Published:Updated:

``தாழ்த்தப்பட்டோர்' என்ற சொல்லை இன்னும் சிலர் தூக்கிப்பிடிப்பது ஏன்?' - செந்தமிழ் சரவணன்

சாதிச் சான்றிதழ் / Representational Image
சாதிச் சான்றிதழ் / Representational Image

`பௌத்தர் கழகம்' அமைப்பின் செயலாளர் செந்தமிழ் சரவணன், 30.6.2021 அன்று விகடன் இணையதளத்தில் வெளியான கட்டுரையில் புனித பாண்டியன் தெரிவித்திருந்த கருத்துகளுடன் முரண்பட்டு, தன் விளக்கம் குறித்த கட்டுரையை நமக்கு அனுப்பியிருந்தார். அது இங்கே...

சென்னை, மாநகராட்சிப் பள்ளி ஒன்றின் சேர்க்கைப் படிவத்தில் சாதி பற்றிய தெரிவில் `தாழ்த்தப்பட்டவர்’, `மலைஜாதியினர்' என்று குறிப்பிடப்பட்டிருந்ததைக் கண்டித்து சமூக வலைதளங்களில் சமீபத்தில் பதிவுகள் எழுதப்பட்டன. சொற்கள் மிகவும் கூர்மையானவை... எப்போதும் கவனமாகக் கையாள வேண்டும். ஆகவேதான், கௌரவக்கொலை என்ற சொல் இன்று `ஆணவக்கொலை' என்றும், நிவாரணத்தொகை என்பது `உரிமைத்தொகை' என்றும், இலவசம் என்பது `கட்டணமில்லா' என்றும் விளிக்கப்படுகிறது. அதன்படி, தாழ்த்தப்பட்டவர் என்பதை அட்டவணை சாதியினர்/பட்டியல் சமூகத்தினர் என்றே குறிப்பிட வேண்டும் என்ற கோரிக்கை கடந்த சில ஆண்டுகளாக வலுப்பெற்று வருகிறது.

இந்நிலையில், சாதி சார்ந்த சொல்லாடல்களை எவ்வகையில் முறைப்படுத்தலாம் என்பது பற்றி, சமூக முன்னேற்றம் சார்ந்து இயங்குபவர்களிடம் நாம் பேசிய கட்டுரையை, 'தாழ்த்தப்பட்டவர்களா, அட்டவணைப் பிரிவினரா... எந்த பதம் சரியானது? - ஓர் அலசல்' என்ற தலைப்பில், 30.6.2021 அன்று விகடன் இணையதளத்தில் வெளியிட்டிருந்தோம்.

அதில் ஒருவராகப் பேசியிருந்த `தலித் முரசு’ இதழ் ஆசிரியர் புனித பாண்டியன், ``இந்திய சாதிய அமைப்பு முறை பற்றிய சரியான புரிந்துணர்வு அற்றவர்கள்தான் தாழ்த்தப்பட்டவர் என்கிற சொல்லை அவமதிப்பான சொல்லாகக் கருதுகிறார்கள்” என்ற நிலைப்பாட்டில் தன் கருத்துகளைப் பகிர்ந்திருந்தார்.

அம்பேத்கர்
அம்பேத்கர்
தாழ்த்தப்பட்டவர்களா, அட்டவணைப் பிரிவினரா... எந்த பதம் சரியானது? - ஓர் அலசல்

இந்நிலையில், `பௌத்தர் கழகம்' அமைப்பின் செயலாளர் செந்தமிழ் சரவணன், அந்தக் கட்டுரையில் புனித பாண்டியன் தெரிவித்திருந்த கருத்துகளுடன் முரண்பட்டு, தன் விளக்கம் குறித்த கட்டுரையை நமக்கு அனுப்பியிருந்தார். அது இங்கே...

``தாழ்த்தப்பட்டோர் என்ற வார்த்தையைப் பயன்படுத்துகிறவர்களை நாம் இரண்டு பிரிவினருக்குள் அடையாளம் காணலாம். ஒரு பிரிவினர் இந்து மதத்தில் இருப்பவர்கள், இன்னொரு பிரிவினர் இந்து மதத்திலிருந்து கிறிஸ்துவ மதம் ஏற்றவர்கள். இவற்றில் நாம் கவனிக்கத்தக்கது, இரு பிரிவினருமே பாபாசாகேப் அம்பேத்கர் வழியில் பௌத்தம் ஏற்காதவர்கள்.

தாழ்த்தப்பட்டோர் என்ற சொல்லைப் பயன்படுத்துவதால், இந்து மதத்தில் இருக்கக் கூடிய இதர பிற்படுத்தப்பட்டோர் தங்களை விட தாழ்ந்த அடுக்கு இருக்கிறது என்கிற பெருமை கிடைப்பதாக உணர்கிறார்கள். இந்து மதத்தில் இருக்கக் கூடிய அட்டவணைப் பிரிவினருக்கோ, `நாம் இந்துக்களே அல்லர்' என்கிற பாபாசாகேப் அம்பேத்கரின் கொள்கையே தெரியவில்லை, எனவே அவர்கள் தங்களைத் தாழ்த்தப்பட்டோர் என்று ஒப்புக் கொள்கிறார்கள்.

இந்து மதத்தில் இருக்கும் முற்பட்டோரைப் பொறுத்தவரை தங்களை விட இரண்டு கீழ் அடுக்குகள் இருக்கின்றன என்ற ஆணவத்தின் உச்சியிலேயே இருக்கிறார்கள். இந்து மதத்திலேயே இருந்து கொண்டு `மதமற்றவர்கள்' என்று சொல்கிற பெரியாரிஸ்ட்கள், கம்யூனிஸ்ட்கள், `அம்பேத்கரை இந்து மதம் உள்வாங்கிவிட்டது, அம்பேத்கர் சொன்ன வழிமுறைகாளால் ஜாதியை ஒழிக்க முடியாது' என்கிற பிரசாரத்தைக் கையில் எடுத்து, `நாங்கள்தான் தாழ்த்தப்பட்டோருக்கு அதைச் செய்தோம் இதைச் செய்தோம்' என்று பேசிக் கொள்வதில் விருப்பப்படுகிறவர்களாக உள்ளனர்.

இந்து மதத்திலிருந்து கிறிஸ்துவம் மாறியவர்கள் இதர பிற்படுத்தப்பட்டோர் பட்டியலுக்குள்தான் இடம் பெற முடியும். எனவே அட்டவணைப் பிரிவினர் என்ற சொல்லைப் பயன்படுத்த முடியாது. ஆகவே தங்களுக்குக் பாதுகாப்பாகத் தலித், தாழ்த்தப்பட்டோர் ஆகிய வார்த்தைகளைப் பயன்படுத்துகிறார்கள். இந்து மதத்திலிருந்து கிறிஸ்துவம் மாறிய அட்டவணைப் பிரிவினரும் தங்களுக்கான அட்டவணைப் பிரிவு பிரதிநிதித்துவத்தை உரிமையாகக் கோருவதே நியாயமாகும். அதைத் தவிர்த்துத் தாழ்த்தப்பட்டோர் என்ற சொல்லுக்குள் சுருங்கிக் கொள்வது
ஏற்புடையதல்ல.

புனித பாண்டியன்
புனித பாண்டியன்

இந்திய அரசியல் அமைப்புச் சட்டப்படி அட்டவணைப் பிரிவினர் என்பதே சரியான சொல். அதைத்தான் டாக்டர் அம்பேத்கர் ஏற்றுக் கொண்டார். தலித் (ஒடுக்கப்பட்டோர்), ஹரிஜன் ஆகிய சொற்கள் இந்திய அரசியல் அமைப்புச் சட்டத்தில் இடம் பெற அவர் ஒப்புக் கொள்ளவில்லை. அதற்கான காரணங்களை அவர் விளக்குகையில் பின்வருமாறு கூறுகிறார்...

``ஹரிஜன் என்று காந்தியார் குறிப்பிடுகிற சொல் கிருஷ்ணனின் குழந்தைகள் என்று பொருள்படுகிறது. நாங்கள் அவ்வாறு மூடநம்பிக்கை வார்த்தையை ஏற்க முடியாது. அது பரிதாபத்திற்குரிய வார்த்தையாக இருந்தால் அதையும் நாங்கள் ஏற்க முடியாது. ஏனெனில் எங்களுக்கான சுயமரியாதை உள்ளது. தலித் என்ற வார்த்தை ஒடுக்கப்பட்டோர் என்ற பொருள்படுகிறது. அந்தப் பொருள் இதர பிற்படுத்தப்பட்டோர், பெண்கள், இஸ்லாமியர்கள், கிறிஸ்துவர்கள் என அனைவரையும் குறிக்கக் கூடியதாகும். ஏனெனில் இந்தியாவில் இவர்கள் அனைவருமே தாழ்த்தப்பட்டவர்கள்தான். அதுவுமன்றி எதிர்காலத்தில் தீண்டத்தகாதவர்கள் ஓர் அடையாளப் பெயருக்குள் அடைபடுதல் தொடரக் கூடாது என்பதால் தற்காலிக அட்டவணைத் தயாரிப்பிற்காக பிரதிநிதித்துவத்திற்கான பட்டியலை நாம் Scheduled என்றே அழைக்கலாம்."

இவ்வாறு அம்பேத்கர் தெளிவாக SC/ST என்ற சொல்லை அங்கீகரித்த பிறகும், தாழ்த்தப்பட்டோர் என்ற சொல்லைப் புனித பாண்டியன் தூக்கிப் பிடிப்பதன் காரணம் என்னவோ?

``தாழ்த்தப்பட்டவர் என்ற சொல் இந்தியச் சாதிய அமைப்பின் படிநிலைகள் மூலம் நிகழ்த்தப்பட்ட அநீதியைச் சுட்டும் வகையில் அமைந்திருக்கிறது” என்கிறார் புனித பாண்டியன். அவரின் சொற்றொடரின் படி இந்திய ஜாதிய அமைப்பின் படிநிலைகள் என்பதை வர்ணாஸ்ரமம் என்று குறிப்பிடலாம். அப்படியெனில் வர்ணாஸ்ரமத்தில் நான்கு அடுக்குகளே உள்ளன.

`பிரம்மனின் வாயில் பிறந்தவர்கள் பிராமணர்கள், தோளில் பிறந்தவர்கள் சத்ரியர்கள், மார்பில் பிறந்தவர்கள் வைசியர்கள், தொடையில் பிறந்தவர்கள் சூத்திரர்கள்' என்பதே அது. பாதத்தில் பிறந்ததாக ஒரு பிரிவும் இல்லை. ஆனால், அந்த நான்கு அடுக்குகளிலும் இடம்பெறாத பஞ்சமர்களைப் பாதத்திற்குக் கீழே வைத்து ஐந்தாவது அடுக்காகக் காட்ட முயற்சி செய்வது என்பது எப்படி சரியாகும்?

பஞ்சமர்கள் என்பவர்கள் வேதங்களை ஏற்காதவர்கள், வர்ணாஸ்ரமத்திற்குள் அடங்காதவர்கள், அவர்களுக்கும் வர்ணாஸ்ரமத்திற்கும் தொடர்பே இல்லை என்பதையே பாபாசாகேப் அம்பேத்கர் `சூத்திரர் யார்?' என்ற புத்தகத்தில் குறிப்பிடுகிறார்.

``பிராமணன் வாயில் பிறந்தவன், சத்ரியன் தோளில் பிறந்தவன், வைசியன் மார்பில் பிறந்வன், சூத்திரன் தொடையில் பிறந்தவன் என்றால் ஆதிதிராவிடர்கள் எங்கே பிறந்தவர்கள்?” என்ற கேள்வியின் போது தந்தை பெரியார், ``அவர்கள்தான் அம்மா அப்பாவிற்கு முறையாகப் பிறந்தவர்கள்” என்று பதில் அளித்திருப்பார்.

புனித பாண்டியன் அவர்கள் பாபாசாகேப் எழுதிய `சூத்திரர் யார்?' என்ற புத்தகத்தையும் பெரியாரின் கூற்றையும் படித்திருப்பார் என்று நம்புகிறோம். பாபாசாகேப் அம்பேத்கர் தனது எழுத்துகளில் `Depressed class, Untouchables, Unfit for human association' ஆகிய சொற்களைப் பயன்படுத்தியிருப்பதாகவும், அவற்றின் பொருள் தாழ்த்தப்பட்டோர் என்றும் புனித பாண்டியன் வாதிடுகிறார்.

அம்பேத்கர்
அம்பேத்கர்
அம்பேத்கர், வெறுமனே தாழ்த்தப்பட்ட மக்களின் தலைவரா?

அட்டவணைப் பிரிவினர் நடத்தப்பட்ட சூழ்நிலைகளை விவரிப்பதற்காகப் பாபாசாகேப் அம்பேத்கர் பயன்படுத்திய சொற்கள்தான் அவை. ஆனால் அவற்றை இந்திய அரசியல் அமைப்புச் சட்டத்தில் அங்கீகரிக்க பாபாசாகேப் மறுத்துவிட்டார் என்பதுதானே உண்மை? பாபாசாகேப் அம்பேத்கர் தன்னுடைய ஆங்கில புத்தகத்தில் Untouchables, Depressed class ஆகிய வார்த்தைகளைப் பயன்படுத்தும்போது, அதைத் தமிழ்ப்படுத்துகிற புனித பாண்டியன் தலித் என்ற சொல்லாகத் திரித்தது ஏன்? தலித் என்ற சொல் எப்படி தமிழாகும்? இந்தக் கேள்வி ஒருபுறம் இருந்தாலும், Untouchables என்ற சொல்லைத் தீண்டத்தகாதவர்கள் என்று மொழிப்பெயர்க்காமல் தலித் என்று குறிப்பிடுவது நேர்மையற்ற எழுத்தாளுமைதானே? பஞ்சமர்கள் தீண்டத் தகாதவர்களாக ஆக்கப்பட்டதற்கான காரணம், `இந்துக் கோயில்களுக்குள் சேர்க்கப்படாததால் அல்ல, அந்தக் கோயில்களைப் புறக்கணித்ததால்' என்பதைப் புனித பாண்டியன் அறிவாரா?

1911 மக்கள் தொகைக் கணக்கெடுப்பின் படி தீண்டத்தகாதவர்கள் என்று
அட்டவணைப்படுத்தப்பட்டதற்கான 10 காரணங்களையும் பாபாசாகேப் ஆவணங்கள் படி கூறுகிறார்...

1) பிராமணர்கள் எல்லோரையும் விட உயர்ந்தவர்கள் என்பதை ஏற்காதவர்கள்

2) பிராமணர் அல்லது வேறு இந்து சாமியாரிடமிருந்து மந்திரங்கள் பெறாதவர்கள்

3) வேதங்களின் அதிகாரத்தை மறுப்பவர்கள்

4) இந்துக்கடவுள்களை வணங்காதவர்கள்

5) புரோகிதர்களைப் பயன்படுத்தாதவர்கள்

6) பிராமணர்களின் சேவையைப் பெறாதவர்கள் (பெற மறுத்தவர்கள்)

7) இந்துக் கோயில்களில் சேர்க்கப்படாதவர்கள் (கோயில்களைப் புறக்கணித்தவர்களைச் சேர்க்கப்படாதவர்கள் என
திசைதிருப்பப்பட்டது)

8) தீட்டு ஏற்படுத்துபவர்கள் (இவன் வந்தாலே வம்பு என்று
சொல்லப்படுபவர்கள் எப்போதுமே பகுத்தறிவாளர்கள் என்பது வரலாறு)

9) இறந்தவர்களைப் புதைக்கிற இயற்கை வழிபாடு முறை கொண்டவர்கள்

10) மாட்டிறைச்சி உண்பவர்கள், பசுவை புனிதமாகக் கருதாதவர்கள்

மேற்படி 10 பண்புள்ளவர்களைப் பார்க்கும்போது அவர்கள் எப்போதும் இந்து மதத்தை ஏற்காதவர்களாகவும், தனித்த அடையாளங்களுடன் வாழ்ந்தவர்களாகவுமே உள்ளனர்.

பிராமணர்கள் கொண்டு வந்த கடவுள் கதைகள், மந்திரங்கள், வேதங்கள், மூடநம்பிக்கைகள் எதையும் ஏற்காதவர்களாகவும் நம்பாதவர்களுமாக வாழ்ந்தவர்களே பஞ்சமர்களாகிய தீண்டத்தகாதவர்கள் என்பது மேற்படி 10 பண்புகள் மூலமாகவே தெரியவருகிறது. பிராமணியத்தை ஏற்றவர்கள் சூத்திரர்கள், ஏற்காதவர்கள் பஞ்சமர்கள் என்று எளிமையாகப் புரிந்து கொள்ளலாம்.

Varnas - Representational image
Varnas - Representational image
சித்தார்த்தனை புத்தனாக மாற்றியது ஒரு நதிநீர் சிக்கல்தான்! - புத்த பூர்ணிமா சிறப்புப் பகிர்வு

தாழ்த்தப்பட்டோர் என்பது வரலாற்று நிகழ்வை அடையாளப்படுத்துவது என்கிறார் புனித பாண்டியன். வரலாறு படி பார்த்தாலும் பஞ்சமர்களைப் பூர்விக பௌத்தர்கள் என்றுதானே அம்பேத்கர் உறுதிபட மெய்ப்பித்துள்ளார். வேதம் படிக்க வேண்டும் என்று சூத்திரர்கள் போராடி, கண்களில் காய்ச்சிய கம்பியால் குத்தப்பட்டபோதும், காதுகளில் ஈயம் ஊற்றப்பட்டபோதும், `பயன்தராத வேதங்களைப் படித்து என்ன பயன்?' என்று பகுத்தறிவு வாழ்வியலை மேற்கொண்டவர்களே பஞ்சமர்கள். கோயில்களைப் புறக்கணித்தவர்களைத் தீண்டத்தகாதவர்களாக மாற்றியதில் சத்ரியர், வைசியர், சூத்திரர்களே துணை போயினர்.

ஒரு சொல் ஒரு பிரிவினரை அவமதிக்கிறது என்றால் அந்தச் சொல்லை விட்டொழித்து அவர்களுக்கான சுயமரியாதையைக் காப்பாற்றுவதுதான் மனிதத்தின் வளர்ச்சியாக இருக்க முடியும். அதைவிடுத்து ``தாழ்த்தப்பட்டோர் என்ற வார்த்தையை நாங்கள் விட்டுக் கொடுக்க மாட்டோம்" என்று அடம் பிடிப்பது ஏற்புடையதாகத் தெரியவில்லை.

இதிலிருந்து தெளிவாகப் புரிந்துகொள்வது என்னவென்றால், பாபாசாகேப் அம்பேத்கர் வழியில் பௌத்தம் ஏற்காதவர்கள் தாழ்த்தப்பட்டோர் என்ற வார்த்தையை விரும்புகிறார்கள். கடவுள், ஆன்மா உள்ளிட்ட மூடநம்பிக்கைகளை எதிர்த்த மனிதநேயப் பேரொளி புத்தரை ஏற்றவர்கள் தாழ்த்தப்பட்டோர் என்ற வார்த்தையை ஏற்பதில்லை.

அடுத்த கட்டுரைக்கு