ரஷ்யாவில் மனித வசிப்பிடங்களின் மேல் படையெடுக்கும் பனிக்கரடிகள் | 50 Polar Bears Searching For Food Invade Russian Town, Terrifying Residents

வெளியிடப்பட்ட நேரம்: 01:00 (13/02/2019)

கடைசி தொடர்பு:10:08 (13/02/2019)

ரஷ்யாவில் மனித வசிப்பிடங்களின் மேல் படையெடுக்கும் பனிக்கரடிகள்

பனிக்கரடி

ரஷ்யாவின் தீவுக்கூட்டமான நோவயா ஸெம்யா (Novaya Zemlya) பகுதியில், மக்களின் இயல்பு வாழ்க்கை முற்றிலும் பாதிக்கப்பட்டுள்ளது. தங்கள் வீடுகளை விட்டு வெளியே வராமல் உள்ளேயே முடங்கியுள்ளனர். அந்தப் பகுதியில் அவசர கால (நெருக்கடி) நிலையை அமல்படுத்தியுள்ளது அரசு. துருவப் பகுதியில் காணப்படும் பனிக்கரடிகள் (துருவக்கரடிகள்) படையெடுத்து வந்து மக்களைத் தாக்கி, ஊருக்குள் சுற்றித்திரிவதால்தான் இந்த நிலை. 

ரஷ்யாவுக்கு வடக்கில் ஆர்டிக் பகுதிக்கு அருகில் அமைந்துள்ள நோவயா ஸெம்யா தீவுக் கூட்டத்தில், மனிதர்கள் வாழும் முக்கியப் பகுதியான பெல்ஷியா கியூபாவிற்குள் (Belushya Guba) 52 பனிக்கரடிகள் நுழைந்துள்ளதாகக் கூறப்படுகிறது. இதற்கு அருகில்தான் ரஷ்ய ராணுவத் தளவாட மையமும் அமைந்துள்ளது. பெல்ஷியாவில் 2500-க்கும் அதிகமான மக்கள் வசிக்கின்றனர். அவர்களது இயல்பு வாழ்க்கை முற்றிலும் பாதிக்கப்பட்டுள்ளது. குழந்தைகள்கூட பள்ளிகளுக்குச்  செல்லவில்லை. வீடுகள், பள்ளிகள், பொதுக் கட்டடங்கள் என எல்லாவற்றிலும் உயரமான வேலிகள் அமைக்கப்பட்டுள்ளன. இருந்தாலும், பனிக்கரடிகள் அச்சம் மக்களிடையே பரவலாக உள்ளது. 

 

காலநிலை மாற்றம்தான் இத்தகைய விளைவுகளுக்குக் காரணம் எனத் தெரிவிக்கின்றனர் சுற்றுச்சூழல் ஆய்வாளர்கள். ஆர்டிக் துருவப்பகுதியில் பனிக்கட்டிகள் உருகுவதாலும், கடல்மீதிருக்கும் பனிப்படலங்கள் உருகுவதாலும் பனிக்கரடிகள் தங்கள் வாழிடங்களையும் உணவுகளையும் இழந்து, வேறு இடங்களை நோக்கிப் படையெடுத்து வருகின்றன. பனிக்கரடிகள் நிலத்தில் பிறந்திருந்தாலும், பெரும்பாலும் கடலின்மீது படர்ந்திருக்கும் பனிப்படலங்களின் மீதே வாழக்கூடியவை. புவி வெப்பமாதலும் காலநிலை மாற்றமும் அந்த பனிப்படலங்களை இல்லாமல் செய்துவருகின்றன. உலகில் 22,000 - 31,000 பனிக்கரடிகள் இருக்கலாம் எனத் தரவுகள் தெரிவிக்கின்றன. இவையே குறைவான எண்ணிக்கைதான். மேலும், பனிக்கரடிகள் எளிதில் பாதிக்கப்படக்கூடிய உயிரினங்கள் பட்டியலில் வகைப்படுத்தப்பட்டுள்ளது. எனவே, அவற்றைக் கொல்வதும் சட்டப்படி குற்றமாகும். ஆதலால், இந்தச் சூழ்நிலையை எப்படிக் கையாள்வது என யோசித்துவருகிறது ரஷ்ய அரசு. 

இதற்கு முன், 2016-ம் ஆண்டு டிரோனாய் தீவு (island of Troynoy) பகுதியில் அமைந்துள்ள வானிலை மையத்தில் இருந்த ஐந்து ரஷ்ய விஞ்ஞானிகளைப்  பனிக்கரடிகள் முற்றுகையிட்டன. பல வாரங்கள் கழித்தே அவர்களைக் காப்பாற்ற முடிந்தது.