வெளியிடப்பட்ட நேரம்: 12:23 (22/08/2017)

கடைசி தொடர்பு:12:38 (22/08/2017)

’முதல்வர் மீதான நம்பிக்கையை இழந்துவிட்டோம்’ - எம்.எல்.ஏ-க்கள் கடிதத்தின் முழு விவரம்

முதலமைச்சர் எடப்பாடி பழனிசாமி தலைமையிலான அரசுக்கு அளித்துவந்த ஆதரவைத் திரும்பப் பெறுவதாக டி.டி.வி.தினகரன் அணியைச் சேர்ந்த 19 எம்.எல்.ஏ-க்களும் ஆளுநர் வித்யாசாகர் ராவிடம் கடிதம் அளித்துள்ளனர். 


ஆளுநர் மாளிகைக்கு வந்த தினகரன் ஆதரவு எம்.எல்.ஏ-க்கள், ஆளுநரிடம் தனித்தனியாகக் கடிதம் அளித்தனர். அந்தக் கடிதத்தில், ''ஜெயலலிதா தலைமையிலான அ.தி.மு.க-வின் சட்டமன்ற உறுப்பினராக நான் தேர்ந்தெடுக்கப்பட்டேன். கடந்த பிப்ரவரி மாதத்தில் நானும், 121 எம்.எல்.ஏ-க்களும் முதலமைச்சர் எடப்பாடி பழனிசாமி தலைமையிலான அரசுக்கு ஆதரவளித்து கடிதம் கொடுத்திருந்தோம். அதேபோல, சட்டப்பேரவையில் நடைபெற்ற நம்பிக்கை வாக்கெடுப்பில் எடப்பாடி பழனிசாமி அரசு பெரும்பான்மையை நிரூபிக்க அவருக்கு ஆதரவாக நான் வாக்களித்தேன். 

ஆனால், எடப்பாடி பழனிசாமி தலைமையிலான அரசுமீது கொஞ்சம் கொஞ்சமாக நான் நம்பிக்கை இழந்துவிட்டேன். அதிகார துஷ்பிரயோகம், அரசு இயந்திரத்தைத் தவறாகப் பயன்படுத்துதல், ஊழல் உள்ளிட்டவையால் நம்பிக்கை இழந்துவிட்டேன். கடந்த நான்கு மாதங்களாக எடப்பாடி பழனிசாமி மீது பல்வேறு தரப்பினரும் ஊழல் குற்றச்சாட்டுகளை அடுக்கிவருகின்றனர். முதலமைச்சர் எடப்பாடி பழனிசாமி ஊழலை ஊக்குவிக்கும் செயலில் தொடர்ந்து ஈடுபட்டுவருவதால், அது எங்கள் கட்சியின் நற்பெயருக்குக் களங்கம் விளைவிக்கும் வகையில் இருக்கிறது. தற்போதுள்ள சூழலில், எடப்பாடி பழனிசாமி தலைமையிலான அரசு, அரசியல் சாசனம் அளித்துள்ள விதிமுறைகளின்படி செயல்பட முடியாது. 


ஆகஸ்ட் முதல் வாரத்தில் செய்தியாளர்களிடம் பேசிய ஓ.பன்னீர்செல்வம், எடப்பாடி பழனிசாமி தலைமையிலான அரசின் அனைத்து துறைகளிலும் ஊழல் மலிந்துகிடப்பதாகக் கூறினார். பெரும்பாலான ஊடகங்கள் ஓ.பன்னீர்செல்வத்தின் பேட்டியை ஒளிபரப்பின. இந்தநிலையில், இரண்டு வார கால இடைவெளியில் முதலமைச்சர் எடப்பாடி பழனிசாமி, ஓ.பன்னீர்செல்வத்தைத் தனது அமைச்சரவையில் இணைத்துள்ளார். இதிலிருந்து, ஊழல் குற்றச்சாட்டை முதலமைச்சர் பதவியைப் பயன்படுத்தி மறைக்கவும் அதிகாரத் துஷ்பிரயோகம் செய்யவும் என்பது வெளிப்பட்டுள்ளது. முதலமைச்சர் எடப்பாடி பழனிசாமி மீதான நம்பிக்கையைத் தமிழக மக்களும் இழந்துவிட்டனர். எனவே, முதலமைச்சர் எடப்பாடி பழனிசாமிக்கு அளித்துவந்த ஆதரவை நான் திரும்பப் பெறுகிறேன். அதேநேரம், அ.தி.மு.க-வின் அடிப்படை உறுப்பினர் பதவியிலிருந்து நான் விலகவில்லை என்பதைத் தெரிவித்துக்கொள்கிறேன். இதுபோன்றதொரு சூழல் கர்நாடகாவின் முதலமைச்சராக எடியூரப்பா இருந்தபோது, கடந்த 2011-ல் ஏற்பட்டது. இதுதொடர்பாக உச்ச நீதிமன்றத்தில் விரிவாக விவாதிக்கப்பட்டுள்ளது. அ.தி.மு.க-வின் சட்டமன்ற உறுப்பினரான நான், முதலமைச்சர் எடப்பாடி பழனிசாமிக்கு அளித்துவந்த ஆதரவைத் திரும்பப் பெறுகிறேன். இதுதொடர்பாக உரிய நடவடிக்கை எடுக்க வேண்டும்’' என்று  குறிப்பிடப்பட்டுள்ளது.