள்ளி இருக்க முடியல. இன்னும் போகப் போக குளிர் கடுமையாகும். இதே நிலைமை நீடித்தால் இன்னும் ஓரிரு நாளில் மைனஸ் டிகிரி போனாலும் போய்விடும்" என்றார்

காஷ்மீர், சிம்லா, டார்ஜிலிங் போன்ற இடங்களுக்குச் சென்று உறை பனியை ரசிக்க விரும்பும் சுற்றுலாப் பயணிகள் தாராளமாகக் கொடைக்கானலுக்குச் சென்று வரலாம்.
 

நீங்க எப்படி பீல் பண்றீங்க