Vikatan.com

www.vikatan.com would like to send you push notifications.

Notifications can be turned off anytime from browser settings.

பிரியாணி, வஞ்சிர மீன் வறுவல்! - தனி கவனிப்பில் தினகரன் அணி எம்.எல்.ஏ-க்கள்

ஆளுநரை சந்தித்த தினகரன் ஆதரவு எம்.எல்.ஏ-க்கள், கிழக்குக் கடற்கரை சாலையில் உள்ள ஓட்டலில் இன்று மதிய உணவை சாப்பிட்டனர். அவர்களில் பலர் பிரியாணி, வஞ்சிர மீன் வறுவலை விரும்பிச் சாப்பிட்டதாகத் தகவல் வெளியாகியுள்ளது.

ஜெயலலிதா மறைவுக்குப் பிறகு அ.தி.மு.க-வில் அதிகாரப் போட்டி ஏற்பட்டது. சசிகலா, பொதுச் செயலாளரானார். அடுத்து, முதல்வராக காய் நகர்த்தப்பட்டது. அதற்குள் சொத்துக்குவிப்பு வழக்கில் குற்றவாளியாக அறிவிக்கப்பட்டார். இதனால், முதல்வராக எடப்பாடி பழனிசாமி தேர்ந்தெடுக்கப்பட்டார். சசிகலா மீது பகிரங்கக் குற்றச்சாட்டைத் தெரிவித்தார் முன்னாள் முதல்வர் ஓ.பன்னீர்செல்வம். அவரது தலைமையில் எம்.எல்.ஏ-க்கள், எம்.பி-க்கள், கட்சியின் மூத்த நிர்வாகிகள் அணி வகுத்தனர்.

முதல்வர் எடப்பாடி பழனிசாமி தலைமையில் ஆட்சியை அமைக்க அ.தி.மு.க. தலைமை அலுவலகத்தில் எம்.எல்.ஏ-க்கள் கூட்டம் நடந்தது. கூட்டம் முடிந்ததும் எம்.எல்.ஏ-க்களை சசிகலா குடும்பத்தினர் கூவத்தூர் ரிசார்ட்டில் தங்கவைத்தனர். அதன்பிறகு, முதல்வர் எடப்பாடி பழனிசாமி தலைமையில் ஆட்சி அமைந்தது. அப்போது, சசிகலா குடும்பத்தினருக்கு ஓ.பன்னீர்செல்வம் அணியிலிருந்து கடும் நெருக்கடி கொடுக்கப்பட்டது. இதையடுத்து, சசிகலா அணியிலிருந்த முதல்வர் எடப்பாடி பழனிசாமிக்கும் டி.டி.வி.தினகரனுக்கும் கருத்துவேறுபாடு ஏற்பட்டது. இதனால், சசிகலா அணியிலிருந்த முதல்வர் எடப்பாடி பழனிசாமி, தனி அணியாக உருவெடுத்தார். நீண்ட போராட்டத்துக்குப் பிறகு முதல்வர் எடப்பாடி பழனிசாமி அணியும் ஓ.பன்னீர்செல்வம் அணியும் இணைந்தன. தற்போது, இவர்களுக்கு எதிராக சசிகலா அணி செயல்படத் தொடங்கியுள்ளது.

ஆளுநரைச் சந்தித்த தினகரன் ஆதரவு எம்.எல்.ஏ-க்கள் தங்களது ஆதரவை வாபஸ் பெறுவதாகவும் முதல்வரை மாற்ற வேண்டும் என்றும் தனித்தனியாக கடிதம் கொடுத்தனர். அதன்பிறகு, ஆலோசனை நடத்திய தினகரன் ஆதரவு எம்.எல்.ஏ-க்களின் கார்கள் சென்னைக் கிழக்குக் கடற்கரைச் சாலையை நோக்கிப் பயணிப்பதாகத் தகவல் வெளியானது.

இதையடுத்து தினகரன் ஆதரவு எம்.எல்.ஏ ஒருவரிடம் செல்போனில் பேசினோம். "எங்கள் அனைவரையும் கிழக்குக் கடற்கரைச் சாலையில் பயணிக்க ஆர்டர் வந்துள்ளது. தற்போது மதிய உணவு, மகாபலிபுரத்தில் உள்ள ரிசார்ட்டில் சாப்பிட்டுள்ளோம். அடுத்த உத்தரவுக்காகக் காத்திருக்கிறோம்" என்றார். தினகரன் ஆதரவு எம்.எல்.ஏ-க்கள் 19 பேர் கிழக்குக் கடற்கரை சாலையில் உள்ள ரிசார்ட்டில் தங்கவைக்கப்படலாம் எனத் தகவல் வெளியாகியுள்ளது. அங்கிருந்து அடுத்தகட்ட ஆலோசனை நடத்தப்பட உள்ளதாக தினகரன் ஆதரவு எம்.எல்.ஏ-க்கள் சிலர் தெரிவித்தனர். தினகரனின் ஆதரவு எம்.எல்.ஏ-க்களிடம் குதிரை பேரம் பேசி முதல்வர் எடப்பாடி பழனிசாமி தரப்பினர், தங்கள் பக்கம் இழுக்க வாய்ப்புள்ளதால், இந்த நடவடிக்கை எடுக்கப்பட்டிருக்கலாம் என்று கருதப்படுகிறது.

பிரியாணி... வஞ்சிர மீன்

தினகரன் ஆதரவு எம்.எல்.ஏ-க்களும், அவரது ஆதரவாளர்களும் மகாபலிபுரத்தில் உள்ள நட்சத்திர ஓட்டலில் மதிய உணவு சாப்பிட்டனர். அதில் பெரும்பாலானவர்கள் பிரியாணியும், வஞ்சிர மீன் வறுவலையும் விரும்பிச் சாப்பிட்டுள்ளனர். மற்றவர்கள், தங்கள் இஷ்டம்போல சாப்பிட்டுள்ளனர். பில் தொகை லட்சத்தைத் தொட்டதாம்.

உங்கள் கருத்தைப் பதிவு செய்யுங்கள்

Advertisement
Advertisement
Advertisement

எடிட்டர் சாய்ஸ்

Advertisement

MUST READ

Advertisement