Published:Updated:

புத்துயிர்ப்பு: ஓர் ஆணை விடுவிப்பது எப்படி?

புத்துயிர்ப்பு
பிரீமியம் ஸ்டோரி
News
புத்துயிர்ப்பு

அறிவியலால் தீர்க்கமுடியாத பெரும் குழப்பம் ஒன்று உண்டு என்பார் சிக்மண்டு ஃபிராய்டு.

பெண் விடுதலையை அழுத்தமாக வலியுறுத்தும் பெரும்பாலானோர் கடந்து செல்லும் அல்லது அதே அளவுக்கு முக்கியத்துவம் அளிக்கத் தவறும் ஓரிடம் உண்டு. அது, ஆண் விடுதலை. ஒரு பெண் தன்னை மீட்டெடுத்துக்கொள்ள எவ்வளவு கடினமாகப் போராடவேண்டியிருக்கிறதோ அதே அளவுக்கு ஓர் ஆணும் தன்னை விடுவித்துக்கொள்ளப் போராடவேண்டியிருக்கிறது. இருந்தும் முதல் போராட்டத்துக்குக் கொடுக்கப்படும் கவனம் இரண்டாவதற்குக் கொடுக்கப்படுவதில்லை.

ஆனால், இப்படிச் சொல்வது அபத்தமாக இல்லையா? உலகின் எந்த மூலைக்குச் சென்றாலும், அங்கே ஆணாதிக்கம் அல்லவா செல்வாக்குமிக்கதாக இருக்கிறது? அந்த ஆதிக்கத்தின் பிடியிலிருந்து விடுபட ஒவ்வொரு பெண்ணும் கடுமையாகப் போராடவேண்டியிருக்கிறது என்பதுதானே உண்மை! ஓர் ஆண் எதற்காகப் போராட வேண்டும்? யாரை எதிர்த்து, எதிலிருந்து அவன் விடுபட வேண்டும்?

உங்கள் அன்றாட தேவைகளின் அனைத்து பொருட்களையும் சிறந்த தள்ளுபடியில் வாங்க

VIKATAN DEALS

பெண் என்றோர் அட்டைப்பெட்டியை உருவாக்கி, அதற்கென்று சில கறாரான பண்புகளை நிர்ணயித்து அதற்குள் ஒவ்வொரு பெண்ணையும் தூக்கிப்போட்டு அடைப்பதுபோல ஆணுக்கும் ஓர் அட்டைப்பெட்டி சமூகத்தில் உருவாக்கப் பட்டிருக்கிறது. அதற்குள் ஒவ்வோர் ஆணும் பலவந்தமாகத் திணிக்கப்படுகிறான். அதற்குள் அடங்கி இருக்குமாறு எச்சரிக்கப்படுகிறான்.

புத்துயிர்ப்பு: ஓர் ஆணை விடுவிப்பது எப்படி?

ஆண் பெட்டியின் பொது இயல்புகள் என்னென்ன? அவன் வலிமையானவன். அதிகாரம்மிக்கவன். முதல் பாலினம் தானே என்பதையும் அதற்குப் பிறகுதான் பெண் என்பதையும் நன்கு உணர்ந்தவன். அவன் அழுவதில்லை. மென்மையாக நடந்துகொள்வதில்லை. விட்டுக்கொடுப்பதில்லை. எந்தத் துறையிலும் உயர்பதவிகள் அவனுக்கானவை. செல்வம் அவனுக்கானது. குடும்பம் அவனுடையது. தேசம் அவனுடையது. மொழி அவனுடையது. உறவுகள் அவனுடையவை அல்லது அவனைச் சார்ந்தவை. எங்கும் எதிலும் அவனே மையம்.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

இதிலிருந்து வெளிவரும் ஆண் சமூகத்தால் பரிகசிக்கப்படுகிறான். தனது பெட்டியிலிருந்து வெளியில் வரும் ஒரு பெண் எதிர்கொள்ளும் அதே பரிகாசம். ஒரு பெண் இழைக்கும் அதிகபட்ச தீங்கு என்பது ஓர் ஆணைப் போல நடந்துகொள்வது. ஓர் ஆணின் அதிகபட்ச பிழை ஒரு பெண்ணைப் போல மாற முயற்சி செய்வது.

அறிவியலால் தீர்க்கமுடியாத பெரும் குழப்பம் ஒன்று உண்டு என்பார் சிக்மண்டு ஃபிராய்டு. ஆண்மை என்றால் என்ன? பெண்மை என்றால் என்ன? `ஒரு தெளிவான கோட்பாட்டு விளக்கத்தை அறிவியல் இதுவரை அளிக்கவில்லை' என்கிறார் அவர்.

புத்துயிர்ப்பு
புத்துயிர்ப்பு

`ஒருவர் என்னவாகப் பிறக்கிறார் என்பதற்கும் அவர் தன்னை என்னவாக உணர்கிறார் என்பதற்கும் தொடர்பு இருக்கவேண்டிய அவசியமில்லை' என்கிறார்கள் ஆய்வாளர்கள். ஒரு பெண்ணாக இருப்பதற்கும் பெண்மைக்கும் எந்தத் தொடர்புமில்லை என்பதுபோல ஓர் ஆணாக இருப்பதற்கும் ஆண்மைக்கும்கூட எந்தத் தொடர்புமில்லை. ஆண்மை என்பது ஒரு கருத்தாக்கம். சமூகத்தின் கூட்டுக்கரங்கள் அதைக் கட்டமைக்கின்றன. அந்தக் கட்டுமானத்தை ஏற்று, அதற்குள் தன்னைப் பொருத்திக்கொள்ளும் ஆண், ஆண்மையுள்ள ஆணாக அங்கீகரிக்கப்படுகிறான்.

`எனக்குச் சமையல் பிடிக்கும்' என்றோ, `நான் வீட்டில் குழந்தைகளைக் கவனித்துக்கொள்ளப் போகிறேன்' என்றோ, `என் மனைவி என்னைவிட அதிகம் படித்தவர்' என்றோ ஓர் ஆணால் நெருடலின்றி, இயல்பாகத் தன் நண்பர்களிடம் பகிர்ந்துகொள்ள முடியுமா?

ஒரு பெண் இரவு நேரத்தில் வீதியில் காலடி எடுத்து வைக்கும்போது, `நான் ஒருவனைக் காதலிக்கிறேன்' என்று அறிவிக்கும்போது, `எனக்குத் திருமணம் வேண்டாம்' என்று வலியுறுத்தும்போது, `என் உடை என் விருப்பம்' என்று சொல்லும்போது... எத்தகைய எதிர்வினைகளைச் சந்திக்க நேரிடும்? கிட்டத்தட்ட அதே எதிர்வினைகளைத்தான் ஓர் ஆணும் தனக்கான பெட்டியைவிட்டு வெளியில் வரும்போது எதிர்கொள்ள நேர்கிறது. `எனக்குச் சமையல் பிடிக்கும்' என்றோ, `நான் வீட்டில் குழந்தைகளைக் கவனித்துக்கொள்ளப் போகிறேன்' என்றோ, `என் மனைவி என்னைவிட அதிகம் படித்தவர்' என்றோ ஓர் ஆணால் நெருடலின்றி, இயல்பாகத் தன் நண்பர்களிடம் பகிர்ந்துகொள்ள முடியுமா?

முடியாது! அவ்வாறு செய்தால் தனது ‘ஆண்மை’ கேள்விக்குள்ளாக்கப்படும் என்பது அவனுக்குத் தெரியும். தீராத மன உளைச்சலுக்கு அவன் ஆட்படுகிறான். ஓர் ஆணால் தன் இயல்பான உணர்வுகளைக்கூடப் பல நேரங்களில் வெளிப்படுத்தமுடியாமல் போகிறது. `இது, அவனை மட்டுமல்ல; அவனுடன் இருப்பவர்களையும் சேர்த்தே பாதிக்கிறது' என்கிறார்கள் உளவியலாளர்கள். மன அழுத்தத்துக்கு உள்ளாகிறவர்களில் பெண்களைவிட ஆண்களே அதிகம். இருந்தும் அதற்கான மருத்துவ உதவியைக்கூட ஓர் ஆணால் இயல்பாக எடுத்துக்கொள்ள முடிவதில்லை. `உணர்ச்சிகளைக் கட்டுப்படுத்திக்கொள்ள அல்லவா என்னைப் பழக்கப்படுத்தியிருக் கிறார்கள்... வலிமையாக இருக்கவேண்டிய நான் எப்படி மனஅழுத்தம் என்று வாய் திறந்து சொல்ல முடியும்... எப்படி மருத்துவரை அணுக முடியும்... வெடித்து அழ வேண்டுமானால்கூட தனிமையில்தானே செய்ய வேண்டியிருக்கிறது...'

பெண்களைக் காட்டிலும் ஆண்கள் அதிக எண்ணிக்கையில் தற்கொலை செய்து கொள்கிறார்கள். வன்முறைகளில் ஈடுபடுபவர்களில் பெண்களைவிட ஆண்கள் பல மடங்கு அதிகம். குற்றச் செயல்களுக்காகத் தண்டிக்கப்பட்டு சிறையிலிருப்பவர்களில் பெரும் பகுதியினர் ஆண்கள். மது, போதைக்கு ஆண்களே அதிகம் அடிமையாகிக்கிடக்கிறார்கள். பாலியல் குற்றங்களில் ஈடுபடுபவர்களில் அநேகம் பேர் ஆண்கள். இளம் குற்றவாளிகளில் மிகப் பெரும்பாலானோர் ஆண்கள். வகுப்பறையில் பத்து, இருபது மாணவர்களைத் திடீரென்று சுட்டுக்கொன்றுவிட்டுத் தன்னைத்தானே மாய்த்துக்கொள்ளும் மாணவர்களில் கிட்டத்தட்ட அனைவருமே ஆண்கள். பெண்கள் மனதளவிலும் உடலளவிலும் அதிக தாக்குதல்களைச் சந்திப்பது ஆண்களிடமிருந்து.

இதெல்லாம் அமெரிக்கப் புள்ளிவிவரங்கள் என்றாலும், வெளியிலும் இதுவேதான் நிலை. இனவெறுப்பை அதிகம் உமிழ்பவர்கள் ஆண்கள். வெறுப்பு அரசியலை அதிகம் முன்னெடுப்பவர்கள் ஆண்கள். மாற்று சாதியினரை, மாற்று மதத்தினரை, அயல் நாட்டினரைத் தாக்குபவர்களில் அதிகம் பேர் ஆண்கள். வீதி தொடங்கி இணையவெளிவரை எல்லா இடங்களிலும் மோசமான நடத்தையை வெளிப்படுத்துபவர்களில் அதிகம் பேர் ஆண்கள். தன்னைக் காதலிக்க மறுத்ததற்காக ஒரு பெண்ணைத் துன்புறுத்துபவர்கள், கொல்பவர்கள் பட்டியலில் ஆண்களுக்கே முதலிடம். ஒரு பெண்ணைச் சீண்டுவது பெரும் குற்றமல்ல என்று வாதிடுபவர்கள் ஆண்கள். `பிரச்னை என்னிடம் இல்லை' என்று மற்றவர்களை நோக்கி கை நீட்டுபவர்கள் ஆண்கள்.

அவர்களால் சிலவற்றை வாய் திறந்து சொல்ல முடிவதே இல்லை. குறிப்பாக, பெண்களிடம். `எனக்குச் சில பிரச்னைகள் இருக்கின்றன. என்னால் இதைச் செய்ய முடியவில்லை. எனக்கு அங்கே செல்ல பயமாக இருக்கிறது. எனக்கு இந்தப் பாடம் புரியவில்லை, விளக்குவாயா... என்னைவிட நீ நன்றாக எழுதுகிறாய், பாடுகிறாய், பணியாற்றுகிறாய். இதை எப்படி இயக்குவது என்று எனக்குக் கற்றுக்கொடுக்க முடியுமா... நான் தவறு செய்துவிட்டேன், என்னை மன்னிப்பாயா?'

அடிப்படை ஒன்றுதான் என்றாலும் ஒவ்வொரு சமூகத்திலும் ஒவ்வொரு மாதிரியாக ஆண்மை என்னும் கருத்தாக்கம் கட்டமைக்கப்பட்டிருக்கிறது. இந்த ஆண்மை, பெண்களுக்கு மட்டும் எதிரானது அல்ல என்பதையும் கவனிக்க வேண்டும். எடுத்துக்காட்டுக்கு, அமெரிக்காவில் அது வெள்ளையின மேன்மையோடு ஒன்று கலந்திருக்கிறது. `வெள்ளையல்லாத அனைவரையும்விட நான் மேலானவன்' என்று ஒரு சராசரி அமெரிக்க ஆண் கருதுகிறான். இங்கே ஆண்மைக்கு, சாதி அடிப்படையாக அமைந்திருக்கிறது. `நான் உயர் சாதி. எனக்குக் கீழே உள்ள சாதியினரைவிட நான் மேலானவன்' என்று ஒரு சராசரி இந்தியன் கருதுகிறான்.

`நீ காலம் காலமாக அடங்கி நடப்பவள், அமைதியாக இரு' என்று இன்றும் சொல்கிறது பெண் பெட்டி. `வரலாற்றில் நீ என்றென்றும் முதல் பாலினமாக இருந்து வந்திருக்கிறாய். வேட்டையாடியிருக்கிறாய். போர் தொடுத்திருக்கிறாய். எதிரிகளை அடிமைப்படுத்தியிருக்கிறாய். பல நாடுகளை ஆண்டிருக்கிறாய். எங்கெங்கும் நீயே அதிகாரமிக்கவன்' என்று இன்னமும் போலிப் பெருமிதங்களை ஊட்டிக்கொண்டிருக்கிறது ஆணின் பெட்டி.

இந்தப் பெருமிதங்களிலிருந்து ஒவ்வோர் ஆணும் விடுபடவேண்டியிருக்கிறது. ஆண்மை என்னும் கருத்தாக்கத்தோடு மிகக் கடுமையான போராட்டம் ஒன்றை அவன் முன்னெடுக்கவேண்டியிருக்கிறது. வலிமை, துணிவு, அதிகாரம், ஆதிக்கம், முதல் பாலினம் போன்ற பண்புகளைத் தீவிர மறுவாசிப்புக்கு உட்படுத்தி அவற்றையெல்லாம் களையவேண்டியிருக்கிறது.

நிலைமை முற்றிலுமாக மாறிவிடவில்லை என்றாலும் ஒப்பீட்டளவில் பெண்கள் முன்னெப்போதும் இல்லாத அளவுக்குப் பொதுவெளிகளில், பணியிடங்களில் அதிகம் தென்படுகிறார்கள். பெண் உரிமைக்கான குரல் முன்பைவிட வலுவாக ஒலிக்கத் தொடங்கியிருக்கிறது. ஆனால், இந்தக் குரலை ஆணால் புரிந்துகொள்ள முடியவில்லை. இந்தக் குரலை எப்படி எதிர்கொள்வது என்று தெரியவில்லை. `இந்தக் குரல் எனக்குச் சவால் விடுகிறது' என்றும் `என்னை அலைக்கழிக்கிறது' என்றும் `என்னை மூழ்கடிக்கப் பார்க்கிறது' என்றும் அவன் பதற்றமடைகிறான். இதன் குறைந்தபட்ச விளைவு, ஒரு பெண்ணோடு இயல்பாக அவனால் பழக முடிவதில்லை. அதிகபட்சமாக, பெண்கள்மீதான குற்றச்செயல்கள் அதிகரிப்பதில் போய் இது முடிகிறது.

ஆண் என்னும் பெட்டியிலிருந்து ஒவ்வோர் ஆணும் வெளியில் வந்தால்தான் பெண் என்னும் பெட்டியிலிருந்தும் பெண்களால் வெளிவர இயலும்.

முதலாவது நடக்காமல் இரண்டாவது நடக்கப்போவதில்லை.