Vikatan.com

www.vikatan.com would like to send you push notifications.

Notifications can be turned off anytime from browser settings.

பியர் கிரில்ஸ்... இது வெறும் பெயரல்ல... சாகசங்களின் பிறப்பிடம்! #HBDBearGrylls

Pic.: https://www.facebook.com/RealBearGrylls/

ந்த வாழ்க்கையில், சொகுசு முழுவதையும் உங்களிடமிருந்து பறித்துவிட்டால், எப்படி இருக்கும்...? ஆள் அரவமற்ற தப்பிக்க முடியாத ஒரு பகுதியில், உங்களை விட்டுவிட்டால் நீங்கள் எப்படி பிழைப்பீர்கள்? ஒருவேளை இதுபோன்ற சூழலில் நீங்கள் மாட்டிக்கொண்டால், எப்படி உங்களை நீங்களே காப்பாற்றிக்கொள்வீர்கள்?எவ்வளவு சிக்கலான சூழ்நிலைகளிலும் சில உயிர் வாழும் உத்திகளை நீங்கள் கற்றுக்கொள்வது மிக அவசியம்.

"இப்ப நாம இருக்கிறது சஹாரா பாலைவனத்தோட நடுப்பகுதி. இங்க உயிர் வாழ்வதற்கான மூலக்கூறு ரொம்ப கம்மி. குறிப்பா ஒவ்வொரு 30 நிமிஷத்துக்கும் அரை லிட்டர் தண்ணி குடிக்கிறது ரொம்ப ரொம்ப அவசியம். இல்லனா உங்க மூளைக்கு போற ரத்தத்துல ஆக்சிஜன் குறைவாகி, அடிக்கிற வெயில்ல மயக்க நிலைக்குப் போயிடுவீங்க. இது உயிருக்கு ரொம்ப ஆபத்து. அதனால தண்ணி இல்லாத நேரத்துல உங்க சிறுநீரையே நீங்க குடிக்கணும். இறந்து போன விலங்குகள் கண்ணுல தெரிஞ்சா அதுல தேவையான பகுதிகளை சாப்பிட பயன்படுத்திக்கணும். அதுக்கு நீங்க தயார் நிலையில இருக்கணும்." இதை சொல்வது யார் தெரியுமா? பியர் கிரில்ஸ். ஆம் நமது வீடுகளின் வரவேற்பறைக்கே வந்து, 'ஆபத்தான சூழ்நிலைகளில் எப்படி உயிர்பிழைப்பது?' என வகுப்பெடுக்கும் அதே 'மேன் வெர்சஸ் வைல்டு' பியர்-தான்! 

Pic.: https://www.facebook.com/RealBearGrylls/

''வெயில் புகாத அமேசான் மழைக் காடுகள், வெயில் தாங்க முடியாத சஹாரா பாலைவனம், ஆர்டிக் பனிப்பிரதேசம், ஆபத்து நிறைந்த பசுபிக் தீவுகள், எரிமலைப் பள்ளத்தாக்குகள் என எந்த இடத்திலும் நம்மால் தப்பித்து வெளியே வர முடியும். அதற்கு மிகப்பெரிய தன்னம்பிக்கையும், கொஞ்சம் உழைப்பும், அதோடு சேர்ந்து தைரியமும் இருந்தால் போதும்...'' என உயிர் பிழைத்திருப்பதற்கான உத்திகளை நமக்கு சொல்லிக்கொடுத்துக்கொண்டிருக்கும் சர்வைவர். 'இதெல்லாம் சும்மா... டி.ஆர்.பி-க்காக மக்களை ஏமாத்தும் வேலை' என நீங்கள் நினைத்துக்கொண்டிருக்கும் இந்த நொடியில்கூட பியர் ஏதேனும் ஒரு சாகச வேலையில் ஈடுபட்டுக்கொண்டிருப்பார். அதனால் இவர் பலரின் சாகச நாயகனாக வலம் வருகிறார். சாகசம் என்ற வார்த்தைக்கு ஒரு பொருத்தமான பெயர் வேண்டுமென்றால், அது பியர் - தான். இன்று அந்த சாகச நாயகனின் பிறந்த தினம்!

Pic.: https://www.facebook.com/RealBearGrylls/

பியரின் இளமைப்பருவம் :

1974 ஆம் ஆண்டு ஜூன் 7 ஆம் தேதி பிறந்த பியர் கிரில்ஸின் உண்மைப் பெயர் எட்வர்ட் மைக்கேல் கிரில்ஸ். ஆனால், இந்தப் பெயர் அவரின் அக்காவுக்குப் பிடிக்கவில்லை. அதனால் 'டெடி பியர்' என தம்பியை செல்லமாக அழைக்க ஆரம்பித்தாள். கடைசியில், அவர் அக்கா வைத்த செல்ல பெயர்தான் கிரில்ஸ்-உடன் சேர்ந்து பியர் கிரில்ஸ் என்றானது. ஆனால், பள்ளிப்பருவத்தில் சக மாணவர்கள் இவருக்கு வைத்தப் பட்டப் பெயர் 'மங்கி'. ஆம், பியரால் ஓர் இடத்தில் நிலையாக உட்கார முடியாது. அங்கும் இங்கும் தாவிக்கொண்டே, சேட்டைகள் செய்துகொண்டே இருந்தான். அதனால், மாணவர்கள் மத்தியில் இவன் ஒரு குரங்கு. ஒரு முறை பள்ளி விடுமுறை காலத்தில், பியர் கிரில்ஸ் தந்தையுடன் 'சைப்ரஸ்' மலைப்பகுதிக்கு சென்றான். அப்போது இருட்டிவிட எப்படி வீட்டுக்குப் போவது என்று வழி தெரியவில்லை. பயத்தில் உறைந்திருந்த தந்தையின் காதுகளில் ''எனக்கு வழி தெரியும் என் பின் தொடர்ந்து வாருங்கள்'' என பியர் சொல்ல... தந்தையும் பியரைப் பின்தொடர்ந்தே வீடு வந்து சேர்ந்தார். இதுதான் பியரின் முதல் சாகசப் பயணம். பள்ளிப் பருவம் முடிந்தபோது குடும்ப நண்பரது அழைப்பின் பேரில், இந்தியாவின் இமயமலை பகுதிக்கு வந்தான் பியர். அப்போது இமயமலையின் உயரத்தைப் பார்த்து, 'சீக்கிரம் இதன் மீது ஏறுவேன்' என சபதம் எடுக்கிறான். 

ராணுவமும், சாகச பயணத்தின் தொடக்கமும் :

Pic.: https://www.facebook.com/RealBearGrylls/

பியரின் ஒரே ஆசை, 'எப்படியாவது இந்திய ராணுவத்தில் சேர வேண்டும்' என்பதே. ஆனால், அது நடக்கவில்லை. அதனால், 1994-ஆம் ஆண்டு பியர், பிரிட்டிஷ் ராணுவத்தின் சிறப்புப் படையான SAS (Special Air Service) தேர்வுக்காகச் சென்றார். ஆனால், வலிமை இல்லையென அங்கிருந்த அதிகாரிகளால் வெளியேற்றப்பட்டார் பியர். அந்த அவமானம் பியரினுள் வெறியைத் தர தனது உடலை வலிமையாக்க ஜிம்மிலேயே தவம் கிடக்கத் தொடங்கினார். அதன் பலனாக அடுத்த SAS தேர்வின்போது அனைவரையும் விட சிறந்த வீரனாகத் தேர்வானார். 1996-ஆம் ஆண்டு ஸாம்பியாவில், பணி நிமித்தமாக ஹெலிகாப்டரில் இருந்து குதிக்கிறார் பியர். அதாவது, சுமார் 16,000 அடி உயரத்திலிருந்து தரையை நோக்கி விர்ரென்று பறந்து வந்துகொண்டிருந்தார் பியர். மிகச் சரியாக தரையிலிருந்து 3,000 அடி உயரத்தில் அவர் வந்துகொண்டிருந்தபோது, முதுகில் மாட்டியிருந்த தனது பாராசூட்டை விரிக்க... அது விரியவில்லை. அவசர உதவி பாராசூட்டை திறக்கப் போதிய அவகாசம் இல்லாததால், பாராசூட் பைகளோடு அசுரவேகத்தில் பூமியில் வந்து பொத்தென்று விழுகிறார். இந்த விபத்தில், பியரின் முதுகுத்தண்டில் மூன்று குறுக்கு எலும்புகள் நொறுங்கிப்போனது. ''இனி பியரால் எழுந்திருக்கக்கூட முடியாது'' என மருத்துவர்கள் கைவிரித்துவிட்டனர். அறுவைச் சிகிச்சை, மன அழுத்தம், உடல் வலி... என எல்லாச் சோதனைகளும் பியரை ஒருசேர தாக்கியது. ஆனாலும் தன் மன வலிமையினால், அனைத்து சோதனைகளையும் புறந்தள்ளி தன்னம்பிக்கையோடு எழுந்து நடந்து மருத்துவர்களின் கூற்றைப் பொய்யாக்கினார் பியர். அதன்பிறகு, ''இனி நீங்கள் சாகசப் பயணம் செய்யக்கூடாது'' என மருத்துவர்கள் சொல்ல... "என்னால் அப்படி இருக்க முடியாது" என்று தீர்க்கமாகச் சொல்கிறார் பியர். '3 வருட ராணுவ வேலை போதும்' என நினைத்த பியர், ''இனி சாகசப் பயணங்கள் மட்டும்தான் செய்வேன்'' என்று கூறியபோது அவரின் கண்கள் இமயமலையின் பக்கம் திரும்பியது. மருத்துவர்கள் எவ்வளவோ சொல்லியும் பியர் கேட்கவில்லை.

1998 ஆம் ஆண்டு, மே 26-ம் தேதி காலை 7:22-க்கு உலகின் உச்சியான எவரெஸ்ட்டில் ஏறி நின்று தனது துணிவையும், சாகசத்தையும் நிலைநாட்டினார். உலகிலேயே மிகக் குறைந்த வயதில், இமயமலையில் ஏறமுடியுமானால் அது பியர் கிரில்ஸால் மட்டும்தான் முடியும்; ஆம், அப்போது பியருக்கு வயது 23. அப்படியானால், பியரின் மனோதிடமும், உழைப்பும் எப்படி இருந்திருக்க வேண்டும். மிகச் சிறிய வயதில், எவரெஸ்ட்டில் ஏறியவர் என்ற கின்னஸ் சாதனையையும் படைத்தார் பியர். ஆனால், தற்போது அந்த சாதனை நேபாள நாட்டைச் சேர்ந்த ஒரு சிறுவனால் முறியடிக்கப்பட்டுவிட்டது.

சாதனைக்குப் பின் மனிதநேயம் :

மலை ஏறும்போது கால்களை இழந்த தனது நண்பருக்கு உதவ நினைத்தார் பியர். இதற்காக, புதிய முயற்சி ஒன்றை அறிவித்தார். அதாவது தனது நண்பரது மருத்துவச் செலவுக்காக, தேம்ஸ் நதியை நிர்வாணமாக தான் கடக்கவிருப்பதாக அறிவித்து அதன்படியே நதியைக் கடந்தும் சாதனை படைத்தார் பியர். நிர்வாணமாக நதியைக் கடக்கும் இந்த முயற்சியில் அவருக்குத் துணையாக இருந்தது சாதாரண பாத் டப்!  11 மீட்டர் நீளம் கொண்ட திறந்தவெளிப் படகில், ஆர்டிக் மற்றும் அட்லாண்டிக் பெருங்கடலைக் கடந்தார். 2005 ஆம் ஆண்டு சுமார் 25,000 அடி உயரத்தில், பலூனில் பறந்தபடியே இரவு விருந்து உண்டு புதிய சாதனை படைத்தார். இது எல்லாமே வெவ்வேறு நலத்திட்டங்களுக்காக பியர் செய்த சாதனைகள். 

புத்தம் புது சாதனைகள் :

மீண்டும் எவரெஸ்டின் மீது பியரின் பார்வை திரும்பியது. எவரெஸ்ட் சிகரப் பகுதியில், 29,500 அடி உயரத்தில், உறையவைக்கும் குளிரில் பாராசூட்டில் பறந்து சாதனை படைத்தார் பியர். இந்த நிகழ்வை டிஸ்கவரி மற்றும் சேனல் 4 சேனல்கள் படம்பிடித்தன. இங்கிருந்துதான் பியரின் தொலைக்காட்சிப் பயணம் ஆரம்பமாகிறது. தொலைக்காட்சி வரலாற்றில், `Escape to the Legion’ என்ற நிகழ்ச்சிக்காக சஹாரா பாலைவனத்தை தனியாகக் கடந்ததுதான் பியரின் முதல் சாகச நிகழ்ச்சி. இந்த நிகழ்ச்சி உலகம் முழுவதும் தாறுமாறாய் பரவ... அடுத்தக் கட்டமாக 'Born Survivor' என்ற நிகழ்ச்சியை நடத்தித்தர பியரை சேனல்-4 ஒப்பந்தம் செய்தது. அந்த நிகழ்ச்சிதான்  'MAN Vs WILD' என்ற பெயரில் ஒளிபரப்பாகிறது. அதன் பின் இவருக்கென்றே டி.ஆர்.பி-கள் எகிறத் தொடங்கின. உலகம் முழுவதும் அதிக மக்களால் ரசித்து பார்க்கப்படும் நிகழ்ச்சி பியருடைய 'MAN Vs WILD'. ராணுவத்தில் கற்றுக்கொடுத்த உத்திகளை மட்டுமே வைத்து இவர் இந்த நிகழ்ச்சிகளை செய்யவில்லை. புதுப்புது உத்திகளை பியரே கண்டுபிடித்தார். அதனால்தான் இன்று 'உலக சாரணர்களின் தலைவராக (Chief Scout of World)' இருக்கிறார். இப்போதும் பலப்பல உத்திகளை தானாகவே கண்டுபிடித்தும் வருகிறார் பியர். 

'MAN Vs WILD'-ல் அபாயகரமான செயல்களை இவர் செய்வதைப் பார்த்து... உயிருக்கு ஆபத்தான இடங்களில் எப்படி இவரை தனியாக விடலாம்? என சர்ச்சைகள் எழுந்தது. அதன் பின் பியருக்கு தனிமனிதப் பாதுகாப்பு விதிகளின்படி உரிய பாதுகாப்பு வழங்கப்படுகிறது என்றும், `பியர் கிரில்ஸ் படப்பிடிப்புக் குழுவினருடன்தான் பயணம் செய்கிறார்’ என்றும் நிகழ்ச்சியின் ஆரம்பத்தில் தெளிவாக அறிவிக்கத் தொடங்கினர். இருந்தாலும் இதுவரை உதவிக்கு உபகரணங்கள் இல்லாமல், கையில் கிடைப்பதைக்கொண்டு சாகச செயல்களைச் செய்து வருகிறார் பியர்.

‘சர்வைவல் அகாடமி’ என்ற ஒரு அமைப்பை ஸ்காட்லாந்து மலைப்பகுதியில் அமைத்து நடத்திவருகிறார். இயற்கைப் பேரிடர்களை  மக்கள் எப்படி எதிர்கொள்ளவேண்டும், அவசர காலத்தில் எப்படிப்பட்ட உணவுகளை உட்கொண்டு உயிர்வாழத் தெரிந்திருக்க வேண்டும் என்பது போன்ற உத்திகளை மக்களுக்கு சொல்லிக்கொடுப்பதே இதன் முக்கிய நோக்கம்.

பியரின் தனித்திறன்கள் :

பியருக்கு சாகச கலைகளும் அத்துப்படி. மலையேற்றம், குதிரையேற்றம், பாராமோட்டரிங், நீச்சல், ஸ்கை டைவிங், கராத்தே, வில் வித்தை, யோகா, பூமராங் வீசுவது, விமானம் ஓட்டுவது,  படகு செலுத்துதல் என ஆகச்சிறந்த அத்தனைக் கலைகளும் பியருக்குத் தெரியும். பன்மொழி வித்தகர். உலக மக்களின் நாகரிகம், வாழ்க்கை முறைகள் பற்றிய பட்டமும் பெற்றுள்ளார். உலக சாரணர் சம்மேளனத்தின் தலைமைச் சாரணராகவும் இருக்கிறார். இப்பதவிக்கு அமர்த்தப்பட்டவர்களிலேயே மிக இளைய வயதுக்காரர் பியர் என்பது மற்றுமொரு சாதனை. பியர் கிரில்ஸ் சாகசக் கலைகளில் மட்டும் வல்லவரல்ல.... அவர் மிகச்சிறந்த எழுத்தாளரும்கூட. இதுவரை 11 புத்தகங்கள் எழுதியுள்ளார். இதில் 'மிஷன் சர்வைவல்' (Mission Survival) எனும் புத்தகம் அதிகளவில் விற்பனையாகியுள்ளது.

பயம் அறியா பியர் :

ஒருமுறை 'MAN Vs WILD' நிகழ்ச்சிக்காக பிரேசில் காடுகளில் பியர் அலைந்துதிரிந்த நேரம் அது. இரவு நேரத்தில், மரங்களுக்கிடையே தொங்கு ஊஞ்சல் அமைத்து பியர் தனியாக உறங்கிக் கொண்டிருந்தார். அப்போது பியரை நோக்கி 3 ஓநாய்கள் வந்தன. சாதாரண மனிதன் என்றால் பயத்திலேயே உயிர் போயிருக்கும். ஆனால், அங்கு இருப்பதோ பியர்! அருகில் நின்ற ஒரு ஓநாயின் காலைப்பிடித்து சுழற்றி அடித்திருக்கிறார். இதைக்கண்ட மற்ற ஓநாய்கள் பயத்தில் தெறித்து ஓட... பாதுகாப்பு டீம் வந்து பார்க்கும்போது மெல்லிய வெளிச்சத்தில், ஓநாயின் கழுத்தைக் கடித்தபடி இருந்தார் பியர். வந்தவர்கள் பியருக்கு ஏதோ ஆபத்து என்றெண்ணி ஓநாயைத் தாக்க முற்படும்போதுதான் தெரிந்தது.... ஏற்கெனவே பியரின் கடியினால் ஓநாய் இறந்துபோயிருந்தது. ஆபத்து வரும்போது நிதானிக்க முடியாத வேகத்தில், மிக சாதுரியமாக அவர் எடுக்கும் முயற்சிகளே சாதனையாளன் பியர் க்ரில்ஸாக மக்களின் மனதில் பதிய வைத்திருக்கிறது!

இப்போதும், 'MAN Vs WILD' நிகழ்ச்சிக்காக ஏகப்பட்ட 'கோல்மால்' வேலைகள் நடக்கின்றன என்று பரவலான குற்றச்சாட்டுகள் உண்டு. மேற்சொன்ன அனைத்துமே பியரின் சாதனைப்பயணங்கள் மட்டும்தான். உடம்பு ஒத்துழைக்க மறுத்தது உள்ளிட்ட வலிகள் நிறைந்த மற்றொரு பகுதியும் பியருக்கு உண்டு. ஆனாலும் அதையெல்லாம் தோற்கடித்தே பியர் ஒவ்வொரு முறையும் வெற்றிகொள்கிறார். 

பியரின் முயற்சிகள் சாதனைப் பட்டியலில் இடம்பிடிப்பது அல்ல; சாதனைப் பட்டியல்களை தானே புதியதாக உருவாக்குவது. இப்போதும், பல சாகசங்களை செய்யப் பயிற்சியும் முயற்சியும் எடுத்துக் கொண்டிருக்கிறார். வரும் காலத்தில் யாராலும் எளிதில் முறியடிக்கமுடியாத சாதனைகளையும் அவரால் செய்யமுடியுமா? நிச்சயம் முடியும்; ஏனென்றால் அவர் பியர் கிரில்ஸ்!

உங்கள் கருத்தைப் பதிவு செய்யுங்கள்

Advertisement
Advertisement
Advertisement

எடிட்டர் சாய்ஸ்

Advertisement

MUST READ

Advertisement