Published:Updated:

சிக்கலில் ஜெட் ஏர்வேஸ்... மீண்டுவர என்ன வழி?

சிக்கலில் ஜெட் ஏர்வேஸ்... மீண்டுவர என்ன வழி?
பிரீமியம் ஸ்டோரி
சிக்கலில் ஜெட் ஏர்வேஸ்... மீண்டுவர என்ன வழி?

வாசு கார்த்தி

சிக்கலில் ஜெட் ஏர்வேஸ்... மீண்டுவர என்ன வழி?

வாசு கார்த்தி

Published:Updated:
சிக்கலில் ஜெட் ஏர்வேஸ்... மீண்டுவர என்ன வழி?
பிரீமியம் ஸ்டோரி
சிக்கலில் ஜெட் ஏர்வேஸ்... மீண்டுவர என்ன வழி?

விமானத்தில் பயணம் செய்வது  உற்சாகமான விஷயமாக இருக்க லாம். ஆனால், விமான நிறுவனம் ஒன்றை வெற்றிகரமாக நடத்துவது எளிதான வேலையில்லை என்பதற்கு அடுத்தடுத்து நமக்கு உதாரணங்கள் கிடைத்துவருகிறது. இந்தப் பட்டியலில் சேர்ந்த சமீபத்திய உதாரணம், ஜெட் ஏர்வேஸ்.

பணியாளர்களுக்கான சம்பளத்தைக் காலம் தாழ்த்திக் கொடுப்பது, விமானப் போக்குவரத்தைக் குறைப்பது என இந்த நிறுவனத்தைக் கடந்த சில மாதங்களாகப் பீடித்திருந்த பிரச்னை தற்போது வெட்ட வெளிச்சமாகி வருகிறது. கடந்த 31-ம் தேதி செலுத்தவேண்டிய கடன் தவணையைக்கூட ஜெட் ஏர்வேஸ் நிறுவனம் செலுத்தவில்லை என்றால், அந்த நிறுவனத்தின் நிலைமை எப்படி என்பதை நீங்களே யோசித்துக் கொள்ளுங்கள். உயரப் பறந்துகொண்டிருந்த ஜெட் ஏர்வேஸ் இப்போது ஏன் தாழப்பறந்து வட்டமடிக்கிறது என்பதற்கான காரணங் களைப் பார்ப்போம்.  

சிக்கலில் ஜெட் ஏர்வேஸ்... மீண்டுவர என்ன வழி?

மூன்று காலாண்டுகளாக நஷ்டம்

கச்சா எண்ணெய் விலை சில மாதங் களுக்குமுன் அதிகரித்தும், இப்போது விலை கொஞ்சம் குறைந்தும் வர்த்தகமாகி வருகிறது. கச்சா எண்ணெய்யின் இந்த விலைப் போக்கினைச் சரியாகக் கணிக்க முடியாத தால், இந்த நிறுவனத்தின் லாபம் ஆட்டம் காணத் தொடங்கியிருக்கிறது. இதனால் கடந்த ஆறு மாதங்களாக இந்த நிறுவனம் நிதி நெருக்கடியில் சிக்கித் தவிக்கிறது. தவிர, கடந்த மூன்று காலாண்டுகளாக இந்த நிறுவனம் நஷ்டத்தை மட்டுமே சந்தித்து வருகிறது.

இந்த நிறுவனத்தின் நிதிச் செயல்பாடுகள் கடந்த சில மாதங்களாக நிலையில்லாமல் இருப்பதால், கடந்த டிசம்பர் 31-ம் தேதி செலுத்த வேண்டிய கடன் தவணைத் தொகையைக்கூட செலுத்த முடியவில்லை. பணப்புழக்கம் தொடர்பான பிரச்னையால்  கடன் தவணையைச் செலுத்த முடியவில்லை என செபிக்கு அனுப்பிய கடிதத்தில் ஜெட் ஏர்வேஸ் தெரிவித்திருக்கிறது. இதனால் இந்த நிறுவனத்தின் தரமதிப்பீட்டை `சி’ பிரிவில் இருந்து `டி’-ஆக இக்ரா நிறுவனம் குறைத்திருக்கிறது. இதனால் புதிதாக நிதி திரட்டுவதில் பல சிக்கல்களைச் சந்திக்கவேண்டிய நிலைக்கு இந்த நிறுவனம் உள்ளாகியிருக்கிறது.

வாய்ப்புகள் என்ன?

நிதிச் சிக்கலில் இந்த நிறுவனம் இருப்பதால், இதன் செயல்பாடு இனி இப்படியே முடங்கி விடுமா, இப்போது ஏற்பட்டிருக்கும் சிக்கல்களை இந்த நிறுவனம் எப்படித் தீர்வு காணப் போகிறது என்பது மிகப் பெரிய கேள்விக்குறியாக இருக்கிறது.

முதல் வாய்ப்பு

இப்போதுள்ள நிலையில் இந்த நிறுவனத்துக்கு மூன்றுவிதமான வாய்ப்புகள் இருக்கின்றன. அதில் முதலாவது வாய்ப்பு, பங்குகள் விற்பனை. ஜெட் ஏர்வேஸ் நிறுவனத்தில், அதன் நிறுவனர் நரேஷ் கோயல் மற்றும் அவரது மனைவி வசம் 51 சதவிகிதப் பங்குகள் உள்ளன. 24 சதவிகிதப்  பங்குகள் எதியாட் நிறுவனம் வசம் இருக்கிறது.

இந்த நிலையில், நரேஷ் கோயல் வைத்திருக்கும் பங்குகளை விற்பனை செய்வதன் மூலம் நிதி திரட்டுவது என்பது முதல் வாய்ப்பு. அல்லது ஏற்கெனவே உள்ள முதலீட்டாளரான எதியாட் நிறுவனம் இன்னும் கூடுதலாக முதலீடு செய்வதும் ஒரு வாய்ப்பு. கடந்த 2013-ம் ஆண்டு ஜெட் ஏர்வேஸில் 2060 கோடி ரூபாயை முதலீடு செய்தது எதியாட் நிறுவனம். தவிர, கடந்த ஆண்டு அக்டோபரில் ஜெட் ஏர்வேஸின் துணை நிறுவனமான ஜெட் பிரிவிலேஜ்-ல் 35 மில்லியன் டாலரை முதலீடு செய்தது. ஏற்கெனவே முதலீடு செய்திருந்த தொகையை எப்படியாவது திரும்பப் பெற்றுவிடலாமா என்கிற யோசனையில் அந்த நிறுவனம் இருப்பதாகச் சொல்லப்படும் நிலையில், இன்னும் கூடுதலான தொகையை அந்த நிறுவனம் முதலீடு செய்யும் என்பது கேள்விக்குறியே.

சிக்கலில் ஜெட் ஏர்வேஸ்... மீண்டுவர என்ன வழி?

டாடா முதலீடு செய்யத் தயங்கியது ஏன்?

எதியாட் நிறுவனம் ஜெட் ஏர்வேஸில் மேற்கொண்டு முதலீடு செய்யத் தயாராக இல்லை எனில், இதர முதலீட்டாளர்களைத் தேடுவது அவசியம். சில மாதங்களுக்கு ஜெட் ஏர்வேஸ் நிறுவனத்தில் பங்குகளை வாங்குவது குறித்து டாடா சன்ஸ் திட்டமிட்டதாகத் தகவல்கள் வெளியாகின. ஆனால், அவை அடுத்தக் கட்டத்துக்கு நகர்ந்ததாகத் தெரியவில்லை.

ஜெட் ஏர்வேஸில் டாடா நிறுவனம் முதலீடு  செய்யாமல் போனதற்கு ஒரு காரணம் சொல்லப் படுகிறது. அதாவது, ஜெட் ஏர்வேஸில் டாடா நிறுவனம் முதலீடு செய்யும்பட்சத்தில், நிர்வாகம் தொடர்பான விஷயங்களில் நரேஷ் கோயல் தலையிடக் கூடாது என்பதே அந்த நிபந்தனை. இந்த நிபந்தனையை ஏற்றுக்கொள்ள முடியாது என நரேஷ் தரப்பிலிருந்து தெரிவிக்கப்பட்டது. இதனால் இந்த நிறுவனத்தில் டாடா முதலீடு செய்வதை நிறுத்தியதாகச் சொல்லப்படுகிறது.

இரண்டாவது வாய்ப்பு

இரண்டாவது வாய்ப்பு, இந்த நிறுவனத்துக்கான  கடனை மறுசீரமைப்பு செய்வது. இதற்குக் கடன் வழங்கிய வங்கிகள் கூட்டமைப்பு ஒப்புக்கொள்ள வேண்டும். மிக முக்கியமான இந்த முடிவு எடுக்கும் தருணம் வந்துவிட்டதா எனக் கடன் தந்த வங்கிகள் யோசித்து வருகின்றன.

இந்த நிலையில், ஜெட் ஏர்வேஸ் கணக்குகளை  தடயவியல் தணிக்கை (Forensic Audit) செய்வதற்கு எர்ன்ஸ்ட் அண்டு யங் நிறுவனத்தை எஸ்.பி.ஐ வங்கி நியமனம் செய்தி ருக்கிறது. ஏப்ரல் 1, 2014 முதல் மார்ச் 31, 2018 வரையிலான காலத்தில் இந்த நிறுவனத்தின் கணக்குகளை ஆய்வு செய்து வழங்குமாறு எர்ஜன்ஸ் அண்டு யங் நிறுவனத்திடம் எஸ்.பி.ஐ சொல்லியிருக்கிறது. இந்த அறிக்கையின் கையில் கிடைத்தபிறகு அதன் அடிப்படையிலே மறுசீரமைப்பு செய்வதற்கு ஒப்புக்கொள்ளலாமா அல்லது இதர திட்டங்கள் குறித்து யோசிக்கலாமா  என்பதை முடிவு செய்ய முடியும் என எஸ்.பி.ஐ தெரிவித்திருக்கிறது.

மூன்றாவது வாய்ப்பு

மூன்றாவது வாய்ப்பு, திவால் நடைமுறைகளை மேற்கொள்வது. கடன் தவணையைச் செலுத்த தவறிய 90 நாள்களுக்குப்பிறகு எடுக்க முடியும். இதற்கு இன்னும் அவகாசம் இருப்பதால், மற்ற இரண்டு வாய்ப்புகளைக் குறித்தே அனைவரும் திட்டமிடுவார்கள் எனத் தெரிகிறது.

கடன் மறுசீரமைப்பு

குறுகிய காலக் கடனுக்காக எஸ்.பி.ஐ மற்றும் ஜெட் ஏர்வேஸ் ஆகிய நிறுவனங்கள் திட்ட மிட்டுவருவதாகத் தெரிகிறது. ஜெட் மற்றும் எதியாட் ஆகிய நிறுவனங்கள் 45 கோடி டாலர் முதலீடு செய்யவேண்டும். அப்படிச் செய்யும் பட்சத்தில், எஸ்.பி.ஐ 45 கோடி டாலர் கடன் உதவி செய்ய முன்வந்திருக்கிறது. இந்தக் கடனை மார்ச் மாதத்துக்குள் திருப்பிக் கொடுக்கவேண்டும் என்பது கூடுதல் நிபந்தனை என்று தெரிகிறது. ஆனால், இதுகுறித்து அதிகாரப்பூர்வ அறிவிப்பு ஏதும் வெளியாகவில்லை. ஒருவேளை கூடுதலாக நிதி திரட்டும்பட்சத்தில் நரேஷ் கோயலின் பங்கு 51 சதவிகிதத்துக்கு கீழ் குறைய வாய்ப்புண்டு. நரேஷ் கோயல் தன்வசம் இருக்கும் பங்குகளைக் குறைத்துக்கொள்ள வேண்டும் என வங்கிகள் தரப்பிலிருந்து கோரிக்கை எழுவதாகத் தெரிகிறது. அப்படி ஒப்புக்கொள்ளும்பட்சத்தில் வழங்கப் பட்ட கடனைப் பங்குகளாக மாற்ற எஸ்.பி.ஐ ஏற்றுக்கொள்ளும் என்று சொல்லப்படுகிறது. 

ரூ.7,000 கோடி இழப்பு

கடந்த சில மாதங்களாக இருக்கும் இந்த பிரச்னை காரணமாக ஜெட் ஏர்வேஸ் பங்குகள் தொடர்ந்து சரிந்து வருகின்றன. 2018-ம் ஆண்டு ஜனவரியில் 876 ரூபாயில் வர்த்தகமான இந்த பங்கு, ஆனால், 2019-ம் ஆண்டு ஜனவரி 8-ம் தேதி 245 ரூபாய் என்னும் அளவுக்குச் சரிந்தது. இதனால் முதல் ரூ.7,000 கோடி அளவுக்கு இந்த நிறுவனத்தின் சந்தை மதிப்பு சரிந்தது.

உடனடி நடவடிக்கை தேவை

ஜனவரி முதல் மார்ச் வரை யிலான காலத்தில் ரூ.1,700 கோடி, 2020-ம் நிதியாண்டில் ரூ.2,445 மற்றும் 2021-ம் நிதியாண்டில் ரூ.2,167 கோடியை இந்த நிறுவனம் கடன் தொகையைச் செலுத்த வேண்டும். அதிகக் கடன், நஷ்டம், தர மதிப்பீட்டுச் சரிவு உள்ளிட்ட பல காரணங்களால் தொடர் சிக்கலில் இந்த நிறுவனம் இருக்கிறது.

கடந்த பத்து ஆண்டுகளில் ஏழு சி.இ.ஓ-கள் இருந்திருக்கிறார்கள் என்பதில் இருந்தே நரேஷ் கோயலுக்கு இந்த நிறுவனத்தின் மீதுள்ள ஈடுபாட்டினைப் புரிந்துகொள்ள முடியும். இப்போதைக்கு இந்த நிறுவனத்துக்கு உள்ள ஒரே சாதகமான விஷயம், கச்சா எண்ணெய் விலை குறைந்துவருவதுதான். இந்தச் சூழலைப் பயன்படுத்தி, நிறுவனத்தைச் சிக்கலிலிருந்து மீட்க உடனடி நடவடிக்கை எடுத்தாக வேண்டும்;

தனிநபர்களைவிட நிறுவனம் முக்கியம் என்பதை நரேஷ் கோயல் தன்னுடைய நடவடிக்கைகள் மூலம் வெளிப்படுத்த வேண்டும் என்பதே  ஆய்வாளர்களின் கருத்தாக இருக்கிறது. இல்லையெனில் இப்போதுள்ள சிக்கல்கள் பெரிதாகி, ஜெட் ஏர்வேஸ் நிறுவனம் அடுத்த கிங்ஃபிஷராகக்கூட மாறலாம்!