வெளியிடப்பட்ட நேரம்: 14:30 (02/08/2017)

கடைசி தொடர்பு:14:30 (02/08/2017)

ராமநாதசுவாமி-அம்பாள் கந்தமாதன பருவதம் மண்டகப்படிக்கு எழுந்தருளல்

ராமேஸ்வரம் அருள்மிகு ராமநாதசுவாமி திருகோயில் ஆடித் திருக்கல்யாணத் திருவிழாவின் ஒரு நிகழ்வான சுவாமி - அம்பாள் மறுவீடு செல்வதற்காக இன்று கந்தமாதன பருவதம் மண்டகப்படிக்கு எழுந்தருளினர்.
ராமேஸ்வரம் அருள்மிகு ராமநாதசுவாமி திருக்கோயில் ஆடித் திருக்கல்யாணத் திருவிழா கடந்த 17-ம் தேதி கொடியேற்றத்துடன் தொடங்கி தொடர்ந்து நடந்து வருகிறது. திருவிழாவின் முக்கிய நாள்களில் ஶ்ரீ பர்வதவர்த்தினி அம்மன் நகரின் முக்கிய வீதிகளில் உள்ள மண்டகப்படிகளுக்கு எழுந்தருளியதுடன் வீதி உலாவும் நடைபெற்றது.

ராமநாதசுவாமி அம்பாள் மண்டகப்படிக்கு எழுந்தருளல்
 கடந்த 28-ம் தேதி மாலை ராமநாதசுவாமி-ஶ்ரீ பர்வதவர்த்தினி அம்மன் திருக்கல்யாண விழா சிறப்பாக நடைபெற்றது. இதனைத் தொடர்ந்து திருக்கல்யாண மண்டபத்தில் தினந்தோறும் சுவாமி-அம்பாள் திரு ஊஞ்சல்  நிகழ்ச்சியும் திருவிழாவின் 16-ம் நாளன்று சுவாமி தங்க நந்திகேசுவரர் வாகனத்திலும், அம்பாள் வெள்ளி யானை வாகனத்திலும் வீதி உலா வந்தனர்.
17-ம் திருநாளான இன்று காலை ஶ்ரீ பர்வதவர்த்தினி அம்மனின் தாய் வீடான கந்தமாதன பர்வத மண்டகப்படிக்கு சுவாமி-அம்பாள் தங்க கேடகத்தில் மறுவீடு சென்றனர். இதையொட்டி இன்று காலை 6 மணிக்கு ராமநாதசுவாமி திருக்கோயில் நடை சாத்தப்பட்டது. கந்தமாதன பருவத மண்டகப்படியில் மாலையில் சுவாமி-அம்பாளுக்குச் சிறப்பு தீபாராதனை நடைபெற்ற பின் கோயிலுக்குத் திரும்புவார்கள். இதன் பின்னரே கோயில் நடை திறக்கப்படும்.
கந்தமாதன பருவதம் மண்டகப்படிக்கு எழுந்தருளிய ராமநாதசுவாமி-ஶ்ரீ பருவதவர்த்தினி அம்பாளுக்கு வழியெங்கும் பக்தர்கள் தேங்காய் உடைத்து வழிபட்டனர். சுவாமி அம்பாளுடன் மண்டகப்படிக்குச் சென்ற பக்தர்களுக்கு நீர் மோர், பானக்கம் மற்றும் பிரசாதம் ஆகியன பொதுமக்களால் வழங்கப்பட்டன.