`உதவிதான் செய்தேன்!' - போலீஸிடம் தெரிவித்த எழுத்தாளர் பிரான்சிஸ் கிருபா  | Chennai police arrests Writer Francis Kiruba over alleged murder

வெளியிடப்பட்ட நேரம்: 15:42 (06/05/2019)

கடைசி தொடர்பு:15:42 (06/05/2019)

`உதவிதான் செய்தேன்!' - போலீஸிடம் தெரிவித்த எழுத்தாளர் பிரான்சிஸ் கிருபா 

எழுத்தாளர் பிரான்சிஸ் கிருபா

கோயம்பேடு மார்க்கெட் பகுதியில் ஒருவரின் சடலத்தின் அருகில் எழுத்தாளர் பிரான்சிஸ் கிருபா அமர்ந்திருந்தார். இதனால் சடலமாக கிடந்தவரை பிரான்சிஸ் கிருபா கொலை செய்திருக்கலாம் என்ற சந்தேகம் போலீஸாருக்கு எழுந்தது. இந்தத் தகவல் தமிழ் வாசகர் வட்டத்தில் பெரும் பரபரப்பை ஏற்படுத்தியுள்ளது.

வணிகர்தினத்தையொட்டி கோயம்பேடு மார்க்கெட் நேற்று செயல்படவில்லை. இதனால் கடைகள் அனைத்தும் மூடப்பட்டிருந்தன. பிளாக் 11-ல் ஒருவர் இறந்துகிடக்க அவரின் அருகில் இன்னொருவர் அமர்ந்திருந்தார். இதைப்பார்த்த மூட்டைத் தூக்கும் தொழிலாளி ஒருவர் கோயம்பேடு காவல் நிலையத்துக்கு தகவல் தெரிவித்தார். இன்ஸ்பெக்டர் தீபக்குமார் தலைமையிலான போலீஸார் சம்பவ இடத்துக்குச் சென்று இறந்து கிடந்தவரின் சடலத்தைக் கைப்பற்றி பிரேதப் பரிசோதனைக்காக அரசு மருத்துவமனைக்கு அனுப்பிவைத்தனர். சடலத்தின் அருகில் அமர்ந்திருந்தவரை பிடித்து காவல் நிலையத்துக்கு அழைத்துவந்தனர். போலீஸார் நடத்திய விசாரணையில் இறந்தவர் யாரென்று தெரியவில்லை. மேலும் அவர், சில மாதங்களாக கோயம்பேடு மார்க்கெட் பகுதியில் சுற்றித்திரிந்தார் என்ற தகவல் மட்டும் போலீஸாருக்கு கிடைத்தது. இதனால் இறந்தவர் மனநிலை பாதிக்கப்பட்டவராக இருக்கலாம் என்று போலீஸார் கருதுகின்றனர்.  சடலத்தின் அருகில் இருந்தவரிடம் விசாரித்திருக்கின்றனர்.

எழுத்தாளர் பிரான்சிஸ் கிருபா

அதுகுறித்து போலீஸார் கூறுகையில், ``கோயம்பேடு மார்க்கெட் பகுதியில் மர்மமான முறையில் ஒருவர் இறந்துகிடந்தார். இதனால் சந்தேக மரணம் என்று வழக்கு பதிவு செய்துள்ளோம். இறந்தவர் குறித்த விவரங்கள் இதுவரை தெரியவில்லை. ஆனால், சடலத்தின் அருகில் அமர்ந்திருந்தவர் விருகம்பாக்கத்தைச் சேர்ந்த பிரான்சிஸ் கிருபா என்று தெரியவந்தது. இவர் பிரபல எழுத்தாளர் மற்றும் கவிஞர். இவர் எழுதிய மல்லிகைக்கிழமைகள், ஏழுவால் நட்சத்திரம் எனும் கவிதை நூல்கள் பிரபலமானவை. இந்நிலையில் கோயம்பேடு மார்க்கெட் பகுதிக்கு ஷூட்டிங்கிற்காக பிரான்சிஸ் கிருபா வந்துள்ளார். அப்போது ஒருவர் வலிப்பு நோயால் துடித்துக் கொண்டிருந்துள்ளார். அதைப்பார்த்த பிரான்சிஸ் கிருபா அவருக்கு உதவி செய்துள்ளார். ஆனால் அவர் இறந்துவிட்டார். இறந்தவர் யார் என்றுகூட எழுத்தாளருக்குத் தெரியவில்லை. இதனால் பிரேதப் பரிசோதனை அறிக்கைக்காகக் காத்திருக்கிறோம்’’ என்றனர். 

பிரான்சிஸ் கிருபாவிடம் போலீஸார் விசாரித்தபோது, ``நான் கொலை செய்யவில்லை, உதவிதான் செய்தேன்!’’ என்று கூறினாராம். இதற்கிடையில், காவல் நிலையத்தில் பிரான்சிஸ் கிருபா இருக்கும் தகவல் அவரின் நண்பர்களுக்குத் தெரியவந்தது. உடனடியாக அவர்கள் காவல் நிலையத்துக்கு வந்தனர். அவர்கள், பிரான்சிஸ் கிருபா யாரையும் கொலை செய்திருக்க மாட்டார் என்று போலீஸாரிடம் தெரிவித்தனர். 

பிரான்சிஸ் கிருபா

பிரான்சிஸ் கிருபாவின் சொந்த ஊர் நெல்லை மாவட்டம். இவருக்குத் திருமணமாகவில்லை. சென்னையிலேயே தங்கியிருந்தார். மல்லிகைக் கிழமைகள், சம்மனசுக்காடு, ஏழுவால் நட்சத்திரம், நிழலன்றி ஏதுமற்றவன், மெசியாவின் காயங்கள், வலியோடு முறியும் மின்னல் ஆகிய கவிதை நூல்களை எழுதியுள்ளார். மேலும், கன்னி என்கிற புதினத்தை எழுதியுள்ளார். 2008-ல் சுந்தரராமசாமி விருதும் 2017-ல் சுஜாதா விருதும் பெற்றுள்ளார். `கன்னி' என்ற புதினத்திற்காக 2007-ல் ஆனந்த விகடன் விருது பெற்றுள்ளார். பிரான்சிஸ் கிருபா சில மாதங்களாக கோயம்பேடு மார்க்கெட் பகுதியிலேயே தங்கியிருந்ததாகக் கூறும் போலீஸார், அந்தப் பகுதியில் உள்ள சிசிடிவி கேமரா பதிவுகளை ஆய்வு செய்துவருகின்றனர். 

எழுத்தாளரும் கவிஞருமான பிரான்சிஸ் கிருபா மீதான இந்தக் குற்றச்சாட்டு, எந்த திசையில் பயணிக்கும் என பிரேதப் பரிசோதனைதான் விடை சொல்லும்!