வெளியிடப்பட்ட நேரம்: 19:02 (16/10/2017)

கடைசி தொடர்பு:19:02 (16/10/2017)

விறுவிறுக்கும் உலகக்கோப்பை... கிறுகிறு நாக்-அவுட் சுற்றுகள் ஆரம்பம்! #FIFAU17WC #FootballTakesOver

உலகக்கோப்பை (U-17) குரூப் சுற்றுப் போட்டிகள் முடிந்துவிட்டன. ஒன்பது நாள்களாக நடந்த இந்தப் போட்டிகளில், போட்டிக்குத் தலா 3.5 கோல்கள் அடிக்கப்பட்டுள்ளன. இன்று முதல் காலிறுதிக்கு முந்தைய சுற்று தொடங்குகிறது. இனி அனைத்தும் நாக் அவுட் போட்டிகள். தோல்வியடைந்த அணி நடையைக் கட்ட வேண்டும். நிர்ணயிக்கப்பட்ட 90 நிமிடத்தில் கோல் அடிக்கவில்லை எனில், ஷூட் அவுட் முறையில் வெற்றியாளர் தீர்மானிக்கப்படுவர். இதுவரையிலான போட்டிகளில் பெரிதாக ஒரு ஸ்டார் உருவாகவில்லை. ஆனால் இனி ஒருவர் உருவெடுக்க வாய்ப்புள்ளது.

உலகக்கோப்பை

 

போட்டி 1 : அக்டோபர்  16

கொலம்பியா - ஜெர்மனி

இரண்டில் எது வெற்றிபெறும் எனக் கணிக்க முடியாது. இரண்டு அணிகளுமே குரூப் சுற்றில் குறிப்பிடத்தகுந்த வெற்றிகளைக் குவித்துள்ளன. இருந்தாலும், கொலம்பியாவின் கை ஓங்கியிருப்பதாகவே தெரிகிறது. அவர்கள் குரூப் சுற்றின் கடைசிப்போட்டியில் அமெரிக்காவை வீழ்த்திய விதம் பாராட்டுக்குரியது. போட்டி நடக்கும் டெல்லி நேரு மைதானம் அவர்களுக்கு ஏற்கெனவே நன்கு பரிச்சயம். ஜெர்மனியையும் குறைத்து மதிப்பிட முடியாது.

நேரம்: 5 மணி

இடம்: டெல்லி

கவனிக்கப்பட வேண்டிய வீரர்: ஜுவான் பெனலஸா (கொலம்பியா)

கால்பந்து

போட்டி 2 : அக்டோபர்  16

பராகுவே - அமெரிக்கா

இந்தப் போட்டியில் கோல் மழையை எதிர்பார்க்கலாம். இரு அணிகளும் அட்டாக்கிங்கில் மிரட்டும். அதேநேரத்தில் சிறுபிள்ளைத்தனமாக எதிரணியைக் கோலடிக்கவும் விட்டுவிடுவார்கள். பராகுவே விளையாடிய மூன்று போட்டியிலுமே வெற்றிபெற்றுள்ளது. இதனால், அவர்களது கை ஓங்கியிருப்பது போலத் தெரிகிறது.

நேரம்: இரவு 8 மணி

இடம்: டெல்லி

கவனிக்கப்பட வேண்டிய வீரர்: ஆலன் ராட்ரிகஸ் (பராகுவே)

 

போட்டி 3: அக்டோபர் 17

ஈரான் - மெக்ஸிகோ

இந்தப் போட்டியில் ஈரான்தான் வெல்லும் என அடித்துச் சொல்லலாம். ஜெர்மனிக்கு எதிராக 4-0 என்ற கோல் கணக்கில் வெற்றிபெற்றபின், அவர்கள்தான் இந்த டோர்னமென்ட்டின் சிறந்த டீம் என உருவெடுத்துள்ளது. எந்தப் போட்டியிலும் வெற்றி பெறாமல் இந்தச் சுற்றுக்குள் நுழைந்துள்ள ஒரே அணி மெக்ஸிகோதான். எனவே ஈரானுக்கு பெரிதாக வேலை இருக்காது. எளிதில் வென்று காலிறுதிக்கு முன்னேறும் என எதிர்பார்க்கலாம்.

நேரம்: 5 மணி

இடம்: கோவா

கவனிக்கப்பட வேண்டிய வீரர்: யுனெஸ் டெல்ஃபி (ஈரான்)

பிரான்ஸ்

போட்டி 4: அக்டோபர் 17

பிரான்ஸ் - ஸ்பெயின்

காலிறுதிக்கு முந்தைய சுற்றில் பெரும் எதிர்பார்ப்பை ஏற்படுத்தியிருப்பது இந்த மேட்ச்தான். இதுவரையில் அதிகக் கோல்கள் அடித்திருப்பது பிரான்ஸ் அணிதான். அந்த அணியின் அமைன் கௌரிதான் இதுவரை இத்தொடரில் அதிகக் கோல்கள் அடித்தவர். ஸ்பெயின் நன்றாக ஆடினாலும் அவர்களால் இந்தியச் சூழலுக்கு இன்னும் முழுமையாகத் தங்களைத் தயார் செய்துகொள்ள முடியவில்லை. போதாக்குறைக்கு கெளகாத்தியும் உஷ்ணமாக இருக்கும். இரு அணிகளும் இதுவரையிலும் தங்கள் முழு வேகத்தைக் காட்டவில்லை. இந்த மேட்ச்சில் அதை எதிர்பார்க்கலாம். 

நேரம்: 5 மணி

இடம்: கெளகாத்தி

கவனிக்கப்பட வேண்டிய வீரர்: அமைன் கெளரி(பிரான்ஸ்)

 

போட்டி 5: அக்டோபர் 17

இங்கிலாந்து - ஜப்பான்

இங்கிலாந்து குரூப் சுற்றில் மூன்று போட்டிகளிலும் வெற்றிபெற்று, அதிக கோல் அடித்த அணிகளின் பட்டியலில் இரண்டாவது இடத்தில் உள்ளது. ‘டீம் பிளே’ விளையாடுவதில் இங்கிலாந்து அணி பக்கா. ஈராக், மெக்ஸிகோ, சிலி அணிகளைத் தோற்கடித்த விதமே அதற்கு சான்று. அந்த அணியின் நட்சத்திர ஸ்ட்ரைக்கரும் அதிக கோல் அடித்தவருமான ஜேடன் சான்சோ,  டார்ட்மண்ட் க்ளப்புக்குத் திரும்பியது அணிக்குச் சற்றுப் பின்னடைவு. இருந்தாலும் ஜப்பான் குழுவாக இம்ப்ரெஸ் செய்யவில்லை. ஆட்டம் பெனால்டி வரை சென்றால் மட்டுமே இங்கிலாந்தின் வெற்றி வாய்ப்பு தடைபடும்!

நேரம் : இரவு 8 மணி

இடம்: கொல்கத்தா

கவனிக்கப்பட வேண்டிய வீரர்: ஏஞ்சல் கோமஸ் (இங்கிலாந்து)

கோமஸ்

போட்டி 6: அக்டோபர் 17

மாலி – ஈராக்

இலக்கை நோக்கி ஷாட்களை அடித்தவகையில் கணக்கிட்டால், இந்தத் தொடரில் மாலி அணிதான் பெஸ்ட் அட்டக்கிங்கைப் பெற்றுள்ளது. மூன்று ஆட்டங்களில் அவர்கள் இலக்கை நோக்கி அடித்த ஷாட்கள் 85. தவிர, பந்தைக் கடத்திச் செல்லும் வேகம், அவர்களது ஆட்டம் ரசிக்கும் வகையில் இருக்கிறது. ஈராக் அணி அவர்களுடைய டாப் ஸ்கோரர் முகமது தாவூத் இல்லாமல் களமறிங்குகிறது. இது மாலி அணிக்குச் சாதகமாக இருக்கும். மாலி வெற்றிபெறுவதில் சிரமம் இருக்காது என்றே தெரிகிறது.

நேரம்: இரவு 8 மணி

இடம்: கோவா

கவனிக்கப்பட வேண்டிய வீரர்: ஜெமோசா  ட்ரயோரே (மாலி)

 

போட்டி 7: அக்டோபர் 18 

கானா - நைஜர்

தங்களால் எவ்வளவு உக்கிரமாக விளையாட முடியும் என்பதை இந்தியாவுக்கு எதிராகக் காட்டிவிட்டது கானா அணி. வேகம், நேரடித் தாக்குதல், அட்டாக்கில் ஒழுங்கு, டிஃபன்ஸில் கெத்து என எல்லா பாக்ஸையும் டிக் அடித்திருந்தது. அந்த அணியின் வீரர்கள் தங்களால் யாரையும் வீழ்த்த முடியும் என்ற நம்பிக்கை வைத்திருக்கின்றனர்.

நேரம்: மாலை 5 மணி

இடம்: மும்பை

கவனிக்கப்பட வேண்டிய வீரர்:  எரிக் அயியா (கானா)

பாலின்ஹோ

போட்டி 8: அக்டோபர் 18 

பிரேசில் - ஹோண்டுரஸ்

சொல்லவே வேண்டியதில்லை. பிரேசில் கண்டிப்பாக வெற்றிபெறும். ஹோண்டுரஸ் கடந்த மூன்று போட்டிகளில் 10 கோல்கள் வாங்கியுள்ளது.  அந்த எண்ணிக்கை 15 ஆக உயரவும் வாய்ப்புள்ளது. காரணம், பிரேசில் அனைத்துப் போட்டிகளிலும் வெற்றிபெற்றுள்ளது. இருந்தாலும், கால்பந்தில் எது வேண்டுமானாலும் நடக்கலாமே!

நேரம்: இரவு 8 மணி

இடம்: கொச்சி

கவனிக்கப்பட வேண்டிய வீரர்: பாலினியோ (பிரேசில்)

நீங்க எப்படி பீல் பண்றீங்க


டிரெண்டிங் @ விகடன்