Published:Updated:

தஞ்சை: 200 ஆண்டுகள் பழைமையான தூக்குமேடை; ஆக்கிரமிக்க முயற்சி?! - தொல்லியல் ஆய்வு கோரும் மக்கள்

பழங்காலத் தூக்குமேடை
பழங்காலத் தூக்குமேடை

’மராட்டிய மன்னர் காலத்தில் கொடுமையான குற்றங்களைச் செய்தவர்களைத் தூக்கு மேடையில் ஏற்றிக் கொல்வது அப்போதைய வழக்கமாக இருந்துள்ளது. தஞ்சாவூரை ஆண்ட மராட்டிய மன்னர்கள் இந்தத் தூக்குமேடையைப் பயன்படுத்தியுள்ளனர்.

தஞ்சையை ஆட்சிசெய்த மராட்டிய மன்னர்கள் காலத்தில் பயன்படுத்தப்பட்ட தூக்குமேடை, இன்றைக்கும் தஞ்சாவூரில் வரலாற்றுச் சின்னமாக வீற்றிருக்கிறது. இதை முறையாகப் பராமரித்து, பாதுகாக்க வேண்டிய தமிழக அரசோ இதைக் கண்டுகொள்ளவேயில்லை. ஆனால், தஞ்சை மக்கள் கடந்த 200 ஆண்டுகளாக இதைப் பாதுகாத்துவருகிறார்கள்.

தஞ்சை தூக்குமேடை
தஞ்சை தூக்குமேடை

ஆங்கிலேயர் ஆட்சிக்காலத்துக்கு முன்பு, தஞ்சாவூரை மராட்டிய மன்னர்கள் ஆட்சி செய்துவந்தார்கள். அப்போது, தஞ்சாவூர் பெரிய கோயில் பின்புறம் சேவப்பநாயக்கன் ஏரியின் மேல் கரையில் 20 தூக்குமேடைகள் கட்டப்பட்டுள்ளன. தரையிலிருந்து 10 அடி உயரத்தில் செங்கல், சுண்ணாம்பு, கருங்கல் கலவையால் 200 அடி நீளத்திலும், 30 அடி அகலத்திலும் இந்தத் தூக்குமேடை கட்டப்பட்டுள்ளது. காலப்போக்கில் சேவப்பன் நாயக்கன் ஏரி குடியிருப்புப் பகுதியாக மாறிப்போனது. இங்கு அமைந்துள்ள தூக்குமேடை கடந்த காலங்களில் பலமுறை ஆக்கிரப்பு முயற்சிக்கு உள்ளானபோது, இந்தப் பகுதி மக்கள் அதைத் தடுத்து நிறுத்திப் பாதுகாத்துவந்திருக்கிறார்கள்.

முறையான பராமரிப்பு இல்லாமல், மேற்கூரை சிதிலமடைந்ததால், தற்போது வெறும் கட்டடம் மட்டும் எஞ்சியுள்ளது. இந்தத் தூக்குமேடை கட்டுமானத்தை நேற்று சிலர் இடிக்க வந்தார்கள். இதையடுத்து அங்கு திரண்டு வந்த இந்தப் பகுதி மக்கள், தூக்குமேடையை இடிக்க எதிர்ப்பு தெரிவித்து, இடிக்கும் பணிக்கு வந்தவர்களைத் திருப்பி அனுப்பினர். இது குறித்து நம்மிடம் விரிவாகப் பேசிய தஞ்சை பெரிய கோயில் மீட்புக்குழு நிர்வாகி பழ.ராசேந்திரன், ‘``மராட்டிய மன்னர் காலத்தில் கொடுமையான குற்றங்களை செய்தவர்களைத் தூக்குமேடையில் ஏற்றிக் கொல்வது அப்போதைய வழக்கமாக இருந்துள்ளது. தஞ்சாவூரை ஆண்ட மராட்டிய மன்னர்கள் இந்தத் தூக்குமேடையை பயன்படுத்தியுள்ளனர். காலப்போக்கில் தூக்குமேடை பயன்படுத்தப்படாமல் இருந்ததால், தற்போது கட்டுமானம் மட்டும் எஞ்சியுள்ளது. இந்தத் தூக்குமேடையை யாரும் ஆக்கிரமிக்காதவாறு அந்தப் பகுதியில் உள்ளவர்கள் பாதுகாத்துவந்துள்ளனர்.

பழ.ராஜேந்திரன்
பழ.ராஜேந்திரன்

இந்தநிலையில், நேற்று திடீரென சிலர் அங்கு வந்து, `இந்த இடம் எங்களுக்கு உரியது’ எனக் கூறி, அதை இடித்து அகற்ற முயற்சி செய்தனர். இதை நாங்கள் தடுத்து நிறுத்தியுள்ளோம். மேலும், இந்த இடத்தைத் தொல்லியல் துறையினர் ஆய்வு செய்து, எஞ்சியுள்ள கட்டுமானத்தைப் பாதுகாக்க வேண்டும். இதில் தஞ்சை மாவட்ட நிர்வாகமும் உடனடியாக கவனம் செலுத்த வேண்டும்’’ என்றார்.

அடுத்த கட்டுரைக்கு