Published:Updated:

அரிசி தவிடு, வைக்கோல், கிழிந்த வாழை இலையில் கப், டம்ளர்! பிளாஸ்டிக் பொருள்களுக்கு மாற்று

பிளாஸ்டிக் பொருள்களுக்கு மாற்றாக தயாரிக்கப்பட்ட பொருள்கள்
பிரீமியம் ஸ்டோரி
பிளாஸ்டிக் பொருள்களுக்கு மாற்றாக தயாரிக்கப்பட்ட பொருள்கள்

சுற்றுச்சூழல்

அரிசி தவிடு, வைக்கோல், கிழிந்த வாழை இலையில் கப், டம்ளர்! பிளாஸ்டிக் பொருள்களுக்கு மாற்று

சுற்றுச்சூழல்

Published:Updated:
பிளாஸ்டிக் பொருள்களுக்கு மாற்றாக தயாரிக்கப்பட்ட பொருள்கள்
பிரீமியம் ஸ்டோரி
பிளாஸ்டிக் பொருள்களுக்கு மாற்றாக தயாரிக்கப்பட்ட பொருள்கள்

பிளாஸ்டிக் பொருள்களைத் தவிர்க்கும் விதமாக, தமிழ்நாடு அரசு மீண்டும் மஞ்சப்பை கலாசாரத்தை ஊக்குவித்து வருகிறது. ஆனால், புற்றீசல் போல சமூகம் முழுவதும் பரவிக் கிடக்கும் பெரும்பாலான பிளாஸ்டிக் பொருள்களுக்கு மாற்று இருப்பதில்லை. அந்தக் குறையைப் போக்கும் விதமாக, கோயம்புத்தூர் மத்தம்பாளையம் பகுதியைச் சேர்ந்த கல்யாண்குமார், எளிதில் மட்கக்கூடிய அரிசி தவிடு, வைக்கோல், பருத்தி, வாழை இலை, கரும்பு, சுக்குச் சக்கைகள் மூலம் டம்ளர், ஸ்பூன், உணவுப் பொருள்களுக்கான ‘பேக்கேஜிங் கன்டெய்னர்’களைத் தயாரிக்கும் இயந்திரங்களை உற்பத்தி செய்து வருகிறார்.

தமிழ்நாடு கடந்து பல்வேறு மாநிலங்கள், நாடுகளிலும் அவர் தயாரிக்கும் இயந்திரங்கள் கால் பதித்து வருகின்றன. மத்தம்பாளையம் பகுதியில் உள்ள அவர்களுடைய பணிமனையில் கல்யாண்குமாரைச் சந்தித்துப் பேசினோம்.

கல்யாண்குமார்
கல்யாண்குமார்

‘‘அப்பாவோட ஊர், கோவையில இருக்கிற சாய்பாபா காலனி. அம்மாவோட ஊர், பொள்ளாச்சி பக்கத்துல இருக்கிற நெகமம். அப்பா போக்குவரத்துக் கழகத்துல ஒப்பந்த அடிப்படையில வேலை செஞ்சுட்டு இருந்தார். அப்புறம் இயந்திரங்களை உற்பத்தி பண்ற தொழில் தொடங்கினார். பாக்கு மட்டை தயாரிக்க இயந்திரத்தை உருவாக்கினார். அப்பாவுக்கு முன்னாடியே வேற ஒருத்தர் அந்த முயற்சியைப் பண்ணியிருக்கார். ஆனா, அதுல நல்ல வடிவம் கிடைக்கல. பெண்கள்கூட எளிதா பயன்படுத்தற வகையில அப்பா பாக்கு மட்டை இயந்திரம் தயாரிச்சார். அது நல்லா விற்பனையாச்சு. அப்பா காலமானப்புறம் நானும் அண்ணனும் சேர்ந்து அதே தொழிலைப் பண்ணிகிட்டு இருந்தோம். என் கல்யாணத்துக்கப்புறம், பாக்கு மட்டைல லாபம் குறையத் தொடங்குச்சு.

அதேநேரத்துல ஸ்பூனுக்கு நல்ல தேவை இருந்துச்சு. அதனால ஸ்பூன் தயாரிக்கிற இயந்திரங்களை உருவாக்கினோம். நல்ல லாபம் கிடைச்சது. அதுக்குள்ள கொரோனா வந்துருச்சு. இயந்திரங்களை வாங்கினவங்க எல்லாம், ‘திருப்பி எடுத்துக்கோங்க’னு சொன்னாங்க. பாக்குமட்டையைப் பொறுத்தவரை, அதுக்கான மூலப்பொருள்கள் கர்நாடகாவுல இருந்துதான் கொண்டு வரணும். அந்த பிரச்னை மக்களுக்குப் புரியல. கொரோனா காலத்துல ‘பிளாஸ்டிக் பேப்பர் கப்’ மறுபடியும் பயன்பாட்டுக்கு வந்துருச்சு. அதைத் தவிர்க்க முடியாதுனாலும், அதுக்கு மாற்று இருக்கானு என்கிட்ட நிறைய பேர் கேட்டாங்க.

பிளாஸ்டிக் பொருள்களுக்கு மாற்றாக தயாரிக்கப்பட்ட பொருள்கள்
பிளாஸ்டிக் பொருள்களுக்கு மாற்றாக தயாரிக்கப்பட்ட பொருள்கள்

பிளாஸ்டிக்குக்கு மாற்றா எளிதில் மட்குற பொருள்கள உற்பத்தி பண்ணலாம்னு தோணுச்சு. மக்கள் அன்றாடம் பயன்படுத்தி, தூக்கி வீசுற பொருள்கள்ல செய்யலாம்னு நினைச்சேன். அரசாங்கம் பிளாஸ்டிக்கை தடை பண்ணாலும், பல பொருள்கள்ல பிளாஸ்டிக்குக்கு மாற்று இல்லாம இருக்கு. எங்ககிட்டயே பாக்கு மட்டைல ‘டீ கப்’ பண்ணிக் கொடுங்கனு கேட்டாங்க. ஆனா, ஏற்கெனவே அதுக்கு மூலப்பொருள்கள் கிடைக்கறதுல சிக்கல் இருந்துச்சு. அப்பதான் என் கவனம் வேறு சில மூலப்பொருள்களை நோக்கிப் போச்சு’’ என்றவர், தனது புதுக் கண்டுபிடிப்பு பற்றிப் பேசினார்.

‘‘இந்தப் பகுதியைச் சுற்றி தென்னந்தோப்பு நிறைய இருக்கு. அதனால எனக்குத் தென்னை மரத்தூள் கிடைச்சது. அதுல என்னென்ன பண்ணலாம்னு 6 மாசம் ஆய்வு பண்ணேன். ஆனா, தென்னை மரத்தூள் கிடைக்கறதுலயும் சவால் இருந்துச்சு. அப்புறம் எதேச்சையா அரிசி தவிடு வெச்சு ஆய்வு பண்ணி பார்த்தோம்.

பிளாஸ்டிக் பொருள்களுக்கு மாற்றாக தயாரிக்கப்பட்ட பொருள்கள்
பிளாஸ்டிக் பொருள்களுக்கு மாற்றாக தயாரிக்கப்பட்ட பொருள்கள்

வேளாண் கழிவுகளில் ‘கப்’ தயாரிப்பு

அரிசி மாட்டுத் தீவனம்ங்றதால, அதுல ஏதும் பிரச்னை வந்துடக் கூடாதுனு அதைப் பத்தியும் நிறைய ஆய்வு பண்ணோம். தென்னை நார், வைக்கோல், வெட்டிவேர், கரும்பு, பருத்தி, சுக்கு, பேரீச்சை, காபி சக்கை மாதிரி நிறைய பொருள்களை வெச்சு முயற்சி பண்ணோம். இது எல்லாத்துலயும் டம்ளர், ஸ்பூன், கன்டெய்னர் எல்லாம் நல்லா வந்துச்சு. அதுக்குக் கிடைச்ச வரவேற்பு, இப்ப நிறைய ஆர்டர்களைக் கொடுத்துட்டு இருக்கு. ஆரம்பத்துல வீட்லயே எதிர்ப்பு வந்துச்சு. ‘சந்தைல இருக்கற விஷயத்தை விட்டுட்டு, எதுக்காகப் புதுப் பொருள்ல முதலீடு போட்டு ‘ரிஸ்க்’ எடுக்கறீங்க’னு கேட்டாங்க.

சொந்த வீடு இல்ல. வொர்க் ஷாப், வீடு எல்லாமே வாடகைதான். இருந்தாலும் யாரும் செய்யாத ஒன்றைப் பண்ணணும்ங் கறது என் ஆசை. அதைப் புரிஞ்சுக்கிட்டு அப்புறம் வீட்லயும் ஆதரவு கொடுத்தாங்க. மக்கள் பிளாஸ்டிக் டம்ளர் பயன்படுத்த முக்கியக் காரணம், அதோட தோற்றம்தான். அதே மாதிரி நல்ல தோற்றத்தோட கொடுத்தா இதையும் மக்கள் பயன் படுத்துவாங்கனு நம்பினேன். எந்த மூலப்பொருளும் கிடைக்காட்டி கோதுமை, சாக்லெட், சர்க்கரை கலவையோட கப் தயாரிக்கலாம். பயன்படுத்திட்டு அந்த டம்ளரையே கூட நம்ம சாப்பிட்டுக்கலாம். ஆனா, இந்தக் கலவைல தயாரிக்கப் பொருள்கள் ஸ்டார் ஹோட்டல்கள்ல தான் வாங்குவாங்க.

கால்நடைகளுக்குத் தீவனமாகும் டம்ளர், கப்

நம்ம தவிடு, வைக்கோல் மாதிரி மத்த மூலப்பொருள்கள்ல தயாரிக்கற பொருள்களைக் கால்நடைகளுக்கே தீவனமாவும் போடலாம். இந்த டம்ளரை அரை மணி நேரம் வரைக்கும் பயன்படுத்த முடியும். பல்வேறு அளவுகள்ல டம்ளர், ஸ்பூக், பேக்கேஜிங் கன்டெய்னர் செய்யறோம். பிளாஸ்டிக் எப்படிப் பார்த்தாலும் விஷம்தான். அதுல பண்ற பொருள்களைப் பயன் படுத்தற விளைவுகள் கொஞ்சம் கொஞ்சமாதான் வெளிப்படும். விஷம், பாக்டீரியா இல்லாத மூலப்பொருள் இதுதான் கொள்கை. கிழிஞ்ச வாழை இலையிலயும் கப் பண்றோம். அதோட உற்பத்தி செலவு ரொம்பவே கம்மி.

அரிசி தவிடு அடிப்படை இயந்திரத் துல ஒரு நாளுக்கு 2,000 டம்ளர் தயாரிக்க முடியும். மாசம் சராசரியா 40,000 ரூபாய் சம்பாதிக்க முடியும். இடைத்தரகர்கள வெச்சு போறப்ப லாபம் கிடைக்கறதுல பிரச்னை வரும். மற்ற பொருள்கள்ல இதைவிட அதிகம் சம்பாதிக்க முடியும். அதனால விலை நிர்ணயம் பண்றப்ப ரொம்ப கவனமா இருக்கணும். இதுக்காகவே நாங்க ஒரு ‘ஆப்’ வெச்சுருக்கோம். இயந்திரங்கள் வாங்கறவங்க நேரடியாக மக்கள்கிட்ட விற்பனை செய்துக்கலாம்.

மட்கும் பைகள்

இயந்திரத்துல வர்ற சின்னச் சின்ன பிரச்னைகளை எப்படி சரி பண்றதுனு அவங்களுக்கு சொல்லிக் கொடுத் துருவோம். பெரிய பிரச்னை வந்தா, நாங்களே நேரடியா போய் சரி பண்ணிடுவோம். பெல்ஜியம், ஜெர்மன் மாதிரி நிறைய நாடுகள்ல இருந்தும் கேக்கறாங்க. தமிழக அரசு மஞ்சப்பையை அறிமுகப்படுத்தினாலும், பலர் அதை வெளிய எடுத்துட்டுப் போறதை ஒரு மாதிரி பார்க்கறாங்க. அடுத்து நாங்க மளிகை, காய்கறி வாங்க பிளாஸ்டிக் பை தோற்றத்துல, எளிதுல மட்குற பைகளைத் தயாரிக்க இயந்திரங் களை உருவாக்கப்போறோம்.

தயாரிப்பு
தயாரிப்பு

நாம தயாரிக்கற பொருள் மட்க பெரிய கால அவகாசம் எல்லாம் இல்லை. தமிழக முதல்வர் மு.க.ஸ்டாலின், சுற்றுசூழல் துறை கூடுதல் தலைமை செயலாளர் சுப்ரியா சாகுவை பார்த்துப் பேசியிருக்கோம். அடுத்ததா அரசு அலுவலகங்கள்ல இந்தப் பொருள்களை அறிமுகப்படுத்தப் போறாங்க. சந்தைல இப்ப இதுக்கு தேவை இருக்கு. பிளாஸ்டிக் குக்கு மாற்றா என்னனென்ன கொண்டு வர முடியுமோ அதையெல்லாம் பண்ணுவோம்.

இப்ப இயந்திரம் தயாரிக்கறதுலதான் கவனம் செலுத்திக்கிட்டு வர்றேன். அடுத்ததா பொருள்கள் சம்பந்தமா விழிப்புணர்வு ஏற்படுத்த, பொருள்கள் மட்டும் தயாரிக்கறதுக்குத் தனி யூனிட் போடப்போறோம். குறைந்தபட்சம் 5 லட்சத்துல இருந்து 40 லட்சம் ரூபாய் வரை இயந்திரங்கள் இருக்கு. காப்புரிமைக்கும் விண்ணப்பிச்சுருக்கேன். இன்னும் கிடைக்கல. அதுக்குள்ள சில கார்ப்பரேட் நிறுவனங்கள், இதுக்கு எதிர்ப்பு தெரிவிச்சு எனக்கே போன் பண்ணி பேசறாங்க. நம்ம பண்ற வேலை மக்களுக்கு ஏதாவது ஒரு வகைல பயனுள்ளதா இருக்கணும்னுதான் இதைப் பண்ணிட்டு இருக்கேன். அரசாங்கம் காப்புரிமை கொடுத்து அங்கீகரிச்சு, மக்கள்கிட்ட எடுத்துட்டு போகணும்” என்றார் நம்பிக்கையுடன்.

தொடர்புக்கு,

கல்யாண்குமார்: 95977 15496

அனுபவமே ஆசான்!

“இயந்திரம் தயாரிக்கறதால என்கிட்ட வர்ற பலரும், ‘இன்ஜினீயரிங் முடிச்சுருக்கீங்களா?’னு கேக்கறாங்க. உண்மைய சொல்லணும்னா அப்பாவோட உடல்நிலை காரணமா கல்லூரிப் படிப்பை இடையில விட்டுட்டேன். படிச்ச பலரும் அந்தத் துறைக்குப் போறது இல்ல. அனுபவம்தான் திறமைசாலிகளை உருவாக்குது. என் அப்பா, தாத்தாவெல்லாம் இதே துறைல இருந்தவங்கதான். என் அப்பாதான் எனக்கு முன்மாதிரி. படிப்புக்கும் திறமைக்கும் சம்பந்தம் இல்லை” என்கிறார் கல்யாண்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism