மொழிப் பாடத்தில் இந்தி... கல்வியாளரின் சந்தேகமும்.. பொன்னாரின் விளக்கமும்! | BJP's Pon Radhakrishnan explains about three language policy and answers to an educationist's questions

வெளியிடப்பட்ட நேரம்: 18:32 (10/06/2019)

கடைசி தொடர்பு:18:33 (10/06/2019)

மொழிப் பாடத்தில் இந்தி... கல்வியாளரின் சந்தேகமும்.. பொன்னாரின் விளக்கமும்!

மொழிப் பாடத்தில் இந்தி... கல்வியாளரின் சந்தேகமும்.. பொன்னாரின் விளக்கமும்!

``தமிழையும் தமிழினத்தையும் அழிப்பதுதான் மத்திய அரசின் நோக்கம்!" எனக் கல்வியியல் மற்றும் சமூகவியல் ஆய்வாளர் கி.வெங்கட்ராமன் தெரிவித்துள்ளார்.

"1938, 1965-ம் ஆண்டுகளுக்குப் பிறகு, தமிழ்நாட்டில் `இந்தி' என்ற சொல் தற்போதுதான் அதிகமாக உச்சரிக்கப்பட்டுக்கொண்டிருக்கிறது. கத்தியின்றி, ரத்தமின்றி சமூக ஊடகங்கள் மூலமாக இந்தி எதிர்ப்பு போராட்டம் தீவிரமாக நடைபெற்றுக்கொண்டிருக்கிறது. மத்திய அரசு புதிதாகக் கொண்டுவரவுள்ள புதிய தேசியக் கல்விக் கொள்கை – 2019 -ல் தமிழ்நாடு போன்ற இந்தி பேசாத மாநிலங்களில் நடுநிலைக் கல்வியிலிருந்து இந்தி மொழிக் கட்டாய பாடமாக்கப்படும் என்று அறிவிக்கப்பட்டது. கடும் எதிர்ப்புகள் கிளம்பியதால், வரைவு அறிக்கையில் பூசி மெழுகியதுபோல் சில திருத்தங்களைக் கொண்டுவந்துள்ளது மத்திய அரசு. இது ஒரு கண் துடைப்பு. வரைவு அறிக்கையில் திருத்தம் கொண்டுவந்துள்ள பத்தியில் இந்தி என்ற சொல் நீக்கப்பட்டபோதிலும், மும்மொழிக் கொள்கை என்ற சொல் நீக்கப்படவே இல்லை. இந்தி பேசாத மாநிலங்களில் முதல் மொழியாக தாய்மொழி, அடுத்து ஆங்கிலம், அதற்கு அடுத்து மூன்றாவதாக தாமாகவே இந்தியைத் தேர்வு செய்துகொள்ளவைக்கும் சூழ்ச்சியை மத்திய அரசு தந்திரமாகக் கையாள்வதாகக் குற்றம்சாட்டப்படுகிறது. இதெல்லாம் ஒருபுறமிருக்க, இந்தி படித்தால் வேலை கிடைக்குமா... கிடைக்காதா என்ற விவாதம் தமிழ்நாட்டு மக்களிடம் அனல் பறந்துகொண்டிருக்கிறது. இதை உணர்ச்சிபூர்வமாகப் பார்க்காமல், ஆய்வுபூர்வமாகப் பார்ப்பது காலத்தின் கட்டாயம். மும்மொழிக் கொள்கையினால் தமிழ்நாட்டுக்கு மக்களுக்குப் பயன் உண்டா, மத்திய அரசு ஆதிக்க மனப்பான்மையுடன் இந்தியை வலியுறுத்துகிறா, இல்லை இந்தி பேசாத மாநிலங்கள் மீதான அக்கறையினால் இந்தியை முன்மொழிகிறதா? தரவுகளுடனும் புள்ளி விவரங்களுடனும் அலசுவோம் வாருங்கள்.

புதிய கல்விக்கொள்கை

1965 மொழிப் போராட்டக் காலத்திலிருந்தே மும்மொழிக் கொள்கை என்பது இந்தியா முழுவதற்குமான கொள்கை என அறிவிக்கப்பட்டது. இந்தி பேசாத மாநிலங்களில் இந்தி கட்டாயமாக்கப்பட்டபோது, இந்தி பேசும் மாநிலங்களில் தென்னிந்திய மொழிகளில் ஏதாவதொன்று கற்பிக்கப்படும் என்று சொல்லப்பட்டது. ஆனால், நடைமுறையில் தென்னிந்திய மொழி எதுவும் இந்தி பேசும் மாநிலங்களில் கற்பிக்கப்படவில்லை. இப்போதும் அதுதான் நடக்கும்” என்றார், கல்வியியல் மற்றும் சமூகவியல் ஆய்வாளர் கி.வெங்கட்ராமன். 

கல்வியியல் ஆய்வாளர்அவரிடம், ``இந்தியினால் தமிழ்நாட்டு மக்களுக்குப் பலன் உண்டா?" என்று கேள்வியெழுப்பினோம். அதற்கு அவர், ``இந்தி படித்தால் வட இந்திய மாநிலங்களில் வேலைவாய்ப்பு கிடைக்கும் என்றுதான் தமிழ்நாட்டில் மீண்டும் மீண்டும் ஆசைவார்த்தை காட்டப்படுகிறது. உண்மையில், தமிழ்நாட்டைச் சேர்ந்தவர்கள் இந்தி மாநிலங்களில் போய் வேலைபார்ப்பதைவிட இந்திக்காரர்கள் தமிழ்நாட்டில் வேலைபெறுவதுதான் அதிகமாக இருக்கிறது. 2011-ம் ஆண்டு மக்கள்தொகைக் கணக்கெடுப்பின்படி, தமிழ்நாட்டிலிருந்து இந்தி மாநிலங்களுக்கு வேலை, தொழில் காரணமாகக் குடிபெயர்ந்திருப்போர் எண்ணிக்கை எட்டு லட்சம் பேர். மாறாக, இந்தி மாநிலங்களான பீகார், உத்தரப்பிரதேசம், ஜார்கண்ட், சட்டீஸ்கர் உள்ளிட்ட மாநிலங்களிலிருந்து தமிழ்நாட்டிற்கு வேலைதேடி வந்து தங்கியிருப்போர் ஒரு கோடி பேர். நாள்தோறும் சென்னை கோவை, திருப்பூர் ரயில் நிலையங்களில் வந்து குவியும் இந்திக்காரர்களே இதற்கு கண்கண்ட சாட்சி. உண்மை நிலை இவ்வாறிருக்க, இந்தி படித்தால்தான் வட இந்தியாவில் வேலை கிடைக்கும் என்று சொல்லி, இந்தியைத் திணிப்பது தீய உள்நோக்கம்கொண்டதாகும். வேலை கிடைப்பதற்காக என்று சொன்னால், இந்தி மாநிலங்களில்தான் தமிழைக் கட்டாய மொழிப் பாடமாகக் கற்பிக்க வேண்டும். தமிழை மூன்றாம் நிலைமொழியாக மாற்றுவதும், தமிழினத்தின் அடையாளத்தை அழிப்பதும்தான் மத்திய அரசின் முதன்மை நோக்கம். இதே கல்விக் கொள்கையில் சமஸ்கிருதம் தொடக்கக் கல்வியிலிருந்தே பரப்பப்பட வேண்டும் என்ற நோக்கமும் அறிவிக்கப்பட்டிருக்கிறது. சமஸ்கிருதத்தையும், சமஸ்கிருதமயமான இந்தியையும் திணிக்கும் ஆரிய இன ஆதிக்க நோக்கம்தான் இந்தக் கல்விக் கொள்கையில் மும்மொழிக் கொள்கை என்ற பெயரால் அறிவிக்கப்பட்டிருக்கிறது.

தமிழ்நாட்டில் கடும் எதிர்ப்பு கிளம்பியவுடன் அதற்கு, `வரைவு அறிக்கை'தான் என மத்திய அரசின் மனிதவள மேம்பாட்டுத் துறை அமைச்சர் ரமேஷ் பொக்ரியால் விளக்கம் கூறுகிறார். இதிலும் நய வஞ்சகம் மறைந்திருக்கிறது. இதற்கு முன்னால், நேரு காலத்திலிருந்து எப்போது மும்மொழிக் கொள்கை என்ற பெயரால் இந்தி திணிக்கப்பட்டாலும் அப்போதெல்லாம் தமிழ்நாட்டில் இதற்கு எதிர்ப்பு தெரிவிக்கப்பட்டே வருகிறது. இந்நிலையில், இந்த வரைவு அறிக்கையை உருவாக்கியபோதே இந்தி திணிப்பையும், சமஸ்கிருதத் திணிப்பையும் தவிர்த்திருக்க வேண்டும். தொடர்ந்து வலியுறுத்தி வந்தால், ஒருகட்டத்தில் ஏற்கவைத்துவிடலாம் என்ற ஆதிக்கவாதிகளின் சூழ்ச்சித் திட்டமாகத்தான் இந்தக் கல்விக்கொள்கையும் அமைந்திருக்கிறது. உத்தரப்பிரதேசம், பீகார், மத்தியப்பிரதேசம் போன்ற மாநிலங்களின் இயற்கை மொழிகளான மைதிலி, போஜ்புரி, அவத்தி உள்ளிட்ட மொழிகளை இந்தி அழித்தது வரலாற்றுச் சான்றாக உள்ளது. தமிழ்மொழிக்கும், தமிழர்களுக்கும் எதிரான இந்த மும்மொழிக் கொள்கைத் திட்டத்தை இந்திய அரசு உடனடியாகத் திரும்பப் பெற வேண்டும். இது வெறும் மொழித் திணிப்பு அல்ல... இன அழிப்பு முயற்சி என்பதைத் தமிழ்நாட்டு இளைஞர்கள் புரிந்துகொண்டுள்ளார்கள். இதனால்தான் சமூக ஊடகங்கள் மூலமாகத் தங்களது எதிர்ப்பை வலுவாகப் பதிவுசெய்து வருகிறார்கள். பி.ஜே.பி., காங்கிரஸ் உள்ளிட்ட கட்சிகளின் நிர்வாகிகளும், ஆதரவாளர்களும்தான் இந்தி திணிப்புக்கு ஆதரவாக பிரசாரம் செய்கிறார்கள். இந்தியைத் திணிப்பதற்காகவே உருவாக்கப்பட்டுள்ள மும்மொழிக் கொள்கையைப் பிரதமர் மோடி அரசு உடனடியாக முழுமையாகத் திரும்ப வேண்டும். இல்லையென்றால், தமிழர்கள் இனவழிப்பட்ட எதிர்ப்புப் போராட்டத்தை நடத்த வேண்டிய நிலை உருவாகும். இது எச்சரிக்கை அல்ல... இதுதான் யதார்த்தம்“ என்றார். 

முன்னாள் மத்திய அமைச்சர் பொன்.ராதாகிருஷ்ணன்

இதுகுறித்து பி.ஜே.பி-யின் முன்னாள் மத்திய அமைச்சர் பொன்.ராதாகிருஷ்ணன், ``தமிழையும் தமிழினத்தையும் மத்திய அரசு அழிக்கப் பார்ப்பதாகச் சொல்வது அபாண்டமான குற்றச்சாட்டு. நாடு முழுவதும் உள்ள கல்லூரி மாணவர்களுக்கு திருக்குறள் போட்டி நடத்திய ஒரே பிரதமர் நரேந்திர மோடிதான். நாடாளுமன்ற வளாகத்தில் தமிழ் தெரியாத பத்தாயிரத்துக்கும் மேற்பட்ட குழந்தைகள் கலந்துகொண்ட ஒரு நிகழ்ச்சியில் பேசிய பிரதமர் மோடி, `தமிழ் ஒரு சிறப்பான மொழி. தயவுசெய்து, தமிழில் 100 வார்த்தைகளாவது கற்றுக்கொள்ளுங்கள்’ என்றார். முதலமைச்சர்கள் கூட்டத்திலும் இதே கருத்தை வலியுறுத்தினார். `உலகத்தில் இருக்கக்கூடிய மொழிகளில் மிகவும் பழைமையான மொழி, தமிழ். அது, நம் நாட்டில் இருப்பது மெத்த மகிழ்ச்சி' என்றார். உலகம் சுருங்கிக்கொண்டே வருகிறது. மாணவர்களின் நலன்கருதி கூடுதலாக மேலும் ஒரு மொழியை கற்றுக்கொள்ளச் சொன்னால், தமிழை அழிக்கப் பார்ப்பதாகப் பொய் பிரசாரம் செய்கிறார்கள். 

கர்நாடகா, இந்தியை ஏற்றுக்கொண்டதால் கன்னடம் அழிந்துவிட்டதா? ஆந்திரா, இந்தியை ஏற்றுக்கொண்டதால் தெலுங்கு பாதிக்கப்பட்டதா? கேரளா, இந்தியை ஏற்றுக்கொண்டதால் மலையாளத்துக்கு என்ன பாதகம் நேர்ந்தது? தமிழ்நாட்டில் வசதி படைத்தவர்கள் இந்தியைக் கற்றுக்கொண்டு தங்களது வளர்ச்சிக்குப் பயன்படுத்திக்கொள்கிறார்கள். இங்குள்ள ஏழை எளிய மாணவர்களுக்கு இந்த வாய்ப்பு மறுக்கப்படுவது மிகப்பெரும் கொடுமையல்லவா? 50 ஆண்டுகளுக்கும் மேலாக, இந்தியை ஒதுக்கிவைத்ததால் நாம் கண்ட பலன்தான் என்ன? 'தமிழ்... தமிழ்' என்று பேசி ஆட்சிக்கு வந்த திராவிடக் கட்சிகளால், தமிழ் எந்த அளவிற்கு வளர்க்கப்பட்டது? தமிழ் இலக்கியங்கள், காப்பியங்கள் வளர்வதற்கும், தமிழ் பண்பாடு வளர்வதற்கும் இவர்கள் என்ன ஊக்கம் கொடுத்தார்கள்? தங்களுக்கு பேர், புகழ் கிடைக்க வேண்டும் என்பதற்காக உலகத் தமிழ் மாநாடு நடத்தினார்கள். அவ்வளவுதான். கிராமப்புறங்களில்கூட, அழைப்பிதழ்கள் ஆங்கிலத்தில்தான் அச்சடிக்கப்படுகின்றன. இது அவலம் அல்லவா?  

தமிழ்நாட்டில் பிரெஞ்ச், ஜெர்மன் உள்ளிட்ட வெளிநாட்டு மொழிகளைக் கற்றுக்கொள்ள வசதி வாய்ப்புகள் உள்ளன. இங்குள்ள ஏழை மாணவர்கள், படித்து முடித்துவிட்டு வெளிமாநிலங்களில் பணிபுரிய அவர்கள் ஏன் இந்தியை இலவசமாக கற்றுக்கொள்ளக்கூடாது? இதற்கு ஏன் இவ்வளவு எதிர்ப்புகள்? தமிழ் நமது உயிர். இந்தி ஒரு சோற்று மொழி. ஏழை மாணவர்கள் சோற்றுப் பிழைப்புக்காக இந்தி கற்றுக்கொள்வதில் எந்தத் தவறும் இல்லை. தமிழர்கள் தொழில் காரணமாக ஒரு காலத்தில் மும்பை, தாராவி  உள்ளிட்ட வடமாநிலப் பகுதிகளுக்கு அதிகளவில் சென்றார்கள். தற்போது அப்படியில்லை என்பதை நானும் ஒப்புக்கொள்கிறேன். ஆனால், இதற்கான காரணத்தை ஆராய வேண்டும். இங்கு தி.மு.க. ஆட்சிக்கு வந்த பிறகு, கிராமம் முதல் நகரம்வரை எங்குப் பார்த்தாலும் மதுபானக் கடைகளைத் திறந்து, நமது இளைஞர்களைப் போதைக்கு அடிமையாக்கியதோடு மட்டுமல்லாமல், இலவசங்களை அள்ளிக்கொடுத்து சோம்பேறிகளாகவும் மாற்றிவிட்டார்கள். தமிழ்நாட்டில் இந்தி திணிக்கப்பட்டால், நானே ஏற்றுக்கொள்ளமாட்டேன். தமிழை நமது உயிர்போல் பாதுகாப்போம். இந்தியை மடியில் கட்டிக்கொண்டு நாங்கள் அலையச் சொல்லவில்லை. இந்தி, துண்டுபோன்றது. இது, கையில் இருந்தால் தேவைப்படும்போது பயன்படுத்திக்கொள்ளலாம் என்றுதான் நாங்கள் சொல்கிறோம்” என்றார், மிகத் தெளிவாக.


டிரெண்டிங் @ விகடன்