Published:Updated:

நீல டிராகன்

ரேஞ்சர் மாமா

நீல டிராகன்

ரேஞ்சர் மாமா

Published:Updated:
##~##

கடலில் வாழும் விசித்திரமான நத்தை வகைகளில்  ஒன்று நீல டிராகன். இதனுடைய விலங்கியல் பெயர், கிளாக்கஸ் அட்லன்டிகஸ் (Glaucus atlanticus).. கிளாக்கஸ் என்றால் நீலமும் சாம்பலும் கலந்த நிறம் என்று அர்த்தம். அட்லான்டிக் கடலில் இருந்து முதன் முதலில் இனம் காணப்பட்டதால், பின் பாதிப் பெயரான அட்லான்டிகஸ் வந்தது. இதற்கு நீல நத்தை என்றும் பெயர் உண்டு.

சாதாரணமாக 3 செ.மீ. நீளம் இருக்கும். முதுகுப் பக்கத்தில் வெள்ளை கலந்த நீல நிறமும் வயிற்றுப் பக்கத்தில் இள நீல நிறமும்கொண்டது. இதனால் இதன் எதிரிகள், சுற்றுப்புறத்தில் இருந்து இவற்றைப் பிரித்து அறிய இயலாமல் போகும். கால்களில் அடர் நீல வண்ணக் கோடுகள் இருக்கும். கால்களைப் போன்ற இணைப்புகள் ஆறு உண்டு. அவற்றில் இருந்து செரேடா என்னும் நீட்சிகள் இருக்கும்.

ஒட்டுமொத்த விகடனுக்கும் ஒரே ஷார்ட்கட்!

உலகெங்கும் உள்ள வெப்ப மண்டலக் கடல்கள் அனைத்திலும் இது வாழும். தென் அமெரிக்காவின் கிழக்கு மற்றும் தெற்குக் கடற்கரைகள், ஐரோப்பிய நாட்டின் கடற்கரைகள், ஆஸ்திரேலியாவின் கிழக்குக் கடற்கரை போன்ற பகுதிகளில் ஆழக்குறைவான இடங்களில் வசிக்கும். அங்கே இருக்கும் ஃபைசாலிஸ், வெலெல்லா, போர்பிடா, ஜதினா போன்ற விஷம் நிரம்பிய உயிரினங்களைச் சாப்பிடும். நீல டிராகன்களுக்கு இயற்கையிலேயே விஷ எதிர்ப்பு சக்தி இருப்பதால், இவற்றின் இரைகளில் இருக்கும் விஷம் இவற்றை ஒன்றும் செய்வது இல்லை.

நீல டிராகன்

ஆச்சரியமான விஷயம்... சொந்தமாக இவற்றுக்கு என விஷம் கிடையாது என்றாலும் விஷத்தன்மைகொண்ட பூச்சிகளை விரும்பிச் சாப்பிடும்போது, அந்தப் பூச்சிகளிடம் இருந்து விஷத்தைத் தனியே சேகரித்துத் தனது விரல் போன்ற உறுப்பில் சேமித்து வைக்கும். இப்படிச் சேகரிக்கும் விஷம் மிக வீரியமானதாக இருக்கும். எதிரிகளை அந்த விஷத்தைக்கொண்டே தாக்கும். சில சமயங்களில் தன்னுடைய இனத்தில் உள்ள மற்ற நத்தைகளையும் இவை தின்றுவிடும்.

இன்னோர் ஆச்சரியமான விஷயம், இவற்றின் வயிற்றில் காற்று நிரம்பிய பை போன்ற அமைப்பு இருப்பதால், கடல் நீரில் மிதக்கும்.

இந்த நத்தையில் இன்னும் ஆச்சரியம் உண்டு. விசித்திரம்... ஆண், பெண் வித்தியாசம் கிடையாது. ஒரே நத்தையில் ஆண் பகுதி, பெண் பகுதி என இரண்டும் இருக்கும். இணைகள் இரண்டும் ஒரே சமயத்தில் கருவுறும். நாள் ஒன்றுக்கு 3,300 முதல் 8,900 முட்டைகள் வரை இடும். இவற்றை மீன்கள் விரும்பி உண்ணும்.