Vikatan.com

www.vikatan.com would like to send you push notifications.

Notifications can be turned off anytime from browser settings.

#MLAsForSale வீடியோவை ஏன் டைம்ஸ் நவ்விற்கு கொடுத்தோம்..? - விளக்கம் கொடுக்கும் மூன் டி.வி

 

.தி.மு.க எம்.எல்.ஏ-க்கள் அணி மாறுவதற்காகப் பல கோடி ரூபாய் மற்றும் கிலோ கணக்கில் தங்கம் கொடுக்கப்பட்டதாக வெளியாகிவரும் வீடியோ தகவல்கள் தமிழக அரசியலில் பெரும் பரபரப்பை ஏற்படுத்தி உள்ளது. இதுகுறித்து கருத்துத் தெரிவித்துள்ள தி.மு.க செயல் தலைவரும் எதிர்க்கட்சித் தலைவருமான மு.க ஸ்டாலின், 'எம்.எல்.ஏ-க்களுக்குப் பணம் தந்ததாக குற்றச்சாட்டு எழுந்ததன் மூலம் அ.தி.மு.க ஆட்சி ஜனநாயகத்தைக் குழி தோண்டிப் புதைத்து விட்டது. இந்த ஆட்சி இனியும் நீடிக்கக்கூடாது' என்று கூறி உள்ளார். சட்டமன்றம் கூட்டம் நடைபெற்றுவரும் சூழலில், அடுத்தடுத்து இன்னும் வீடியோக்கள் வெளியாகும் எனத் தகவல்கள் வெளியாகி வருவதால், மீண்டும் இவ்விஷயத்தில், பரபரப்பு கூடியுள்ளது.

அ.தி.மு.க-வின் சட்டமன்றக் குழுத் தலைவராக சசிகலா தேர்வு செய்யப்பட்டபிறகு, அ.தி.மு.க இரண்டாக உடைந்தது. தற்போது மூன்று அணிகளாக செயல்படத் தொடங்கியுள்ளது.  முதன்முதலில், சசிகலாவை எதிர்த்து ஓ.பன்னீர்செல்வம் தனி அணியை உருவாக்கியபோது, சசிகலா தரப்பினர் தங்கள் பக்கம் உள்ள எம்.எல்.ஏ-க்கள், அணி மாறிவிடக்கூடாது என்பதில் குறியாக இருந்தனர். அதேநேரத்தில், ஓ.பன்னீர்செல்வம் அணியும் எம்.எல்.ஏ-க்களை தங்கள் பக்கம் இழுக்கும் முயற்சியில் ஈடுபட்டார்கள். அதனைத்தொடர்ந்து சசிகலா தரப்பு, தங்கள் ஆதரவு எம்.எல்.ஏ-க்களை கூவத்தூர், 'கோல்டன் பே ரிசார்ட்'டில் தங்க வைத்தார்கள். இந்த விவகாரம் பெரும் சர்ச்சைகளை உருவாக்கியது.

இந்தச் சம்பவங்களின்போது, அங்கு எம்.எல்.ஏ-க்களை விலைக்கு வாங்கும் பேரம் நடைபெற்றதாக செய்திகளும் வெளிவந்தன. இந்த நிலையில், தனியார் தொலைக்காட்சிகளான, 'டைம்ஸ் நவ்' மற்றும் 'மூன் தொலைக்காட்சி' உள்ளிட்டவை பரபரப்பு வீடியோ ஒன்றை வெளியிட்டனர். அதில், 'கோல்டன் பே ரிசார்ட்'டிலிருந்து முதன்முதலில் தப்பி ஓடிவந்து, ஓ.பன்னீர்செல்வம் அணியில் இணைந்த மதுரை தெற்குத் தொகுதி எம்.எல்.ஏ சரவணன் பேசிக்கொண்டிருப்பதாக காட்சிகள் பதிவாகியுள்ளன. குறிப்பிட்ட அந்த வீடியோக் காட்சிகளில், ''எம்.எல்.ஏ-க்களை விமான நிலையத்திலேயே மடக்கி 2 கோடி ரூபாய் தருவதாகச் சொன்னார்கள். அடுத்து எம்.எல்.ஏ விடுதியில் இருந்து கவர்னர் மாளிகைக்குச் சென்றபோது 4 கோடி தருவதாகச் சொன்னார்கள். பிறகு கூவத்தூர் விடுதியில் தங்க வைத்திருந்தபோது 6 கோடி ரூபாய் தருவதாக உறுதியளித்தார்கள். அதனைத் தங்கமாகத் தருவதாகவும் கூறினார்கள்'' என எம்.எல்.ஏ சரவணன் பேசுவதாக வீடியோக் காட்சிகள் உள்ளன.

இந்த வீடியோ குறித்து செய்தியாளர்களிடம் விளக்கம் அளித்த எம்.எல்.ஏ சரவணன், “அந்த வீடியோவில் இருப்பது நான்தான். ஆனால், அதில் உள்ள வாய்ஸ் என்னுடையது இல்லை” என மறுத்திருந்தார். 

இந்த நிலையில், 'மூன் தொலைக்காட்சித் தரப்பினர் தாங்கள் ரகசியமாகப் பதிவு செய்த வீடியோக்களை தங்களது சேனலில் ஒளிபரப்பாமல், டைம்ஸ் நவ் தொலைக்காட்சிக்கு அதிக விலைக்கு விற்றுவிட்டனர்' என்று கூறப்படும் குற்றச்சாட்டு குறித்து விளக்கம் கேட்பதற்காக மூன் டி.வி நிர்வாக இயக்குநர் ஷாநவாஸ்கானிடம் பேசினோம்...

மூன் தொலைக்காட்சி“அது வெறும் வதந்திதான். நாங்கள் யாருக்கும் வீடியோக்களை விற்கவில்லை. டைம்ஸ் நவ் ஆங்கில செய்தித் தொலைக்காட்சியில் இந்த வீடியோக்களை ஒளிபரப்பினால், அதன் வீச்சும் தாக்கமும் அபரிமிதமாக இருக்கும். மக்களை முட்டாள்களாக நினைத்துக்கொண்டு அரசியல்வாதிகள் செய்துவரும் மோசடிகள் பெரும்பான்மை மக்களை சென்றடையவேண்டும்; அவர்கள் விழிப்புஉணர்வு பெறவேண்டும் என்பதுதான் எங்கள் நோக்கம். அதற்காகவே, டைம்ஸ் நவ் தொலைக்காட்சியோடு புரிந்துணர்வு ஒப்பந்தம் செய்துகொண்டு வீடியோக்களை ஒளிபரப்பினோம்... அவ்வளவுதான்!

அந்த வீடியோவில் இருப்பது அனைத்தும் உண்மை. அ.தி.மு.க உடைந்த பிறகு எம்.எல்.ஏ-க்களை இழுப்பதற்கு பெரும் குதிரைப் பேரம் நடந்தது என்பது அனைவருக்கும் தெரியும். இந்த அரசியல்வாதிகள் மக்களை முட்டாளாக்க நினைக்கிறார்கள். இதை அப்படியே கடந்துபோக முடியவில்லை. ஒரு பத்திரிகையாளராக, ஒளிப்பதிவாளராக இதை அப்படியே மக்களிடம் அம்பலப்படுத்தத் திட்டமிட்டோம். அதன்படி, கோல்டன் பே ரிசார்ட்டில் தங்கியிருந்த எம்.எல்.ஏ-க்களைக் கண்காணித்தோம். முதன்முதலில் ரிசார்ட்டில் இருந்து தப்பித்து வந்த எம்.எல்.ஏ சரவணனைத் தொடர்ந்து கண்காணித்தோம். அவரிடம் தொடர்ந்து பேசினோம். எங்கள் அலுவலகத்துக்கு அவரை வரவைத்து, நடந்தது குறித்து நேர்காணல் நடத்தினோம்.

மூன்று நாள் அவருடனேயே பயணித்துள்ளோம். திருநெல்வேலிவரை அவர் கூடவே சென்றுள்ளோம். அவர் கொடுத்த தகவல்களின்படி, அடுத்து சில எம்.எல்.ஏ-க்களிடமும் இதுகுறித்துப் பேசியுள்ளோம். அனைத்தையும் வீடியோக்களாகவும் பதிவு செய்துள்ளோம்.

கடந்த ஏப்ரல் மாதம் 1-ம்தேதியில் இருந்து மே 25-ம் தேதிவரை இதற்காக உழைத்தோம். அந்தப்பணி முடிந்ததும்தான் வீடியோக்களை வெளியிட்டுள்ளோம். நாங்கள் வெளியிட்டுள்ள வீடியோக்கள் அனைத்தும் உண்மை. எம்.எல்.ஏ-க்கள் எங்கள் அலுவலகத்துக்கு வந்தது முதல் அவர்களுடன் பேசிய அனைத்தையும் பதிவு செய்துள்ளோம். 

எம்.எல்.ஏ பேர விவகாரத்தில், அனைத்துக்கும் காரணமாக இருந்ததோடு, எம்.எல்.ஏ-க்களையும் இயக்கிய முக்கியப் புள்ளியையும் வீடியோ எடுத்துள்ளோம். அத்துணை வீடியோக்களும், இன்றும் நாளையும் வெளியாகும். இறுதியாக ஒரு பத்திரிகையாளர்கள் சந்திப்பை நடத்தி, இதுகுறித்து விளக்கவும் உள்ளோம். அதோடு எங்கள் பணி முடிந்தது. ஒரு பொறுப்புள்ள பத்திரிகையாளராக எங்கள் பணியை முழுமையாகச் செய்துள்ளோம்” என்றார்.

உங்கள் கருத்தைப் பதிவு செய்யுங்கள்

Advertisement
Advertisement
Advertisement

எடிட்டர் சாய்ஸ்

Advertisement

MUST READ

Advertisement