13,000 ரூபாயில் அமெரிக்கா பறக்கலாம்... மிரட்ட வருகிறது `வாவ்' ஏர்லைன்ஸ்!

வாவ் ஏர்லைன்ஸ், தன் சேவையை டிசம்பர் 5-ம் தேதி முதல் இந்தியாவில் தொடங்குகிறது. டெல்லியிலிருந்து ஐஸ்லாந்தின் தலைநகரான Keflavik வரை பயணிக்க வேண்டும். அங்கிருந்து அடுத்த இறக்கம் அமெரிக்காதான். இணைப்பு விமானங்கள் வழியாக குறைந்த கட்டணச் சேவை சாத்தியமாகிறது.

13,000 ரூபாயில் அமெரிக்கா பறக்கலாம்... மிரட்ட வருகிறது `வாவ்' ஏர்லைன்ஸ்!

ந்தியாவிலிருந்து அமெரிக்கா செல்ல, குறைந்தது 60,000 ரூபாய் வரை செலவு ஆகும். அமெரிக்காவின் மறுமுனையில் உள்ள சான்ஃபிரான்ஸிஸ்கோ போன்ற நகரங்களுக்குச் செல்ல வேண்டுமானால், 2 லட்சம் ரூபாய் வரை விமானக் கட்டணம் இருக்கும். அமெரிக்காவுக்குச் சுற்றுலா செல்ல இந்தியர்களுக்கு விருப்பம் இருந்தாலும், விமானக் கட்டணம் காரணமாக அங்கு செல்வதைத் தவிர்ப்பவர்களும் உண்டு. அப்படிப்பட்ட இந்தியர்களை டார்கெட்டாக வைத்து இந்தியச் சந்தையில் குதித்துள்ளது ஐஸ்லாந்தின் `வாவ்' ஏர்லைன்ஸ். பெயருக்கேற்ற வகையில் விமானக் கட்டணமும் `வாவ்' ரகம்தான். ஆம்... டெல்லியிலிருந்து வெறும் 13,499 ரூபாயில் லாஸ் ஏஞ்சலீஸ் நகருக்குப் பறந்துவிடலாம்.  

வாவ் ஏர்லைன்ஸ்

வாவ் ஏர்லைன்ஸை சாதாரணமாக நினைத்துவிடாதீர்கள். 2012-ம் ஆண்டுதான் ஐஸ்லாந்தைச் சேர்ந்த தொழிலதிபர் ஸ்குலி மொகன்ஸன் இந்த நிறுவனத்தைத் தொடங்கினார். தற்போது ஐரோப்பா - வடஅமெரிக்கா நகரங்களுக்கிடையே 39 சேவைகளை இந்த நிறுவனம் மேற்கொண்டுவருகிறது. லண்டன், பாரீஸ், சிகாகோ, லாஸ்ஏஞ்சலீஸ், டொரன்டோ, சான்ஃபிரான்சிஸ்கோ, நியூயார்க் நகரங்களும் இதில் அடக்கம். தொடங்கப்பட்ட  ஆறு வருடத்தில் ஐஸ்லாந்தின் அரசு விமானப் போக்குவரத்து நிறுவனமான `ஐஸ்லேண்ட் ஏர்'  நிறுவனத்துக்கு சந்தையில் கடும் போட்டியாளராக மாறியது வாவ் ஏர்லைன்ஸ். 2019-ம் ஆண்டுக்குள் ஐஸ்லேண்ட் ஏர் நிறுவனத்தை வியாபாரரீதியில் ஜெயிப்பது ஸ்குலி மொகன்ஸனின் இலக்கு.  

வாவ் ஏர்லைன்ஸ், தன் சேவையை டிசம்பர் 5-ம் தேதி முதல் இந்தியாவில் தொடங்குகிறது. டெல்லியிலிருந்து ஐஸ்லாந்தின் தலைநகரான Keflavik வரை பயணிக்க வேண்டும். அங்கிருந்து அடுத்த இறக்கம் அமெரிக்காதான். இணைப்பு விமானங்கள் வழியாக குறைந்த கட்டணச் சேவை சாத்தியமாகிறது. டெல்லியிலிருந்து  Keflavik நகருக்கு வாரத்தில் ஐந்து நாள்கள்  விமான சேவை அளிக்கப்படும். இந்தியாவிலிருந்து ஐஸ்லாந்தின் Keflavik நகர் வழியாக அமெரிக்கா செல்வதே குறைந்த தூரம் என்றும் இந்த நிறுவனம் சொல்கிறது. வாவ் பேசிக் கட்டணப் பிரிவில் உணவு, எக்ஸ்ட்ரா லக்கேஜ்களுக்குத் தனிக்கட்டணம் வசூலிக்கப்படும். வாவ் ப்ரீமியம், வாவ் ப்ளஸ், வாவ் காம்ஃபை என்ற வகைகளிலும் கட்டணம் வசூலிக்கப்படுகின்றன. 10 கிலோவுக்குமேல் உள்ள லக்கேஜுகளுக்கு அனுமதியில்லை. பேக்குகள் 17x13x10 என்ற அளவுக்குள்தான் இருக்க வேண்டும். 

வாவ் ஏர்லைன்ஸ்

ஸ்குலி மொகன்ஸன் ``இந்தியாவில் விரைவில் சந்தையைப் பிடித்துவிடுவோம்'' என்று நம்பிக்கையுடன் சொல்கிறார். ``இந்தியாவிலிருந்து தினமும் 20 ஆயிரம் பேர் அமெரிக்கா செல்கின்றனர். 80 சதவிகிதம் பேர், நேரடி விமானத்தில் செல்வதில்லை. இணைப்பு விமானங்கள் வழியாகவே செல்கின்றனர்.  இவர்கள்தான் எங்கள் டார்கெட் கஸ்டமர்கள். அன்றாடம் மாறும் எண்ணெய் விலை உள்ளிட்டவற்றால் டிக்கெட் விலையில் சற்று  மாற்றம் செய்யப்படும். அதுவும் 100 டாலர்களுக்குள்தான் இருக்கும்'' என்கிறார்.

வாவ் ஏர்லைன்ஸ்

வாவ் ஏர்லைன்ஸின் இணையதளத்தைப் பார்த்தால், டிசம்பர் 7-ம் தேதி புதுடெல்லி - லாஸ்ஏஞ்சலீஸ் நகரத்துக்கு அடிப்படை விலை 309.99 (ரூ.20,921) அமெரிக்க டாலர்கள்.  பயண நேரம் 24 மணி நேரம் 5 நிமிடம் எனக் குறிப்பிடப்பட்டிருந்தது. அதே நாளில் டெல்லியிலிருந்து லாஸ்ஏஞ்சலீஸ் நகருக்கு எந்த விமானத்தில் கட்டணம் குறைவாக இருக்கிறது எனத் தேடினால், சைனா ஈஸ்டர்ன் ஏர்லைன்ஸ் பெயரைக் காட்டியது. டெல்லியிலிருந்து லாஸ்ஏஞ்சலீஸ் நகருக்கு ஷாங்காய் வழியாகச் செல்லும் இந்த விமானத்தின் டிக்கெட்டின் விலை 38,875 ரூபாய். வாவ் ஏர்லைன்ஸில் ஜனவரி 14-ம் தேதியில், டெல்லியிலிருந்து அமெரிக்காவின் பாஸ்டன் நகருக்குச் செல்ல 199 டாலர்தான் (ரூ.13,532 ) கட்டணமாகக் காட்டியது.

என்ன மக்களே அமெரிக்காவுக்கு ஒரு ரவுண்டு போயிட்டு வருவோமா!

Do you like the story?

Please Appreciate the Author by clapping!