Vikatan.com

www.vikatan.com would like to send you push notifications.

Notifications can be turned off anytime from browser settings.

பெண்ணுரிமைக் கழகத் தலைவர் ’மாவோயிஸ்ட்’ பத்மா கடத்தல்: - சிவில், ஜனநாயக உரிமை அமைப்புகள் கண்டனம்

மாவோயிஸ்ட் பத்மா

மதுரையில், ஆபாசப் பட போஸ்டர்களைக் கிழித்தும் பிரேமானந்தா சாமியார் மீது முட்டை வீசியும் போராட்டம் நடத்திய பெண்கள் உரிமைக் கழகத் தலைவர்  ’மாவோயிஸ்ட்’ பத்மாவைக் கடத்தியது கண்டனத்துக்குரியது' என சிவில் மற்றும் ஜனநாயக உரிமை அமைப்புகள் கண்டனம் தெரிவித்துள்ளன. 

இது குறித்து தமிழ்நாடு - புதுவை பி.யு.சி.எல். அமைப்பின் மாநிலச் செயலர், பேரா. இரா.முரளி வெளியிட்டுள்ள அறிக்கையில்,

“ ஆந்திரப் பிரதேச காவல்துறையைச் சேர்ந்த சிறப்புப் புலனாய்வுப் பிரிவினர், 4.7.17 அன்று நள்ளிரவு சென்னிமலை அருகே ரயில் நிலையத்தில், தோழர் பத்மா என்பவரை தேடப்படும் மாவோயிஸ்ட் தீவிரவாதி என்று குற்றம் சாட்டி, துப்பாக்கி முனையில் அவரைக் கைதுசெய்து அழைத்துச்சென்றுள்ளனர். இதுபோல மாநிலம் கடந்து வந்து, எந்தவித சட்ட ரீதியான விதிகளையும் மதிக்காமல், நள்ளிரவில் ஒரு பெண்ணைக்  கைதுசெய்து இழுத்துப்போவது, உச்ச நீதிமன்ற நீதிபதி DK பாசு அவர்கள் கைதுகுறித்து இந்திய காவல் துறையினருக்கு வழங்கியுள்ள வழிகாட்டல்களை அவமதிப்பதாகும். கைதுசெய்யப்படுபவருக்கு, முறையாக ஏன் கைது செய்யப்படுகின்றார் என்ற காரணத்தைத் தெரிவிக்க வேண்டும். கைது பற்றி அவருடைய உறவினருக்கோ அல்லது நெருங்கிய நபருக்கோ காவல் துறை அதிகாரபூர்வமாகத் தெரிவிக்க வேண்டும். நள்ளிரவில் பெண் ஒருவரை இப்படி விதிகளை மீறி கைதுசெய்வது, மனித உரிமை மீறலாகும். மக்கள் சிவில் உரிமைக் கழகம் (பி.யு.சி.எல்), ஆந்திர காவல் துறையின் இந்தப் போக்கைக் கண்டிக்கிறது. தமிழக காவல் துறையினரும் இந்த மாதிரி விதி மீறலை அனுமதித்தது சரியல்ல.மேலும், கைதுசெய்யப்பட்ட தோழர் பத்மாவை உடனடியாக நீதிமன்றத்தின் முன் ஆஜர்படுத்த பி.யு.சி.எல் கோருகிறது. பத்மா அவர்களின் உயிருக்கும் உடலுக்கும் காவல்துறை பாதுகாப்பு அளிக்கும் பொறுப்பை ஏற்கவேண்டும்” என்று கூறப்பட்டுள்ளது. 

போலி மோதல் எனக் கொல்ல முயற்சியா எனக் கேள்வி எழுப்பியுள்ளது, மக்கள் உரிமைப் பாதுகாப்பு மையம். 

அதன் மாநில ஒருங்கிணைப்பாளர் வாஞ்சிநாதன் இது குறித்து வெளியிட்டுள்ள அறிக்கை விவரம்:

"மாவோயிஸ்ட் அமைப்பைச் சேர்ந்தவர் என்று சொல்லி பத்மா என்பவரை கடந்த  3.7.2017 அன்று ஈரோடு மாவட்டம் சென்னிமலை அருகே ஈங்கூர் ரயில் நிலையத்தில் வைத்து, ஆந்திர மாநில நக்சல் தடுப்புப் பிரிவு போலீசார் துப்பாக்கி முனையில் கடத்திச் சென்றதாகவும் அவரது உயிருக்கு ஆபத்து இருப்பதாகவும், கடத்தப்பட்ட பத்மாவின் கணவர் விவேக் தெரிவித்துள்ளார். சமூக வலைதளங்களில் பலரும் கடத்தலுக்குக் கண்டனம் தெரிவித்துள்ளனர். சில பத்திரிகைகளில், 'பத்மா கைது எனச் செய்தி வந்துள்ளது. ஆனால், தமிழக போலீஸார் கைதை மறுத்துள்ளனர். இந்தக் கடத்தல் தொடர்பாக, சென்னை உயர்நீதிமன்றத்தில் ஆட்கொணர்வு நீதிப் பேராணையும், ஆந்திர மாநில மனித உரிமை ஆணையத்தில் புகாரும் பதிவுசெய்யப்பட்டுள்ளது. கடத்தப்பட்டு சுமார் 72 மணிநேரம் ஆகியும், எந்தத் தகவலும் இல்லை.

பத்மா மாவோயிஸ்ட் அமைப்பில் இருந்து என்ன குற்றச் செயலில் ஈடுபட்டார் என்பது போலீசால் தெளிவுபடுத்தப்படவில்லை. இதற்கு முன்பும் பத்மா மீது தமிழக, கேரள, ஆந்திர போலீசார் பல்வேறு வழக்குகளைத் தொடுத்து, சித்திரவதை செய்வதையே வழக்கமாகக் கொண்டுள்ளனர். அரசு மற்றும் காவல்துறையின் தொடர் சித்திரவதையால் ஏற்கெனவே மிகவும் உடல்நலம் பாதிக்கப்பட்டிருக்கிறார் பத்மா. இக்கடத்தலால் அவரது உடல்நிலை மேலும் பாதிக்கப்பட வாய்ப்புள்ளது.

கடந்த காலங்களில் பத்மாவைப்போல் மாவோயிஸ்ட் என்று கைது செய்யப்பட்ட பெண்கள், பாலியல் பலாத்காரம் செய்யப்பட்டு, கொடூரமான சித்திரவதைக்குப் பின் போலி மோதலில் சுட்டுக் கொல்லப்பட்டுள்ளனர். குறிப்பாக ஆந்திர மாநில நக்சல்  ஒழிப்பு பிரிவு போலீசார் ரகசியமாகக் கடத்திக் கொலை செய்வதில் கைதேர்ந்தவர்கள்.

குற்ற வழக்கில் தொடர்புடைய ஒருவரைக் கைது செய்வதற்கான வழிமுறைகளை டி.கே.பாசு வழக்கில் உச்சநீதிமன்றம் தெளிவாக வகுத்துள்ளது. இதன்படி கைது செய்யப்படுபவரிடம், கைதுக்கான காரணம், கைது செய்யும் அதிகாரி பெயரைத் தெரிவிக்க வேண்டும். சீருடை அணிந்திருக்க வேண்டும். கைது செய்யப்பட்டவரின் குடும்பத்தினர், உறவினரிடம் தகவல் தெரிவிக்க வேண்டும். குற்றவியல் நடைமுறை சட்டப்படி, கைது செய்யப்பட்ட ஒருவரை 24 மணி நேரத்தில் அருகிலுள்ள நீதித்துறை நடுவரிடம் ஆஜர்படுத்த வேண்டும். பெண்களைக் கைது செய்தால், பெண் போலீசார் உடன் இருக்க வேண்டும்.

பத்மா கைதில், மேற்கண்ட உச்சநீதிமன்ற உத்தரவோ, குற்றவியல் நடைமுறைச் சட்டமோ பின்பற்றப்படவில்லை. எனவேதான் இது கைது இல்லை, கடத்தல் என்கிறோம். சட்டத்தின் ஆட்சி என்பதன் லட்சணம் இதுவாகத்தான் உள்ளது. மேலும், ஆந்திர மாநில போலீசார், தமிழ்நாட்டில் வந்து தமிழகத்தைச் சேர்ந்த ஒருவரைக் கைது செய்யும்போது, தமிழ்நாடு அரசுக்கும், சம்மந்தப்பட்ட மாவட்ட போலீசுக்கும் தகவல் தெரிவிக்க வேண்டும். ஆனால், இந்த கைது குறித்து தமிழக அரசும், போலீசும் மவுனம் சாதிக்கிறது. தகவல் தெரியாது என்கிறார்கள். தகவல் இல்லை என்றால், உண்மையில் வந்தது போலீசா? இல்லையா? வேறு யாரும் கூடக் கடத்தலாம் என்ற நிலையில் கடத்தியவர்கள் மீது வழக்குப் பதிவு செய்ய வேண்டாமா? தமிழக அரசின் பதில் என்ன?

மாவோயிஸ்ட் அமைப்பில் இருப்பதாலே ஒருவரைக் கைது செய்ய முடியாது, அவ்வாறு தவறாகக் கைது செய்ததற்கு அரசு இழப்பீடு தரவேண்டும் எனக் கேரள உயர்நீதிமன்றம் தீர்ப்பளித்துள்ளது. இருந்தபோதிலும் மாவோயிஸ்ட் என்று சந்தேகப்பட்டாலே, கைது செய்யலாம், கடத்தலாம், கொள்ளலாம் என்பதுதான் காவல்துறையின் அணுகுமுறையாக உள்ளது. உச்சநீதிமன்றத் தீர்ப்பு, தேசிய மனித உரிமை ஆணையத்தின் உத்தரவு, குற்றவியல் நடைமுறைச் சட்டம் எல்லாம் குப்பைக் கூடையில் எறியப்படுகிறது.

ஆனால், இதே காவல்துறை  வெளிப்படையாக ஆயுதப் பயிற்சியளிக்கும், பலமுறை இந்திய அரசால் தடை செய்யப்பட்ட ஆர்.எஸ்.எஸ் மற்றும் அதன் துணை அமைப்புகள் மீது எந்த நடவடிக்கையும் எடுத்ததில்லை. இதுவரை எங்காவது ஆர்.எஸ்.எஸ் அமைப்பின் உறுப்பினர் போலீசால் கடத்தப்பட்டார்,  மோதலில் கொல்லப்பட்டார், என்ற செய்தி வந்துள்ளதா?  இத்தனைக்கும் அவர்களின் தொழிலே கலவரம் செய்வது, கொலை செய்வது, பெண்களை வல்லுறவு செய்வதுதான். குஜராத் படுகொலையும், பசுப் பாதுகாப்பு பயங்கரவாதிகளின் நடவடிக்கையும் இதற்கு மிகச்சிறந்த உதாரணம். எனவே, எப்போதும் சட்டத்தைக் காவல்துறை கடைபிடிப்பதில்லை. உச்சநீதிமன்றத் தீர்ப்பையும் மதிப்பதில்லை. நடவடிக்கைகளிலும் பாரபட்சம்தான். 

இவை அனைத்தையும் நீதிமன்றத்துக்குக் கொண்டு சென்றால், காவல்துறையே பரவாயில்லை என்ற நிலைதான் உள்ளது. பத்மாவை ஒப்பபடைக்கச் சொல்லித் தாக்கல் செய்த ஆட்கொணர்வு மனு 5.7.2017-ல் விசாரணைக்கு வந்து 17.7.2017 அன்று வாய்தா போடப்பட்டுள்ளது. அடுத்த வாய்தா தேதிக்குள் கடத்தப்பட்ட பத்மாவுக்கு ஏதேனும் நேர்ந்தால் யார் பொறுப்பேற்பது?
மாவோயிஸ்டுகள் பயங்கரவாதிகள் அல்ல. நாட்டின் இயற்கை வளங்கள் கொள்ளை போவதை எதிர்த்து நிற்கும் பழங்குடி மக்களின் போராட்டத்துக்கு உறுதுணையாக இருப்பவர்கள். மாவோயிஸ்டுகள் மீதான ஒடுக்குமுறைக்குக் காரணம், மத்திய இந்தியாவில் உள்ள பல லட்சம் கோடி மதிப்புள்ள தாதுப்பொருள்களை இந்திய மற்றும் பன்னாட்டு முதலாளிகள் கொள்ளையடிப்பதற்கு வழிவகை செய்வதே. இதற்கு  மாவோயிஸ்டுகள் தடையாக இருப்பதே, அரசும் போலீசும் அவர்கள் மீது இத்தகைய அடக்குமுறையை ஏவுவதற்குக் காரணம்.
பத்மா சட்டவிரோதமாகக் கடத்தப்பட்டதை மக்கள் உரிமைப் பாதுகாப்பு மையம் வன்மையாகக் கண்டிக்கிறது. உடனே அவரை விடுதலை செய்ய வேண்டும். கடத்திய ஆந்திர போலீசு மீது தமிழக அரசு கடத்தல் வழக்குப் பதிய வேண்டும்” என்று வாஞ்சிநாதன் கூறியுள்ளார்.

உங்கள் கருத்தைப் பதிவு செய்யுங்கள்

Advertisement
Advertisement
Advertisement

எடிட்டர் சாய்ஸ்

என்னுள் மையம் கொண்ட புயல்! - கமல்ஹாசன் - 8 - அரியலூர் அனிதாவும் நானும்!
Advertisement

MUST READ

Advertisement