Vikatan.com

www.vikatan.com would like to send you push notifications.

Notifications can be turned off anytime from browser settings.

[X] Close

வெளியுறவுத்துறையில் பெண்களுக்கு எதிரான விதிகளை நீக்கிய முத்தம்மாவின் பிறந்த தினம் இன்று!

முத்தம்மா

ன்றைய காலகட்டத்தில் சிவில் சர்வீஸ் எழுதும் பல பெண்கள் அறிந்திருக்க வேண்டிய பெண்ணின் பெயர், முத்தம்மா. ஐ.எஃப்.எஸ் முத்தம்மா. மூடத்தனத்தை தனி ஒருவராக உடைத்தெறிய காரணமாக இருந்தவர். அரசு வேலைகளில் பெண்களுக்கு இருந்த தடைகளை தகர்த்து, அரசின் மிக உயர்ந்த பதவிகளில் பெண்களும் அமர்ந்து சாதிக்க வழி ஏற்படுத்தி கொடுத்த மாபெரும் பெருமைக்குரிய முத்தம்மாவின் பிறந்த தினம் இன்று.

* சி.பி.முத்தம்மா (கொனிரா பெல்லியப்பா முத்தம்மா) கர்நாடக மாநிலம் குடகு மாவட்டத்தைச் சேர்ந்த விராஜ்பேட் என்ற ஊரில் 1924-ஆம் ஆண்டு பிறந்தார்.

* ஒன்பது வயதாகும் போது தந்தையை இழந்த முத்தம்மாவின் படிப்பில் மிகக் கவனமாக இருந்தவர் அவருடைய தாய். தன்னுடைய நான்கு குழந்தைகளையும் படிப்பில் சிறக்க காரணமாக இருந்தார். மடிக்கேரியில் பள்ளிப்படிப்பை முடித்த முத்தம்மா, சென்னையில் உள்ள பெண்கள் கிறிஸ்துவக் கல்லூரியில் பட்டப்படிப்பு, பிறகு சென்னை பிரெசிடென்ஸி கல்லூரியில் ஆங்கில இலக்கியத்தில் முதுகலை பட்ட மேற்ப்படிப்பை முடித்தார். படிப்பில் கில்லியான முத்தம்மா கல்லூரி காலங்களில் பல முறை தங்கம் வென்றவர்.

* 1949-ல் வெளியுறவுத்துறை அதிகாரியாக பணியில் சேர்ந்த சி.பி.முத்தம்மா, 1970-ல் ஹங்கேரிக்கான இந்திய தூதராக நியமிக்கப்பட்டு 'இந்தியாவின் முதல் பெண் வெளியுறவுத்துறை அதிகாரி' என்ற பெருமைக்குரியவரானார். அதனைத் தொடர்ந்து நெதர்லாந்து, கானா ஆகிய நாடுகளுக்கு இந்திய தூதராக பணியாற்றியுள்ளார்.

* முத்தம்மாவின் காலத்தில் வெளியுறவு துறையில் பணியாற்றும் பெண்ணுக்கு திருமணம் என்றால், அதற்கு அரசின் அனுமதியைப் பெற வேண்டும் என்பது விதியாக இருந்தது.  ஒருவேளை திருமணம் முடிந்து குடும்பப் பொறுப்புகள் காரணமாக ஒரு பெண் தனது பணியை சரிவர செய்ய முடியாவிட்டால் அவர் ராஜினாமா செய்துவிட வேண்டும் என்பது உள்ளிட்ட பெண்களுக்கு எதிரான பல விதிகள் இருந்தன. தெளிவாக சொல்லப்போனால் இந்திய வெளியுறவுத் துறையில் பணியாற்ற ஆண்களுக்கு மட்டுமே பல சலுகைகள் அளிக்கப்பட்டிருந்தன.

* தனது 25-வது வயதில் முத்தம்மா வெளியுறவுத் துறையில் சேரும் போது, அக்குழுவின் பணி நியமன தலைவர், மேற்கொண்ட விதிகளைக் கூறி 'வெளியுறவுத் துறையில்தான் நீ சேர வேண்டுமா?' எனக் கேட்டபோது, 'ஆமாம் எனக்கு இந்தப் பணிதான் பிடித்திருக்கிறது' என்றுக் கூறிய முத்தம்மா உடனே அதற்கான கோப்புகளில் கையெழுத்திட்டார். அன்று மாற ஆரம்பித்தது பெண்களின் தலையெழுத்து.

* பணிக்கு வந்த பிறகு தன்னுடைய துறையில் பெண்களுக்கு எதிராக இருந்த விதிகளை எதிர்த்து உச்ச நீதிமன்றத்தின் கதவுகளை தட்டினார். அரசு விதிகளில் இருந்த ஆணாதிக்கக் கருத்துக்களை தன்னுடைய விடா முயற்சியால் உடைத்தெறிந்து,  இன்றைய கால பெண்களுக்கு வழி அமைத்துக் கொடுத்த பெருமைக்குரியவர்.

* தொடர்ந்து 32 ஆண்டுகள் செவ்வனே அரசுப்பணியைச் செய்துவந்த முத்தம்மா, 1982-ல் ஓய்வு பெற்றார். தனது பணி ஓய்விற்கு பிறகு அவர் செய்த காரியம் எல்லோரையும் வியக்கவைத்தது. டெல்லியில் முக்கிய இடத்தில் இருந்த தனது 15 ஏக்கர் நிலத்தை அன்னை தெரசாவின் ஆதரவற்றோர் இல்லத்திற்கு நன்கொடையாக வழங்கினார்.

* அரசுத் துறைகளில் பணியாற்றிய பெண்களுக்கு எதிரான விதிகளை நீக்க, அவர் எடுத்துக் கொண்ட முயற்சிக்கு உரமாக அமைந்தது பெரியாரின் பெண்ணடிமை ஒழிப்பு போராட்டமாகும். கடைசிவரை திருமணம் செய்துகொள்ளாமல் வாழ்ந்த முத்தம்மா, தனது 85-வது வயதில் அக்டோபர் 10, 2009-ம் ஆண்டு பெங்களூருவில் காலமானார்.

* இருந்தாலும் இறந்தாலும் பேர் சொல்ல வேண்டும் என்பதற்கேற்ப தன்னுடைய வாழ்நாளை அமைத்துக் கொண்டவர் முத்தம்மா.

-என்.மல்லிகாஜுனா

உங்கள் கருத்தைப் பதிவு செய்யுங்கள்

Advertisement
Advertisement
Advertisement
Advertisement

எடிட்டர் சாய்ஸ்

மெகா ரெய்டு - 187 இடங்கள்... 1,800 அதிகாரிகள்... குவிந்தது பணம்... குவித்தது யார்?
Advertisement

MUST READ

Advertisement
[X] Close