Published:Updated:

105 ஆண்டுகளில் முதல் பெண் தலைவர்; இந்திய உயிரியல் நிறுவனத்தில் சாதனை படைத்த த்ரிதி பானர்ஜி யார்?

த்ரிதி பானர்ஜி/ Dhriti Banerjee
த்ரிதி பானர்ஜி/ Dhriti Banerjee ( Twitter/ Zoological Survey of India )

கடந்த நூறு ஆண்டுகளில் பல பெண் ஆராய்ச்சியாளர்கள் பல சாதனைகளைச் செய்துள்ளனர். ஆனால், இந்த அமைப்பின் பொறுப்புகளை ஒரு பெண் தலைவர் ஏற்பது இதுவே முதல்முறை.

இந்தியாவில் காட்டுயிர்கள் தொடர்பான ஆராய்ச்சி அமைப்புகளில் மிகவும் பழைமையான நிறுவனங்களில் ஒன்றான இந்திய உயிரியல் நிறுவனத்தின் (Zoological Survey of India), முதல் பெண் தலைவராகத் தற்போது த்ரிதி பானர்ஜி பதவியேற்றுள்ளார்.

1916-ம் ஆண்டு ஜூலை மாதத்தில் தொடங்கப்பட்ட இந்த அமைப்பின் தலைமையிடம் கொல்கத்தாவில் உள்ளது. சுற்றுச்சூழல், காடு மற்றும் காலநிலை மாற்ற அமைச்சகத்தின் கீழ் செயல்பட்டுக் கொண்டிருக்கும் இந்த அமைப்பில் கடந்த ஒரு நூற்றாண்டாகப் பெண் தலைவர்களே பொறுப்பேற்றதில்லை. நாடு முழுக்க 16 பிராந்திய ஆராய்ச்சி மையங்களைக் கொண்ட இந்த அமைப்பு, இந்தியாவில் வாழும் உயிரினங்கள் மற்றும் அவற்றின் வாழ்விடம் குறித்து ஆய்வு செய்வது, விழிப்புணர்வு ஏற்படுத்துவது, உயிரினங்களைக் கணக்கெடுப்பது ஆகிய பணிகளைச் செய்து வருகிறது.

சர் வில்லியம் ஜோன்ஸ்
சர் வில்லியம் ஜோன்ஸ்

Zoological Survey of India அமைப்பு தொடங்கப்பட்டது 20-ம் நூற்றாண்டின் தொடக்கத்தில்தான் என்றாலும், அதன் வரலாறு 1784-ம் ஆண்டு முதலே தொடங்கிவிட்டது. 1784-ம் ஆண்டு, ஜனவரி 15-ம் தேதியன்று, சர் வில்லியம் ஜோன்ஸ் என்பவரால் வங்காள ஆசிய சொசைட்டி (Asiatic society of Bengal) என்ற அமைப்பு தொடங்கப்பட்டது. 1875-ம் ஆண்டு தொடங்கப்பட்ட இந்திய அருங்காட்சியகம் (Indian Museum), இந்திய நிலவியல் நிறுவனம் (Geological Society of India), இந்திய உயிரியல் நிறுவனம் (Zoological Survey of India) ஆகிய அனைத்துக்குமான தாய் அமைப்பாக இது கருதப்படுகிறது. நிலவியல் மற்றும் உயிரியல் படிமங்களைச் சேகரித்து ஆய்வு செய்யும் பணிகளில் ஈடுபட்டிருந்த வங்காள ஆசிய சொசைட்டி, பின்னாளில், மூன்று பிரிவுகளாகப் பிரிக்கப்பட்டு, நிலவியல் மற்றும் உயிரியல் அடிப்படையிலான ஆய்வுகளைத் தனித்துவமாக மேற்கொள்ளத் தொடங்கியது.

இவ்வளவு பழைமையான மற்றும் இந்தியாவின் சூழலியல் ஆய்வுத்துறையில் முதன்மைத்துவம் வாய்ந்த ஓர் ஆராய்ச்சி நிறுவனம், பெண் ஆய்வாளர்களைப் பணியில் அமர்த்தத் தொடங்கியது 1949-ம் ஆண்டிலிருந்துதான். மீரா மன்சுகானி என்ற முதல் பெண் ஆராய்ச்சியாளர்தான், முழுக்கவும் ஆண்களால் நிறைந்திருந்த இந்த அமைப்பில் முதல்முறையாகப் பணியில் சேர்ந்து வரலாறு படைத்தார். 2016-ம் ஆண்டின்போது, துணைத் தலைவராக இருந்த த்ரிதி பானர்ஜி, இந்திய உயிரியல் நிறுவனத்தின் வரலாற்றில் குறிப்பிடத்தக்க சேவைகளைப் புரிந்த 100 பெண் ஆய்வாளர்கள் குறித்த ஆவண நூலை உருவாக்குவதில் பங்கு வகித்தார். ``The Glorious 100 women's scientific contribution in ZSI" என்ற அந்த நூல், இந்த அமைப்பின் நூற்றாண்டு அடையாளமாக வெளியிடப்பட்டது.

Zoological survey of India Museum
Zoological survey of India Museum
Subbuka/ Wikimedia Commons

2016-ம் ஆண்டில் இந்த நூல் குறித்துப் பேசிய இந்திய உயிரியல் நிறுவனத்தின் முன்னாள் தலைவர் வெங்கடராமன், ``சமூக மற்றும் அறிவியல் வளர்ச்சியில், தேசத்தின் வளர்ச்சியில், பெண்களுக்கும் சம பங்கு இருக்கிறது என்பதை இந்த நூல் உணர்த்தும். மீரா மன்சுகானிதான் 1949-ம் ஆண்டில் இந்திய உயிரியல் நிறுவனத்தில் பணியமர்த்தப்பட்ட முதல் பெண் ஆராய்ச்சியாளர். அவரைத் தொடர்ந்து பல பெண் ஆராய்ச்சியாளர்கள் இந்த அமைப்பின் வளர்ச்சியில் முக்கியப் பங்கு வகித்துள்ளனர். அறிவியல் ஆய்வுத்துறைக்குள் இன்னும் பல பெண்களை வரவேற்பதன் மூலம் அவர்களுடைய மரபை நாங்கள் கௌரவிப்போம்" என்று கூறியிருந்தார்.

Follow @ Google News: கூகுள் செய்திகள் பக்கத்தில் விகடன் இணையதளத்தை இங்கே கிளிக் செய்து ஃபாலோ செய்யுங்கள்... செய்திகளை உடனுக்குடன் பெறுங்கள்.

கடந்த நூறு ஆண்டுகளில் பல பெண் ஆராய்ச்சியாளர்கள் பல சாதனைகளைச் செய்துள்ளனர். ஆனால், பெண் ஒருவர் இந்த அமைப்பின் தலைவராகப் பொறுப்பேற்பது இதுவே முதல்முறை. இந்திய உயிரியல் நிறுவனத்தின் முதல் பெண் தலைவராக, ஆய்வாளர் த்ரிதி பானர்ஜி தற்போது பொறுப்பேற்றுள்ளது, பெண் ஆய்வாளர்களிடையே பெரும் உற்சாகத்தைக் கொடுத்துள்ளது.

இந்திய உயிரியல் ஆய்வு  நிறுவனத்தின் முதல் பெண் தலைவர் த்ரிதி பானர்ஜி
இந்திய உயிரியல் ஆய்வு நிறுவனத்தின் முதல் பெண் தலைவர் த்ரிதி பானர்ஜி
ZSI/ Twitter

பூச்சியியல் வல்லுநரான பானர்ஜி, இரட்டைச் சிறகு உயிரின குடும்பத்தைச் சேர்ந்த பூச்சிகள் குறித்து நிபுணத்துவம் உள்ளவர். இந்திய உயிரியல் நிறுவனத்தின் உயிரின தகவல் கட்டமைப்பு, மரபணு மற்றும் மூலக்கூறு ரீதியிலான தகவல்களைச் சேகரித்தல், உயிரின மாதிரிகளைச் சேகரித்தல் ஆகியவற்றிற்குத் தலைமை வகித்துள்ளார். 1990-களில் இவர் இங்கு பணியில் சேர்ந்தபோது, இந்த நிறுவனத்தின் மொத்த ஆய்வாளர்களில் பெண்கள் 24 சதவிகிதம் பங்கு வகித்தனர். அந்த விகிதம் தற்போது 40 சதவிகிதமாக உயர்ந்துள்ளது.

இவர் கொல்கத்தாவில் அமைந்துள்ள பிரெசிடென்சி கல்லூரியில் படித்தவர். 15 அறிவியல் ஆய்வுத் திட்டங்களில் பங்கெடுத்ததோடு, இதுவரை தேசிய மற்றும் சர்வதேச அளவில் வெளியான 95 ஆய்வுக் கட்டுரைகளில் இவருடைய ஆராய்ச்சிகளின் மூலம் பங்களித்துள்ளார்.

உயிரினப் புவி வரைவியல் (Zoogeography), உயிரின வகைப்பாட்டியல் (Taxonomy), புறத்தோற்றவியல் (Morphology), மூலக்கூறு உயிரியல் ஆகிய பிரிவுகளில் பல்வேறு ஆராய்ச்சிகளைச் செய்துள்ளார். தனக்குக் கிடைத்துள்ள இந்தப் புதிய பொறுப்பு குறித்துப் பேசியவர், ``பெண்கள் தனித்துவமான ஆற்றலைப் பெற்றவர்கள். குடும்பம் மற்றும் வேலை இரண்டையும் சமமாகப் பேணிப் பாதுகாக்கும் திறனுடையவர்கள். 100 ஆண்டுக்கால பெருமை வாய்ந்த இந்திய உயிரியல் நிறுவனத்தை, பல்லுயிரிய வளப் பாதுகாப்பு மற்றும் நீண்டகால வளர்ச்சிப் பாதையில் அடுத்தகட்டத்துக்கு நகர்த்தப்போகிறோம்" என்று கூறியுள்ளார்.

Dhriti Banerjee
Dhriti Banerjee
ZSI/ Twitter
"லேடி டாக்டர்ஸ்!" - மறைக்கப்பட்ட இந்திய பெண் மருத்துவர்களின் கதை

மேலும், ``இமயமலை முதல் ஆழ்கடல்வரை வாழும் பல்வேறு உயிரினங்கள் குறித்து, இந்த நிறுவனத்தின் பெண் ஆராய்ச்சியாளர்கள் பலரும் பல்வேறு ஆய்வுகளைச் செய்து வருகிறார்கள். அந்த ஆய்வுகளின் வழியே பல புதிய உயிரினங்களையும் கண்டுபிடித்துள்ளார்கள். கடந்த நூறு ஆண்டுகளில், மொத்த ஆராய்ச்சியாளர்களில் 20 சதவிகிதம் மட்டுமே பெண்கள் இருந்தாலும்கூட, அவர்கள் அறிவியல் துறைக்குச் செய்துள்ள எண்ணற்ற பங்களிப்புகள் இந்த நிறுவனத்தில் குறிப்பிடத்தக்க பங்கு வகித்துள்ளன. இந்த அமைப்பின் மூலம் கண்டறியப்பட்ட புதிய உயிரினங்களில் 20 சதவிகிதம் பெண் ஆய்வாளர்களால் கண்டுபிடிக்கப்பட்டவை. அந்தப் பங்களிப்புகள் இனியும் அதிகமாக இருக்கும்" என்று கூறியுள்ளார்.

17-ம் நூற்றாண்டில், மேற்கத்திய மக்கள் பூச்சிகளை சாத்தான்களின் பிள்ளைகளாகப் பார்த்துக்கொண்டிருந்தனர். அப்போதெல்லாம் யாருமே பூச்சிகளில் பெரிதாக ஈடுபாடு செலுத்தியதில்லை. இறந்த சடலங்கள் அழுகிப் போகும்போது அவற்றிலிருந்து உருவாகும் உயிரினங்களாகவே இவற்றை மக்கள் கருதினார்கள். அதனால், அவற்றை சாத்தானின் பிள்ளைகளாக வர்ணித்தார்கள். அந்தக் காலகட்டத்தில் ஜெர்மனியில் பிறந்த மரியா சிபிலா மெரியன் என்ற பெண்ணுக்கு, அத்தகைய சாத்தானின் பிள்ளைகளை ஆய்வு செய்ய வேண்டும் என்ற ஆர்வம் மேலோங்கியது.

Zoological Survey of India
Zoological Survey of India
ZSI/ Twitter
`பெண் என்பதால் மறுப்பதா? மாணவியை போலந்து அழைத்துச் செல்லுங்கள்!' - உத்தரவிட்ட உயர்நீதிமன்றம்

புழுக்களின் மீது அதீத ஆர்வம் கொண்டவர், அவை மூன்று கட்ட வளர்ச்சிக்குப் பிறகு வண்ணத்துப்பூச்சிகளாக, அந்துப்பூச்சிகளாக உருமாற்றம் அடைவதை முதன்முதலாக ஆய்வு செய்தார். அவர் தொடங்கிவைத்த அந்த ஆய்வுப் பயணத்தில், பின்னாளில் பலரும் ஈடுபட்டு, பூச்சி உலகத்தின் பல அதிசயங்களை வெளிக்கொணர்ந்தனர். இன்றுவரை, மரியா சிபிலா மெரியன் பூச்சிகளின் மூதாய் என்று அழைக்கப்படுகிறார் என்பது வரலாறு.

அவரைப் போலவே, இன்று இந்தியாவிலும் பூச்சியியல் ஆராய்ச்சியாளராக, முக்கியத்துவம் வாய்ந்த உயிரியல் ஆய்வு நிறுவனத்தின் தலைவராக உயர்ந்து வரலாறு படைத்திருக்கிறார் த்ரிதி.

அடுத்த கட்டுரைக்கு