Published:Updated:

தேங்காய் திருடி ராட்சத நண்டு !

ரேஞ்சர் மாமா

பிரீமியம் ஸ்டோரி
##~##

’ஆர்த்ரோபாட்’ எனப்படும் உயிரின வகைகளில், நிலத்தில் வாழும் உலகின் பெரிய உயிரினம் தேங்காய்த் திருடி நண்டு. இதற்குத் திருட்டு நண்டு என்றும் பெயர் உண்டு. இதன் விலங்கியல் பெயர் ஙிவீக்ஷீரீus றீணீtக்ஷீஷீ. அதிகபட்சம் 4 கிலோ எடை  இருக்கும். இவற்றின் உடல் நீளம் 16 அங்குலம். கால்கள் மட்டுமே மூன்று அடி நீளம் வளரும். ஆரஞ்சு, சிவப்பு, நீலம் போன்ற பல வண்ணங்களிலும் இவை இருக்கும்

இந்தியப் பெருங்கடல், பசிஃபிக் கடல், ஆஸ்திரேலியா மற்றும் மடகாஸ்கர் தீவுகளில் தென்னை மரங்கள் மிகுந்து காணப்படும் இடங்களில் இவை வசிக்கின்றன.

சுற்றுச்சூழலைத் தாக்குப்பிடித்துத் தரையில் உயிர் வாழ இந்த நண்டுகளுக்குப் பல உபாயங்கள் இருக்கின்றன. சிறு குஞ்சுகளாக இருக்கும்போது நத்தையைப் போல ஒரு கூட்டைச் சுமந்து திரியும். தங்களை வேட்டையாடும் எதிரிகளிடம் இருந்து தங்களை இதன் மூலம் காப்பாற்றிக்கொள்ளும்.

தேங்காய் திருடி ராட்சத நண்டு !

பெரிதானவுடன் இவற்றின் உடலுக்கு மேல் தடித்த ஓடு ஒன்று உருவாகிக் கவசம்போல பாதுகாக்கத் தொடங்கிவிடும். பிற நண்டுகளைப் போல செவிள்கள் மூலம் சுவாசிக்காமல், நுரையீரல் மூலம் சுவாசிக்கும். இவற்றால் நீந்த முடியாது.  தண்ணீருக்குள் விழுந்தால் மூழ்கிவிடும். வாசனைகளை அறிவதில் இவை கில்லாடிகள்.

முட்டைகளை இடுவதற்காகப் பெண் நண்டுகள் கடற்கரைப் பகுதிக்குச் செல்லும். முட்டையில் இருந்து வெளியே வரும் குஞ்சு நண்டுகள் ’பளான்க்டன்’ என்னும் கடல்வாழ் நுண்ணுயிரிகளை சுமார் நான்கு வாரங்கள் உண்டு வாழும். ஐந்து வயதில் பருவம் அடையும் இவை, 60 வருடங்கள் வரை உயிர் வாழக் கூடியவை.  

இவை பெரிதாக வளர்ந்தவுடன், பழங்கள், கொட்டைகள், விதைகள், மற்றும் கீழே விழுந்த மரங்களின் தண்டுப் பகுதி ஆகியவற்றைச் சாப்பிடும். தேங்காய் என்றால் மிகவும் பிரியம். தென்னை மரத்தில் ஏறித் தேங்காய்களில் இருந்து பருப்பைப் பிய்த்துத் தின்னும்.

ஆண்டுக்கு ஒரு முறை பழைய ஓட்டில் இருந்து புது ஓட்டுக்கு, பாம்பு சட்டை உரிப்பதைப்போல மாற்றிக்கொள்ளும். அந்த ஓடு உருவாவதற்கு மூன்று வாரம் வரை ஆகலாம். அப்போது இதன் உடல் மிருதுவாக இருக்கும். அந்தச் சமயத்தில் எதிரிகளிடம் இருந்து தப்புவதற்காகக் குழிகள் தோண்டி அவற்றில் பதுங்கி இருக்கும்.

தெளிவான புரிதல்கள் | விரிவான அலசல்கள் | சுவாரஸ்யமான படைப்புகள்Support Our Journalism
அடுத்த கட்டுரைக்கு