Published:Updated:

பெண்களுக்கான ஹெல்த் இன்ஷூரன்ஸ் பாலிசிகள்... ஏன்? எதற்கு? எப்படி?

ஒட்டுமொத்த விகடனுக்கும் ஒரே ஷார்ட்கட்

Use App
பெண்களுக்கான ஹெல்த் இன்ஷூரன்ஸ் பாலிசிகள்
பெண்களுக்கான ஹெல்த் இன்ஷூரன்ஸ் பாலிசிகள்

பாதுகாப்பு

பிரீமியம் ஸ்டோரி
பாதுகாப்பு என்பது சொந்த வீட்டுக்கு கிரில் கேட் போடுவதில் மட்டும் இல்லை. வீட்டு நலனுக்காக உழைக்கும் பெண்களுக்கும் குடும்ப உறுப்பினர்களுக்கும் மருத்துவ ரீதியாக ஏதாவது பிரச்னைகள் ஏற்படும்போது, சிகிச்சை எடுத்துக்கொள்வதற்காக ‘ஹெல்த் இன்ஷூரன்ஸ்’ எடுப்பதுதான் உண்மையான பாதுகாப்பு.

பெண்கள் ஹெல்த் இன்ஷூரன்ஸ் எடுத்துக்கொள்ள வேண்டியதன் அவசியம் என்ன, பெண்களுக்கான சிறப்பு பாலிசிகள் என்னென்ன போன்ற விவரங்கள் குறித்து நிதி ஆலோசகர் பி.பத்மநாபனிடம் பேசினோம்.

“தன் குடும்ப உறுப்பினர்களின் நலனிலும் பாதுகாப்பிலும் அதிக அக்கறை எடுத்துக் கொள்ளும் பெண்கள் பலரும், தங்களுடைய பாதுகாப்பு குறித்து யோசிப்பது இல்லை. ஆனால், அவர்கள்தாம் அவசியம் ஹெல்த் இன்ஷூரன்ஸ் பாலிசியை எடுத்துக்கொள்ள வேண்டும். ஏனெனில், ஆண்களைவிட அதிகமான நோய்த் தொற்று, உடல் ரீதியான பாதிப்புகள் பெண்களுக்கே வருகின்றன. எனவே, பெண்களுக்கு ஹெல்த் இன்ஷூரன்ஸ் பாலிசி மிகவும் அவசியமாகிறது. வேலைக்குப் போகும் பெண்களாக இருந்தாலும் சரி, ‘ஹோம்மேக்கர்’களாக இருந்தாலும் சரி... கட்டாயம் ஹெல்த் இன்ஷூரன்ஸ் பாலிசி எடுத்துக்கொள்ள வேண்டும்” என்றவர் பாலிசி சார்ந்த விவரங்களைப் பகிர்ந்துகொண்டார்.

 பி.பத்மநாபன்
பி.பத்மநாபன்

குரூப் பாலிசி மட்டும் போதாது

“வேலைக்குப் போகும் பெண்களில் பெரும்பாலானவர்கள், அலுவலகத்தில் ‘குரூப் பாலிசி’ இருக்கிறது என்பதற்காக, தனியாக ஹெல்த் பாலிசிகளை எடுத்துக் கொள்ளாமல் இருப்பார்கள். ஆனால், அலுவலகத்தில் குரூப் ஹெல்த் இன்ஷூரன்ஸ் பாலிசி வைத்திருந்தாலும், தனியாக ஹெல்த் பாலிசி எடுத்து வைத்திருப்பது அவசியம். ஏனெனில், பெரும்பாலான அலுவலகங்

களில் அதிகபட்சமாக ஒரு லட்சம் ரூபாய் கவரேஜுக்குத்தான் பாலிசி இருக்கும். மேலும், இடையில் வேலையை விட்டு விலகும்போது, ஏதாவது மருத்துவத் தேவையின் காரணமாக மருத்துவமனையில் தங்கி சிகிச்சை எடுக்க வேண்டிய சூழல் ஏற்பட்டால், அந்த நேரத்தில் பாலிசியைப் பயன்படுத்த முடியாது.

ஃபேமிலி ஃப்ளோட்டர்

பெண்களுக்கு உடல் சார்ந்த சில பிரச்னைகள் அதிக செலவு வைக்கும். அப்போது மருத்துவ சிகிச்சைக்குத் தேவையான பெரும்தொகை கையில் இல்லையெனில் சிக்கல்தான். எனவே, குறைந்தபட்சம் 3-5 லட்சம் ரூபாய் வரை கவரேஜ் உள்ள பாலிசிகளை எடுத்து வைத்திருப்பது நல்லது. தேவைப்படுபவர்கள் தனிநபர் பாலிசியாகவும் எடுத்து வைத்துக் கொள்ளலாம். அல்லது கணவன், குழந்தை களையும் இணைத்து ஃபேமிலி ஃப்ளோட்டர் பாலிசியாகவும் எடுத்துக் கொள்ளலாம். இதனால் தன்னுடன் சேர்த்து, குடும்பத்தின் மொத்த பாதுகாப்பையும் உறுதி செய்ய முடியும்.

பெண்களுக்கான சிறப்பு பாலிசிகள்

‘மகப்பேறு மருத்துவ காப்பீடு' கர்ப்பிணி களுக்காக உருவாக்கப்பட்ட பிரத்யேக ரைடர் (துணை பாலிசி) பாலிசி ஆகும். இதைத் தனியாக வாங்க முடியாது. ஏற்கெனவே இருக்கும் ஹெல்த் பாலிசிக்கு ரைடராக வாங்கலாம். மகப்பேறு மருத்துவ காப்பீடு பிரசவத்துக்கு முன், பிரசவத்துக்குப் பின், மற்றும் மருத்துவமனை செலவுகள் எனத் தாய், குழந்தை இருவரையும் உள்ளடக்கியது, கூடுதலாக பிரசவம் காரணமாக ஏற்படும் சிக்கல்களும் உள்ளடங்கும். ஆனால், இதில் சில விதிமுறைகள் இருக்கின்றன. இது நிறுவனத்துக்கு நிறுவனம் வேறுபடும். ரைடர் பாலிசியாக எடுத்துக்கொள்ளும்போது, இதற்கான பிரீமியம் 1,000-2,000 ரூபாய் வரை மட்டுமே இருக்கும். அதே போல `கிரிட்டிகல் இல்னஸ்' பாலிசிகளும், பெண்களுக்காக கிடைக்கின்றன. இவற்றின் மூலம், அதி நவீன மருத்துவ சிகிச்சைகளுக்கு கிளெய்ம் பெற முடியும்.

டாப்-அப் பாலிசிகள்

ஹெல்த் இன்ஷூரன்ஸ் பாலிசிகள் எடுப்பவர்கள் எல்லோரும், டாப்-அப் பாலிசிகள் பற்றித் தெரிந்துகொள்வது மிகவும் முக்கியம். குறிப்பாக பெண்கள், இந்த வகை பாலிசிகளையும், தன் ஹெல்த் இன்ஷூரன்ஸ் பாலிசிகளுடன் எடுத்துக்கொள்வது நல்லது. ஏற்கெனவே எடுத்திருக்கும் காப்பீட்டு வரம்பு போதாமல் இருந்தால், ஒரே நோயினால் ஏற்படும் செலவுகளை ஈடுசெய்ய இந்த வகை பாலிசிகள் பயன்படுகின்றன.

புற்றுநோய், சிறுநீரகச் செயலிழப்பு, மாரடைப்பு போன்ற கடுமையான நோய் களுக்கு சிகிச்சையளிக்க ஒரு முழுமையான பாலிசியுடன், டாப்-அப் செய்துகொள்ளலாம். பாலிசிதாரர் ஒரு குறிப்பிட்ட கொடிய நோயால் பாதிக்கப்பட்டிருப்பது கண்டறியப்பட்டால், அவருடைய மருத்துவச் செலவுக்குத் தேவையான மொத்த தொகையையும் இந்த டாப்-அப் பாலிசி வழங்கும்.

பெண்களுக்கான ஹெல்த் இன்ஷூரன்ஸ் பாலிசிகள்... ஏன்? எதற்கு? எப்படி?

உதாரணத்துக்கு, 5 லட்சம் ரூபாய் மதிப்புள்ள ஃபேமிலி ஃப்ளோட்டர் பாலிசி எடுக்கும்போது, வருடத்துக்கு அதிகபட்சம் 15,000 ரூபாய் பிரீமியம் செலுத்த வேண்டி வரும். 50 லட்சம் ரூபாய்க்கு எடுக்கும் போது 50,000 ரூபாய்க்கு மேல் ஆண்டு பிரீமியம் கட்ட வேண்டியிருக்கும். ஆனால், ஏற்கெனவே எடுத்திருக்கும் 5 லட்சம் ரூபாய் பாலிசியுடன், 50 லட்சம் ரூபாய்க்கு டாப்-அப் பாலிசியை எடுத்துக்கொண்டால், கூடுதலாக, அதிகபட்சம் 10,000 ரூபாய் செலுத்தினால் போதுமானது. இப்படி எடுத்துக்கொள்வதன் மூலம், 55 லட்சம் ரூபாய்க்கான மருத்துவக் காப்பீட்டை, மொத்த குடும்பமுமே பெறும்” என்றவர், பாலிசி எடுக்கும்போது கவனிக்க வேண்டிய விஷயங்கள் பற்றியும் விளக்கினார்.

“பாலிசி எடுக்கும்போது எந்தெந்த நோய்களுக்கு கிளெய்ம் கிடைக்கும், எந்த நோய்களுக்குக் காத்திருப்புக் காலம் இருக்கிறது என்பது பாலிசி பத்திரத்தில் இருக்கும். அதைப் படித்துப்பார்த்த பிறகு, பாலிசியை எடுப்பது நல்லது. பாலிசியை இளமைக் காலத்தில் எடுப்பது அவசியம். அதிக வயதில் பாலிசி எடுக்கும்போது பிரீமியம் அதிகரிப்பதோடு, ஏற்கெனவே உள்ள நோய்களுக்குக் காப்பீடு பெறுவதில் சிக்கல் உருவாகும்” என்றார்.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

பெண்களுக்கு டேர்ம் இன்ஷூரன்ஸ் தேவையா?

டேர்ம் இன்ஷூரன்ஸ் என்பது வருமானம் ஈட்டுபவர்களுக்கானது. ஏனெனில், வருமானத்தின் அடிப்படையில்தான் இந்த வகை இன்ஷூரன்ஸ் திட்டத்துக்கான முதிர்வுத் தொகையும், அதற்கான பிரீமியமும் கணக்கிடப்படுகிறது. அதுமட்டுமல்லாமல், சம்பாதித்துக்கொண்டிருப்பவருக்கு திடீரென அசம்பாவிதம் நிகழும்போது, பொருளாதார ரீதியாக மொத்த குடும்பமும் ஸ்தம்பித்துப் போகும். இந்த இக்கட்டான சூழ்நிலையிலிருந்து தப்பிப்பதற்கான பாலிசிதான் இந்த டேர்ம் இன்ஷூரன்ஸ். அதனால், வேலைக்குப் போகும் பெண்கள் இந்த வகை பாலிசியை எடுத்துக்கொள்ளலாம்.

இல்லத்தரசிகளுக்கு டேர்ம் இன்ஷூரன்ஸ் பாலிசி ஆப்ஷன் கிடையாது. இருப்பினும் பெரும்பாலான நிறுவனங்கள் கணவனின் வருமான ஆவணங்கள் அடிப்படையில் அதிகபட்சமாக 25 லட்சம் ரூபாய் வரை டேர்ம் இன்ஷூரன்ஸ் தருகின்றன. ஒருவேளை, இல்லத்தரசிகளின் பெயரில் சொத்துகள் இருந்து அவற்றின் மூலம் வருமானம் வரும்பட்சத்தில், அதற்கான ஆவணங்கள் முறையாக இருந்தால் டேர்ம் இன்ஷூரன்ஸ் எடுத்துக்கொள்ளலாம்.

உதாரணத்துக்கு, 30 வயதுள்ள ஒருவர், வருடத்துக்கு 10 லட்சம் ரூபாய் சம்பாதிப்பவராக இருந்தால், அதன் 15 மடங்கு அளவுக்கு, அதாவது அதிகபட்சமாக 1.5 கோடி ரூபாய் வரை ‘டேர்ம் இன்ஷூரன்ஸ்’ எடுத்துக்கொள்ள முடியும். இதற்கு ஆண்டு பிரீமியம் அதிகபட்சமாக 20,000 ரூபாய்க்குள் வரும். இதே 40 வயதுள்ள ஒருவர் எடுத்துக்கொள்வதாக இருந்தால், ஆண்டு பிரீமியம் 30,000 ரூபாய் கட்ட வேண்டியிருக்கும்.

அதிகமாகும் ஹெல்த் இன்ஷூரன்ஸ் பிரீமியம்

இந்திய காப்பீட்டு ஒழுங்குமுறை மற்றும் மேம்பாட்டு ஆணையமான, ஐ.ஆர்.டி.ஏ வருகிற அக்டோபர் 1-ம் தேதி முதல், ஹெல்த் இன்ஷூரன்ஸ் எடுப்பதில் சில மாற்றங்களைக் கொண்டு வர இருக்கிறது. அந்த மாற்றங்களை அனைத்து ஹெல்த் இன்ஷூரன்ஸ் நிறுவனங்களும் உடனே நடைமுறைக்குக் கொண்டு வர வேண்டும் எனவும் ஐ.ஆர்.டி.ஏ அறிவுறுத்தியுள்ளது. இது அனைத்து வகையான ஹெல்த் இன்ஷூரன்ஸ்களுக்கும் பொருந்தும். இதனால் அக்டோபர் 1-ம் தேதிக்குப் பிறகு, ஹெல்த் இன்ஷூரன்ஸ் பிரீமியம் தொகை அதிகரிக்க வாய்ப்பிருக்கிறது.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு