Published:Updated:

முழுக்கட்டணத்தைச் செலுத்த வற்புறுத்தும் கல்வி நிறுவனங்கள்... பெற்றோரின் புலம்பல்கள்...

பெற்றோரின் புலம்பல்கள்...
பிரீமியம் ஸ்டோரி
News
பெற்றோரின் புலம்பல்கள்...

பதிவாகாத புகார்கள்!

கொரோனா பேரிடர் காரணமாக, மாணவர்கள் வீட்டிலிருந்தே இணையவழியில் கல்வி பயின்று வருகின்றனர். ஆகையால், கடந்த ஆண்டு ஏப்ரல் மாதம், கோவிட்-19 பெருந்தொற்றுக் காலத்தில் கட்டாயப்படுத்தி முழு கல்விக் கட்டணத்தையும் வசூலிக்கக் கூடாது என்று கல்வி நிறுவனங்களுக்கு தமிழ்நாடு அரசு அறிக்கை அனுப்பியது. மேலும், 75 சதவிகித கல்விக் கட்டணத்தை மட்டுமே வசூலிக்க வேண்டும் என்றும் தனியார் கல்வி நிறுவனங்களுக்கு தமிழ்நாடு அரசு உத்தரவிட்டது.

முழுக்கட்டணத்தைச் செலுத்த வற்புறுத்தும் கல்வி நிறுவனங்கள்... பெற்றோரின் புலம்பல்கள்...

இதை எதிர்த்து தனியார் நிறுவனங்கள் உயர் நீதிமன்றத்தில் வழக்கு தொடுத்தனர். அதில், 40 சதவிகித கட்டணத்தை கல்வியாண்டின் தொடக்கத் தில் பெற்றுக்கொள்ளலாம் என்று நீதிமன்றம் உத்தரவிட்டது. மேலும், பெற்றோர்களிடம் முழுக் கட்டணத்தைச் செலுத்த வேண்டுமென்று கட்டாயப் படுத்தினால், கடுமையான நடவடிக்கை எடுக்கப்படும் என்று நீதிமன்றம் உத்தரவிட்டது. பின்னர், கடந்த ஆண்டு நவம்பர் மாதத்தில், கூடுதலாக 35 சதவிகித கட்டணத்தைச் சேர்த்து 75 சதவிகித கட்டணத்தைப் பெற்றுக்கொள்ள தனியார் கல்வி நிறுவனங்களுக்கு சென்னை உயர் நீதிமன்றம் அனுமதியளித்தது.

2020-21-ம் ஆண்டுக்கான கல்வியாண்டு முடிந்து, அடுத்த கல்வியாண்டு தொடங்கியுள்ள நிலையில், புதிய கல்வியாண்டுக்கான மாணவர் சேர்க்கையை கல்வி நிறுவனங்கள் தொடங்கியுள்ளன. ஆனால், இன்னமும் முழுக் கட்டணத்தையும் செலுத்த வேண்டும் என்றும் போக்குவரத்து, மெஸ் போன்ற இதர கட்டணங்களையும் செலுத்துமாறும் பெற்றோர்களை, தனியார் நிறுவனங்கள் வலியுறுத்துவதாகப் பல பெற்றோர்கள் வருத்தம் தெரிவிக்கின்றனர். தமிழ்நாடு மாணவர், பெற்றோர் நலச்சங்கத்தின் மாநில தலைவர் செ.அருமைநாதனிடம் இதுபற்றி பேசினோம்.

“குறிப்பாக, சி.பி.எஸ்.இ பள்ளிகளில்தான் இது போன்ற பிரச்னைகள் அதிகமாக ஏற்படுகின்றன. பள்ளிக் கல்வித் துறையின் நேரடிக் கட்டுப்பாட்டில் வரும் மெட்ரிகு லேஷன், ஸ்டேட் போர்டு பள்ளிகள் உத்தரவின்படி ஓரளவுக்குச் செயல்பட்டாலும், சில நிறுவனங்கள் முழுக் கட்டணத்தையும் வசூலிக்கின்றன. இதை மீறும் பள்ளி களை பற்றி மாவட்ட கல்வி அதிகாரியிடம் புகார் தெரிவிக்க வேண்டும்.

சி.பி.எஸ்.இ மற்றும் சர்வதேச பள்ளிகளுக்கும் நீதிமன்ற உத்தரவு பொருந்தும். இருப்பினும், அவை முழுக்கட்டணத்தைச் செலுத்த கட்டாயப்படுத்துவதோடு, அப்படிச் செலுத்தாத மாணவர்களை இணைய வகுப்பில் கலந்துகொள்ள அனுமதிக்காதது, டி.சி கொடுப்பது போன்ற கொடுமைகளையும் செய்கின்றன. பள்ளிக் கல்வித்துறை வழங்கியுள்ள 14417 என்ற உதவி எண்ணில் கட்டணப் பிரச்னை குறித்து புகார் தெரிவிக்க லாம். அந்தப் புகார்களின் மீது உரிய நடவடிக்கை எடுப்பதோடு புகார் அளிப்போரின் தகவல்களும் ரகசியமாக வைக்கப்படும் என்று தமிழ்நாடு அரசு கூறியது. ஆனால், அப்படித் தெரிவிக்கப்பட்ட புகார்களின் அடிப்படையில் எந்தப் பள்ளியின்மீதும் இதுவரை நடவடிக்கை எடுத்ததாகத் தெரியவில்லை. உத்தரவை மீறி முழுக் கட்டணம் பெறும் சில பள்ளி நிர்வாகிகளின் மீது கடுமையான நடவடிக்கை எடுக்க வேண்டும். அப்போதுதான் மற்ற பள்ளிகள் உத்தரவை மதிக்கத் தொடங்குவார்கள்” என்று கூறினார்.

 செ. அருமைநாதன்,  சோமசுந்தரம்
செ. அருமைநாதன், சோமசுந்தரம்

இதுபோல் நீதிமன்ற உத்தரவுக்கு எதிராகச் செயல்படும் கல்வி நிறுவனங்கள் மீது என்ன மாதிரியான நடவடிக்கைகளை எடுக்க வேண்டும் என்பது பற்றிப் பேசிய, கல்வி ஆலோசகர் முனைவர் சோமசுந்தரம், “ஒரு சில பள்ளிகள் இந்த உத்தரவை மீறி தவறு செய்கின்றன. அவற்றின்மீது போர்க்கால அடிப்படையில் நடவடிக்கை எடுக்க வேண்டியது அவசியம்தான். ஆனால், இப்படி உத்தரவை மீறியதற்காக ஒரு பள்ளியின் அங்கீகாரத்தை ரத்து செய்தால் அது மேலும் சிக்கலைத்தான் உருவாக்கும். மாணவர்கள் மீண்டும் வேறு பள்ளிகளில் சேர்வதற்கான முயற்சிகள் பல குழப்பங்களையும் மன உளைச்சலையும் உண்டாக்கும். அதற்கு பதிலாக, நிர்ணயிக்கப்பட்ட 75 சதவிகித தொகை போகக் கூடுதலாக வசூலித்த தொகையை பெற்றோர்களிடமே திருப்பித் தர வைக்க வேண்டும்’’ என்று கூறினார்.

குழந்தைகளின் கல்வி பாதிக்கப்பட்டுவிடுமோ, கொரோனா சூழலில் ஒருவேளை டி.சி கொடுத்துவிட்டால், குழந்தையை வேறு பள்ளியில் சேர்ப்பது கடினமாகி விடுமே என்ற அச்சத்தில் பெரும்பான்மையான பெற்றோர், கல்வி நிறுவனங்கள் கூறும் கட்டணத்தை சிரமப்பட்டாவது செலுத்திவிடவே முயல்கின்றனர். அப்படிச் செலுத்த முடியாதோர் குழந்தைகளை அரசுப் பள்ளிக்கு மாற்றிவிடுகின்றனர். அதையும் மீறி புகார் அளிக்க முன்வருவோர் மிகச் சிலரே. அந்தப் புகார் களின் மீது அரசு கடுமையான நடவடிக்கை எடுத்தால் மட்டுமே தாங்கள் எதிர்கொள்ளும் சிரமங்களைப் பற்றி புகார் அளிக்கும் தைரியம் பெற்றோர்களுக்கு வரும்.