Published:Updated:

ஐரோப்பாவில் உயர்கல்வி - 10: ஆஸ்திரியா நாட்டில் உயர்கல்வி வாய்ப்புகள் - விண்ணப்பிப்பது எப்படி?

ஐரோப்பாவில் உயர்கல்வி - Higher Education in Europe

குறைந்த குற்றங்கள் கொண்ட நாடுகளில் ஒன்று, அதிகளவிலான சமூக பாதுகாப்புக் கொண்ட நாடுகளில் ஒன்று, ஐரோப்பிய நாடுகளில் அழகிய கலைநயக் கட்டிடங்களைக் கொண்டு உலக அளவிலான அதிகமான பயணிகளை ஈர்க்கும் நாடு என்ற பல பெருமைகளைக் கொண்டிருக்கிறது ஆஸ்திரியா.

ஐரோப்பாவில் உயர்கல்வி - 10: ஆஸ்திரியா நாட்டில் உயர்கல்வி வாய்ப்புகள் - விண்ணப்பிப்பது எப்படி?

குறைந்த குற்றங்கள் கொண்ட நாடுகளில் ஒன்று, அதிகளவிலான சமூக பாதுகாப்புக் கொண்ட நாடுகளில் ஒன்று, ஐரோப்பிய நாடுகளில் அழகிய கலைநயக் கட்டிடங்களைக் கொண்டு உலக அளவிலான அதிகமான பயணிகளை ஈர்க்கும் நாடு என்ற பல பெருமைகளைக் கொண்டிருக்கிறது ஆஸ்திரியா.

Published:Updated:
ஐரோப்பாவில் உயர்கல்வி - Higher Education in Europe
கிழக்கு ஐரோப்பிய நாடுகளில், அதுவும் குறிப்பாக, ஆஸ்திரிய நாட்டுப் பல்கலைக்கழகங்கள் குறித்தானத் தகவல்கள் இன்னும் நம்மூர் மாணவ, மாணவிகளுக்கு சென்றுச் சேரவில்லை என்றே நினைக்கிறேன். இந்திய மாணவ, மாணவிகளைப் பொறுத்தவரை ஆங்கில மொழி, வரலாற்றுத் தொடர்பு உள்ளிட்டக் காரணங்களால் இங்கிலாந்து நாட்டுப் பல்கலைக்கழகங்களே முதல் இலக்காக இருந்து வந்தன. அதனைத் தொடர்ந்து ஜெர்மனி, ஃபிரான்சு நாடுகள் அதிகம் ஈர்க்கப்பட்டு வந்தன. நெதர்லாந்து, சுவீடன், டென்மார்க் என பல நாடுகளுக்கும் இந்திய மாணவ, மாணவிகள் அதிகளவில் கல்விக்காகப் பயணிக்கத் தொடங்கினர். 
ஐரோப்பாவில் உயர்கல்வி
ஐரோப்பாவில் உயர்கல்வி

கிழக்கு ஐரோப்பிய நாடுகளுக்கு குறைந்த அளவிலான கல்விக்கட்டணம், ஆங்கில வழிக் கல்வி என்ற காரணங்களால் மருத்துவக் கல்விக்காகப் பயணிக்கும் மாணவ, மாணவிகள் சமீப காலமாக அதிகரித்து வந்தாலும், பொறியியல், அறிவியல், கலைப் பாடங்களுக்கென கல்விப் பயிலச் செல்வது ஒப்பீட்டளவில் குறைவே! செய்திகள் பரவலாகக் கிடைக்காத காரணத்தால் இந்திய மாணவ, மாணவிகளும், குறிப்பாக, தமிழ்நாட்டவர்களுக்கான ஆஸ்திரிய நாட்டுப் பல்கலைக்கழகங்களில் கிடைக்க வேண்டிய பல நல் வாய்ப்புகள் தவறவிடப்படுகின்றது. இவைகளைக் கருத்தில் கொண்டு, ஆஸ்திரிய நாட்டுப் பல்கலைக்கழகங்கள் மற்றும் ஆஸ்திரிய கல்விப் பற்றின பல்வேறு தகவல்களை இக்கட்டுரை விவரிக்கின்றன.

ஆஸ்திரிய நாட்டின் சிறப்பம்சங்களில், குறைந்த குற்றங்கள் கொண்ட நாடுகளில் ஒன்று, அதிகளவிலான சமூக பாதுகாப்புக் கொண்ட நாடுகளில் ஒன்று, ஐரோப்பிய நாடுகளில் அழகிய கலைநயக் கட்டிடங்களைக் கொண்டு உலக அளவிலான அதிகமான பயணிகளை ஈர்க்கும் நாடு என்ற பல பெருமைகளைக் கொண்டிருக்கிறது ஆஸ்திரியா. ஆல்பஸ் மலையின் சில பகுதிகளை உடைய நாடு என்பதால் அழகிய நிலப்பரப்புக் கொண்ட நாடு. ஐரோப்பியாவின் மிகப்பெரிய ஏரியான கான்சுடான்சே (Constance) ஜெர்மனி, சுவிசர்லாந்து, ஆஸ்திரியாவினைத் தொடுகிறது.

இவை எல்லாவற்றையும் விட, வாழ்க்கைத் தர மேம்பாட்டு குறியீட்டில் முன்னணியில் இருக்கும் ஐரோப்பிய நாடுகளில் ஆஸ்திரியாவும் ஒன்று. 167 நாடுகளில் இருந்து பெறப்பட்டத் தகவலின் அடிப்படையில் Legatum Prosperity Index வெளியிட்ட ஆய்வுக்குறிப்பின்படி, பாதுகாப்பு மற்றும் அமைதியான நாடுகளின் பட்டியலில் ஆஸ்திரியா 4வது இடத்தினையும், இயற்கைச் சூழல் அழகில் 5வது இடமும் வாழ்நிலைத் தரத்தில் 11வது இடமும் தனிமனித சுதந்திரத்தில் 14வது இடமும் பெற்றுள்ளது. மனநலன், தனிமனித வாழ்க்கைச் சூழல், அமைதி ஆகியவற்றில் ஐரோப்பிய நாடுகளில் ஆஸ்திரியா முதன்மையானது என Organization for Economic Co-operation and Development (OECD) அமைப்பும் தகவல் வெளியுட்டுள்ளது.

ஆஸ்திரிய நாட்டைப் பொறுத்தவரை, பெண்களை விட ஆண்கள் தொழிற்முறைக் கல்வியியல் (Vocational education) அதிகம் நாட்டம் கொண்டுள்ளனர். 2019 கணக்கின் படி 54% ஆண்கள் தொழிற்முறைக் கல்வியிலும் 25-34 வயதிற்குட்பட்ட பெண்களில் 46 சதவீதத்தினர் முதுநிலை மற்றும் முனைவர் ஆய்வு வரை கல்விக்கற்கின்றனர். 2018இல், ஒவ்வொரு மாணவ, மாணவியருக்கும் மழலையர் கல்வி முதல் பல்கலைக்கழகக் கல்வி வரையிலான காலக்கட்டத்திற்கு 10254 அமெரிக்கன் டாலர் செலவிடுகின்றது ஆஸ்திரிய அரசு, அமெரிக்கா அரசு 10454 அமெரிக்கன் டாலர் செலவிடுகின்றது. இத்தகவல்கள் ஆஸ்திரிய நாட்டின் கல்வித்துறை வளர்ச்சிக் குறித்தான ஈடுபாட்டுக் கொள்கைக்கானச் சான்றாக உள்ளது. 

ஆஸ்திரியாவெங்கும் 22 அரசுப் பல்கலைக்கழகங்கள், 21 பயனுறு அறிவியல் பல்கலைக்கழகங்கள், 14 ஆசிரியர் பயிற்சி கல்லூரிகள் மற்றும் 16 தனியார் பல்கலைக்கழகங்கள் உள்ளன, இவற்றில் ஆண்டொன்றிற்கு தோராயமாக 3,50,000 மாணவ, மாணவிகள் கல்விப் பயில்கின்றனர். கிட்டத்தட்ட 60,000 அயல்நாட்டு மாணவர்கள் (ஒட்டுமொத்த மாணவர் தொகையில் 26%), கல்விக் கற்று வருகின்றனர்.
ஐரோப்பாவில் உயர்கல்வி
ஐரோப்பாவில் உயர்கல்வி

ஏனைய நாடுகள் போல, இளநிலைப் பட்டப்படிப்பிற்கு 180 ECTS, முதுநிலைப் பட்டப்படிப்பிற்கு 120 ECTS, பாரம்பரிய பட்டப்படிப்பான Magistra or Magister in most disciplines or Diplom-Ingenieur(in) for engineers கல்விக்கு 4 – 6 ஆண்டுகள், 240-360 ECTS வரை கணக்கிடப்படுகிறது. 1 ECTS என்பது 28 மணி நேர பாட வகுப்புகள் ஆகும்.  ஆஸ்திரியப் பல்கலைக்கழகங்களில் குளிர்காலப் பருவம் அக்டோபரில் தொடங்கி ஜனவரியில் நிறைவுப் பெறுகிறது. கோடைக்காலப் பருவம் மார்ச் மாதம் தொடங்கி செப்டம்பரில் நிறைவுப்பெறுகிறது. அந்தந்தக் கல்விப் பருவத்திற்கு ஏற்ப விண்ணப்பத் தேதிகளும் மாறுபடும். கீழே அதனைக் காணலாம்.

  1. ஆஸ்திரியா நாட்டுப் பல்கலைக்கழகங்கள்

 ஆஸ்திரிய நாட்டின் உயர்கல்வி நிறுவனங்கள் மற்றும் அதன் செயற்பாடுகளை அறிந்துக்கொள்ள இந்த இணைய முகவரியைக் காணலாம்.

https://www.eui.eu/Documents/MWP/AcademicCareers/Countries/Austria/AustriaHigherEducation.pdf 

 https://www.bmbwf.gv.at/en/Topics/Higher-education---universities/Higher-education-system.html 

 https://www.oesterreich.gv.at/themen/bildung_und_neue_medien/universitaet/Seite.160102.html (in German Language)

  1. ஆஸ்திரியா பல்கலைக்கழகத் தரவரிசை 

https://www.timeshighereducation.com/student/where-to-study/study-in-austria 

  1. ஆஸ்திரியா பட்டப்படிப்பு நுழைவு விதிமுறைகள்

ஒவ்வொருப் பல்கலைக்கழகத்திற்கும் ஒவ்வொருப் பாடத்திட்டத்திற்கும் நுழைவு விதிமுறைகள் மாறுபடுவதால், இவ் இணைய இணைப்பில் சென்று பாடப்பிரிவினைத் தேர்ந்தெடுத்து விவரமாகக் காணலாம்.  https://www.studienwahl.at/en

பயனுறு அறிவியல் பல்கலைக்கழகங்களில் கற்றுக்கொடுக்கப்படும் பாடப்பிரிவுக் குறித்த விவரங்களுக்கு கீழே உள்ள இணைய இணைப்பினைக் காணலாம்.

https://www.fachhochschulen.ac.at/en 

பெரும்பாலுமான ஆஸ்திரியப் பல்கலைக்கழகப் பட்டப்படிப்பிற்கு தனியே நுழைவுத் தேர்வும் ஜெர்மன் மொழித் திறன் சான்றிதழும் அவசயமாகிறது.

ஐரோப்பாவில் உயர்கல்வி
ஐரோப்பாவில் உயர்கல்வி
ஆஸ்திரிய நாட்டுக் கல்விக்குரியத் தகுதியினைப் பெறுவதற்கு தனியே பயிற்சிக் கல்வியினை (தயார்படுத்தல் பாடங்கள்) வழங்குகிறார்கள் (The University Preparation Programmes). ஜெர்மன் மொழிப் பாடம், ஆங்கிலம், கணிதம், இயற்பியல், வேதியியல், உயிரியல், வரலாறு, பூகோளவியல் உள்ளிட்டப் பாடப்பிரிவுகளுக்கு இத்தகைய பயிற்சிப் பாடங்கள் கற்றுத்தரப்பட்டு தேர்வு நடத்தப்பட்டு, தகுதிச் சான்றிதழ் வழங்குகிறார்கள்.

OeAD என்ற அதிகாரப்பூர்வ அமைப்பு வியன்னா பல்கலைக்கழகம், கிரேஸ் பல்கலைக்கழகம், லியோபென் பல்கலைக்கழகம் ஆகியவைகளுடன் இணைந்து இப் பயிற்சிக் கல்வியை வழங்குகிறார்கள். 

https://vorstudienlehrgang.at/en/vienna/

https://vorstudienlehrgang.at/en/graz/ 

https://vorstudienlehrgang.at/en/leoben/ 

3. அ) இளநிலைப் பட்டப்படிப்புகள்

அவரவர் நாட்டில் இருக்கும் மேல்நிலைப் பள்ளித் தகுதித் தேர்வினை நிறைவு செய்திருக்க வேண்டும். சில பாடப்பிரிவிற்கு, மேல்நிலை வகுப்பின் பின்னரான 3 ஆண்டுகள் கல்லூரிக் கல்வியோ, 1-3 ஆண்டுகள் பணி அனுபவமோ, ஆஸ்திரியப் பல்கலைக்கழகங்களின் தனி நுழைவுத் தேர்வோ, தனிப்பயிற்சித் தேர்வோ நிறைவு செய்திருக்க வேண்டும். 

ஆ) முதுநிலைப் பட்டப்படிப்புகள்

முதுநிலைக் கல்வி நுழைவிற்கான அடிப்படைத் தகுதியாக இளநிலைக் கல்வி 180 ECTS என்ற அளவு நிர்ணயிக்கப்பட்டுள்ளது. இந்தியா உள்ளிட்ட அயல் நாட்டினர், இளநிலைப் பாடப்பிரிவில் எதில் தேர்ச்சிப் பெற்றுள்ளார்களோ, அதேப் பாடப்பிரிவினில் மட்டும் தான் முதுநிலைக் கல்விக்கு நுழைய முடியும். பயனுறு அறிவியல் பல்கலைக்கழகங்களைப் பொறுத்தவரை, இளநிலைக் கல்விக்குப் பிறகான பணி அனுபவம் அவசியம்.

4. கல்விக்கட்டணம்

அரசுப் பல்கலைக்கழகங்களில் ஒவ்வொருப் பருவத்திற்கும் கல்விக்கட்டணமாக 726.72 யூரோ நிர்ணயிக்கப்பட்டுள்ளது. தோராயமாக 60,000 இந்திய ரூபாய். சில பருவங்களில் தொடர் வகுப்பு இல்லாமல், சில பாடங்களை மட்டும் தேர்ந்தெடுக்கும் நிலையில் பருவத்திற்கு 363.36 யூரோ நிர்ணயிக்கப்பட்டுள்ளது. அதாவது, தோராயமாக 30,000 இந்திய ரூபாய்.

https://www.studienwahl.at/Content.Node/sonstiges/studienbeitraege.en.php 

தனியார் பல்கலைக்கழகங்களைப் பொறுத்தவரை, ஆண்டொன்றிற்கு 6000-23000 யூரோ, அதாவது, 4.95 லட்சங்கள் முதல் 18.95 லட்சங்கள் வரை தேவைப்படும்.

மாணவ மருத்துக் காப்பீட்டிற்காக ஒவ்வொரு பருவத்திற்கும் 20.20 யூரோ கட்ட வேண்டும்.

5. ஜெர்மன் மொழி மற்றும் ஆங்கிலப்புலமைத் தேர்வு  

ஜெர்மன் மொழிப் பிரிவுப் பாடத்திட்டத்தில் படிக்க வேண்டிய வந்தாலோ, ஒரு சில பாடங்களை மட்டும் ஜெர்மன் மொழியில் படிக்க வேண்டிய வந்தாலோ, ஜெர்மன் மொழித் திறன் தேர்வில் A2 நிலையினை எட்டியிருக்க வேண்டும். அல்லது உயர்நிலை, மேல்நிலைப் பள்ளி வகுப்புகளில் 4 ஆண்டுகள் ஜெர்மன் மொழியில் தேர்ச்சிப் பெற்றிருக்க வேண்டும். ஆங்கில மொழிப் பிரிவுப் பாடத்திட்டத்திற்கு IELTS, TOEFL அல்லது Cambridge சோதனைகளில் பல்கலைக்கழகங்கள் நிர்ணயித்திருக்கும் அளவினை எட்டியிருக்க வேண்டும்.

6. விண்ணப்பிக்கும் முறை 

ஆஸ்திரிய நாட்டினைப் பொறுத்தவரை, பல்கலைக்கழக நுழைவு விண்ணப்பங்கள் அந்தந்த பல்கலைக்கழகச் சேர்க்கைப் பிரிவே நேரடியாக வழங்குகிறது. சில நேரங்களில், மாணவ, மாணவிகளின் சான்றிதழ்களை நேரடியாக விண்ணப்பங்களோடு சேர்த்து ஆஸ்திரிய நாட்டிற்கு அனுப்பச் சொல்லிக் கேட்கபடலாம். சில நேரங்களில் ஆஸ்திரியத் தூதரகங்கள் வழியாக விண்ணப்பிக்க வேண்டிய இருந்தால், அவர்களே அனைத்து ஆவணங்களையும் பல்கலைக்கழகங்களுக்கு அனுப்பிவைப்பர். 

ஐரோப்பாவில் உயர்கல்வி
ஐரோப்பாவில் உயர்கல்வி
ஒவ்வொருப் பல்கலைக்கழகமும், விண்ணப்பங்கள் பெறுவதற்குரிய தனித்த நடைமுறையினைப் பின்பற்றுகின்றனர். உதாரணமாக, வியன்னா பல்கலைக்கழக நடைமுறைக் குறித்து அறிய, இந்த இணைய இணைப்பில் காணலாம்.

University of Vienna: https://uspace.univie.ac.at/en/web/gast

விண்ணப்பங்கள் இணையம் வழியாக பதிவுச் செய்தப்பின்னர், பல்கலைக்கழகக் கல்வி அதிகாரிகளோடு Skype நேர்காணலுக்கான நேரத்தினைப் பதிவுச் செய்துக்கொள்ள வேண்டும்.  அக்டோபரில் கல்விச் சேர்க்கைக்காக ஜூலை முதலே இந்த நேர்காணலுக்காக விண்ணப்பிக்கலாம். அதேப்போல, கிரேஸ் பல்கலைக்கழக கல்விச்சேர்க்கைக்கான மேலதிகத் தகவல்களைப் பெற, இவ் இணைய இணைப்பினைக் காணலாம். 

University of Graz:  https://studienzugang.uni-graz.at/de/bewerbungstool/ 

அக்டோபரில் கல்விச்சேர்க்கைக்காக, மார்ச் மாதம் முதலே இணையப் பதிவும் நேர்காணல் தேதிக்கான கோரிக்கையும் வைக்கலாம். 

7. விண்ணப்பிக்கும் நாள்கள்

குளிர்காலப் பருவத்திற்கான விண்ணப்பங்கள் பல்கலைக்கழகங்களைப் பொறுத்து மார்ச் மாதம் தொடங்கி ஜூலையில் நிறைவுப் பெறுகிறது, சில பாடப்பிரிவிற்கு செப்டம்பர் முதலாம் வாரம் வரை விண்ணப்பங்கள் பெறப்பட்டு நேர்காணலும் நடைபெறுகிறது. கோடைக்காலப் பருவத்திற்கான விண்ணப்பங்கள் டிசம்பரில் தொடங்கி ஜனவரி இறுதியிலோ பிப்ரவரி முதல் வாரம் வரையிலோ வரை பெறப்படுகிறது.

8. வாழ்க்கைச் செலவு

மாணவர்களின் வயதினைப் பொறுத்து மாதச் செலவுக்கான அளவுகோல் வைத்திருக்கிறார்கள். உதாரணமாக, 24 வயதிற்குட்பட்ட மாணவ, மாணவிகளுக்கு 569.11 யூரோ (தோராயமாக, 50,000 இந்திய ரூபாய்), அதற்கும் மேற்பட்டவர்களுக்கு மாதம் 1030.49 யூரோ (தோராயமாக 85,000 இந்திய ரூபாய்), திருமணமான இணையர்களுக்கு மாதம் 1625.71 யூரோ (தோராயமாக 1.35 லட்ச இந்திய ரூபாய்), ஒவ்வொரு குழந்தைக்கும் கூடுதலாக மாதம் 159 யூரோ (தோராயமாக 13,000 இந்திய ரூபாய்) என நிர்ணயிக்கப்பட்டுள்ளது.

நுழைவிசைவு (visa) விண்ணப்பிக்கும் முன், மேற்குறிப்பிட்ட மதிப்பில் 12 மாதத்திற்கான கூட்டுத் தொகையினை வங்கிக்கணக்கில் செலுத்தி, ஆஸ்திரிய நாட்டில் செலவுச் செய்ய வாய்ப்புள்ளதைக் கணக்கில் காட்ட வேண்டும். ஒருவேளை, மாத வீட்டு வாடகை 309.93 யூரோ (தோராயமாக 25,500 இந்திய ரூபாய்) தொகைக்கு மேற்பட்டதாக இருப்பின், அதற்கேற்ற தொகையையும் மருத்துவக் காப்பீட்டிற்கானத் தொகையையும் சேர்த்து வங்கிக்கணக்கில் 12 மாதத்திற்கான கையிறுப்பு உள்ளதை ஆவணப்படுத்த வேண்டும். மாணவ, மாணவியர் சட்டப்படி வார 20 மணி நேரம் பகுதி நேர வேலைச்செய்ய அனுமதி உண்டு.

9. மாணவ நுழைவிசைவு (Student Visa) 

மாணவ நுழைவிசைவுக் குறித்தான அலுவல் ரீதியிலானத் தகவல்களைத் தெரிந்துக்கொள்ள கீழே உள்ள இணைப்புகளில் வாசிக்கலாம்.

https://oead.at/de/nach-oesterreich/einreise-und-aufenthalt/

https://oead.at/de/nach-oesterreich/einreise-und-aufenthalt/aufenthaltsbewilligung-student-kein-mobilitaetsprogramm#c22581 

ஐரோப்பாவில் உயர்கல்வி
ஐரோப்பாவில் உயர்கல்வி

10. ஆஸ்திரியா நாட்டு கல்வி ஊக்கத்தொகை

ஆஸ்திரிய நாட்டுப் பல்கலைக்கழகங்களில் கல்விப் பயிலும் மாணவ, மாணவிகளுக்கு கல்வி உதவித்தொகை வழங்கப்படுகிறது. அதுத்தொடர்பான விண்ணப்பங்களை மாணவ, மாணவிகள் குளிர்காலப் பருவக் கல்விக்காலத்தில் செப்டம்பரிலிருந்து டிசம்பருக்குள் பதிவுச் செய்யலாம், கோடைக்கால பருவத்திற்கான விண்ணப்பத்தினை பிப்ரவரி 20லிருந்து மே 15 வரை பதிவுச்செய்யலாம். மேலதிகத் தகவல்களை,

https://www.stipendium.at/kontakt/stipendienstellen என்ற இணையத்தில் பெறலாம். 

ஏனைய ஊக்கத்தொகைகள் பற்றினத் தகவல்களை அறிய, 

https://oead.at/en/to-austria/grants-and-scholarships என்ற இணைய இணைப்பில் காணலாம். ஒவ்வொரு நாட்டு மாணவ, மாணவிகளைப் பொறுத்தும், அவர்கள் பயிலும் கல்வியைப் பொறுத்தும், பெற்ற மதிப்பெண்களைப் பொறுத்தும் ஊக்கத்தொகை அளவும் ஊக்கத்தொகைத் திட்டமும் மாறுபடும். 

ஆஸ்திரிய நாட்டுப் பல்கலைக்கழகங்களைப் பொறுத்தவரை அங்கு வழங்கப்படும் பல்வேறு ஊக்கத்தொகைகள் குறித்தான முழுமையான தகவல்கள் மற்றும் விண்ணப்பிக்கும் முறைகள் குறித்து மேலே உள்ள இணையத்திலும், www.grants.at, என்ற இணைய முகவரியிலும் தகவல்களைப் பெறலாம். இத்தகைய பொதுவான ஊக்கத்தொகைகள் மட்டுமின்றி, ஒவ்வொரு பல்கலைக்கழகங்களும் தனியே கல்வி உதவித்தொகைகள், ஊக்கத்தொகைகள் வழங்குவதால், தனித்தனியே பல்கலைக்கழக அலுவலகங்களையும் அதற்கென்ற தனி அதிகாரிகளையும் தொடர்புக்கொண்டு விண்ணப்பிக்கலாம். 

- முனைவர் விஜய் அசோகன், சுவீடன்