Published:Updated:

தேர்தலும் பெண்களும்: தேர்தலைத் தீர்மானிக்கும் சக்தியாகப் பெண்கள்!

ஒட்டுமொத்த விகடனுக்கும் ஒரே ஷார்ட்கட்

Use App
தேர்தலும் பெண்களும்: தேர்தலைத் தீர்மானிக்கும் சக்தியாகப் பெண்கள்!
தேர்தலும் பெண்களும்: தேர்தலைத் தீர்மானிக்கும் சக்தியாகப் பெண்கள்!

தேர்தலும் பெண்களும்: தேர்தலைத் தீர்மானிக்கும் சக்தியாகப் பெண்கள்!

பிரீமியம் ஸ்டோரி

2019 மக்களவைத் தேர்தலுக்கான கட்சிகளின் தேர்தல் அறிக்கைகளில், `33% இட ஒதுக்கீட்டு  மசோதா நிறைவேற்றுதல், பெண்களுக்குத் திறன் மேம்பாட்டுப் பயிற்சி, பெண்கள் தொழில் தொடங்க வட்டியில்லாக் கடன், பெண் குழந்தைகளுக்கு வங்கியில் சிறப்பு வைப்புத்தொகைத் திட்டம், பட்டதாரிப் பெண்களுக்கு கல்வி நிதி உதவி, நாப்கின் வழங்கும் திட்டம்' என, பெண்களுக்கென்று பிரத்யேக வாக்குறுதிகளை அள்ளித் தந்திருக்கிறார்கள். கடந்த காலங்களில் தமிழகத்தில் பெண்களின் வாக்குகளை மையமாகவைத்து வழங்கப்பட்ட இலவசங்கள் (டி.வி, மிக்ஸி, மின்விசிறி, கிரைண்டர், இருசக்கர வாகனம்) போன்றவற்றையும் இந்த இடத்தில் நினைவுகூர வேண்டியது  அவசியம். அதேபோல, பெண்களை மையப்படுத்திய நலத்திட்டங்கள் தமிழகத்தில் பெண்களின் வளர்ச்சிக்கு வித்திட்டவை என்பதிலும் மாற்றுக் கருத்து இருக்க முடியாது.

தொட்டில் குழந்தைத் திட்டம், பெண் குழந்தைப் பாதுகாப்புத் திட்டம், மூவலூர் இராமாமிர்தம் அம்மையார் நினைவு நிதியுதவித் திட்டம், ஈ.வே.ரா. மணியம்மையார் நினைவு ஏழை விதவை மகள் திருமண நிதி உதவித் திட்டம், அன்னை தெரசா நினைவு ஆதரவற்ற பெண் திருமண நிதி உதவித் திட்டம், டாக்டர் தர்மாம்பாள் அம்மையார் நினைவு விதவை மறுமண நிதி உதவித் திட்டம், டாக்டர் முத்துலட்சுமிரெட்டி மகப்பேறு நிதி உதவித் திட்டம், சானிட்டரி நாப்கின் வழங்கும் திட்டம், உடல் எடை பரிசோதனைத் திட்டம், மகளிர் சுய உதவிக் குழுத் திட்டம், அம்மா குழந்தைகள் நல பரிசுப் பெட்டகம், அம்மா மகப்பேறு சஞ்சீவி திட்டம், தாலிக்குத் தங்கம் திட்டம், முதியோர் உதவித்தொகை... இப்படி தமிழகத்தில் எண்ணற்ற  திட்டங்கள் பெண்களை மையமாகவைத்து ஏற்கெனவே செயல்பட்டுக்கொண்டிருக்கின்றன.

தேர்தலும் பெண்களும்: தேர்தலைத் தீர்மானிக்கும் சக்தியாகப் பெண்கள்!

இந்தத் திட்டங்கள் எல்லாம் ஏதோ ஒரு வகையில் பெண்கள் முன்னேற்றங்களுக்கு உதவியாக இருந்திருக்கின்றன.  உதாரணத்துக்கு... பெண்கள் உயர்கல்வி கற்பதை ஊக்குவிக்கும் வகையில் பட்டப்படிப்பு முடித்தவர்களுக்கு 50,000 ரூபாய் உதவித் தொகையாக வழங்கப் படுகிறது. இதன்மூலம் பெண் கல்வி ஊக்குவிப்பு தமிழகத்தில் நடந்தேறியிருக்கிறது. தி.மு.க, அ.தி.மு.க எனக் கட்சி வேறுபாடின்றி, ஆட்சியாளர்கள் பெண்களுக்கான திட்டங் களைத் தொடர்ந்து செய்ததில் பெரும் சமூக சீர்திருத்தத்தை முன்னெடுத்து இந்தியாவிலேயே முன்னோடி மாநிலமாகத் தமிழகத்தை மாற்றியிருக்கிறார்கள். அவை சமூக மாற்றத்தைத் தனிநபர் சார்ந்து குடும்ப அளவிலும், மாநில அளவிலும் பிரதிபலிக்கும் வண்ணம் அமைந்துள்ளன. அதனால்தான், காங்கிரஸ் கட்சியின் அகில இந்தியத் தலைவராக இருக்கும் ராகுல் காந்தி எத்தனையோ மாநிலங்களில் பிரசாரம் மேற்கொண்டாலும், கல்லூரி மாணவிகளிடம் உரையாடியது தமிழகத்தில்தான். அதுவும் 3,000 மாணவிகள் மத்தியில் நடப்பு அரசியல் உரையாடலை முன்னெடுத்ததும், அவர் என்ன பேச வேண்டும் என்பதைத் தீர்மானிக்கும் விதமாகப் பெண்கள் அவரிடம் நேரடியாகக் கேள்விகள் கேட்டதையும் சொல்லலாம்.

பெண்கள் பாதுகாப்புக்கு வருவோம்... மற்ற மாநிலங்களைவிடத் தமிழகம் மற்றும் அதன் தலைநகரான சென்னையில் பெண்களுக்கு எதிரான குற்றங்கள் குறைவுதான் என்றாலும் கூட, பொள்ளாச்சிக் குற்றங்கள் போன்ற சம்பவங்களும், அவற்றில் உள்ள அரசியல் தலையீடுகளும் பேரச்சம் தருவதுடன் பெண்களின் பாதுகாப்பைக் கேள்விக்கும் உள்ளாக்குகின்றன. பெண்களுக்குப் பெருமளவில் அதிகாரப் பகிர்வு அளிக்கப்படும்போதுதான் பெண்களுக்கு எதிரான குற்றங்கள் குறையும்.

இந்திய அளவில் பெண் வேட்பாளர்களை நிறுத்தியதில் பா.ஜ.க - 11%, காங்கிரஸ் - 15%, திரிணாமூல் காங்கிரஸ் - 41%, பிஜு ஜனதா தளம் - 33% என்கிற அளவில் பங்களித்திருக்கிறது. தமிழகத்திலோ நமது அரசியல் கட்சிகளின் பெண் வேட்பாளர்களாக 30 பேர் மட்டுமே நிறுத்தப்பட்டிருக்கிறார்கள்.  அதிகபட்சமாக நாம் தமிழர் கட்சி 50%  இடங் களில் பெண்களுக்கு வாய்ப்பு வழங்கியுள்ளது.

இந்தத் தேர்தலைப் பொறுத்தவரை வேட்பாளர்களில் பெண்களின் எண்ணிக்கை குறைவென்றாலும், வாக்காளர்களில்  பெண்கள் தாம் ஆண்களைவிட எண்ணிக்கையில் அதிகம். அவர்கள்தாம் அடுத்த ஐந்து ஆண்டுகளில் இந்திய அரசின் பிரதிநிதிகளைத் தேர்வு செய்யும் இடத்தில் பிரதானமாக இருக்கப் போகிறார்கள். அதேநேரத்தில் 2.1 கோடிப் பெண் வாக்காளர்கள் பெயர்கள் வாக்காளர் பட்டியலிலிருந்து நீக்கப்பட்டிருக்கின்றன என்பது அதிர்ச்சிதரக்கூடிய ஒன்று.

2011 மக்கள்தொகைக் கணக்கின்படி தோராயமாக, தொகுதிக்கு 39,000 பெண் வாக்காளர்கள் பெயர்கள் வாக்காளர் பட்டியிலில் சேர்க்கப்படாமல் உள்ளன. இதில் அதிகபட்சமாக உத்தரப்பிரதேசத்தில் ஏழு கோடிப் பெண் வாக்காளர்கள் பெயர்கள் பட்டியலில் சேர்க்கப்படாமல் உள்ளன. அதாவது, தொகுதிக்கு 87,000 வாக்காளர்கள் பட்டியலிலிருந்து விடுபட்டிருக்கிறார்கள். இவர்களில் பெரும்பாலானோர் வாக்காளர்களாகப் பதிந்துகொள்ளவில்லை என்பது வருத்தத்துக்குரியது.

தெளிவாகப் படிக்க படத்தை க்ளிக் செய்யவும்

தேர்தலும் பெண்களும்: தேர்தலைத் தீர்மானிக்கும் சக்தியாகப் பெண்கள்!

வாக்களிப்பதில் கிராமத்துப்பெண்கள் காட்டும் ஆர்வம் நகரப்பெண்களிடம் குறைந்திருக்கிறது என்றே தேர்தல் குறித்த பல ஆய்வுகள் முன்வைக்கின்றன.

1962-ம் ஆண்டு முதல் 2014-ம் ஆண்டு வரை பெண் வாக்காளர்களின் எண்ணிக்கை 20% அதிகரித்திருக்கிறது. இந்தத் தேர்தலில் பெண்களின் வாக்குப்பதிவு அதிகரிக்கும் என்ற எதிர்பார்ப்பு இருக்கிறது. சமீபத்தில் நடந்து முடிந்த ஐந்து மாநிலங்களுக்கான தேர்தலில் ஆண்களைவிட ஒரு சதவிகிதம் அதிகமாக பெண்கள் வாக்களித்திருந்தனர். இது ஒருபுறம் இருக்க, ராஜஸ்தான் முதல்வர் வேட்பாளரின் வீட்டுப் பெண்கள் வாக்களிக்காததால் ஒற்றை ஓட்டில் தோல்வியடைந்த வரலாறுகள் உண்டு. அதற்கு உதாரணம்தான்  ராஜஸ்தான் மாநில முதல்வர் வேட்பாளர் சி.பி.ஜோஷி வழக்கு.

2008-ம் ஆண்டு, டிசம்பர் மாதம், ராஜஸ்தான் மாநில சட்டமன்றத் தேர்தலில் காங்கிரஸ் கட்சித் தலைவரும் முதல்வர் வேட்பாளருமான சி.பி.ஜோஷியும், பா.ஜ.க தரப்பில் கல்யாண் சிங் சவுகானும் நாத்துவாரா தொகுதியில் போட்டியிட்டனர். தேர்தல் முடிவில் காங்கிரஸின் வேட்பாளர் ஜோஷி 62,215 வாக்குகள் பெற்று ஒற்றை ஓட்டில் தோல்வியைத் தழுவுகிறார். அவரை எதிர்த்துப் போட்டியிட்ட பா.ஜ.க வேட்பாளர் கல்யாண்சிங் 62,216 வாக்குகள் பெற்று வெற்றி பெற்றார்.  ஒற்றை ஓட்டில் தோல்வி என்பதை ஏற்றுக்கொள்ள முடியாமல் சி.பி.ஜோஷி மறு எண்ணிக்கை கோருகிறார். மீண்டும் எண்ணியதில் கல்யாண்சிங்கின் மனைவி கல்பனா இரண்டு வாக்குச்சாவடிகளில் வாக்குப் பதிவு செய்திருப்பது தெரிய வருகிறது.

டெண்டர் வாக்குகளை எண்ணவும், கள்ள ஓட்டுகள் போடப்பட்டிருப்பதைச் சுட்டிக்காட்டியும் ராஜஸ்தான் உயர் நீதிமன்றத்தில் நீதி கேட்டு 2009-ம் ஆண்டு, ஜனவரியில் சி.பி.ஜோஷி வழக்கு பதிவு செய்தார். நான்கு ஆண்டுகள் நடைபெற்ற வழக்கில் நீதிபதி தினேஷ் மகேஷ்வரி 2012-ம் ஆண்டு தீர்ப்பு வழங்கினார். நாத்துவாரா தொகுதியில் பா.ஜ.க வேட்பாளர் கல்யாண் சிங்கின் வெற்றி செல்லாது என அறிவித்தார். கள்ள ஓட்டுகள் ரத்து செய்யப்பட்டு கள்ள ஓட்டு போட்ட பா.ஜ.க வேட்பாளரின் மனைவி கல்பனா மற்றும் வேறு இருவர்மீது கிரிமினல் வழக்கு பதியவும் நீதிபதி உத்தரவிட்டார். 

தேர்தலும் பெண்களும்: தேர்தலைத் தீர்மானிக்கும் சக்தியாகப் பெண்கள்!

பா.ஜ.க வேட்பாளர் கல்யாண் சிங் உச்ச நீதிமன்றத்தில் மேல்முறையீடு செய்தார்.  கள்ள ஓட்டுகள் நீங்கலாக டெண்டர் ஓட்டுகளை மறு எண்ணிக்கை செய்யக் கோரி, உச்ச நீதிமன்றத்தில் முறையிட்டார் சி.பி.ஜோஷி. உச்ச நீதிமன்ற உத்தரவில் மீண்டும் டெண்டர் ஓட்டுகள் எண்ணப்பட்டபோது  இருவருமே சமமான வாக்குகள் பெற்று அடுத்த சிக்கலுக்குள் புகுந்தது இந்த வழக்கு.  வேட்பாளர்கள் சம வாக்குகள் பெறும்போது குலுக்கல் முறையில் தேர்வு செய்ய வேண்டும் என்று ஜோஷி கோரிக்கை விடுத்தார். இந்த விசித்திர வழக்கில் உச்ச நீதிமன்றம் 2013-ம் ஆண்டு தீர்ப்பளித்தது. 2008-ம் ஆண்டு தேர்ந்தெடுக்கப்பட்ட சட்டமன்றத்தின் பதவிக்காலமே முடிவடையும் நிலையில், நாத்துவாரா தொகுதியில் கல்யாண்சிங்  வெற்றி செல்லாது என அறிவிக்க முடியாது; அவர் நாத்துவாரா தொகுதி சட்டமன்ற உறுப்பினராகத் தொடர்வார் என விநோதத் தீர்ப்பை வழங்கி சி.பி.ஜோஷி வழக்கைத் தள்ளுபடி செய்தது உச்ச நீதிமன்றம். `சர்கார்' படத்தில் விஜய்க்கு ஓரிரவில் நியாயம் கிடைப்பது போன்றெல்லாம் தேர்தல் முறைகேடு வழக்குகளுக்கு யதார்த்தத்தில் தீர்வு கிடைக்காது. 49பி-யைப் பயன்படுத்தி நீதிமன்றத்துக்குச் சென்ற காங்கிரஸின் முதல்வர் வேட்பாளருக்கே ஐந்து ஆண்டுகள் கழித்து - சட்டமன்றத்தின் ஆயுட்காலம் முடிவடையும்போதுதான் - தீர்ப்பு வந்தது. அந்தத் தீர்ப்பிலும் கல்யாண்சிங்கின் மனைவி கள்ள ஓட்டு போட்டிருந்தது கண்டுபிடிக்கப்பட்டும் கள்ள ஓட்டுகளை நீக்கிவிட்டு மறு எண்ணிக்கைக்குத்தான் நீதிமன்றம் உத்தரவிட்டதே தவிர, தேர்தலை ரத்து செய்யவில்லை என்பது கவனிக்கப்பட வேண்டிய விஷயம்!

சமீபத்தில் கர்நாடகத் தேர்தலின்போது முன்னாள் தேர்தல் ஆணையர் குரேஷி, `தேர்தலில் ஓர் ஓட்டு எவ்வளவு பெரிய மாற்றத்தை ஏற்படுத்தும்' என்பதற்கு உதாரணமாக `ராஜஸ்தானில் சி.பி.ஜோஷி முதல்வராக முடியாமற்போன கதை'யைச் சொன்னார்.

சி.பி.ஜோஷி முதல்வராகாமல் போனதற்கு குரேஷி சொன்ன காரணம் கவனிக்கத்தக்க ஒன்று. குரேஷி தேர்தல் ஆணையராக இருந்தபோதுதான் ராஜஸ்தான் தேர்தல் சம்பவம் நடந்தேறியது. மறுவாக்கு எண்ணிக்கையின்போது சி.பி.ஜோஷியின் மனைவியும் மகளும் வாக்களிக்கவில்லை என்பது ராஜஸ்தான் தேர்தல் பொறுப்பு அதிகாரி மூலம் குரேஷிக்குத் தெரியவருகிறது. குரேஷி போன் செய்து ஏன் அவர்கள் வாக்களிக்கவில்லை என்று ஜோஷியிடம் கேட்டாராம். அவர்கள் கோயிலுக்குச் சென்றுவிட்டனர் என்று ஜோஷி பதிலளித்துள்ளார். `ஜோஷியின் மனைவி வந்து வாக்களித்திருந்தால் அன்று ராஜஸ்தான் முதல்வராகியிருப்பார் ஜோஷி' என்று கூறிய குரேஷி, கடைசியாகச் சொன்னது மிக முக்கியமானது... ``வாக்குச்சாவடிதான் தேர்தல் நாளன்று ஒவ்வொரு வாக்காளனுக்கும் கோயில்'' என்றார் அவர். அதனால் பெண்கள் வாக்களிப்பது மிக முக்கியம்.

`ஆண்கள் அதிகம் வாக்களிக்கும்போது பா.ஜ.க வெற்றி பெறுகிறது' என்கிறது மற்றோர் ஆய்வு. ஆம்... 2014 நாடாளுமன்றத் தேர்தலில் ஆண்கள் அதிக அளவில் பா.ஜ.க-வுக்கு வாக்களித்திருந்தனர். பெண்கள் குறைவாக வாக்குப்பதிவு செய்து ஆண்கள் அதிகம் வாக்குப்பதிவு செய்த இரண்டு மாநிலங்களையே இதற்கு உதாரணமாகச் சொல்லலாம். குஜராத்தில் பெண்களைவிட 7% ஆண்கள் அதிகம் வாக்களித்திருந்தனர். மத்தியப்பிரதேசத்தில் பெண்களைவிட 10% ஆண்கள் அதிகம் வாக்களித்தனர்.

 தமிழகத்தில் இந்தத் தேர்தலைத் தீர்மானிக்கக் கூடிய சக்தியாக இருந்த பிரச்னைகளில் முதலிடம் நீட் தேர்வும் அனிதாவின் மரணமும். அனிதாவின் மரணம்தான் அனைத்துக் கட்சிகளையும் நீட் தேர்வு விலக்கு நோக்கி வாக்குறுதிகளை வழங்கவைத்தது. அதேபோல, தூத்துக்குடி மரணத்தில் இறந்த பெண்கள் - குறிப்பாக வாயில் துப்பாக்கிக் குண்டு பாய்ந்து இறந்த ஸ்னோலின், எட்டு வழிச்சாலைப் போராட்டத்தை முன்னெடுத்த பெண்கள்  - குறிப்பாக, உண்ணாமலை போன்றவர்கள் இந்தத் தேர்தலில் அதிகம் கவனிக்கத்தக்க அம்சங்களாக இந்தப் பிரச்னைகளை மாற்றியதில் முக்கியப் பங்காற்றியிருக்கிறார்கள். தி.மு.க தலைவர் ஸ்டாலினிடம், `ஏன் பாசிச பா.ஜ.க என்றே அழைக்கிறீர்கள்' என்றால்,  `அது எங்கள் குரல் மட்டும் அல்ல; தூத்துக்குடி விமானத்தில் ஒலித்த மாணவி சோஃபியாவின் குரல். அதைத்தான் எங்கள் குரலாக ஒலிக்கிறோம்' என்கிறார். இன்னும்... மகனுக்காக அற்புதம்மாளின் கால் நூற்றாண்டுக்கு மேலான போராட்டம்...   இப்படி, தமிழகத் தேர்தலைத் தீர்மானிக்கும் சக்திகளாக இந்தப் பெண்கள் இருக்கிறார்கள்.

- காத்திருப்போம்!

-சுகிதா சாரங்கராஜ்,  படம்: எல்.ராஜேந்திரன்

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு