FA பக்கங்கள்
Published:Updated:

சின்னக் குச்சியும் வண்ணக் கலையாகும்!

சின்னக் குச்சியும் வண்ணக் கலையாகும்!
பிரீமியம் ஸ்டோரி
News
சின்னக் குச்சியும் வண்ணக் கலையாகும்!

தி.ஸ்ரீ ஸ்வர்ணா, P.S.B.B மில்லெனியம் ஸ்கூல், கடலூர். படங்கள்: எஸ்.தேவராஜன்

‘‘மாணவப் பருவத்தில் போடப்படும் விதைதான், விருட்சமாக வளர்ந்து ஒருவரின் முழு வாழ்க்கையையும் தீர்மானிக்கும். மற்றவர்களுக்கும் பயனுள்ளதாக மாற்றும். இதை மனதில் வைத்துதான், அவர்களின் கற்பனை மற்றும் கலைத்திறனை வளர்த்து வருகிறேன்’’ என்கிறார் உமாபதி.

சின்னக் குச்சியும் வண்ணக் கலையாகும்!

புதுச்சேரி, சேலியமேடு, கவிஞரேறு வாணிதாசன் அரசு உயர்நிலைப் பள்ளியில் கலை ஆசிரியராகப் பணியாற்றி வருபவர் உமாபதி. கிராமங்களில் எளிதாகக் கிடைக்கும் இயற்கைப் பொருட்களிலேயே பல்வேறு கலைப் படைப்புகளை உருவாக்கும் பயிற்சியை மாணவர்களுக்கு அளிக்கிறார். இவரிடம் பயிற்சிபெற்ற மாணவர்கள், புது டெல்லி வரை சென்று அசத்தி இருக்கிறார்கள்.

சின்னக் குச்சியும் வண்ணக் கலையாகும்!
சின்னக் குச்சியும் வண்ணக் கலையாகும்!

‘‘நான் இதற்கு முன்பு கோவை, நாகை போன்ற ஊர்களின் பள்ளிகளில் பணியாற்றி, பத்து வருடங்களுக்கு முன்பு இந்தப் பள்ளிக்கு வந்தேன். இங்கே படிக்கும்  மாணவர்களில் பெரும்பாலானோர் பொருளாதாரரீதியாக மிகவும் பின்தங்கிய குடும்பத்தைச் சேர்ந்தவர்கள். கலைப் படைப்புகளை உருவாக்க, கடைகளில் பொருள்களை வாங்க வசதியற்றவர்கள். ஆனால், எல்லோரிடமும் அற்புதமான கலைத்திறன் இருந்தது. என்ன செய்யலாம் என யோசித்தேன். அப்போது ஆரம்பித்ததுதான் இது’’ என்கிறார் உமாபதி.

சின்னக் குச்சியும் வண்ணக் கலையாகும்!

பள்ளிக்கு வரும் வழியில் கிடைக்கும்  தென்னை நார்கள், பனை மட்டைகள், மரச் சருகுகள் போன்றவற்றைச் சேகரித்து வரச்சொல்லி, உருவங்களை உருவாக்கும் பயிற்சி அளித்துள்ளார்.

சின்னக் குச்சியும் வண்ணக் கலையாகும்!

‘‘உமாபதி சார் செஞ்சு காட்டியதைப் பார்த்ததும் நாங்களும் ஆர்வமாகக் கத்துக்கிட்டோம். ஸ்கூலுக்கு வர்ற வழியில் இருக்கிற ஒரு குச்சியையும் விட மாட்டோம். எந்த மாதிரி உருவங்களை செய்யலாம்னு கூடிப் பேசி, நிறைய புத்தகங்களைப் பார்த்து, வித்தியாசமான உருவங்களைச் செய்வோம்’’ என்று குஷியோடு சொல்கிறார்கள் மாணவர்கள்.

சின்னக் குச்சியும் வண்ணக் கலையாகும்!

இந்தியாவின் பல்வேறு கலாசாரங்களைப் பிரதிபலிக்கும் உருவங்கள், தேசிய ஒருமைப்பாட்டைச் சொல்லும் சிற்பங்கள் எனப் பலவற்றை உருவாக்கி இருக்கிறார்கள்.

சின்னக் குச்சியும் வண்ணக் கலையாகும்!

ஒடிஸா மாநிலத்தின் பூரியில் நடைபெற்ற மணல் சிற்பக் கலைஞர்களுக்கான போட்டியில் பரிசு வென்றுள்ள உமாபதி, முன்னாள் குடியரசுத் தலைவர் அப்துல் கலாமிடம் பாராட்டுப் பெற்றவர்.

‘‘புதுச்சேரி ஆரோவில்லுக்கு வரும் வெளிநாட்டுப் பயணிகளுக்கு எங்கள் மாணவர்களே கற்றுக்கொடுக்கிறார்கள். பெங்களூருவில் நடக்கும் ‘சித்திரச் சந்தை’ மற்றும் புது டெல்லியில் ‘கலா உத்சவ்’ விழாக்களிலும்  பங்கேற்றுள்ளார்கள். கலைக்கு ஏழ்மை ஒரு தடையில்லை. சரியான வாய்ப்பு கிடைத்தால் எதையும் சாதிக்க முடியும் என்பதற்கு உதாரணம், எங்கள் பிள்ளைகள்’’ என்கிற உமாபதியின் குரலில் பெருமிதம்.

கலக்குங்க கலைஞர்களே!