Published:Updated:

கீழடியில் ஐந்தாம் கட்ட அகழாய்வுப் பணிகள் நிறைவு! - கடைசிநாளில் குவிந்த மக்கள்

கீழடியில் நடைபெற்ற 5ம் கட்ட அகழாய்வுப் பணி இன்று மாலையோடு நிறைவு பெற்றது.

கீழடி
கீழடி ( நந்தகுமார் )

மதுரை அருகே, சிவகங்கை மாவட்டத்துக்கு உட்பட்ட கீழடியில் தமிழக தொல்லியல் துறையின் சார்பாக 5-ம் கட்ட அகழாய்வுப் பணி நடைபெற்றுது. கடந்த ஜூன்13-ம் தேதி தொடங்கிய அகழாய்வுப் பணிகள் இன்று நிறைவுபெறுவதாக தொல்லியல் துறை அதிகாரிகளும், தமிழக தொல்லியல் மற்றும் தமிழ்வளர்ச்சி துறை அமைச்சர் மாஃபாபாண்டியராஜனும் ஏற்கெனவே அறிவித்திருந்தனர்.

கீழடி
கீழடி

கீழடி, கொந்தகை, பள்ளிச்சந்தை, மணலூர் என்று கீழடியில் சுற்றியுள்ள பகுதிகளில் 6ம் கட்ட அகழாய்வு பணி வரும் ஜனவரி மாதத்தின் இரண்டாவது அல்லது 3வது வாரத்தில் தொடங்கலாம் என்று தெரிகிறது. ஐந்தாம் கட்ட அகழாய்வுப் பணிகளின் இறுதி நாளான இன்று அகழாய்வுப் பணிகள் நடைபெறும் இடத்தை தொல்லியல் ஆர்வலர்களும், பொதுமக்களும், பள்ளி, கல்லூரி மாணவர்களும் திரளாக வந்து பார்வையிட்டுச் சென்றனர்.

`நமது கலாசாரத்தை உலகறிய செய்ய வேண்டும்'- கீழடி குறித்து நடிகர் சசிக்குமார்!

அகழாய்வுப் பணிகள் நிறைவு பெற்றுள்ளதால், பொதுமக்கள் 5ம் கட்ட அகழாய்வுப் பணி நடைபெற்ற 52 குழிகளையும் இனி பார்வையிட முடியாது. புவிகாந்த புலவிசை உள்ளிட்ட பல்வேறு நவீன முறைகள் மூலம் கீழடியில் ஐந்தாம் கட்ட அகழாய்வுப் பணி கொந்தகை, பள்ளிச்சந்தைக்கு இடைப்பட்ட பகுதியில் உள்ள தனியாருக்கு சொந்தமான தென்னந்தோப்பில் நடைபெற்றது.

தென்னந்தோப்பு
தென்னந்தோப்பு

இதில் ஏராளமான பழமையான சான்றுகள் கிடைத்தது. எந்த ஒரு ஜாதி, மத அடையாளங்களிலும் தழுவாமல் கீழடியில் சான்றுகள் கிடைத்ததை உலகத் தமிழர்கள் வரவேற்றனர். இந்த அகழாய்வுப் பணியில் கிடைத்த பொருட்களையும் தொடர்ந்து ஆய்வுக்கு உட்படுத்தி அதன் ஆவணங்களை தயார்செய்யும் பணியில் தொல்லியல் துறையினர் ஈடுபட்டுள்ளனர்.

கி.மு 600 முதல் கி.பி 2019 வரை... `கீழடி’ நேற்று இன்று நாளை!  #Vikatan360

ஐந்தாம் கட்ட கள ஆய்வு முடிவு பெற்றாலும் ஆய்வகங்களில் நடக்கக்கூடிய அகழாய்வின் தொடர்ச்சி ஆய்வுகள் நடைபெறும். கீழடியில் கிடைத்த எலும்புகள் புனே மற்றும் கேரளாவில் ஆய்வுக்கு உட்படுத்தப்பட்ட உள்ளன. பானை ஓட்டு பகுப்பாய்வு, உலோக மாதிரி ஆய்வுகள் சென்னை, பெங்களூர் உள்ளிட்ட பல்வேறு இடங்களிலும் ஆய்வு நடைபெற உள்ளது.

கீழடி
கீழடி

ஐந்தாம் கட்ட அகழாய்வுப் பணி நடைபெற்ற இடத்தில் அகழாய்வுப் பணி இன்று மாலையோடு நிறுத்தப்பட்டது. ஐந்தாம் கட்ட அகழாய்வுப் பணிகள் நடைபெற்ற இடங்களைப் பார்வையிட இன்று கடைசி நாள் என்பதால் பல்வேறு இடங்களில் இருந்தும் பொதுமக்கள் குவிந்தனர்.