Published:Updated:

பண்டிகை நாளில் மகிழ்ச்சியை அனுபவிப்பது... ஆண்களா.. பெண்களா ?

எஸ்.விஜயஷாலினி படங்கள்: ஜெ.வேங்கடராஜ்

பண்டிகை நாளில் மகிழ்ச்சியை அனுபவிப்பது... ஆண்களா.. பெண்களா ?

எஸ்.விஜயஷாலினி படங்கள்: ஜெ.வேங்கடராஜ்

Published:Updated:

ஒரு பண்டிகை, விசேஷ நாள் என்றால் பட்டிமன்றம் இல்லாமலா? பட்டிமன்றம் என்றால் ராஜா, பாரதி பாஸ்கர் இல்லாமலா? இதோ, 'பண்டிகை நாளில் அதிக மகிழ்ச்சி யாருக்கு... ஆண்களுக்கா, பெண்களுக்கா?’ என்னும் தலைப்பில், விகடன் தீபாவளி மலருக்காக ஸ்பெஷல் பட்டிமன்றம் நடத்துகிறார்கள் இவர்கள்!

ராஜா: ஒரு திருவிழா அல்லது பண்டிகை நாள்னா, அதுக்குக் கொஞ்ச நாள் முன்னாடியே அதுக்கான தயாரிப்புகள் தொடங்கிடுது. அதில் முதல் தயாரிப்பு ஆண்களைப் பொறுத்தவரை கடன் வாங்குவது அல்லது ஃபைனான்ஸ் ரெடி பண்ணிக் கொடுப்பது. பெண்களைப் பொறுத்தவரை என்ன என்ன வாங்கலாம்னு பட்டியல் போடுவது. இப்ப நீங்களே சொல்லுங்க, பண்டிகை யாருக்கு மகிழ்ச்சி தரும், யாருக்கு மண்டையை உடைக்கும்?

பண்டிகை நாளில் மகிழ்ச்சியை அனுபவிப்பது... ஆண்களா.. பெண்களா ?

ஒட்டுமொத்த விகடனுக்கும் ஒரே ஷார்ட்கட்!

பாரதி பாஸ்கர்:  நீங்க எந்த உலகத்துல வாழ்ந்துட்டு இருக்கீங்க? பொருளாதாரத் தேவை ஏற்பட்டா, ஆண்கள் அதைச் செய்து முடித்தது, பெண்கள் எட்ட நின்று வேடிக்கை பார்த்தது எல்லாம் ஒரு காலம். இன்னிக்குப் பெண்களும் சம்பாதிக்கிறாங்க. வேலைக்குப் போற பெண்கள் தீபாவளி அட்வான்ஸ் வாங்குறது இல்லையா?.

ராஜா: என்ன இருந்தாலும், ஒரு வீட்டின் ஃபைனான்ஷியல் தேவைகளை ஆண்தானே இன்னமும் முன்னின்று நடத்துறான்?

பாரதி பாஸ்கர்: ஆனா, அதுக்கான பிளானிங்கை எப்பவும் பெண்கள்தான் செய்யறாங்க. ரொம்பச் சாதாரண குடும்பங்கள்ல தீபாவளி என்பது ஒரு செலவு. குழந்தைகளின் ஆசைகளை எக்காரணம் கொண்டும் குறைக்க முடியாது. பள்ளி செல்லும் குழந்தைகள், கூடப் படிக்கிற பசங்க புது டிரஸ் போட்டிருக்கிறதைப் பார்த்து ஏங்கும். வாங்கித் தர வசதி இல்லைன்னு சொல்ல அம்மாவுக்கு மனசு வராது. அதனால, பெண்கள் ரொம்ப நாள் முன்னாடியே அதுக்காக பிளான் பண்ண ஆரம்பிக்கிறாங்க.

ராஜா: அதாவது, செலவுகளை ரெடி பண்றது எல்லாம் பெண்கள், செலவுக்கான ஃபைனான்ஸை ரெடி செய்றது ஆண்கள்னு ஒப்புக்கறீங்க. வருமானத்துக்கு ஏற்ற செலவுகள் மட்டும் செய்வோம், வீணான செலவுகள் எல்லாம் வேண்டாம்கிறது மாதிரியான சிந்தனைகள் எல்லாம் பெண்களுக்கு வருதா என்பதுதான் என் கேள்வி.

பண்டிகை நாளில் மகிழ்ச்சியை அனுபவிப்பது... ஆண்களா.. பெண்களா ?

பாரதி பாஸ்கர்:  சிக்கனம்கிறது பெரும்பாலும் பெண்ணைச் சார்ந்ததுதான். ஆனா, பண்டிகைன்னு வரும்போது சிக்கனமாக இருப்பது என்பது சரியா இருக்காது.

ராஜா: ஆமாம். துணிக்கடைகள்ல அதிக நேரம் செலவிடுவதும், அதிகம் காணப்படுவதும் பெண்கள்தானே?

பாரதி பாஸ்கர்:  துணிக்கடைகள்ல பெண்கள் ஏன் அதிகமாக இருக்கிறாங்கன்னா, அழகுணர்ச்சியோடு சம்பந்தப்பட்டவங்க அவங்கதான். தன் கணவருக்கு என்ன சட்டை போட்டா நல்லா இருக்கும்னு அவங்களுக்குத்தான் தெரியும். மிடில் ஏஜில் உள்ள ஆண்களுக்கு ஆடை விஷயத்தில் எந்த ஆர்வமும் இருப்பதில்லை. அதனால, அவங்களுக்கும் சேர்த்துப் பெண்கள்தான் வாங்க வேண்டியிருக்கு.

ராஜா: வாங்குவது மனைவியாக இருந்தாலும், கணவருடைய பர்ஸ்லேர்ந்துதான் பணம் எடுத்துக் கொடுக்கப்படுது.

பாரதி பாஸ்கர்:  தீபாவளிக்கு யார் யாருக்குத் தின்பண்டங்கள் கொடுக்கணும்னு நினைக்கிறப்பவே பெண்களுக்கு மண்டை காயும். அதை அக்கம்பக்கத்து வீடுகளுக்குப் பகிர்ந்து கொடுப்பது பெரிய கலை. வயசானவங்க இருக்குற வீட்டுல அதிகம் ஸ்வீட்ஸ் கொடுக்க முடியாது. குழந்தைகள் அதிகம் இருக்குற சில வீடுகள்ல குழந்தைங்க அதிகமா இருக்கும். அதுக்கேத்த மாதிரி பண்டங்களை பேக் செய்து கொடுக்கணும். இதை பெரும்பாலும் பெண்கள்தான் செய்யறாங்க.

ராஜா: அதெல்லாம் சரிம்மா... இப்பெல்லாம் பெண்கள் எங்கே வீடுகள்ல பலகாரம் பண்றீங்க? ஹஸ்பெண்டை விட்டு ஸ்வீட் கடையில போய் வாங்கிட்டு வரச் சொல்லிடறீங்களே?

பாரதி பாஸ்கர்:  தீபாவளிக்காக, வீட்டில் வேலை செய்யும் பணிப்பெண்ணுக்கு சேலை வாங்கித் தருவது இருக்கே... ரொம்பவும் கஷ்டமான விஷயம். மாமியாருக்குக்கூட எதையாவது வாங்கிக் கொடுத்துத் திருப்திப்படுத்திடலாம்; பணிப்பெண்ணைத் திருப்திப்படுத்த முடியாது. என்னதான் மெனக்கெட்டு புது டிசைனா வாங்கிக் கொடுத்தாலும், 'ப்ச்... இதையா வாங்கினீங்க? இந்த கலர்தான் என்கிட்ட இருக்கே?’ம்பாங்க.

ராஜா: ஆனா, ஆண்கள் எப்பவாவது இது  சரியில்லை, அது சரியில்லைன்னு சொல்லியிருக்காங்களா? மாட்டாங்க!

பாரதி பாஸ்கர்:   ஏன்னா, ஆண்களுக்கு ரசனை கம்மி. தவிர, அவங்களுக்கு எது போட்டாலும் சரியாதான் இருக்கும். இன்னிக்கு அஞ்சு வயசு குழந்தைக்குக்கூட அதைக் கூட்டிட்டுப் போகாம நம்ம இஷ்டத்துக்கு டிரஸ் வாங்க முடியாது, தெரியுமா? நான் கேட்கிறேன், வீட்டில் இருக்கும் எல்லோருக்கும் டிரஸ் வாங்கியாச்சான்னு அந்தக் குடும்பத்தில் எந்த ஆம்பிளைக்காவது தெரியுமா? அவர்களுக்கு காசு கொடுக்கதான் தெரியும்.

தீபாவளியன்னிக்கு கணவர் டி.வி பார்த்துக்கொண்டு ஜாலியாக இருப்பார். யாராவது விருந்தினர்கள் வந்தா, 'யார் வந்திருக்காங்கன்னு பாரு!’ன்னு சொல்லி, அவர்களைக் கவனிக்கும் வேலையை நைஸா மனைவியிடம் தள்ளிவிட்டுடுவார். ஆக, பண்டிகை நாளில் மகிழ்ச்சியாக இருப்பது ஆண்கள்தான். பெண்களுக்கு வேலை முதுகை ஒடிக்கும்.''

ராஜா: ஆனா, ஆண்களும் இப்பெல்லாம் கொஞ்ச கொஞ்சம் வீட்டு வேலைகளைச் செய்யறாங்களே?

பண்டிகை நாளில் மகிழ்ச்சியை அனுபவிப்பது... ஆண்களா.. பெண்களா ?

பாரதி பாஸ்கர்:  ஆயிரத்துல ஒருத்தர்! ஆனா, ஆண்கள் வீட்டு வேலை செய்ய பெண்களே அனுமதிப்பது இல்லை. காரணம், அவங்களை ஒரு நாள் வீட்டு வேலை செய்ய விட்டா, அதுக்கப்புறம் அடுப்பங்கரையையும் சமையலறையையும் க்ளீன் செய்ய பெண்களுக்கு இரண்டு நாள் தேவைப்படும்.  அந்த அளவுக்குக் கந்தரகோலம் பண்ணி வெச்சிருப்பாங்க!

ராஜா: பெண்கள் வீட்டு வேலை செய்றாங்கன்னாலும், முன்னே மாதிரி செய்றது இல்லை. தோசை மாவு உள்பட பெரும்பாலும் கடைகள்ல வாங்கிடுறாங்க. எல்லாத்துக்கும்தான் ரெடி மிக்ஸ் கிடைக்குதே! முன்னாடி எல்லாம் தீபாவளின்னா எல்லார் வீட்டுல இருந்தும் அதிரச மாவு வாசனை வந்துட்டே இருக்கும். பாட்டி முறுக்கு சுடும்போது எல்லோரும் சுற்றி உட்கார்ந்துகொண்டு சுடச்சுட எடுத்துச் சாப்பிடுவது, உப்பு சரியா இருக்கான்னு பார்க்கிறதுக்காக எல்லோரும் போட்டி போடுவதுன்னு பல சுவையான அனுபவங்கள் இப்ப கிடையாது!

பாரதி பாஸ்கர்:  ஆனா, இன்னுக்கும் பண்டிகைன்னாலே அது பெண் சார்ந்ததுதான். பெண்தான் அந்தப் பண்டிகையை நிறைவடையச் செய்கிறாள். அந்த முழு பொறுப்பும் அவளுக்கு இருப்பதால் அதைச் சார்ந்த வேலைகள் அவளுக்குதான் அதிகம்.

ராஜா:  சரிம்மா... அய்யா சாலமன் பாப்பையாவுக்கு பதிலா இப்ப நாமளே கலந்து பேசி ஒரு முடிவுக்கு வருவோம். எல்லா விழாக்களும் பண்டிகைகளும் பெண்கள் தோளில் இறங்குகின்ற சுமைதான். அதை யாரும் இல்லைன்னு மறுக்க முடியாது. ஆனா, இன்னும் பெரும்பாலான இடங்களில் பொருளாதாரச் சுமை ஆணின் மீதும், உழைப்பு, பிறரை மகிழ்ச்சிப்படுத்துவது போன்ற சுமைகள் பெண்ணின் மீதும் விழுந்திருக்கின்றன. விதிவிலக்காக, சில இடங்களில் மாறி இருக்கும்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism