Published:Updated:

`தமிழகத்தில் ஒரே நாளில் 170 கோடி ரூபாய்’ -ஊரடங்குக்கு மத்தியிலும் குறையாத மதுபான விற்பனை #Tasmac

டாஸ்மாக்
டாஸ்மாக்

``தமிழகம் முழுவதும் உள்ள 5,300 கடைகளில் 3,850 டாஸ்மாக் கடைகள் நேற்று திறக்கப்பட்டன. அனைத்து கடைகளும் திறந்திருக்கும் சாதாரண நாள்களில் 80 முதல் 90 கோடிக்கு மதுபானங்கள் விற்பனையாகும்.”

இந்தியா முழுவதும் கொரோனா வைரஸ் பரவுவதைத் தடுக்க நாடு முழுவதும் ஊரடங்கு கட்டுப்பாடுகள் அமலில் இருந்துவருகிறது. தொடர்ந்து அதிகரித்துவரும் பாதிப்பால், மூன்றாவது கட்டமாகத் தொடரும் இந்த ஊரடங்கில், சிவப்பு மண்டலங்களைத் தவிர்த்து ஆரஞ்சு மற்றும் பச்சை மண்டலங்களில் மதுக்கடைகள் திறக்கலாம் என்றும், சமூக இடைவெளியைக் கடைபிடிப்பது மற்றும் முகக்கவசம் அணிவது உள்ளிட்ட விதிமுறைகளைக் கடைபிடிக்க வேண்டும் என்றும் மத்திய அரசு அறிவித்தது. அதன்படி, சுமார் 40 நாள்களுக்குப் பிறகு நாட்டின் பல்வேறு மாநிலங்களிலும் மதுபானக்கடைகள் திறக்கப்பட்டன.

மதுக்கடைகள்
மதுக்கடைகள்

தமிழக அரசு, மே 7-ம் தேதி சென்னையைத் தவிர்த்து மற்ற பகுதிகளில் டாஸ்மாக் கடைகள் திறக்கப்படும் என அறிவித்தது. இதன்படி கட்டுப்படுத்தப்பட்ட பகுதிகளைத் தவிர, தமிழகம் முழுவதும் உள்ள 5,300 கடைகளில் 3,850 டாஸ்மாக் கடைகள் நேற்று திறக்கப்பட்டன. அனைத்து கடைகளும் திறந்திருக்கும் சாதாரண நாள்களில் 80 முதல் 90 கோடிக்கு மதுபானங்கள் விற்பனையாகும். விழாக்காலங்களாக இருந்தால் இதைவிட அதிக அளவில் விற்பனையாகும். இந்நிலையில், தமிழகத்தில் சுமார் 44 நாள்களுக்குப் பிறகு திறக்கப்பட்ட டாஸ்மாக்கில், நேற்று ஒருநாள் மட்டும் சுமார் 170 கோடிக்கு மதுபானங்கள் விற்றுத் தீர்ந்துள்ளதாகத் தகவல்கள் தெரிவிக்கின்றன. அதிகபட்சமாக மதுரை மண்டலத்தில் ரூ. 37 கோடிக்கும், சென்னை புறநகர் பகுதியில் ரூ.34 கோடிக்கும், திருச்சி மண்டலத்தில் ரூ.32 கோடியும் விற்பனை ஆகியுள்ளது.

மதுக்கடைகள் திறப்பது தொடர்பாக மத்திய அரசு வழங்கிய விதிமுறைகள், பல மாநிலங்களிலும் காற்றில் பறந்ததைப் போல தமிழகத்திலும் பல இடங்களில் விதிமுறைகள் பின்பற்றப்படவில்லை. கடைகள் திறப்புக்கு எதிர்ப்பு தெரிவித்து பல இடங்களில் போராட்டங்கள் நடைபெற்றன. மேலும், இந்த மதுக்கடைகள் திறப்பைச் சுற்றியும் பல பிரச்னைகள் நேற்று ஒருநாளில் மட்டும் நடந்திருப்பதும் குறிப்பிடத்தக்கது.

`இழுத்து மூடு’ போராட்டம்... போதையில் உயிரிழந்த நபர்...- டாஸ்மாக் களேபரங்கள் #LiveUpdates
அடுத்த கட்டுரைக்கு