Published:Updated:

ஆன்லைன் கல்வி முறையை நெறிப்படுத்த... அரசு செய்ய வேண்டியவை என்ன?

ஆன்லைன் கல்வி முறை
பிரீமியம் ஸ்டோரி
News
ஆன்லைன் கல்வி முறை

ஆன்லைன் கல்வி என்பது கல்வியை வியாபாரமாக்குபவர்களுக்கு மிகப்பெரிய வாய்ப்பாக இருக்குமே ஒழிய, எந்த வகையிலும் சமூக மேம்பாட்டுக்குப் பலனளிக்காது.

“கல்வியின் நோக்கத்தை அடிப்படையாக வைத்துதான் கல்வியின் செயல்பாடு குறித்துப் பேச முடியும். சீரான கல்வி, அனைவருக்கும் கல்வி என்பதுதான் நம் கல்வியின் நோக்கம். ஆன்லைன் கல்வி அப்படி சீராகவும், அனைவருக்கும் வழங்கப்படுகிறதா என்று கேட்டால், இல்லை. வறுமையில் உழலும் மாணவர்களுக்கும் வசதியற்ற மாணவர்களுக்கும் ஆன்லைன் கல்வி கிடைக்கவில்லை.

இன்னொருபுறம், கல்வியை தங்கள் கட்டுப்பாட்டுக்குள் கொண்டு வர நினைக்கும் ஒன்றிய அரசு, அதற்கு ஆன்லைன் கல்வியைப் பயன்படுத்திக்கொள்ளப் பார்க்கிறது. ஆசிரியர் நியமனத்தைக் குறைக்கலாம் என்பதாலும் எலெக்ட்ரானிக் சாதனங் களின் விற்பனையைப் பெருக்கலாம் என்பதாலும் ஆன்லைன் கல்வி முறையை ஊக்கப்படுத்தி அதை நிரந்தரமாக்கச் சிலர் முயற்சி செய்கின் றனர். இவற்றையெல்லாம் கடந்து இப் போதைய கொரோனா அச்சுறுத்தல் சூழலில் ஆன்லைன் கல்வியே நமக்கு மாற்று வாய்ப்பாக இருக்கிறது. கொரோனா தொடர்ந்து கொண்டே இருக்கும் சூழலில், அவசர கால தீர்வாக நாம் ஆன்லைன் கல்வியைப் பயன்படுத்திக்கொள்வதில் தவறு கிடையாது.

 அ.கருணானந்தன்
அ.கருணானந்தன்

ஆனால், ஆன்லைன் கல்வியை நிரந்தர அமைப்பாக மாற்றுவது சமுதாய சீர்கேடு களைத்தான் உருவாக்கும். நேரடியான வகுப்பறைகள் குறைக்கப்பட்டாலோ, இல் லாமல் செய்யப்பட்டாலோ மாணவர்களுக்கு சமூக உணர்வு உருவாவது தடைப்படும்.

ஆன்லைன் கல்வி என்பது கல்வியை வியாபாரமாக்குபவர்களுக்கு மிகப்பெரிய வாய்ப்பாக இருக்குமே ஒழிய, எந்த வகையிலும் சமூக மேம்பாட்டுக்குப் பலனளிக்காது என்ற புரிந்துணர்வுடன்தான், தற்காலிகத் தீர்வான ஆன்லைன் கல்வியை நெறிப்படுத்து வதற்கான வழிவகைகளைச் சிந்திக்க வேண்டும்” என்கிறார் பேராசிரியர் அ.கருணானந்தன்.

``ஆன்லைன் கல்வியை நெறிப்படுத்த வேண்டுமெனில், கல்வி தொடர்பான தெளி வான கொள்கை முடிவை மாநில அரசு எடுக்க வேண்டும். அந்தக் கொள்கை அடிப் படையில் திட்டங்களை வகுக்க வேண்டும்” என்ற கருணானந்தன், சீர்படுத்துதல், பரவலாக்குதல் என்ற இருவழிகளில் அதை முன்னெடுக்க வேண்டும்” என்கிறார்.

“சீர்படுத்துதல் என்பது இந்தக் கல்வியை எப்படியெல்லாம் கொடுக்க வேண்டும் என்ற அம்சங்களை உள்ளடக்கியது. ஒருவர் ஐந்து நிமிடங்கள் லெக்சர் கொடுத்துவிட்டுப் போய் விடுகிறார்; இன்னொருவர் இடைவிடாமல் பேசிக்கொண்டே இருக்கிறார்.

இவைதாம் ஆன்லைன் வகுப்புகளா? எது ஆன்லைன் வகுப்பு? அதன் அணுகுமுறை எப்படி இருக்க வேண்டும் என்பதையெல்லாம் முதலில் தீர்மானிக்க வேண்டும். செல்போனில் சிறிய திரையில் பாடம் படிப்பது மாணவர்களுக்கு பெரும் அதிர்வுகளை ஏற்படுத்தும். ஆகையால், பெரிய திரை கொண்ட மழலை, விடலை மாணவர் களைப் பாதிக்காத வகையிலான மாற்றுக் கருவிகள் குறித்து ஆலோசிக்க வேண்டும்.

இந்தக் கல்வியை எப்படி வழங்குவது, எந்த விதத்தில் வழங்குவது, எந்த அளவில் வழங்குவது என்பது குறித்தெல்லாம் முழுமை யாக ஆராய வேண்டும். இதற்கு ஆர்வமும் பள்ளிக்கல்வியில் அறிவும் அனுபவமும் கொண்ட மூத்த கல்வியாளர்கள் கொண்ட ஒரு குழுவை அமைக்க வேண்டும். அந்தக் குழுவின் பரிந்துரைப்படி இதற்கான வழிகளை உருவாக்க வேண்டும்.

அடுத்து, பரவலாக்குதல்... ஆன்லைன் கல்விக்கான கருவிகள் எல்லோருக்கும் கிடைப்பதில்லை. வறுமையில் இருக்கும் குடும்பங்கள் மற்றும் வசதி குறைவான குடும்பங்களைச் சேர்ந்த மாணவர்கள் கருவிகள் இல்லாததால் ஆன்லைன் கல்வி யிலிருந்து விலகியே இருக்கின்றனர். சிலரிடம் கருவிகள் இருந்தாலும் அவற்றைப் பயன் படுத்தக்கூடிய திறன் இருப்பதில்லை.

ஆன்லைன் கல்வி முறையை நெறிப்படுத்த... அரசு செய்ய வேண்டியவை என்ன?
donaldyip

ஆன்லைன் கல்வியைப் பொறுத்தவரையில் குழந்தைகள் வீட்டில் உள்ளவர்களைச் சார்ந்திருக்க வேண்டிய நிலை இருக்கிறது. தங்கள் குழந்தைகளுக்குத் தொழில்நுட்ப ரீதியாக உதவும் ஆற்றல் இல்லாத குடும்பங் களின் நிலை என்ன என்ற கேள்விக்கு யாரிடமும் பதில் இல்லை.

எல்லோரிடமும் கருவியும், அதை இயக்கு வதற்கான திறனும் இருக்கிறதா என்பதை முதலில் உறுதிப்படுத்த வேண்டும். இல்லை யெனில், அதை அரசு ஏற்படுத்தித் தர வேண்டும். அதன் பிறகே, ஆன்லைன் கல்வியைச் செயல்படுத்துவதையும் சீர்படுத்து வதையும் பற்றிச் சிந்திக்க வேண்டும்.

இல்லையெனில் சமூக இடைவெளியைக் குறைக்கும் ஜனநாயக சாதனமான கல்வி, சமூக இடை வெளியைப் பெருக்கும் சீர்கெட்ட சாதனமாக மாறிவிடும். ஆன்லைன் வகுப்புகள் குறித்துத் தெளிவான முடிவுகள் எடுக்கத் தவறினால் மிகப்பெரிய அபாயம் ஏற்படும்” என்றார் முடிவாக.