Published:Updated:

`கட்டண தரிசனத்துக்கு மட்டும் லட்டு, விபூதி பிரசாதம்!' -மதுரையைப் பின்பற்றுமா திருச்செந்தூர் கோயில்?

திருச்செந்தூர்  சுப்பிரமணிய சுவாமி கோயில்
திருச்செந்தூர் சுப்பிரமணிய சுவாமி கோயில்

திருச்செந்தூர் சுப்பிரமணிய சுவாமி கோயிலில், அனைத்து பக்தர்களுக்கும் இலவச லட்டு, விபூதிப் பிரசாதம் வழங்கிட கோயில் நிர்வாகம் நடவடிக்கை எடுக்க வேண்டும் என பக்தர்கள் கோரிக்கை விடுத்துள்ளனர்.

முருகப்பெருமானின் அறுபடை வீடுகளில் இரண்டாவது படை வீடும், கடற்கரை ஓரத் தலமும் ஆனது திருச்செந்தூர் அருள்மிகு சுப்பிரமணிய சுவாமி திருக்கோயில். தமிழகக் கோயில்களில் முக்கியமான கோயிலாகவும் பரிகார ஸ்தலமாகவும் உள்ளது. இக்கோயிலில், ரூ.250 கட்டணத்தில் சிறப்பு விரைவு தரிசனம், ரூ.100 கட்டணத்தில் விரைவு தரிசனம், சிறப்புக் கட்டண தரிசனம், பொதுதரிசனம் என நான்கு வரிசை முறைகளில் பக்தர்கள் தரிசனத்திற்காகச் செல்கின்றனர்.

கோயில் முகப்பு
கோயில் முகப்பு

இதில், விழாக்காலங்கள், விசேஷ காலங்கள் மட்டுமின்றி விடுமுறை நாள்களிலும் பக்தர்கள் கூட்டம் அலைமோதுகிறது. இந்நிலையில், ரூ.250 கட்டண தரிசன வரிசையும் ரூ.100 கட்டண தரிசன வரிசையும் மகா மண்டபத்தில் நுழையும்போது ஒரே வரிசையாகிவிடுகிறது. இதனால், ரூ.250 கட்டண தரிசன வரிசையில் செல்லும் பக்தர்கள் மனக்குமுறல் அடைந்தனர்.

இதனால், பக்தர்களின் அதிருப்தியைப் போக்கும் வகையில், ரூ.250 கட்டண தரிசனத்தில் செல்லும் பக்தர்களுக்காக கொடிமரம் அருகில் பிரசாதமாக ஒரு லட்டு, இலை விபூதி வழங்கிட திருக்கோயில் நிர்வாகம் ஆலோசித்தது. இதற்காக அறநிலையத்துறை ஆணையரின் அனுமதி கேட்கப்பட்டிருந்தது. தற்போது, லட்டு மற்றும் இலை விபூதி வழங்க அறநிலையத்துறை ஆணையர் பணீந்திர ரெட்டி அனுமதியளித்திருக்கிறார்.

திருக்கோயில்
திருக்கோயில்

இதனால், விரைவில் ரூ.250 கட்டண தரிசனத்தில் செல்லும் பக்தர்களுக்கு லட்டு, பன்னீர் இலை விபூதிப் பிரசாதம் வழங்கப்பட உள்ளது. விரைவில், தமிழக முதல்வர் மற்றும் இந்து சமய அறநிலையத்துறை அமைச்சர் மூலம் லட்டு பிரசாதம் வழங்கும் நிகழ்ச்சி தொடங்க உள்ளது.

”இத்திட்டத்துக்காக, ஒரு லட்சம் பிரசாத கவர்கள் தயார் செய்யப்பட்டுள்ளன” என்று திருக்கோயில் இணை ஆணையர் அம்ரித் தெரிவித்துள்ளார். இந்நிலையில், அனைத்து பக்தர்களுக்கும் லட்டு, விபூதிப் பிரசாதம் வழங்கிட வேண்டும் என்ற கோரிக்கை எழுந்துள்ளது.

இதுகுறித்து நம்மிடம் பேசிய பக்தர்கள், “தமிழகத்தில் உள்ள 44 முதுநிலைக் கோயில்களில் பிரசித்தி பெற்றது, திருச்செந்தூர் சுப்பிரமணிய சுவாமி திருக்கோயில். தரிசனக் கட்டணம், அபிஷேகக் கட்டணம், விடுதி அறைகள், வாகன நுழைவு, முடிக் காணிக்கை, இதர கட்டணங்கள் எனப் பல வகைகளில் ஆண்டுக்கு ரூ.30 முதல் 35 கோடி வரை திருக்கோயிலுக்கு வருமானம் கிடைக்கிறது. இதுதவிர, கோயிலில் உள்ள 30 உண்டியல்கள் மூலம் மாதந்தோறும் பக்தர்களின் காணிக்கையாக ரூ.1 முதல் 1.50 கோடி வரை வருமானம் கிடைக்கிறது.

திருக்கோயில்
திருக்கோயில்

வெள்ளி, தங்கம் காணிக்கை மூலம் தனி வருமானம். அத்துடன், அன்னதானம், யானை பராமரிப்பு, கோசாலை பராமரிப்பு, திருப்பணி ஆகிய உண்டியல்களின் வருமானம் தனி. கந்தசஷ்டி, ஆவணித் திருவிழா, மாசித் திருவிழா, வைகாசி விசாகம் ஆகிய திருவிழாக்கள், முக்கிய விழாக்களாகக் கொண்டாடப்படுகின்றன.

மதுரை மீனாட்சியம்மன் கோயிலில் இன்று முதல் லட்டு பிரசாதம்...`விறுவிறு' தயாரிப்பு பணிகள்!

தினமும் ஆயிரக்கணக்கான பக்தர்கள், விழாக்கள் மற்றும் விஷேச நாள்களில் லட்சக்கணக்கான பக்தர்கள் சுவாமி தரிசனம் செய்கின்றனர். தற்போது, ரூ.250 சிறப்புக் கட்டண வரிசையில் தரிசனம் செய்யும் பக்தர்களுக்கு மட்டும் லட்டு, விபூதிப் பிரசாதம் வழங்கிட திருக்கோயில் நிர்வாகத்தால் முடிவு செய்யப்பட்டுள்ளதாகத் தகவல்கள் வெளியாகியுள்ளன. இது வரவேற்கத்தக்கதுதான்.

`கட்டண தரிசனத்துக்கு மட்டும் லட்டு, விபூதி பிரசாதம்!' -மதுரையைப் பின்பற்றுமா திருச்செந்தூர் கோயில்?

மதுரை மீனாட்சி - சுந்தரேஸ்வரர் திருக்கோயிலில், கடந்த நவம்பர் 7-ம் தேதி முதல் சுவாமி தரிசனம் செய்யும் அனைத்து பக்தர்களுக்கும் பிரசாதமாக இலவச லட்டு வழங்கப்பட்டு வருவதைப் போல அதிக வருமானம் உடைய இக்கோயிலிலும், தரிசனக் கட்டண வரிசையில் செல்லும் பக்தர்களுக்கு மட்டும் லட்டு, விபூதி பிரசாதம் வழங்கிடாமல், பாரபட்சமின்றி அனைத்து பக்தர்களுக்கும் வழங்கிட வேண்டும்” என்றனர். இதுகுறித்து இணை ஆணையரிடம் கோரிக்கை மனு அளிக்க உள்ளதாகவும் பக்தர்கள் தெரிவித்துள்ளனர்.

பின் செல்ல