வெளியிடப்பட்ட நேரம்: 19:00 (19/10/2018)

கடைசி தொடர்பு:19:00 (19/10/2018)

தந்தை வீட்டுக்குப்பதில் பக்கத்துவீட்டில் விட்டுச்செல்லப்பட்ட சிறுவன்! - சிசிடிவியால் சிக்கிய தாயின் தோழி

அமெரிக்காவின் டெக்சாஸ் நகரில், 911 அவசர எண்ணுக்கு தொடர்புகொண்ட ஒரு பெண், தன் வீட்டின் அழைப்பு மணி ஒலித்ததாகவும், சென்று பார்க்கும்போது யாருமின்றி இரண்டு வயது சிறுவன் அங்கு நின்றுகொண்டிருப்பதாகவும் புகார் அளித்தார். இதைத்தொடர்ந்து அங்கு சென்ற போலீஸார், அந்தப் பெண்ணுடைய வீட்டில் பொருத்தப்பட்டிருந்த சிசிடிவி கேமரா பதிவுகளை ஆய்வு செய்தனர்.

சிசிடிவி

அப்போது குழந்தையுடன் காரில் வரும் ஒரு இளம் பெண், குழந்தையை வாசலில் நிற்கவைத்து, காலிங் பெல்லை அழுத்தி, கதவையும் வேகமாகத் தட்டிவிட்டு, குழந்தையையும், தன் கையிலிருந்த இரு பைகளையும் வாசலிலேயே போட்டுவிட்டு ஓடிச் சென்று காரில் ஏறிச் செல்வது பதிவாகியிருந்தது.

 

குழந்தையின் தாயே இப்படி அந்தச் சிறுவனை விட்டுச் சென்றார் என்று செய்தி பரவிய நிலையில், நேற்று அந்தக் குழந்தை யார் என்ற அடையாளமும் அந்தக் குழந்தையின் பெற்றோரும் கண்டுபிடிக்கப்பட்டனர். அந்த வீடியோவை நண்பர் ஒருவர் காட்டியதாகவும், அப்போது தான் அது தன்னுடைய குழந்தை என அறிந்துகொண்டதாகவும் கூறியிருக்கிறார் அச்சிறுவனின் தந்தை சிம்மன்ஸ். சிறுவனின் பெயர் ராயல் சிம்மன்ஸ். அவன் தந்தையும் தாயும் பிரிந்து வாழ்ந்து வருகின்றனர். இந்நிலையில் சிறுவன் ராயல் சிம்மன்ஸின் தாய், அவருடைய தோழி ஒருவரிடம் குழந்தையை அவனுடைய தந்தை வீட்டில் விடுமாறு சொல்லி அனுப்பியிருக்கிறார். அந்தப் பெண் தவறுதலாகக் குழந்தையை பக்கத்துக்கு வீட்டில் விட்டுவிட்டு, வீட்டில் யாராவது இருக்கிறார்களா என்றுகூட பார்க்காமல் சென்றுவிட்டார். தற்போது சிறுவன் அரசு பாதுகாப்பில் உள்ளான். சிறுவனின் பெற்றோரிடம் விசாரணை மேற்கொள்ளப்பட்டு வருகிறது. பொறுப்பில்லாமல், குழந்தையைத் தனியாக விட்டுச் சென்ற இளம் பெண் மீது குற்றவியல் வழக்கு பாயலாம் என்று சொல்லப்படுகிறது.