Published:Updated:

சென்றதும் வென்றதும்! - 20

சென்றதும் வென்றதும்! - 20
பிரீமியம் ஸ்டோரி
News
சென்றதும் வென்றதும்! - 20

உலகை மாற்றிய கடல் பயணங்கள்மருதன், ஓவியங்கள்:ஷண்முகவேல்

சென்றதும் வென்றதும்! - 20

ஜான் கபோட்

கிறிஸ்டோபர் கொலம்பஸ் போலவே ஜான் கபோட் இத்தாலியைச் சேர்ந்தவர். இருவருக்கும் கப்பல் பயணம் பிடிக்கும். ஐரோப்பாவில் இருந்து ஆசியா செல்ல ஒரு புதிய வழித்தடத்தைக் கண்டுபிடிக்க, இருவருமே வாழ்நாள் முழுவதும் கனவாக அலைந்தவர்கள். கொலம்பஸ் அமெரிக்காவைக் கண்டுபிடித்ததாக தவறாக நினைத்துக்கொண்டார். கபோட் என்ன செய்தார்?

ஜான் கபோட், ஒரு வணிகராகத் தன் வாழ்வைத் தொடங்கியவர். மெக்கா வரை சென்றிருக்கிறார். கப்பல் ஓட்டவும் வரைபடம் தயாரிக்கவும் தெரியும். கொலம்பஸைப் போல மேற்கே வலம் வந்து, ஆசியாவைத் தொட்டுவிடலாம் என்று கனவு கண்டார்.

1492-ம் ஆண்டு கொலம்பஸ், அமெரிக்காவைக் கண்டடைந்ததாக அறிவித்தபோது, ஜான் கபோட் எங்கே இருந்தார், என்ன செய்துகொண்டிருந்தார் என்று தெரியவில்லை. 1495-ம் ஆண்டின்  இறுதியில், கபோட் வெளிச்சத்துக்கு வந்தார்.

அப்போது, அவர் இங்கிலாந்தில் உள்ள ‘பிரிஸ்டோல்’ பகுதிக்கு வந்து சேர்ந்திருந்தார். அது ஒரு துறைமுக நகரம். கப்பல் பயணங்களை நேசிப்பவர்களுக்கும் புதிய வழிகளைக் கண்டறிய விரும்பும் ஆர்வலர்களுக்கும் பிரிஸ்டோல் ஒரு கலங்கரை விளக்கம். இங்கிருந்துதான் பல பயணிகள் புது வழியைத் தேடி பயணத்தை ஆரம்பிப்பார்கள். ஜான் கபோட் கனவுப் பயணமும் இங்கிருந்தே தொடங்கியது. இங்கிலாந்து மன்னர் ஏழாம் ஹென்றி, கபோட்டுக்கு கை நிறைய பணமும் கப்பலில் ஆட்களையும் அளித்து அனுப்பிவைத்தார். ஏழாம் ஹென்றி கபோட்டை அனுப்பியதற்குக் காரணமும் கொலம்பஸ்தான்.

கொலம்பஸ் தன்னுடைய சாகசப் பயணங்களைப் பற்றி பல இடங்களில் சொல்லிவந்தார். இந்தப் பேச்சுகள் இங்கிலாந்தையும் வந்தடைந்தன. ‘யாரிந்த கொலம்பஸ், பல புதிய நாடுகளைக் கண்டுபிடித்திருக்கிறாராமே? இவருக்கு நிதியுதவி அளித்த ஸ்பெயின் நாடு, ஓஹோ என வளரப்போகிறதாமே’ என்று  மக்கள் பேசிக்கொண்டார்கள். ஏழாம் ஹென்றி சும்மா இருப்பாரா? ‘நாமும் கப்பலில் ஒருவரை அனுப்பிவைப்போம்’ என, ஜான் கபோட்டை கப்பென்று பிடித்துக்கொண்டார்.

விகடன் Daily

Quiz

சேலஞ்ச்!

ஈஸியா பதில் சொல்லுங்க...

ரூ.1000 பரிசு வெல்லுங்க...

Exclusive on APP only
Start Quiz
சென்றதும் வென்றதும்! - 20

1497-ம் ஆண்டு மே மாதம், பிரிஸ்டோலில் இருந்து கிளம்பினார் கபோட். சிறிய கப்பல்தான். மேத்யூ என்று பெயர். மொத்தம் 18 பணியாளர்கள் இருந்தார்கள். ஜூன் 24-ம் தேதி இந்தக் கப்பல், வட அமெரிக்காவைச் சென்றடைந்தது என்ற  குறிப்பு மட்டுமே நமக்குக் கிடைக்கிறது. எப்படி போனார்கள், வழியில் என்ன நடந்தது என்று தெரியவில்லை.

‘‘நான் சென்றபோது, அந்தப் பகுதியில் மக்கள் யாரும் இல்லை. ஆனால், அது மக்கள் வாழக்கூடிய இடம்தான் என்பது பார்த்தவுடனே தெரிந்துவிட்டது’’ என்கிறார் கபோட்.

‘இது, நான் கண்டுபிடித்த இடம்’ என்று பெருமையுடன் சொல்லிக்கொண்டர். அந்த நிலத்தை, ஏழாம் ஹென்றிக்குச் சொந்தமானதாகவும் மாற்றினார். இப்போதைய கிழக்கு கனடாவைச் சேர்ந்த அந்தப் பகுதி, இன்று, ‘கபோட் ஸ்ட்ரெயிட்’ (Cabot Strait) என்னும் பெயரால் அழைக்கப்படுகிறது.

சந்தேகமில்லை, இது கபோட்டின் சாதனைதான். யாருமற்ற, இயற்கை வளம்கொண்ட ஒரு புதிய இடத்தை கண்டுபிடித்திருந்தார். அதுவும் முதல் பயணத்திலேயே, அதிகம் சிரமப்படாமல் செய்தார். எவ்வளவோ கடல் பயணிகள் உயிரைக் கொடுத்து,  ஆண்டுக்கணக்கில் சுற்றியும்  ஒன்றும் கிடைக்காமல் திரும்பி  இருக்கிறார்கள். பலர், திரும்பவே இல்லை. அப்படியிருக்க, போன வேகத்தில் ஒரு புதிய பகுதியை வசப்படுத்திக்கொண்ட கபோட், பல பாராட்டுகளை வென்றெடுத்தது நிஜம்.

ஆனால், கபோட் கண்டுபிடித்தது ஒரு வட அமெரிக்க நிலப்பரப்பை என்பதை உணரவில்லை. ‘ஆசியாவின் வடகிழக்கு கடற்கரைப் பகுதியைக் கண்டுபிடித்துவிட்டேன். இங்கே மிளகும் ஏலக்காயும் இன்னபிற வாசனைப் பொருள்களும் கொத்துக் கொத்தாகக் கிடைக்கும். என்னை நம்பி அனுப்பிய மன்னருக்கும் அவருடைய நாட்டுக்கும் பெருமை சேர்த்துவிட்டேன்’ என்று கூத்தாடினார்.

அவர் சொன்னதை எல்லோரும் நம்பினார்கள். ‘அடடா, கொலம்பஸுக்கு அடுத்தது நீதான்’ என்று  பாராட்டினார்கள்.  அதுவும் சரிதான். தப்பாக ஓர் இடத்தைக் கண்டுபிடித்ததில் அவர் இன்னொரு கொலம்பஸேதான்.

1497-ம் ஆண்டின்  இறுதியில் அடுத்த பெரும் பயணத் திட்டத்துடன் ஏழாம் ஹென்றியைச் சந்தித்தார் ஜான் கபோட். சிறிய கப்பலை வைத்துக்கொண்டே பெரிய இடத்தைக் கண்டுபிடித்தவருக்கு, இன்னொரு பயணத்துக்கு மறுப்பார்களா? அளவு கடந்த உற்சாகத்துடன் வழியனுப்பினார் மன்னர்.

இந்த முறை அவர் கண்டுபிடிக்க விரும்பிய இடம், ஜப்பான். வடக்கு அட்லான்டிக் பகுதி வழியாகச் சென்று ஜப்பானை அடைவது திட்டம். 1498-ம் ஆண்டு, மே மாதம் கபோட்டின் பயணம் ஆரம்பமானது. இந்த முறை ஒன்றல்ல, இரண்டல்ல, ஐந்து பெரிய கப்பல்கள். உடன் எவ்வளவு பேர் தெரியுமா? 200 ஆட்கள். இனியும் கபோட் ஒரு சாதாரண பயணி கிடையாது அல்லவா?

கப்பல் பார்வையைவிட்டு மறைவதற்குள்  மன்னர் கனவு காண ஆரம்பித்துவிட்டார். ‘ஆசியாவின் ஒரு பகுதி கைக்கு வந்துவிட்டது. ஜப்பானும் கிடைத்துவிட்டால், என் புகழ் வானம் வரை உயர்ந்துவிடும். ஃபிரான்ஸ், போர்ச்சுகல் என்று இனி யாரும் பெருமை பேச முடியாது.  கண்டுபிடிப்புகளின் நாடாக, இங்கிலாந்து ஜொலிக்கும். ஜான் கபோட் உண்மையிலேயே ஒரு மகத்தான பயணிதான்’ என்று பெருமைப்பட்டார்.

சென்றதும் வென்றதும்! - 20

நம் பார்வையை கபோட்டை நோக்கித் திருப்புவோம். பிரிஸ்டோலில் இருந்து ஐந்து கப்பல்கள் ஆடி அசைந்து செல்லத் தொடங்கின. சரி, அதற்குப் பிறகு என்ன நடந்தது? சுத்தமாகத் தகவலே இல்லை. ஜூலை மாதம், ஒரு கப்பலின் ஏதோ ஒரு பகுதி, அயர்லாந்து அருகில் கரை ஒதுங்கியது. அது, ஜான் கபோட் சென்ற ஐந்து கப்பல்களில் ஒன்று என்றார்கள்.

கடல் பயணத்தில் பெரும் சூறாவளியில் சிக்கி இருக்கலாம் என்று சிலர் யூகித்தார்கள். வேறு ஏதேனும் விபத்து நடந்திருக்கலாம் என்கிறார்கள் வேறு சிலர். விபத்து நடந்தால் ஒரே நேரத்தில் ஐந்து கப்பல்களுமா காணாமல் போய்விடும் என்று சிலர் மறுத்தார்கள். சரி, கபோட் என்ன ஆனார்?

‘கப்பல்கள் காணாமல் போகும்போது, அவர் மட்டும் எப்படி பிழைத்திருக்க முடியும்’ என்றார்கள் சிலர். ‘அவர் சாதாரண ஆள் இல்லை, நிச்சயம் எங்காவது கரை ஒதுங்கியிருப்பார்’ என்றார்கள் சிலர். ‘நினைத்தது போலவே அவர் ஜப்பான் போய்விட்டார்’ என்றும் சிலர் நம்பினார்கள்.

வரலாற்று ஆசிரியர்கள் சொல்லும் பதில் ஒன்றுதான். கபோட் என்னவானார் என்று தெரியவில்லை!

(பயணம் தொடரும்...)