Published:Updated:

புத்தக உலகம் - சூசன்னாவும் ஜெல்லி பீனும்!

புத்தக உலகம் - சூசன்னாவும் ஜெல்லி பீனும்!
பிரீமியம் ஸ்டோரி
புத்தக உலகம் - சூசன்னாவும் ஜெல்லி பீனும்!

கிங் விஸ்வா

புத்தக உலகம் - சூசன்னாவும் ஜெல்லி பீனும்!

கிங் விஸ்வா

Published:Updated:
புத்தக உலகம் - சூசன்னாவும் ஜெல்லி பீனும்!
பிரீமியம் ஸ்டோரி
புத்தக உலகம் - சூசன்னாவும் ஜெல்லி பீனும்!

ரண்டாம் வகுப்பில் படிக்கும் சூசன்னாவுக்குச் செல்லப் பிராணிகள் என்றால், அவ்வளவு பிரியம். ஆனால், அவர்கள் வசிப்பதோ, நகரத்தின் மையத்தில் இருக்கும் ஒரு அப்பார்ட்மென்ட்டில். வழக்கம்போல, அந்த அப்பார்ட்மென்ட்டிலும் செல்லப் பிராணிகளை வீட்டில் வளர்க்கத் தடை விதிக்கப்பட்டிருக்கிறது. சூசன்னாவின் விருப்பதை உணர்ந்த பெற்றோர்கள், அவளுக்கு ஏகப்பட்ட பொம்மைகளை, குறிப்பாக விலங்குகளின் பொம்மைகளை வாங்கித் தந்தனர். அந்தப் பொம்மைகளுடன் விளையாடியும், கிடைக்கும் சிறு சிறு பொருள்களைப் பயன்படுத்தியும் தானே சில பொம்மைகளைச் செய்தாள் சூசன்னா.    

புத்தக உலகம் - சூசன்னாவும் ஜெல்லி பீனும்!

என்னதான் ஆயிரம் பொம்மைகளுடன் விளையாடினாலும், உண்மையான செல்லப் பிராணிகளுக்கு ஈடாகாது அல்லவா? அதை நன்றாக உணர்ந்திருந்தனர், சூசன்னாவின் பெற்றோர். ஆகவே, மகளின் ஆர்வத்தை உணர்ந்து, அவளை வீட்டுக்கு அருகில் இருக்கும் ஒரு விலங்குகள் காப்பிடத்துக்கு அழைத்துச்செல்ல முடிவெடுத்தனர்.

விலங்குகள் காப்பிடம்:

நமது ஊரில் ப்ளூ கிராஸ் போன்ற அமைப்புகள் இருப்பதைப்போல அமெரிக்காவில் இந்த விலங்குகள் காப்பிடம் (Animal Shelter) இருக்கிறது. இங்கே, நம்மால் தொடர்ந்து வளர்க்க முடியாத செல்லப் பிராணிகளையும், தெருவில் இருக்கும் பிராணிகளையும் கொண்டுவந்து விட்டுச்செல்லலாம். அவர்கள், அந்தப் பிராணிகளை நன்றாக வளர்த்து, அவற்றை விரும்புபவர்களுக்கு விற்றும், தத்துக்கொடுத்தும் வருகின்றனர். அப்படிப்பட்ட ஒரு விலங்குகள் காப்பிடத்துக்குத்தான் சூசன்னாவின் அம்மா அவளை அழைத்துச்சென்றார்.

அங்கே இருக்கும் விலங்குகளைப் பார்த்த உடனே, அவளுக்கு அப்படி ஒரு மகிழ்ச்சி. நாய்க்குட்டிகள், பெரிய நாய்கள், பூனைகள், கிளிகள், எலிக்குஞ்சுகள் என்று ஏகப்பட்ட செல்லப் பிராணிகளை ஒரே இடத்தில் பார்த்தவுடன், சூசன்னாவுக்கு அந்த இடத்தை விட்டு வரவே பிடிக்கவில்லை. அதன்பிறகு, ஒவ்வொரு வார இறுதியிலும் சூசன்னா  தொடர்ந்து அந்த விலங்குகள் காப்பிடத்துக்கு வர ஆரம்பித்தாள்.

புதிய நண்பர்கள்:

புது இடத்தில் குடிபுகுந்த சூசன்னாவுக்கு, தன்னைப் போலவே செல்லப் பிராணிகள்மீது அன்பு கொண்ட பல புதிய நண்பர்கள் உருவானார்கள். மேலும், விலங்குகளைப் பழக்குவது, அவற்றுடன் பழகுவது போன்றவற்றை முறையாக, தொழில் வல்லுநர்களிடமிருந்தும் கற்றுக்கொண்டாள் சூசன்னா. அதுமட்டுமல்ல, அங்கே இருக்கும் கைவிடப்பட்ட விலங்குகளுக்கும் அவற்றின்மீது அன்புகாட்ட சூசன்னா போன்றவர்கள் தொடர்ந்து வருவதால், அந்தச் செல்லப் பிராணிகளும் முன்புபோல மகிழ்ச்சியாக இருக்கத் தொடங்கின. நாய்களை நடைப்பயிற்சிக்கு அழைத்துச்செல்வது, பூனைகளுக்கு உணவு ஊட்டுவது போன்ற செயல்களால், சிறு குழந்தைகளுக்கும் ஒரு பாஸிட்டிவ் வைப்ரேஷன் ஏற்படும். இதை, சூசன்னா நிஜ வாழ்க்கையில் உணர ஆரம்பித்தாள்.

ஜெல்லி பீனின் வருகை:


இப்படி சூசன்னாவும் தோழர்களும் மகிழ்ச்சியாக செல்லப் பிராணிகளுடன் விளையாடிக்கொண்டிருந்த ஒரு மாலைவேளையில், அந்த விலங்குகள் காப்பிடத்துக்கு ஒரு குடும்பம் வருகிறது. அம்மா, அப்பா மற்றும் சூசன்னாவின் வயதுடைய ஒரு சிறு பெண் என்று மூவர் அங்கே வருகின்றனர். அந்தச் சிறுமி அழுதுகொண்டே இருக்கிறாள். என்ன என்று விசாரிக்க, அவர்கள் அந்த ஊரை விட்டு வேறு ஊருக்கு இடம் மாறுவதை அறிகிறாள் சூசன்னா. ஆனால், அவர்கள் செல்லும் புதிய இடத்துக்கு, அந்தப் பெண் வளர்க்கும் செல்லப் பிராணியான ஜெல்லி பீனை எடுத்துச் செல்ல முடியாத சூழ்நிலை. அந்தப் பெண்ணின் வலியை உணர்ந்த சூசன்னா, ஜெல்லி பீனை ஒரு நல்ல இடத்தில் பாதுகாப்பாக வளர்க்க ஏற்பாடு செய்வதாக வாக்களிக்கிறாள்.

கினிப் பன்றி:

ஜெல்லி பீன் என்பது அந்தப் பெண் வளர்த்து வந்த கினிப் பன்றி (Guinea Pig). பன்றி என்று அழைக்கப்பட்டாலும், இது முயலைப் போல இருக்கும் ஒருவகை எலிக் குடும்பத்தைச் சேர்ந்த சிறு பிராணி. மொத்தமே 10 இன்ச் அளவுக்கு வளரும் இந்தப் பிராணிகள், ஒன்றிலிருந்து ஒன்றே கால் கிலோ அளவுக்குத்தான் வளரும். முயலைப் போல புசுபுசுவென்று அழகாக பல வண்ணங்களில் இருக்கும் இவை, குழந்தைகளின் செல்லம். இப்படிப்பட்ட ஒரு கினிப் பன்றியைத்தான் அந்தப் பெண் விலங்குகள் காப்பிடத்தில் விட்டுச் செல்கிறாள்.

சூசன்னாவும் நண்பர்களும் ஜெல்லி பீனை நன்றாகக் கவனித்துக்கொள்கிறார்கள். ஆனால், அவர்கள் வருவதோ, வார இறுதியில் மட்டும்தான். ஆகவே, உடனடியாக ஜெல்லி பீனுக்கு ஒரு வீட்டைத் தேடிக் கண்டுபிடித்தாக வேண்டும். அனைவரும் சேர்ந்து எப்படி இதைச் செய்யலாம் என்று யோசிக்கிறார்கள். பலரும் யோசனைகள் சொல்ல, கடைசியாக ஒரு ஐடியாவைச் செயல்படுத்துகிறார்கள்.

உங்கள் தோழன் ஜெல்லி பீன்:

ஜெல்லி பீனைப் பற்றி அழகான வார்த்தைகளில் எழுதி, அதை ஒரு விளம்பரமாக பேப்பரில் அச்சிட்டு, பலருக்கும் கொடுக்கலாம் என்று முடிவெடுக்கின்றனர். அதன்படி, ‘ஜெல்லி பீன் ஒரு நல்லவர்’, ‘ஜெல்லி பீன் ஒரு வல்லவர்’ என்று பலவற்றை எழுதி, ஜெல்லி பீனை போட்டோ எடுத்து, அதையும் இணைத்து ஒரு விளம்பரத்தைத் தயார் செய்கின்றனர். அதை பிரின்ட் அவுட் எடுத்து, நண்பர்களிடமும் பள்ளியிலும் வினியோகம் செய்கின்றனர்.

இதற்கிடையில், வீட்டில் பாம்புகளை வளர்க்கும் ஒரு மர்மமான ஆள், விலங்குகள் காப்பிடத்துக்கு வந்து, ஜெல்லி பீனைத் தத்தெடுத்துக்கொள்வதாகச் சொல்கிறான். ஆனால், அவன் ஜெல்லி பீனைத் தத்தெடுப்பது வளர்க்கவா, இல்லை அவனது வளர்ப்புப் பிராணிகளான பாம்புகளுக்கு இரை கொடுக்கவா?

சூசன்னாவால் ஜெல்லி பீனை அந்த மர்ம மனிதனிடமிருந்து காப்பாற்ற முடிந்ததா?

ஜெல்லி பீனுக்கு என்ன ஆயிற்று?

நண்பர்களின் கூட்டு முயற்சி பலன் அளித்ததா?

இதுபோன்ற கேள்விகளுக்குப் பதில் அளிக்கிறது, ஜெல்லி பீன் என்ற இந்த 128 பக்க சிறுவர் நாவல். வழக்கமாக, இதுபோன்ற கதைகளில் எல்லாம், கதையின் முக்கியப் பாத்திரம் (சூசன்னா மாதிரி), தானே அந்த ஜெல்லி பீனைத் தத்து எடுப்பதுபோல அமைத்திருப்பார்கள். ஆனால், நிஜ வாழ்வில் அதெல்லாம் நடக்காது. இந்த உண்மையை அழகாக கதையின்மூலம் சுட்டிக்காட்டுகிறார் கதாசிரியர். அதைப்போலவே, ஒரு பிரச்னை என்று வரும்போது, அதைச் சிறுவர்கள் அனைவரும் கூட்டாக ஆலோசித்து ஒரு முடிவுக்கு வருவது, முடிவு எடுக்கும் முன்னர் பெரியவர்களைக் கலந்தாலோசிப்பது என்று பல நல்ல விஷயங்களைக் கதையினூடே சொல்லியிருக்கிறார் சிந்தியா.

ஒட்டுமொத்த விகடனுக்கும் ஒரே ஷார்ட்கட்!

புத்தக உலகம் - சூசன்னாவும் ஜெல்லி பீனும்!

எரின் மெக்வாயர் (Erin McGuire) அமெரிக்கா (ஓவியர்)

வியக்கல்லூரியில் படித்துவிட்டு, ரீல் FX என்ற நிறுவனத்தில் டிசைனராக ஐந்து ஆண்டுகள் பணிபுரிந்துவந்தார் எரின். தன்னுடைய வலைப்பூவில் (பிளாக்) தொடர்ந்து, தன் ஓவியங்களைப் பதிவேற்றிவந்தார். அவருடைய ஓவியங்களைப் பார்த்து, ஒரு சிறுவர் இலக்கியப் புத்தகத்துக்கு ஓவியம் வரையும் வாய்ப்பு கிடைத்தது. அச்சில் வந்த அந்தப் புத்தகத்தைப் பார்த்த பலரும் எரினிடம் ஓவியம் வரையக் கேட்டனர். விரைவிலேயே பல புத்தகங்களுக்கு, காமிக்ஸ் தொடர்களுக்கு ஓவியம் வரையும் வாய்ப்பு அவரைத் தேடி வந்தது. தனது டிசைனர் வேலையை விட்டுவிட்டு, இப்போது முழுநேர ஓவியராக இருக்கிறார். உலகப் புகழ்பெற்ற நான்சி ட்ரு சிறுவர் கதைத் தொடருக்கு, இப்போது இவர்தான் ஓவியம் வரைகிறார். எரினின் வெற்றி நமக்குச் சொல்வது ஒரே ஒரு விஷயம்தான்.

சமூக வலைதளங்களின் மூலமும் நம் திறமைகளை வெளிப்படுத்தி, வெற்றி காணலாம்.

புத்தக உலகம் - சூசன்னாவும் ஜெல்லி பீனும்!

சிந்தியா லார்ட் (Cynthiya Lord) (கதாசிரியர்):

நான்கு வயதில் சொந்தமாகப் பாட்டெழுதி, பாட ஆரம்பித்தவரான சிந்தியா, சிறு வயதில் கூச்ச சுபாவம் கொண்டவராக இருந்தவர். அதனாலேயே, வெளியே விளையாடச் செல்லாமல் தன்னுடைய அறையிலேயே இருந்து, ஏகப்பட்ட புத்தகங்களைப் படித்து வளர்ந்தவர். கல்லூரியில் பல சிறுகதைகளை, கட்டுரைகளை எழுதிப் பரிசுகளைக் குவித்தார். தன்னுடைய இரண்டாவது மகனுக்கு, கற்றல் குறைபாடு (ஆட்டிஸம்) இருப்பது தெரிய வந்ததற்குப் பிறகு, குழந்தைகளுக்கு என்று முழுமையாக 2006-ல் இருந்து எழுத ஆரம்பித்தார். இவரது முதல் கதையான Rules மிகவும் பிரபலமானதற்கு முக்கியக் காரணம் ஒன்றுதான். வாழ்க்கையே ஒரு கொண்டாட்டம் என்ற கருப்பொருளை மையமாக வைத்து எழுதப்பட்ட நாவல் அது.

உலகின் முதல் சிறுவர் இலக்கிய விருதான ஜான் நியூபெரி விருது முதல், பல முக்கியமான விருதுகளைப் பெற்றவர் சிந்தியா.

புத்தக உலகம் - சூசன்னாவும் ஜெல்லி பீனும்!

கதை: Shelter Pet Squad : Jelly Bean

கதாசிரியர்: சிந்தியா லார்ட்

ஓவியர்: எரின் மெக்வாயர்

மொழி: ஆங்கிலம் (ஆரம்ப நிலை).

வெளியீடு:
2014 (முதல் கதை), 2015 (2-வது கதை), 2016 (3-வது கதை)

பதிப்பாளர்:
Scholastic Inc

புத்தக அளவு: 19 x 13.3 CM

பக்கங்கள்: 128 பக்கங்கள்

விலை: ஸ்ரீ  386

வாங்க: புத்தகக் கடைகள்,   Amazon.in இணையதளம் மூலம்

இணையத்தில்: 
ஆடியோ மற்றும் இணைய லிங்க்குகள் உள்ளன.

கதை:
அப்பார்ட்மென்ட்டில் செல்லப் பிராணிகளை வளர்க்கத் தடை. ஒரு இரண்டாம் வகுப்பு மாணவிக்கோ, அவற்றின்மீது கொள்ளை ஆசை. என்ன செய்தாள் என்பதுதான் கதை.

கதை வரிசை: மொத்தம் 3 புத்தகங்கள்

விருதுகள்: பெற்றோரின் விருப்பத் தேர்வு முதலான தலை சிறந்த சிறுவர் இலக்கிய விருதுகள் பல. 

சிறப்பு அம்சம்: சக உயிர்களிடம் அன்பு செலுத்துதல், ஜீவ காருண்யம், கருணை போன்ற நற்பண்புகளை இந்தக் காலத்துச் சிறுவர்களுக்கு போதிக்காமல், போரடிக்காமல் கதைகள் மூலமாகச் சொல்கிறது.