Published:Updated:

இந்தியாவின் முதல் பெண் பொறியாளர்! - ஏ.லலிதா

இந்தியாவின் முதல் பெண் பொறியாளர்! - ஏ.லலிதா
பிரீமியம் ஸ்டோரி
இந்தியாவின் முதல் பெண் பொறியாளர்! - ஏ.லலிதா

முதல் பெண்கள்ஹம்சத்வனி - ஓவியம் : கார்த்திகேயன் மேடி

இந்தியாவின் முதல் பெண் பொறியாளர்! - ஏ.லலிதா

முதல் பெண்கள்ஹம்சத்வனி - ஓவியம் : கார்த்திகேயன் மேடி

Published:Updated:
இந்தியாவின் முதல் பெண் பொறியாளர்! - ஏ.லலிதா
பிரீமியம் ஸ்டோரி
இந்தியாவின் முதல் பெண் பொறியாளர்! - ஏ.லலிதா

ண்டு: 1964

இடம்: நியூயார்க்... 35 நாடுகளைச் சேர்ந்த 300 பெண் பொறியாளர்கள் பங்கேற்ற `பெண் பொறியாளர்கள் மற்றும் அறிவியல் வல்லுநர்களின் முதல் சர்வதேச மாநாடு’.  

இந்தியாவின் முதல் பெண் பொறியாளர்! - ஏ.லலிதா

“ஒருவேளை, 150 ஆண்டுகளுக்கு முன் நான் பிறந்திருந்தால், என் கணவர் இறந்த அன்று அவர் சிதையுடன் சேர்ந்து எரிந்து போயிருப்பேன். படிப்புடன் நிறுத்திவிடாமல் பெண் பொறியாளர்கள் பணியிலும் தங்கள் முத்திரையைப் பதிக்க வேண்டும்” என்று உரை நிகழ்த்திய அந்தப் பெண்ணை உலகமே வாய்பிளந்து பார்த்தது. அவர்தான் இன்றைய இந்தியப் பெண் பொறியாளர்கள் அனைவருக்கும் முன்னோடியான ஏ.லலிதா... இந்தியாவின் முதல் பெண் பொறியாளர். லலிதா கடந்து வந்த பாதை வலியும் வேதனையும் நிறைந்தது. ஆனால், அதைத் தாண்டி உலகம் போற்றும் ஒரு பொறியாளராக அவரைச் சிம்மாசனத்தில் அமர்த்தி வைத்தது, அவரின் விடாமுயற்சியும் தன்னம்பிக்கையும்தான்.

சென்னைதான் லலிதாவின் தந்தைக்குப் பூர்வீகம். கிண்டி பொறியியல் கல்லூரியின் மின்பொறியியல் துறைப் பேராசிரியராகப் பணிபுரிந்து வந்தார் லலிதாவின் தந்தை பப்பு சுப்பாராவ். 1919 ஆகஸ்ட் 27 அன்று பப்புவின் ஐந்தாவது மகளாகப் பிறந்தார் லலிதா. சாதாரண நடுத்தரக் குடும்பம். அந்தக் காலத்தின் வழக்கப்படி பதினைந்தே வயதில் திருமணம் செய்துகொடுக்கப்பட்டார் லலிதா. அதன் பின்னும் விடாமல் பத்தாம் வகுப்பு வரை படித்து முடித்தார்.

1937-ம் ஆண்டு சியாமளா எனும் பெண் குழந்தையைப் பெற்றெடுத்தார் லலிதா. குழந்தை சியாமளா பிறந்து நான்கே மாதங்களில் இறந்துபோனார் லலிதாவின் கணவர். இடிந்துபோனார் லலிதா. மகளின் நிலைகண்டு வருந்திய பெற்றோர், அவரை அப்படியே சோர்ந்துபோக விடவில்லை. அவருக்குப் பிடித்த படிப்பைத் தொடர ஊக்கம் தந்தனர். உறவினரின் கடும் எதிர்ப்புக்கு இடையே லலிதா 1939-ம் ஆண்டு ராணி மேரி கல்லூரியில் முதல் வகுப்பில் இன்டர்மீடியட் தேர்ச்சி பெற்றார். அடுத்து என்ன செய்வது என்ற குழப்பம்.

சுப்பாராவ் அப்போதைய கிண்டி பொறியியல் கல்லூரி முதல்வர் கே.சி.சக்கோவிடம் கலந்தாலோசித்தார். அப்போதைய கல்வித்துறை இயக்குநராக இருந்த ஆங்கிலேயரான ஆர்.எம்.ஸ்டத்தாமின் அனுமதி கிடைத்தால், கிண்டி கல்லூரியிலேயே லலிதா பொறியியல் கற்கலாம் என்று அறிவுறுத்தினார் சக்கோ. அந்தக் காலத்தில், இந்தியாவின் சொற்ப பொறியியல் கல்லூரிகளில் ஆண்கள் மட்டுமே பயின்றுவந்தனர். இதுபோன்ற தொழில்நுட்பப் பிரிவுகளில் பெண்கள் ஆர்வம்காட்டவில்லை. ஸ்டத்தாமைச் சந்தித்து சுப்பாராவ் சிறப்பு அனுமதி கோர, ஒருவழியாகப் பொறியியல் பட்டப்படிப்பு கற்க லலிதாவுக்கு அனுமதி கிடைத்தது. 1940-ம் ஆண்டு கிண்டி பொறியியல் கல்லூரிக்குள் அடியெடுத்து வைத்த லலிதாவுக்கு உள்ளூர உதறல்தான்.

சில மாதங்கள் என்ன, சில நாள்கள்கூட கல்லூரியில் அவரால் தொடர முடியாது என்றுதான் மற்ற மாணவர்கள் நினைத்தனர். பொறியியல் பட்டப்படிப்பில் பெண்களும் சேரலாம் என்ற விளம்பரத்தை அன்றைய `தி ஹிந்து' ஆங்கில நாளேட்டில் தந்தார் சுப்பாராவ். அந்த விளம்பரம் கண்டு இன்னும் இரண்டு பெண்கள் கிண்டி கல்லூரியை அணுகி, கட்டடக்கலை பொறியாளர் படிப்பில் சேர்ந்தனர். தனியாகக் கல்லூரியில் அவதியுற்ற லலிதாவுக்கு இப்போது லீலம்மா, தெரசா என்ற இரு தோழிகள் கிடைத்தனர். நிம்மதியுடன் படிப்பைத் தொடர்ந்தார் லலிதா. 1943-ம் ஆண்டு பொறியியல் பட்டதாரியானார். சிம்லா மத்திய தரக் கட்டுப்பாட்டு அமைப்புப் பணியில் சேர்ந்தார். இரண்டாண்டுகளுக்குப் பின் அவர் தந்தை செய்துவந்த ஜெலெக்ட்ரோமோனியம் (மின் இசைக்கருவி), புகையற்ற அவன் (oven) போன்ற ஆராய்ச்சிகளில் இணைந்து பணியாற்றினார். 1948-ம் ஆண்டு முதல் அசோசியேட்டட் எலெக்ட்ரிக்கல் இண்டஸ்ட்ரீஸ் நிறுவனத்தில் பணியாற்றி வந்தார். இந்தியா முழுக்க சப்ஸ்டேஷன் வடிவமைப்பு, ஜெனரேட்டர் வடிவமைப்பு எனப் பல திட்டங்களில் பணி செய்தார். புகழ்பெற்ற பக்ராநங்கல் அணையின் ஜெனெரேட்டர்கள் இவர் வடிவமைத்தவையே.

1965-ம் ஆண்டு முதல், லண்டன் பெண் பொறியாளர்கள் சொசைட்டி மற்றும் இன்ஸ்டிட்யூஷன் ஆஃப் எலெக்ட்ரிக்கல் இன்ஜினீயர்ஸ் போன்றவற்றில் முழுநேர உறுப்பினராக வும் இருந்தார். 1979-ம் ஆண்டு தன் அறுபதாவது வயதில் இறந்தார் லலிதா.

அவரின் மகள் சியாமளா, “என் அம்மாவின் மனவலிமை எனக்கு இருந்தால் நன்றாக இருக்கும். என்னைக் கவனித்துக்கொள்ள அப்பா இல்லை என்பதை நான் ஒரு போதும் உணர்ந்தது இல்லை. கல்வி கற்க, டென்னிஸ், நீச்சல் என்று நான் விரும்பியவற்றைச் செய்ய அம்மா ஊக்கப்படுத்திக்கொண்டே இருந்தார்கள். சமூகம் என்ன சொல்லும் என்பதைப் பற்றி அவர் கவலைப்படவில்லை. என் நலனில் அக்கறைகொண்ட காரணத்தால் மறுமணமும் செய்துகொள்ளாமலேயே இருந்தார்” என்று வியக்கிறார்.

ஒட்டுமொத்த விகடனுக்கும் ஒரே ஷார்ட்கட்!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism