Published:Updated:

`அடையாற்றின் மற்றோர் ஆலமரம்’... மருத்துவர் சாந்தா காலமானார்!

டாக்டர் சாந்தா
டாக்டர் சாந்தா

தனியார் மருத்துவமனையில் அனுமதிக்கப்பட்டவருக்கு ஆஞ்சியோ சிகிச்சை மேற்கொள்ளப்பட்டிருக்கிறது. ஆனால், சிகிச்சை பலனின்றி இன்று காலை 3.30 மணியளவில் சாந்தா காலமானார். இவருக்கு வயது 94.

சென்னை அடையாறு என்றாலே பலருக்கும் முதலில் நினைவுக்கு வருவது புற்றுநோய் நிறுவனம். லட்சக்கணக்கான புற்றுநோயாளிகளைக் குணப்படுத்திய இந்த நிறுவனத்துக்கு, நாள்தோறும் நூற்றுக்கணக்கான புற்றுநோயாளிகள் சிகிச்சைக்காக வருகிறார்கள். இந்த நிறுவனத்தின் வளர்ச்சிக்கு ஆணிவேராக இருப்பவர் மருத்துவர் சாந்தா.

டாக்டர் சாந்தா
டாக்டர் சாந்தா

1954-ம் ஆண்டு குடிசையில் தொடங்கப்பட்ட இந்த நிறுவனத்தில் தன்னையும் இணைந்துக்கொண்ட சாந்தா, இதற்காக அரசுப் பணியையும் கைவிட்டார். அதன் பிறகு கடந்த 67 ஆண்டுகளாக சாந்தாவின் உலகமே இந்த புற்றுநோய் நிறுவனம்தான். நிறுவனத்தை விரிவுபடுத்துவது, நோயாளிகளுக்கான சிகிச்சை முறைகள் குறித்தத் திட்டமிடல் போன்ற பணிகளுடன், தினந்தோறும் மருத்துவ சிகிச்சையும் வழங்கிவந்தார்.

வயோதிகத்தைப் பொருட்படுத்தாமல் புற்றுநோய் நிறுவனத் தலைவராகப் பணியாற்றிவந்த நிலையில், கொரோனா சமயத்தில் பொதுமக்களுக்கு சிகிச்சையளிப்பதை மட்டும் தவிர்த்துள்ளார். தனது அலுவலக வீட்டில் இருந்தபடியே வழக்கமான நிர்வாகப் பணிகளை மேற்கொண்டுவந்தார். சாந்தாவுக்கு ஆஸ்துமா பாதிப்பு இருந்துள்ளது. இதனால் அவ்வப்போது சுவாசப் பிரச்னைகளுக்காக சிகிச்சை எடுத்துக்கொண்டுள்ளார். இந்த நிலையில், கடந்த சில நாள்களாக சாந்தாவுக்கு உடல்நிலை சரியில்லாமல் இருந்துள்ளது.

டாக்டர் சாந்தா
டாக்டர் சாந்தா

ஞாயிற்றுக்கிழமை சாந்தாவுக்கு சுவாசிப்பதில் சிரமம் ஏற்படவே, தனியார் மருத்துவமனையில் அனுமதிக்கப்பட்டுள்ளார். சில மருத்துவ பரிசோதனைகள் நடந்துள்ளன. பின்னர் வீடு திரும்பிய நிலையில், நேற்று பகல் முழுக்க இயல்பாகவே இருந்திருக்கிறார். திடீரென நேற்று இரவு சாந்தாவுக்கு உடல்நிலை பாதிப்பு ஏற்பட்டுள்ளது. தனியார் மருத்துவமனையில் அனுமதிக்கப்பட்டவருக்கு ஆஞ்சியோ சிகிச்சை மேற்கொள்ளப்பட்டிருக்கிறது. ஆனால், சிகிச்சை பலனின்றி இன்று காலை 3.30 மணியளவில் சாந்தா காலமானார். இவருக்கு வயது 94.

சென்னை அடையாறு காந்தி நகரில் உள்ள புற்றுநோய் நிறுவனத்தில் சாந்தாவின் வசிப்பிடம் இருக்கிறது. அதில் அவரது உடல் அஞ்சலிக்காக வைக்கப்பட்டுள்ளது. புற்றுநோய் நிறுவன ஊழியர்கள், பிரபலங்கள், பொது மக்கள் பலரும் சாந்தாவுக்கு அஞ்சலி செலுத்திவருகின்றனர். அவரது உடல் இன்று மாலை நல்லடக்கம் செய்யப்பட வாய்ப்புகள் உள்ளதாகத் தெரிகிறது.

டாக்டர் சாந்தா
டாக்டர் சாந்தா
Vikatan

ஜவஹர்லால் நேரு முதல் இன்றைய இந்திய அரசியல் பிரபலங்கள் வரை அனைவரின் நன்மதிப்பையும் அன்பையும் பெற்றுள்ள சாந்தா, தனது தன்னலமற்ற மருத்துவ சேவைக்காக ஆசியாவின் உயரிய விருதான `மகசேசே’ விருது உட்பட இந்தியாவின் உயரிய விருதுகள் அனைத்தையும் பெற்றவர் என்பது குறிப்பிடத்தக்கது. அடையாற்றின் மற்றோர் ஆலமரம்போல புற்றுநோய் நிறுவனத்தை விருட்சமாக உருவாக்கிய சாந்தாவின் மரணம், மருத்துவ உலகில் ஈடுசெய்ய முடியாத இழப்பாகவே கருதப்படுகிறது.

அடுத்த கட்டுரைக்கு