ஹாரி-மார்கில் திருமணத்தில் உடைக்கப்பட்ட விதி எது தெரியுமா? #RoyalWedding

ஹாரி-மார்கில் திருமணத்தில் உடைக்கப்பட்ட விதி எது தெரியுமா? #RoyalWedding

பிரின்ஸ் ஆஃப் வேல்ஸ் சார்லஸ் - டயானா தம்பதியின் இளைய மகனான பிரின்ஸ் ஹாரி மற்றும் அமெரிக்க நடிகை மேகன் மார்கில் திருமணம், மே 19-ம் தேதி அரச குடும்பத்துக்குச் சொந்தமான `தி வின்சர் கேஸில்' எனும் கோட்டையில் உள்ள St.George's Chapel ஆலயத்தினுள் நடைபெற்றது. இந்தத் திருமண நிகழ்வுக்குச் சுமார் 250 கோடி ரூபாய் செலவு செய்யப்பட்டுள்ளது. வழக்கமான திருமண நிகழ்வைவிட அரச குடும்பத்தின் நிகழ்வுக்கு ஏகப்பட்ட வழிமுறைகள் இருக்கின்றன. அந்த வகையில், முதலில் Duke and Duchess of Sussex என்று ஹாரி மற்றும் மார்க்கிலுக்கு மகுடம் சூட்டப்பட்டு, பிறகு தங்களின் உறுதிமொழியை ஏற்று, மோதிரம் மாற்றிக்கொண்டனர்.

மேகன் மார்கில்

உலகமே வியந்துப் பார்த்த பிரின்ஸ் ஹாரி மற்றும் மேகன் மார்கில் திருமணத்தில் சில சுவாரஸ்ய நிகழ்வுகள் இதோ...

மார்கிலின் தந்தை உடல்நிலை சரியில்லாமல் இருப்பதால், மணப்பெண்ணை சபைக்கு அழைத்து வருவது யார் என்ற குழப்பம் இருந்தது. இறுதியில், ஹாரியின் தந்தை சார்லஸ், மார்கிலின் தந்தை ஸ்தானத்தில் இருந்து அனைத்துச் சம்பிரதாயங்களையும் முன்னின்று நடத்தினார்.

Prince Charles

தேர்ந்தெடுக்கப்பட்ட 600 சிறப்பு விருந்தினர்கள் உள்பட 2,500 பேர் மட்டுமே இந்தத் திருமண நிகழ்வுக்கு அழைக்கப்பட்டனர். அவர்களில், பிரபல பாடகி Mel B, Spice Girls ராக் பேண்ட், கால்பந்து வீரர் டேவிட் பெக்காம் மற்றும் அவரின் மனைவி விக்டோரியா பெக்கம், பாலிவுட் நடிகை பிரியங்கா சோப்ரா போன்ற பிரபலங்களும் அடங்குவர்.

Priyanka Chopra in Royal Wedding

திருமண நிகழ்வு முடிந்த பிறகு விருந்தினர் அனைவருக்கும், `Standing Reception' என்றழைக்கப்படும் ராயல் விருந்து கொடுக்கப்பட்டது. இதற்கான செலவு 6,80,000 டாலர்.

மேகன் மார்கிலின் திருமண உடை, வெள்ளைப் பட்டுத்துணியால் அந்நாட்டு பிரபலங்களின் ஃபேவரிட் டிசைனர் வெயிட் கெல்லர் என்பவரால் வடிவமைக்கப்பட்டது. போட் நெக், A-லைன் வடிவம் என அதிக வேலைப்பாடுகள் ஏதுமின்றி, எளிமையான ஆடையை உடுத்தியிருந்தார் மேகன்.

Megan Markle Wedding Dress

மேகன், அடிப்படையில் ஒரு சமூக ஆர்வலர். சமூகப் பிரச்னைகள் குறித்து அடிக்கடி இன்ஸ்டாகிராம், ட்விட்டர் உள்ளிட்ட சமூக வலைதளங்களில் கருத்துப் பதிவு செய்வது அவரது வழக்கம். இத்தனைநாள் சமூக ஆர்வலராக இருந்த மேகன் இனி அரச குடும்பத்தின் மருமகள். அரச குடும்ப விதிமுறைகளை அவரும் கடைப்பிடிக்க வேண்டும். மேகன் பின்பற்ற வேண்டியவை குறித்து ஒரு லிஸ்ட்டே இருக்கிறது. `ஆட்டோகிராஃப்' போடுவது, சமூக வலைதளங்களை உபயோகிப்பது, முட்டிக்கும் மேல் ஆடைகள் உடுத்துவது, சாக்ஸ் இல்லாமல் ஷூ போடுவது, செல்லப் பிராணிகள் வளர்ப்பது, தனியாக அல்லது நண்பர்களுடன் பயணம் செல்வது, வெளியில் சாப்பிடுவது, அரசியல் சம்பந்தமாகப் பேசுவது போன்றவற்றுக்கு `தடா'. எல்லாவற்றையும்விட ராணி எலிசபெத் சாப்பிட்ட பிறகுதான் மற்றவர்கள் சாப்பிட வேண்டும். மேகனும் இனி அப்படித்தான்.

உறவினர்களின் வருகை, நண்பர்களின் கேலி, குழந்தைகளின் விளையாட்டு, மேளதாள முழக்கத்தில் புதியதாய் முளைக்கும் காதல், தாலி கட்டப்போகும் நேரத்தை ஆவலுடன் எதிர்பார்த்துக் காத்துக்கொண்டிருக்கும் மணமக்கள், கடமையைச் செய்துவிட்டோம் என்ற பெற்றோர்களின் நிம்மதி... இப்படி பல உணர்வுகள் ஒன்றுசேர்வதுதான் `திருமணம்'. பொதுவாகவே ஆட்டம் பாட்டம் கொண்டாட்டங்கள் நிறைந்திருக்கும் திருமண நிகழ்வுகளுக்கு, பள்ளிகளில் உள்ளதுபோல் `ரூல்ஸ்' இருந்தால் எப்படி இருக்கும்? இப்படித்தான் இருக்கும் எனப் பதிலளிக்கும்விதமாக இருந்தது பிரிட்டிஷ் அரச குடும்ப திருமண நிகழ்வு.

ரூல் 1:

தொலைபேசி உபயோகிப்பதற்கு அனுமதியில்லை. இந்தக் காலத்தில் மொபைல் போன் இல்லாத ஆள்களே இல்லை. ஆனால், இவர்களின் திருமண நிகழ்வுக்குச் சென்றால், கட்டாயமாக மொபைல் போன் உபயோகிக்கக் கூடாது. எந்தவிதமான சமூக வலைதளங்களை உபயோகிக்கவும், புகைப்படங்கள் எடுப்பதற்கும் இங்கு அனுமதியில்லை.

ரூல் 2:

தங்களுக்கென ஒதுக்கப்பட்ட இருக்கையில்தான் அமர வேண்டும். 800 இருக்கைகள் கொண்டிருக்கும் ஆலயத்தின் வலதுபுறம் மணமகன் உறவினருக்கானது, இடதுபுறம் மணமகள் உறவினருக்கானது. அதிலும் முன்வரிசையில் இருக்கும் இருக்கைகள் மணமக்களின் பெற்றோர்கள் மற்றும் நண்பர்களுக்கு மட்டுமே.

ரூல் 3:

ராணி எலிசபெத் வருகையின்போது அனைவரும் தலை தாழ்த்தி வணங்க வேண்டும். திருமணத்தின்போது பெரும்பாலானவர்கள் புதியவர்களாக இருப்பார்கள். எனவே, அறிமுகத்தின்போது ராணி எலிசபெத் முன் தலை தாழ்த்தி வணங்கி, `யுவர் மெஜெஸ்டி' என்று கூறி அழைக்க வேண்டும். நன்கு பரிச்சயமான பிறகு `Mam' என்று அழைக்கலாம். எல்லாம் ஒரு மரியாதைதான்!

ரூல் 4:

ராணியைப் பார்த்ததும் ஆவேசப்பட்டோ, ஆசைப்பட்டோ ஓடிப்போய் அவரிடம் பேசிவிடக் கூடாது. அனைவரையும் ராணியே சந்தித்துப் பேசுவார். அதுவரைக்கும் அமைதிகாப்பது அவசியம். பொறுமை ரொம்ப முக்கியம்!

Queen Elizebeth

ரூல் 5 :

குறிக்கப்பட்ட திருமண நிகழ்வு நேரத்துக்கு ஒரு மணி நேரம் முன்னதாகவே அனைவரும் அவரவர் இடத்துக்கு வர வேண்டும். ராணி எலிசபெத்தின் வருகைக்கு முன்னதாகவே அனைவரும் அமர்ந்திருக்க வேண்டும். ராணி வந்த பிறகு மணமக்கள் வருவார்கள். இவங்க ரொம்ப ஸ்ட்ரிக்ட்!

ரூல் 6 :

பிரிட்டிஷ் அரச குடும்ப திருமண நிகழ்வு, வார நாளில்தான் நடைபெறும்; வார இறுதியில் நடைபெறாது. ஆனால், இந்தக் கோட்பாட்டை முதன்முறையாக உடைத்தவர்கள் பிரின்ஸ் ஹாரி மற்றும் மேகன் மார்கில்.

Do you like the story?

Please Appreciate the Author by clapping!