Published:Updated:

`நல்லெண்ணத் தூதரான மதுரை சலூன் கடைக்காரர் மகள் நேத்ரா!' - உதவிக்கு கிடைத்த கெளரவம்

நேத்ரா
நேத்ரா ( ஈ.ஜெ.நந்தகுமார் )

வளர்ச்சி மற்றும் அமைதிக்கான அவை (United Nations Association for Development and Peace) என்ற தன்னார்வ அமைப்பின் சார்பாக ஏழை மக்களின் நல்லெண்ணத் தூதராக (GOODWILL AMBASSADOR FOR THE POOR) நேத்ரா அறிவிக்கப்பட்டுள்ளார்.

குறிப்பு: முதலில் வெளியான தகவல்படி இந்த UNADAP அமைப்பு ஐ.நா-வின் கிளை அமைப்பு என்று சொல்லப்பட்டது. பின்னர், இதற்கும் ஐ.நா.வுக்கும் எந்தத் தொடர்பும் இல்லை என்றும் இது ஒரு தன்னார்வ அமைப்பு என்பதும் தெரியவந்துள்ளது.

பிரதமர் நரேந்திர மோடியால் 'மன் கி பாத்' வானொலி நிகழ்ச்சியில் பாராட்டப்பட்ட மதுரையைச் சேர்ந்த சலூன் கடை உரிமையாளர் மோகனின் மகள் நேத்ராவை UNADAP என்ற தன்னார்வ அமைப்பு `ஏழை மக்களின் நல்லெண்ணத் தூதராக' அறிவித்துள்ளது மதுரை மக்கள் அனைவரையும் மகிழ்ச்சி அடைய வைத்துள்ளது.

UNADAP அறிவிப்பு
UNADAP அறிவிப்பு

மதுரை மேலமடைப் பகுதியில் சலூன் கடை வைத்திருக்கும் மோகன், கொரோனா ஊரடங்கில் கஷ்டப்படும் அப்பகுதி மக்களுக்கு தன் மகளின் படிப்புச் செலவுக்காக சேர்த்து வைத்திருந்த பணத்தைக் கொண்டு நிவாரண உதவிகளை வழங்கினார். இது பல தரப்பினராலும் பாராட்டப்பட்டது. 9-ம் வகுப்பு படிக்கும் தன் மகள் நேத்ரா வற்புறுத்தியதால் நிவாரண உதவியை வழங்கியதாக மோகன் அப்போது தெரிவித்தார்.

இந்த நிலையில் சமீபத்தில் மக்களுக்கு வானொலி உரையாற்றிய பிரதமர் மோடி, கொரோனா ஊரடங்கில் கஷ்டப்படும் மக்களுக்கு மகளின் படிப்புச் செலவுக்காக சேர்த்து வைத்திருந்த பணத்தை எடுத்து நிவாரணம் வழங்கிய மோகனைப் பாராட்டுவதாக தெரிவித்தார்.

பெற்றோருடன் நேத்ரா
பெற்றோருடன் நேத்ரா
ஈ.ஜெ.நந்தகுமார்

இதைத்தொடர்ந்து நாடு முழுவதும் அறியப்படும் நபராக மாறினார் மோகன். நடிகர் பார்த்திபன் உட்பட பலரும் மோகனை பாராட்டியது மட்டுமல்லாமல் அவர் மகள் கல்விக்கு உதவுவதாக அறிவித்துள்ளனர்.

இந்த நிலையில், மோகன் மகள் நேத்ராவை UNADAP-வின் `ஏழை மக்களின் நல்லெண்ணத் தூதராக' அறிவிக்கப்பட்டுள்ளார். மேலும், அவருடைய எதிர்காலத்திற்காக ஒரு லட்ச ரூபாயை ஊக்கத் தொகையாக வழங்கியுள்ளனர். ஜெனிவாவில் நடைபெறும் ஐ.நா மாநாட்டில் வறுமை தொடர்பாக பேசவும் வாய்ப்பளிக்கப்பட்டுள்ளதாக சொல்கிறார்கள்.

இது கௌரவப் பதவிதான் என்றாலும், பெருமை வாய்ந்தது. இதற்கு முன் இந்திய அளவிலும், தமிழ்நாட்டளவிலும் சிலருக்கு இந்த கௌரவம் அளிக்கப்பட்டுள்ளது.

நேத்ரா
நேத்ரா
ஈ.ஜெ.நந்தகுமார்

நாமும் வாழ்த்துகளைத் தெரிவித்துவிட்டு மோகன் மற்றும் நேத்ராவிடம் இதுபற்றி கேட்டபோது, ``மிகவும் மகிழ்ச்சியாக உள்ளது. எல்லோரையும் போல மக்களுக்கு உதவிகள் செய்தோம். அதற்கு இந்தளவுக்கு பாராட்டு கிடைக்கும் என்று நினைக்கவில்லை. எங்களைப் பாராட்டும் அனைவருக்கும் நன்றி'' என்றனர்.

அடுத்த கட்டுரைக்கு