என் இல்லம் பசுமை இல்லம் - என் வீட்டுத் தோட்டத்தில் பூவெல்லாம் கேட்டுப் பார்!

``குறைந்த அளவுதான் இடம் இருக்கிறது என்பவர்கள், ஆரோக்கியம் மிகுந்த பிரண்டைச் செடிகளை தொட்டியில் வைத்து வளர்க்கலாம்’’ என்று நம்மிடம் பேசத் தொடங்கினார், காய்கறிகள், மூலிகைகள் என 100க்கும் மேற்பட்ட செடி வகைகளைத் தன்னுடைய மாடித்தோட்டத்தில் வைத்துப் பராமரித்து வரும் இல்லத்தரசி பத்மப்பிரியா. . சென்னை ராயப்பேட்டையில் உள்ள தன் மாடித்தோட்ட அனுபவங்களையும், பராமரிக்கும் முறைகளையும் நம்மிடம் பகிர்ந்துகொண்டார்.

“கடந்த மூணு வருஷமா மாடித்தோட்டம் வெச்சு பராமரிச்சுட்டு வர்றேன். ஆரம்பத்தில் புதினா, கொத்தமல்லின்னு சின்னச் சின்ன செடிகள்தான் வளர்த்தேன். கொஞ்சம் கொஞ்சமா ஆர்வம் அதிகமாகி இப்போ காய்கறிகள், பூக்கள், பழங்கள், மூலிகை வகைகள் என்று எல்லா வகையான செடிகளும் வெச்சிருக்கேன்.

நான் ஒரு தனியார் நிறுவனத்தில் வேலை பார்க்கிறேன். எப்போதும் பரபரப்பா ஓடிட்டே இருக்கிற நேரத்தில் கொஞ்ச நேரம் செடிகளோட உட்கார்ந்தால் போதும், மனசு அமைதியாயிடும். நானும் என் கணவரும் சேர்ந்து இந்தத் தோட்டத்தைப் பராமரிக்கிறோம். சென்னையில் எங்க மனசுக்கு பிடிச்ச இடம், எங்க மாடித்தோட்டம்தான். தினமும் ஒரு மணிநேரம் தோட்டத்தில் செலவிடுவோம். விடுமுறை நாளில் உரம் தயாரிக்கிறது, கழிவுகளை அகற்றுவதுன்னு சின்ன சின்ன வேலைகள் இருக்கும்.

ரெண்டு நாளைக்கு முறை தேவையான காய்கறிகளை அறுவடை செய்வோம். உண்மையிலேயே வீட்டுத்தோட்டத்தில் விளையும் காய்களுக்குத் தனிச்சுவை இருக்கு. அதோடு இயற்கை உரம் பயன்படுத்துவதால் ஆரோக்கியமும் அதிகம்.

. சில செடிகள் எல்லா மாதமும் பயனளிக்கும் சில செடிகள் அந்தந்த சீசனில்தான் பயன்படும். பொதுவாக ஜூலை மாதம் வீட்டுத்தோட்டத்தில் அவரை, மிளகாய், புடலை, பாகை என எல்லா வகையான காய்கறிகளுக்கும் விதைப்புக்கு ஏற்ற நேரம்” என்று செடிகளுக்கு தண்ணீர் ஊற்றியவாறே அவரைச் செடி வளர்க்கும் முறை பற்றி பேசினார்...

. சீசனுக்கு பெஸ்ட்!

``அவரை வகையில் செடி அவரை, கொடி அவரை என இரண்டு வகை இருக்கு. சிறிய அளவிலான இடம் இருப்பவர்கள் செடி அவரையைத் தேர்வு செய்யலாம். கொடி படரும் அளவு இடம் இருக்கிறது எனில் கொடி அவரை வளர்க்கலாம்.

செடி வளர்க்கப்போகும் தொட்டியில் தென்னங்கழிவு, மண்புழு உரம், செம்மண் ஆகியவற்றை 2:3:1 என்ற விகிதத்தில் மண் கலவையை நிரப்புங்கள். மூன்று இன்ச் அளவுக்குக் குழிதோண்டி அவரை விதைகளை விதையுங்கள்.

ஒரு தொட்டிக்கு அதிகபட்சம் இரண்டு விதைகளை விதைக்கலாம். நான்கு பேர் உள்ள குடும்பத்துக்கு மூன்று தொட்டிகள் இருந்தால் போதுமானதாக இருக்கும்.

. 12 நாள்களில் செடி துளிர்விட ஆரம்பிக்கும். 30 நாள்களில் செடி பூக்கத் தொடங்கும். இந்த நேரத்தில் 10 மில்லி லிட்டர் பஞ்சகவ்யாவை ஒரு லிட்டர் தண்ணீரில் கலந்து செடியின் மீது ஸ்பிரே செய்யுங்கள். பூக்கத் தொடங்கும்போது, செடியில் 2 செ.மீ அளவுக்குக் குழிதோண்டி முட்டை ஓடு அல்லது இயற்கை உரம் இட்டால் பூக்கள் உதிராமல் காய்க்கத் தொடங்கும்கொடி அவரை வளர்க்கிறீர்கள் எனில் செடியின் அருகே ஒரு குச்சியை நட்டுவைத்து செடி படரும்படி செய்யுங்கள். 50-வது நாள் காய்கள் காய்க்கத் தொடங்கி விடும். ஒரு முறை நட்டுவைத்த செடியை தொடர்ச்சியாகப் பராமரிப்பதன் மூலம் நான்கு மாதங்களுக்குக் காய்கள் அறுவடை செய்ய முடியும்.

கடைசி அறுவடையின்போது செடியிலேயே சில அவரை விதைகளை முற்றவிட்டு அதில் இருக்கும் விதைகளைப் பத்திரப் படுத்தி அடுத்த விதைப்புக்கான விதையாகப் பயன்படுத்தலாம்.

. குறுகிய இடம்...

மிகுந்த ஆரோக்கியம்!

குறைந்த அளவுதான் இடம் இருக்கிறது என்பவர்கள், ஆரோக்கியம் மிகுந்த பிரண்டைச் செடிகளை ஒரு தொட்டியில் வைத்து வளர்க்கலாம்.

ஒரு தொட்டியில் மண்ணை நிரப்பி, 2 செ.மீ அளவுக்கு குழிதோண்டி, பிரண்டையின் தண்டு போன்ற பகுதியை லேசாகச் சாய்த்து மண்ணில் நட்டு வையுங்கள். தண்டின் அடிப்பகுதி மண்ணில் இருக்க வேண்டும். ஒரு தொட்டியில் ஐந்திலிருந்து ஆறு பிரண்டை தண்டுகளை நட்டு வைக்கலாம்.

பிரண்டைக்கு அதிக அளவு உரமோ, தண்ணீரோ தேவையில்லை. மற்ற செடிகளுக்குத் தெளிக்கும்போது பஞ்சகவ்யா மட்டும் தெளித்தால் போதும்.

ஒரு மாதத்தில் நீங்கள் நட்டுவைத்த தண்டில் இருந்து புதிய கிளைகள்விட ஆரம்பித்து பிரண்டை படர்ந்து வளரத்தொடங்கும். தேவையான அளவு தண்டுகளை மட்டும் கத்தரிக்கோலால் கத்தரித்துப் பயன்படுத்திக் கொள்ளலாம்.

. அழகுக்கு அல்லி!

வீட்டின் முற்றத்திலோ, தோட்டத்தின் ஒரு பகுதியிலோ அழகுக்காக அல்லிச் செடிகளை வளர்க்கலாம். அகலமான பிளாஸ்டிக் தொட்டி ஒன்றை எடுத்துக்கொள்ளுங்கள். அதனுள் வைக்க சிறிய தொட்டி ஒன்றையும் எடுத்துக்கொள்ளுங்கள்.

. சிறிய தொட்டியில் முக்கால் அளவுக்கு மண் கலவை யால் நிரப்பிக்கொள்ளுங்கள். கிழங்குடன் இருக்கும் அல்லிச் செடியை மண் நிரப்பியுள்ள சிறிய தொட்டியில் நட்டுவைக்கவும்.

செடி நட்டுவைத்துள்ள சிறிய தொட்டியைப் பெரிய பிளாஸ்டிக் தொட்டியில் வைத்து, பெரிய தொட்டியின் விளிம்பு வரை தண்ணீர் ஊற்றி, சூரிய ஒளி பரவும் இடத்தில் வைத்து விடுங்கள். 45 நாளுக்குள் பூக்கத் தொடங்கி விடும். பெரிய தொட்டியில் அழகுக்காக மீன்கள்கூட வளர்க்கலாம். பார்க்க ரம்மியமாக இருக்கும்.

. ப ழைய குடம், வாளி போன்றவற்றில் செடிகள் வளர்க்கிறீர்கள் என்றால் தேவையில்லாத தண்ணீர் வெளியேறும் வகையில் அந்த பொருள்களில் அடியில் துளையிடுவது அவசியம்.

ஜன்னல்கள் இருக்கும் இடத்தில் சூரிய ஒளி கிடைக்கும் என்பவர்கள் தொட்டி வைக்க இடம் இல்லை என்றாலும், பழைய வாட்டர் பாட்டில்களில் மேல் புறத்தை வெட்டியெடுத்துவிட்டு கேனின் அடிப்பகுதியில் மண் நிரப்பிக்கொள்ளுங்கள். இதில் வெந்தயக் கீரை, புதினா, போன்றவற்றை வளர்க்கலாம். பாட்டிலின் இருபுறமும் துளையிட்டு கயிற்றில் கோத்து ஜன்னலில் தொங்கவிட்டால் வீட்டுக்கு அழகும் சேர்க்கும்.

மாடு, ஆட்டின் சாணங்களை உரமாகப் பயன்படுத்துபவர்கள் நேரடியாகச் செடியில் சாணத்தை இட்டால் செடி அதிக வெப்பத்தால் முளைக்கும் திறன் இழந்துவிடும். சாணங்களைச் சேகரித்து சிறிது சாம்பலுடன் கலந்து காயவைத்து 15 நாளுக்கு ஒருமுறை ஒரு செடிக்கு ஒரு கைப்பிடி அளவு என்ற கணக்கில் உரமாக இடலாம்.

என் இல்லம் பசுமை இல்லம் - என் வீட்டுத் தோட்டத்தில் பூவெல்லாம் கேட்டுப் பார்!

சு.சூர்யா கோமதிFollow

சு.சூர்யா கோமதி Follow