Vikatan.com

www.vikatan.com would like to send you push notifications.

Notifications can be turned off anytime from browser settings.

‘ஓ.பன்னீர்செல்வம் வீட்டில் நடந்த மோதல்! - முன்னாள் அமைச்சரை வசைபாடிய மூத்த நிர்வாகி #VikatanExclusive

முதல்வர் எடப்பாடி பழனிசாமி,ஓ.பன்னீர்செல்வம்

ஓ.பன்னீர்செல்வம் வீட்டில் நடந்த ஆலோசனைக் கூட்டத்தில், முன்னாள் அமைச்சருக்கும் மூத்த நிர்வாகிக்கும் இடையே கடும் வாக்குவாதம் ஏற்பட்டுள்ளது. அவர்களை ஓ.பன்னீர்செல்வம் அணியினர் சமரசம் செய்ததாகத் தகவல்கள் வெளியாகியுள்ளன.

அ.தி.மு.க-வில் அணிகள் இணைப்புப் பணிகள் துரிதமாக நடந்துவருகின்றன. முதல்வர் எடப்பாடி பழனிசாமி அணி, முன்னாள் முதல்வர் ஓ.பன்னீர்செல்வம், டி.டி.வி.தினகரன் ஆகிய மூன்று அணிகளைச் சேர்ந்தவர்கள் தனித்தனியாக ஆலோசனையில் ஈடுபட்டுள்ளனர். 
அமாவாசையான இன்று, முதல்வர் எடப்பாடி பழனிசாமி அணியும் ஓ.பன்னீர்செல்வம் அணியும் இணையவதாக உறுதியான தகவல் வெளியாகியுள்ளது. அணிகள் இணைவதற்கான அனைத்து டீல்களும் ஓ.கே ஆகிவிட்டதாக இரு அணிகளைச் சேர்ந்த முக்கிய நிர்வாகிகள் தெரிவித்துள்ளனர்.

இந்தச் சூழ்நிலையில், ஓ.பன்னீர்செல்வம் அணியில் நடந்த ஆலோசனைக் கூட்டத்தில், முன்னாள் அமைச்சருக்கும் மூத்த நிர்வாகிக்கும் இடையே கடும் வாக்குவாதம் ஏற்பட்டதாகத் தகவல் வெளியானது. அந்தத் தகவலை ஓ.பன்னீர்செல்வம் அணியைச் சேர்ந்தவர்கள் உறுதிப்படுத்தினர்.

இதுகுறித்து நம்மிடம் பேசிய ஓ.பன்னீர்செல்வம் அணியைச் சேர்ந்த மூத்த நிர்வாகி ஒருவர், "அணிகள் இணைப்புகுறித்து தொடர்ந்து ஆலோசனை நடந்துவருகிறது. கூட்டத்தில், முன்னாள் அமைச்சரின் பேச்சு சர்ச்சைக்குள்ளானது. அவர், தன்னுடைய அமைச்சர் பதவியைத்  துறந்து, அணியில் இணைந்ததாகக் குறிப்பிட்டார். இது, மூத்த நிர்வாகி ஒருவருக்கு கோபத்தை ஏற்படுத்தியது. 'நீங்கள் மட்டுமல்ல...  நாங்கள், உங்களைவிட உயர்ந்த பதவியை விட்டுத்தான் இங்கு வந்துள்ளோம். தேவையில்லாமல் பேச வேண்டாம் என்று குறிப்பிட்டுள்ளார். இதனால் இருவருக்கும் இடையே வாக்குவாதம் முற்றியுள்ளது. இதைப்பார்த்த மற்ற நிர்வாகிகள் இருவரையும் சமரசம் செய்துள்ளனர். அதன்பிறகு, ஆலோசனைக் கூட்டம் தொடர்ந்து நடந்தது" என்றார்.

ஓ.பன்னீர்செல்வம் அணி வட்டாரங்கள் கூறுகையில்,"அணிகள் இணைவது உறுதியாகிவிட்டது. எங்கள் அணியில் உள்ளவர்களில் யார், யாருக்கெல்லாம் என்னென்ன பதவிகள் என்று பட்டியல் போடப்பட்டது. அப்போது, ஓ.பன்னீர்செல்வத்துக்கு துணை முதல்வர் மற்றும் உள்துறை, பொதுப்பணித்துறை போன்ற முக்கிய துறைகள் ஒதுக்க வேண்டும் என்று குறிப்பிடப்பட்டது. அதுபோல, முன்னாள் அமைச்சரான மாஃபா.பாண்டியராஜனுக்கும் முக்கிய இலாகா கொடுக்கப்பட வேண்டும் என்று சொல்லப்பட்டது. அதற்கு, கட்சியின் மூத்த நிர்வாகிகளான எம்.எல்.ஏ-க்களில் சிலர், எங்களுக்கும் அமைச்சர் பதவி வேண்டும் என்று அடம்பிடித்தனர். அவர்களுக்கு கட்சியில் முக்கியத்துவம் கொடுக்கிறோம் என்று ஓ.பன்னீர்செல்வம் உள்பட சிலர் தெரிவித்தனர். ஆனால், அவர்களில் ஒருசிலர் எங்களுக்குக் கண்டிப்பாக அமைச்சர் பதவி வேண்டும் என்று தெரிவித்தனர். இதைக்கேட்ட ஓ.பன்னீர்செல்வம் உள்பட அந்த அணியில் உள்ள முக்கிய நிர்வாகிகள் மீண்டும் முதல்வர் எடப்பாடி பழனிசாமி அணியினருடன் ஆலோசனை நடத்தினர். அப்போது, ஓ.பன்னீர்செல்வம் உள்பட மூன்று பேருக்கு அமைச்சர் பதவி கொடுக்கலாம் என்று கிரீன் சிக்னல் கொடுக்கப்பட்டுள்ளது. அதன்பிறகு, அணிகள் இணைப்பு உறுதியானது. மேலும், மாநிலங்களவை உறுப்பினர் பதவியை ஆரம்பத்திலிருந்தே ஓ.பன்னீர்செல்வம் அணியில் உள்ள மூத்த நிர்வாகியும் முன்னாள் அமைச்சருமான ஒருவர் கேட்டுள்ளார். அவருக்கும் எம்.பி. பதவி கொடுக்கிறோம் என்று உறுதியளிக்கப்பட்டுள்ளதாம். மற்றவர்களுக்கு கட்சியில் முக்கியத்துவம் கொடுக்கப்பட உள்ளது" என்றனர். 

முதல்வர் எடப்பாடி பழனிசாமி தரப்பில் பேசியவர்கள், “அணிகளை இணைத்தால் மட்டுமே ஆட்சியையும் கட்சியையும் வழிநடத்திச் செல்ல முடியும். தேர்தல் ஆணையத்தால் முடக்கப்பட்ட இரட்டை இலைச் சின்னத்தை மீட்க முடியும். சசிகலா குடும்பத்தினரை கட்சியிலிருந்து நீக்க முடியும். இதற்கு, ஓ.பன்னீர்செல்வம் அணியின் ஆதரவு தேவை என்று நாங்கள் கருதினோம். அதனால், அவர்களின் கோரிக்கைகளை நிறைவேற்ற சம்மதம் தெரிவித்துள்ளோம். அமைச்சரவையில் மாற்றம் செய்ய முடிவுசெய்யப்பட்டுள்ளது. தினகரன், திவாகரனின் ஆதரவு அமைச்சர்களை மாற்றவும் முடிவு எடுத்துள்ளோம். அதுதொடர்பாக, ஆலோசனை நடத்தியபிறகு அறிவிப்பு வெளியாகும். கட்சியை வழிநடத்த குழு அமைக்கப்பட உள்ளது. அதில், இரு அணிகளைச் சேர்ந்தவர்களுக்கு சமமாக பொறுப்புகள் வழங்கப்படும். சசிகலா குடும்பத்தினரின் தயவு மற்றும் தலையீடு இல்லாமல் அ.தி.மு.க இனி செயல்படும். கட்சி விதிகளில் மாற்றம்செய்வதுகுறித்தும் இன்று ஆலோசனை நடத்தப்படும். நிச்சயம் இரு அணிகளும் இன்று இணைந்துவிடும்" என்றனர்.

உங்கள் கருத்தைப் பதிவு செய்யுங்கள்

Advertisement
Advertisement
Advertisement

எடிட்டர் சாய்ஸ்

Advertisement

MUST READ

Advertisement