Published:Updated:

பள்ளி ஆசிரியர் டு ஒலிம்பிக் நடுவர்... விளையாட்டால் நனவான கனவு!

விஜயா
பிரீமியம் ஸ்டோரி
News
விஜயா

கிளப், பயிற்சி மையங்கள்னு விளை யாட்டுக்கு முக்கியத்துவம் கொடுக்கிற இடம் கல்பாக்கம். அதனால அங்கிருந்து வேற ஸ்கூலுக்கு மாறும் எண்ணமே வரல.

ஒலிம்பிக்கில் பங்கேற்பது விளையாட்டு வீரர்களுக்கு மட்டுமல்ல; நடுவர்களுக்கும் கனவுதான். அந்தக் கனவை நோக்கிய பயணத்தில் பல மைல்கல்களை சர்வ சாதாரண மாகக் கடந்திருக்கிறார் உடற்பயிற்சி ஆசிரியர் விஜயா.

“இன்றைய ராணிப்பேட்டை மாவட்டம் செங்காடுமோட்டூர்தான் என் சொந்த ஊர். எட்டாவது படிக்கும்போது மாவட்ட அளவிலான தடகளப் போட்டியில தடை தாண்டும் ஓட்டத்துல கலந்துகிட்டு பரிசு வாங்கினேன். அதுல ஆரம்பிச்சது... இன்னி வரைக்கும் மைதானம் விட்டா வீடு, வீடு விட்டா மைதானம்னு இயங்கிட்டே இருக் கேன்” என்பவர் உடற்பயிற்சி ஆசியரானதே எதிர்பாராததுதான்.

பள்ளி ஆசிரியர் டு ஒலிம்பிக் நடுவர்... விளையாட்டால் நனவான கனவு!
பள்ளி ஆசிரியர் டு ஒலிம்பிக் நடுவர்... விளையாட்டால் நனவான கனவு!

“பி.எஸ்ஸி முடிச்சதும் எம்.எஸ்ஸி படிக்கணும்னு ஆசை. என் தங்கச்சிங்க ரெண்டு பேரையும், தம்பியையும் கரையேத் தணும்னு சொல்லி எம்.எஸ்ஸி படிக்க வீட்டுல அனுமதிக்கலை. சேலம் சாரதா காலேஜ்ல விளையாட்டுத்துறை படிப்பான M.P.Ed முடிச்சு யுனிவர்சிட்டி ரேங்க் வாங்கினேன்” என்பவர், தற்போது கல்பாக்கம் இந்திய அணு சக்தி மத்தியப் பள்ளியில் உடற்பயிற்சி ஆசிரியராகப் பணியாற்றி வருகிறார்.

“கிளப், பயிற்சி மையங்கள்னு விளை யாட்டுக்கு முக்கியத்துவம் கொடுக்கிற இடம் கல்பாக்கம். அதனால அங்கிருந்து வேற ஸ்கூலுக்கு மாறும் எண்ணமே வரல. வேலை பார்த்துக்கிட்டே, எம்.பில் பண்ணினேன். நான் பண்ணின ஆய்வறிக்கைக்கு ‘Highly Commandable’னு குறிப்பிட்டு சான்றிதழ் கொடுத்தாங்க. அப்படிக் குறிப்பிட்டதால பிஹெச்.டியில எளிதா சீட் கிடைச்சது. தமிழ்நாடு விளையாட்டுப் பல்கலைக்கழகத் தோட முதல் பிஹெச்.டி பட்டதாரி நான்தான்” என்பவர் முதல் தேசிய விருது பெற்ற உடற்பயிற்சி ஆசிரியரும்கூட. “பொதுவா பாடங்கள் எடுக்குற ஆசிரியர்களுக்குத்தான் தேசிய நல்லாசிரியர் விருது கொடுப்பாங்க. என்னோட பணிகளைப் பார்த்துட்டு, என்னோட பள்ளியிலேயே அந்த விருதுக்குப் பரிந்துரை செஞ்சாங்க.

பள்ளி ஆசிரியர் டு ஒலிம்பிக் நடுவர்... விளையாட்டால் நனவான கனவு!
பள்ளி ஆசிரியர் டு ஒலிம்பிக் நடுவர்... விளையாட்டால் நனவான கனவு!
DANISH

2007-ல் தேசிய மற்றும் சர்வதேச அளவிலான தடகளப் போட்டிகளில் பங்கேற்கத் தகுதி பெறும் லெவல்-1 தேர்வு நடத்தினாங்க. இந்தியாவிலேயே அதுக்குத் தகுதிபெற்ற முதல் பெண் நான்தான். காமன்வெல்த் உள்ளிட்ட சர்வதேச தடகளப் போட்டிகள்ல நடுவராகவும், நடுவருக்கு அடுத்த நிலையான தொழில்நுட்ப அலுவலராகவும் (Technical Delegate) 50-க்கும் மேற்பட்ட தேசிய, சர்வதேசப் போட்டிகள்ல பங்கேற்று இருக்கேன்.

இந்திய அணுசக்தி மத்தியப் பள்ளிகளுக்கு இடையில வருஷா வருஷம் விளையாட்டுப் போட்டிகள் நடக்கும். நான் வேலைக்குச் சேர்ந்ததுல இருந்து அந்தப் போட்டிக்கான ரோலிங் டிராபியை விட்டுக் கொடுத்ததில்லை. வெளி பயிற்சியாளர்கள் இல்லாம நானே பயிற்சி கொடுத்துக் கூட்டிட்டுப் போவேன்” என்பவரிடம், பயிற்சி பெற்ற 1,000 மாணவர்களுக்கு மேல் மாநில, தேசிய தடகளப் போட்டிகளில் பங்கேற்று இருக் கின்றனர். அவர்களில் சிலர் ஸ்போர்ட்ஸ் கோட்டாவில் வேலையிலும் இருக்கிறார்கள்.

“ஆண்கள் கோலோச்சும் துறையில ஒரு பெண்ணா என்னுடைய வளர்ச்சிக்குப் பல தடைகள் இருந்திருக்கு. ஆனா, உழைப்பை மட்டுமே நம்பினதால தடைகள் எதுவும் என் கண்களுக்குத் தெரியலை” எனும் விஜயாவின் அல்டிமேட் கோல் ஒலிம்பிக் போட்டியின் நடுவராவது.

பள்ளி ஆசிரியர் டு ஒலிம்பிக் நடுவர்... விளையாட்டால் நனவான கனவு!
பள்ளி ஆசிரியர் டு ஒலிம்பிக் நடுவர்... விளையாட்டால் நனவான கனவு!

“ஒலிம்பிக் போட்டிக்கு நடுவராகத் தகுதி பெற்றுவிட்டேன். எனக்கான வாய்ப்புக்காகக் காத்திருக்கேன். நிச்சயம் சீக்கிரமே ஒலிம்பிக்கில் என்னைப் பார்க்கலாம்” - நம்பிக்கையுடன் நிறைவு செய்தார்.

பெஸ்ட்... பெஸ்ட்!