Published:Updated:

பெண்களும் இனி பங்காளிகள்!

பங்காளிகள்
பிரீமியம் ஸ்டோரி
பங்காளிகள்

சொத்துரிமை

பெண்களும் இனி பங்காளிகள்!

சொத்துரிமை

Published:Updated:
பங்காளிகள்
பிரீமியம் ஸ்டோரி
பங்காளிகள்
இந்து கூட்டுக் குடும்பச் சொத்தில் மகன்களைப்போலவே மகள்களுக்கும் சம உரிமை உண்டு’ என்ற அதிரடியான, வரவேற்கப்பட வேண்டிய தீர்ப்பை வழங்கியிருக்கிறது உச்ச நீதிமன்றம்.

1956-ம் ஆண்டு அமல்படுத்தப்பட்ட இந்து வாரிசு உரிமைச் சட்டம், குடும்பத்தின் பரம்பரைச் சொத்தில் ஆண் வாரிசுகளுக்கு மட்டுமே உரிமை உண்டு என்றது. பல ஆண்டுப் போராட்டங்களுக்குப் பிறகு, 2005-ல் இந்து வாரிசு உரிமைச் சட்டத் திருத்தம் கொண்டுவரப்பட்டது. அதில், ஆண்களைப்போலவே பெண்களும் வாரிசுதான் என்று சட்டத் திருத்தம் செய்யப்பட்டது. என்றாலும் இந்தச் சட்டத் திருத்தத்திலும் சில சிக்கல்கள் முளைத்தன.

1989-ல் தமிழகத்தில் கொண்டுவரப்பட்ட இந்து வாரிசுரிமைச் சட்டம் என்பது தனி.

பெண்களும் இனி பங்காளிகள்!

உச்ச நீதிமன்றம் ஒரு வழக்கில், ‘இந்து வாரிசு உரிமைச் சட்டத் திருத்தம் கொண்டுவரப்பட்ட 2005-ம் ஆண்டுக்கு முன்பு, சொத்து கோரும் பெண்ணின் தந்தை உயிரிழந்திருந்தால், அந்தப் பெண்ணால் சொத்தில் உரிமை கோர முடியாது’ என்று வழங்கிய தீர்ப்பு சிக்கலை ஏற்படுத்தியது. இதைத் தொடர்ந்து, ‘இந்து வாரிசு உரிமை திருத்தச் சட்டம் 2005’ தொடர்பாகப் பல்வேறு வழக்குகள் தொடரப்பட்டு முரண்பட்ட தீர்ப்புகள் வழங்கப்பட்டன.

இந்த நிலையில், நீதிபதிகள் அருண் மிஸ்ரா, எஸ்.அப்துல் நசீர், எம்.ஆர்.ஷா ஆகியோர் அடங்கிய அமர்வு, வினீதா ஷர்மா என்பவரின் வழக்கில், ‘2005-க்கு முன்பு பெண்ணின் தந்தை இறந்திருந்தாலும் கூட்டுக் குடும்ப சொத்தில் பெண்களுக்குச் சம உரிமை உண்டு’ என அதிரடியான தீர்ப்பை வழங்கியிருக்கிறது. இந்தத் தீர்ப்பு குறித்து வழக்கறிஞர் அஜிதாவிடம் பேசினோம்.

விகடனின் அதிரடி ஆஃபர்!
தற்பொழுது ரூ.800 சேமியுங்கள்! ரூ.1749 மதிப்புள்ள 1 வருட டிஜிட்டல் சந்தா949 மட்டுமே! மிஸ் பண்ணிடாதீங்க!Get Offer

சட்டமும் சிக்கல்களும்

“9.9.2005 முதல் நடைமுறைக்கு வந்த இந்து வாரிசு உரிமை சீர்திருத்தச் சட்டம் 2005, இந்து கூட்டுக் குடும்பச் சொத்தில் ஆண்கள் எப்படிப் பங்காளிகளோ அதேபோல பெண்களும் (மகள், பேத்தி, மகள் வயிற்றுப் பேத்தி) பங்காளிகள் என்கிறது. என்றாலும், ‘19.12.2004-க்கு முன்னர் ஒரு கூட்டுக் குடும்பச் சொத்தில் பாகம் பிரிக்கப்பட்டிருந்தால் அந்தச் சொத்தில் பெண்கள் உரிமை கோர முடியாது. அதாவது, பெண்களுக்குச் சொத்தில் உரிமை அளிக்கும் இந்தச் சட்டத்தின் கூறுகள் 20.12.2004-க்கு முன்னர் செல்லாது’ என்று சொல்லப் பட்டது சிக்கல் ஆனது.

‘இந்து வாரிசு உரிமைச் சட்டம் 1956-ல் ஒரு பிரிவில், ஓர் இந்து கூட்டுக் குடும்பத்தில் பாகப்பிரிவினை என்பது எழுத்துபூர்வமாக இல்லாமல் வாய்மொழியாகவும் இருக்கலாம்’ எனச் சொல்லப்பட்டிருக்கிறது. பெண்களுக்குச் சேர வேண்டிய குடும்பச் சொத்துகளைத் தர விரும்பாத ஆண்கள் இதை தங்களுக்குச் சாதகமாகப் பயன்படுத்தினர். ஒரு பெண் தனக்குச் சேர வேண்டிய சொத்தைக் கேட்டால், 19.12.2004-க்கு முன்பே வாய்மொழியாகப் பாகம் பிரித்துவிட்டதாகச் சொல்லி ஏமாற்றினர்.

அடுத்ததாக, ஒரு பெண் கூட்டுக்குடும்பச் சொத்தின் உரிமையைக் கோர அவர் தந்தை உயிருடன் இருக்க வேண்டும். எனவே, 2005-ம் ஆண்டுக்கு முன்பு தந்தையை இழந்த பெண்கள் தங்களது குடும்பச் சொத்தில் பங்கு கேட்க முடியாது என இன்னொரு வழக்கில் உச்ச நீதிமன்றம் தீர்ப்பு சொல்லியிருந்ததும் பாதகமாக அமைந்தது.

களையப்பட்ட குழப்பங்கள்

இந்த இரண்டு முரண்பட்ட விஷயங்களுக்குத் தீர்வளிக்கும் வகையில், வினீதா ஷர்மா வழக்கில் இப்போது தீர்ப்பு வழங்கப்பட்டிருக்கிறது. ‘பெண் ஒரு குடும்பச் சொத்தினுடைய பங்காளியாக ஆவதென்பது இந்தச் சட்டத் சீர்திருத்தம் வந்த பின்னர்தான். என்றாலும், ஒரு குடும்பத்தில் பிறக்கக்கூடிய மகனும் பேரனும் எப்படி அந்தக் குடும்பத்தில் பிறப்பதாலேயே பங்காளிகள் ஆகிவிடுகின்றனரோ அதேபோலத்தான் பெண்களும் பிறக்கும்போதே பங்காளிகள் ஆகிவிடுகின்றனர். 2005-ல் கொண்டுவரப்பட்ட சட்டத் திருத்தம் என்பது இந்து வாரிசு உரிமைச் சட்டம் 1956-க்கான திருத்தம். எனவே, அது அப்போதிலிருந்து நடைமுறைக்கு வந்துவிடுகிறது. ஆகவே, 2005-க்கு முன்பு பாகம் பிரிக்கப்படாமல் உள்ள குடும்பச் சொத்துகளிலும் அந்தக் குடும்பத்தைச் சேர்ந்த பெண் தன் பங்கைக் கோரலாம்.

பெண்களும் இனி பங்காளிகள்!

‘பாகப்பிரிவினை என்பது வாய்மொழியாகக்கூட இருக்கலாம்’ என்று இந்து வாரிசு உரிமைச் சட்டம் 1956-ல் சொல்லப்பட்டுள்ளதைப் பயன்படுத்தி பெண்களுக்குச் சேர வேண்டிய சொத்து சேராமல் தடுக்கப்படுகிறது. எனவே, உரிய ஆவணங்கள் இல்லாமல், ‘வாய்மொழியாக பாகம் பிரித்துக்கொண்டோம்’ எனச் சொல்வதை நீதிமன்றங்கள் ஏற்றுக்கொள்ளக் கூடாது. ஆவணங்களைக் காட்ட முடியா விட்டால் அந்த சொத்துகள் பாகம் பிரிக்கப்படாத சொத்துகளாகத்தான் கருதப்படும். அவற்றில் பெண்கள் பங்கு கோரலாம். அதேவேளை, அந்தச் சொத்தை ஏற்கெனவே விற்றுவிட்டார்கள் என்றாலோ, ஏற்கெனவே வேறொருவருக்குக் கைமாற்றிவிட்டிருந்தார்கள் என்றாலோ அதைப் பெண்கள் ஏற்றுக்கொள்ளத்தான் வேண்டும்.

அப்பா உயிருடன் இருந்தால்தான் என்பதில்லை!

ஒரு பெண் பிறக்கும்போதே ஒரு குடும்பத்தினுடைய பங்குதாரராக ஆகிவிடும்படியால் அப்பா உயிருடன் இருக்க வேண்டும் என்று இல்லை. அப்பா உயிருடன் இல்லையென்றாலும் 2005 வரை பாகம் பிரிக்கப்படாமல் இருக்கும் சொத்தில் பெண்ணால் உரிமை கோர முடியும். அனைத்து நீதிமன்றங்களிலும் நிலுவையில் உள்ள பாகப்பிரிவினை வழக்குகளை, பெண்களுக்கு பாகம் கொடுக்கும் வகையில் ஆறு மாதங்களுக்குள் முடிக்க வேண்டும் என்று தீர்ப்பில் குறிப்பிடப்பட்டுள்ளது.

பாகம் பிரிக்கப்பட்டிருந்தாலும்...

பாகப்பிரிவினை வழக்கில் முதல் நிலை தீர்ப்பு, இறுதித் தீர்ப்பு என இருவகையான தீர்ப்புகள் உள்ளன. ஒருவருக்கு எத்தனை பாகங்கள் என்று முதல்நிலை தீர்ப்பிலும், பாகம் நிர்ணயம் இரண்டாம் நிலை தீர்ப்பிலும் செய்யப்படும். ‘ஒரு கூட்டுக் குடும்பச் சொத்தில் சகோதரியை ஒதுக்கிவிட்டு சகோதரர்கள் பாகப்பிரிவினைக்காக வழக்கு தொடர்ந்திருந்தால் அந்த வழக்கில் முதல்நிலை தீர்ப்பு வந்திருந்தாலும்கூட, சகோதரி தன் உரிமையைக் கோரலாம்’ என்று தீர்ப்பளிக்கப்பட்டுள்ளது.

இப்படி பல சட்ட அம்சங்களிலும் இது மிகவும் வரவேற்கக்கூடிய, குழப்பங்களுக்கு முற்றுப்புள்ளி வைத்து பெண்களின் சொத்துரிமையை நிலை நாட்டியுள்ள தீர்ப்பு” என்றார் அஜிதா.

பெண்களின் சொத்துரிமை...

தமிழகம் முன்னோடி!

அழகுராமன், வழக்கறிஞர்

“இந்து வாரிசுரிமைச் சட்டம் 1956 கூட்டுக் குடும்பச் சொத்தில் பெண்களுக்கு சம உரிமை வழங்காத நிலையில், தி.மு.க ஆட்சிக்காலத்தில், மறைந்த முதலமைச்சர் கருணாநிதி 1989-ம் ஆண்டு தமிழ்நாட்டில் பெண்களுக்குச் சொத்தில் சம உரிமை உண்டு என்ற சட்டத்தை நிறைவேற்றியிருந்தார். அது 25.3.1989-லிருந்து அமலுக்கு வந்தது. இதன்படி தமிழ்நாட்டில் உள்ள இந்துக்கள் குடும்பத்தில் (ஹிந்து மித்தாக்‌ஷரா) மகன், மகள் ஆகிய இருவருக்கும் இடையேயான சொத்துரிமை வேறுபாடுகள் களையப்பட்டன. ஆனால், அதை நடைமுறைப்படுத்தி பாகம் கோருவதில் சில சிக்கல்கள் இருந்தன.

பெண்களும் இனி பங்காளிகள்!

தமிழ்நாட்டில் பெண்மக்களின் பாகம் பெறும் சட்ட நிலை குறித்து இந்தச் சட்டம், ‘25.3.1989-க்கு முன்பு திருமணம் செய்துகொண்ட ஓர் இந்துப் பெண் தன் பூர்வீகச் சொத்தில் பாகப்பிரிவினை கேட்க முடியாது. அதற்குப் பின்னர் திருமணம் செய்துகொண்ட பெண்கள், தங்கள் தந்தையின் பூர்வீகச் சொத்தில் பாகப்பிரிவினை கோர உரிமை உண்டு. எனினும், பாகப்பிரிவினை 25.3.1989-க்கு முன்பு செய்யப்பட்டிருந்தால் அந்தச் சொத்தில் உரிமை கோர முடியாது’ என்று குறிப்பிட்டது சிக்கலை ஏற்படுத்தியது.

மிகவும் ஏழ்மைச் சூழலில் உள்ள ஒரு பெண், சென்னை புறநகரில் உள்ள தனது குடும்பச் சொத்தான 10 ஏக்கரில் தனக்கும் பங்கு வேண்டுமென தன் இரு அண்ணன்களிடம் கேட்கிறார். அவர்களோ, ‘பொது குடும்பச் சொத்திலிருந்துதான் உனக்குத் திருமணம் செய்துவைத்தோம். மீதமிருக்கும் சொத்தில் நாங்கள் இருவரும் பாகப்பிரிவினை செய்துகொண்டோம். எனவே, சொத்தில் பங்கு தர முடியாது’ என்று கூறிவிட்டனர். அந்தப் பெண் வழக்கு தொடர்ந்தார். அவருக்கு மார்ச் 1989-ல் திருமணம் ஆகிவிட்டதாலும், அவரின் தந்தையும் முன்பே இறந்துவிட்டதாலும், பல ஆண்டுகளாக நடந்துவரும் அந்த வழக்கில் அப்பெண்ணுக்கு எதிரான நிலையே இருந்து வந்தது. இப்போது இந்தத் தீர்ப்பு, வழக்கின் நிலையையே தலைகீழாகப் புரட்டிப்போட்டுள்ளது. அந்தப் பெண்ணுக்கு நிச்சயம் சரி சமமான பங்கு கிடைக்கும். இவரைப் போன்ற பல பெண்களுக்கும்!”

பெண்கள் என்ன சொல்கிறார்கள்..?!

சீர் வேணாம், சொத்தில் பங்கைக் கொடுங்க!

ரோஸ்லின், சென்னை

“ஆண் குழந்தைதான் வாரிசுனு சொல்லிட்டு வர்ற நம்ம சமூகத்துல, இது ரொம்ப முக்கியமான தீர்ப்பு. பொண்ணுங்களுக்கும் சொத்து கிடைக்கும்போது, பாதுகாப்பு உணர்வு, சுயமரியாதை, சொத்தை மூலதனமாக்கித் தொழில் தொடங்கும் பொருளாதார சப்போர்ட்னு எங்களுக்குக் கிடைக்கக்கூடிய பலன்கள் பல. இனிமே, ‘உன் கல்யாணத்துக்கு நகை செய்றேன், காலம் முழுக்க சீர் செய்றேன்’னுலாம் ஏமாத்த வேணாம். சரிசமமா சொத்தை கொடுங்க... போதும்!”

பெண்களும் இனி பங்காளிகள்!

எமோஷனல் மிரட்டல்ல சறுக்கிடக் கூடாது!

ரேணுகாதேவி, சென்னை

“என் மாமியாருடன் பிறந்தவங்க 13 பெண்ணுங்க, ஒரே ஒரு பையன். அவங்க அப்பாவுக்கு எக்கச்சக்கமான சொத்துகள்.

‘13 பேருக்கும் திருமணம் செஞ்சு நல்லது, கெட்டதெல்லாம் பார்த்திருக் கிறேன், சொத்தெல்லாம் கிடையாது’னு என் மாமியாருடன் பிறந்தவர் சொல்லியிருக்கிறார். ஆனா, அந்தக் காலத்திலேயே விடாமல் போராடி தனக்கான பங்கை வாங்கியிருக்கார் என் மாமியார். அதை ஆதாரமா வெச்சுதான் இன்னிக்கு நாங்க நல்ல நிலைமைக்கு வந்திருக்கோம். தீர்ப்புக்குப் பிறகும், பெண்கள் சொத்துக் கேட்டா, `நான் வேணுமா சொத்து வேணுமா’, ‘அதுக்கப்புறம் உறவே கிடையாது’ன்னு எல்லாம் சொல்வாங்கதான். அந்த எமோஷனல் மிரட்டல்ல பெண்கள் சறுக்கிடாம, உரிமையைக் கேட்டு வாங்கணும்!”