Published:Updated:

கிராமத்து விளையாட்டு !

மள்ள வந்து மெள்ள போ இரா.முத்துநாகு சக்திஅருணகிரி

பிரீமியம் ஸ்டோரி
##~##

மனம் என்ன நினைக்கிறது என்பதை முகம் காட்டிக்கொடுத்துவிடும். இதைத்தான் 'அகத்தின் அழகு முகத்தில் தெரியும்’ என்பார்கள். அகத்தில் உள்ளதைக் கண்டுபிடிப்பது ஒரு கலை. விளையாட்டின் மூலம் இதை வளர்த்துக்கொள்ள உருவாக்கியதுதான் 'மெள்ள வந்து கிள்ளிப் போ’.

இதை இரு பாலரும் விளையாடலாம். ஓர் அணிக்கு 5 முதல் 10 பேர் வரை இருக்கலாம்.தப்பு செய்தாலும் அதை வெளியில் காட்டிக் கொள்ளாமல்'தேமே’ என்று அமுக்குணியாய் இருப் பார்கள் ஒவ்வோர் அணியிலும் உள்ளவர்கள். மேலும் எதிராளியின் முகபாவம் மற்றும் பலவிதமான தடயங்களையும் வைத்துத் தாங்கள் தேடும் நபரை அடையாளம் காண்பவர்களாகவும் இருக்க வேண்டியது ஆட்டக்காரர்களின் முக்கியமான குவாலிஃபிகேஷன்!

கிராமத்து விளையாட்டு !

அணியின் தலைவர் தங்கள் அணியினர் ஒவ்வொருவருக்கும் ரகசியப் பெயர் வைப்பார். அந்தப் பெயர்களைத் தனது அணியில் உள்ள மற்றவர்களுக்குக்கூட தெரியாதபடி காதில் சொல்வார். பிறகு

கிராமத்து விளையாட்டு !

இரு அணியினரும் எதிர் எதிராக உட்காருவார்கள். யார் ஆட்டத்தைத் துவக்குகிறார்களோ... அந்த அணித் தலைவர், எதிர் அணியினரின் முதுகுப் புறமாக நின்று முதல் ஆளின் கண்களைக் கையால் இறுக்கமாகப்  பொத்துவார்.

கண்கள் பொத்தப்படுவர், ''ஏலே... கண்ணே அவிஞ்சுடும்போல, மெதுவாப் பொத்துடா’ எனச்  சொல்ல, ''இறுக்கமாப் பொத்தலேன்னா விரல் இடுக்கில் எங்காளுகளப் பாத்திருவயில்ல!'' எனக் கண்களைப் பொத்தியவர் பதிலடி கொடுப்பார். அணித் தலைவர் தனது அணியினருக்கு வைத்த ரகசியப் பெயரைச் சொல்லி 'மல்லிகையே மல்லிகையே மெள்ள வந்து மெள்ளப் போ’ எனச் சொல்ல, மல்லிகை பெயர் வைக்கப்பட்டவர் மெதுவாக நடந்துவந்து பொத்தியவர் கையைக் கிள்ளுவார். சில ஊர்களில் தலையில் குட்டி  விளையாடுவார்கள்.கிள்ளியவர்/குட்டியவர் தனது இருப்பிடத்துக்கு நேராக நடந்துபோனால் கால் தடத்தையோ, வேறு அசைவையோ கணக்கிட்டுக் கண்டுபிடித்துவிடுவார் என்பதால் இப்படியும் அப்படியும் நடந்து தனது இருப்பிடத்திற்கு வந்து உட்காருவார்.

பொத்திய கையை எடுக்கும்போது, 'காலாட்டு மணி கையாட்டு மணி’ என அணித் தலைவர் கட்டளை இட அவர் அணியினர் அனைவரும் ஒன்றாகக் கை, கால்களை ஆட்டுவார்கள். பொத்திய கண்களைத் திறந்தவுடன் திடீரென வெளிச்சத்தைப் பார்க்கும்போது கண்கள் கூசுவதால் தன்னைக் குட்டியவர் யார் எனக் கண்டுபிடிக்கக் குட்டு வாங்கியவர் திணறுவார்.

குட்டியவர் நடந்த கால் தடங்களை ஆராய்வார்.  எதிர்ப் பக்கம் இருக்கும் அனைவரின் முகங்களையும் கூர்மையாகப் பார்த்து, யார் முகத்திலாவது குற்ற உணர்வோ, நமட்டுச் சிரிப்போ தெரிகிறா எனக் கவனித்து, ஒருவரைச் சுட்டிக் காட்டுவார். எல்லோரும் சிரித்தபடி காலாட்டு மணி, கையாட்டு மணி எனக் கவனத்தைச் சிதற அடித்துக் கொண்டே இருப்பதால் குட்டியவரைக் கண்டுபிடிப்பது சவாலாகாக இருக்கும்.

கிராமத்து விளையாட்டு !

சரியான ஆளைக் கண்டுபிடித்து விட்டால் எதிர் அணியினரின் கண்களை இவர்கள் பொத்துவார்கள். இப்படியாகத் தொடரும் விளையாட்டு, நம் கவனக் கூர்மையையும் புத்திசாலித்தனத்தையும் பலப்படுத்தும்!

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு