எக்ஸாம்? சும்மா ஊ...தி தள்ளலாம் வங்க!

. எக்ஸாம்? சும்மா ஊ...தி தள்ளலாம் வங்க!

. பு துவருடக் கொண்டாட்டங்கள் முடிந்து, விடுமுறையும் தீர்ந்து, பள்ளி தொடங்கிவிடும்... இனி எல்லாருமே பிஸி ஆகிவிடுவீர்கள். அப்படித்தானே சுட்டீஸ்?! ஜனவரியில் தொடங்கி கொஞ்சம் கொஞ்சமாக 'பரீட்சை' முஸ்தீபுகள் டாப் கியரை அடையும்போது... பரீட்சை நெருங்கிவிடும். சிலர் படு டென்ஷனாகிவிடுவார்கள். பலர் ரொம்ப ஜாலியாக பரீட்சையை எதிர்கொள்வார்கள். டென்ஷன் இல்லாத சுட்டீஸ்களாக நீங்கள் இருக்க வேண்டும் என்பதே சுட்டி விகடனின் ஆசை. இதோ உங்களை தயார்ப்படுத்திக்கொள்ள சில பயனுள்ள டிப்ஸ்...

வெற்றிக்கான திட்டங்களை வகுத்துக் கொள்ளுங்கள்

. வீட்டின் ஒரு பகுதியில்... நீங்கள் படிக்கும் இடத்தை தேர்வு செய்து கொள்ளுங்கள். வீட்டின் அன்றாட விஷயங்கள் உங்கள் காதுகளுக்கு எட்டக்கூடாது. அதற்காக காற்றோட்டம் இல்லாத இடத்தில் அடைந்து கொள்ளாதீர்கள்.

. நூறு மார்க்குகளுக்கும் விடை எழுதி, அதிக மார்க்குகளைப் பெற வேண்டும் என்று தீவிரமாக எண்ணுங்கள்.

. ஆசிரியர்களிடம் தயக்கமில்லாமல் பேசுங்கள். இதுவரை கேட்கலாமா... வேண்டாமா என்று நினைத்துக் கொண்டிருந்த சந்தேகங்களை ஆசிரியரிடம் கேட்டுத் தெளிவு பெறுங்கள்.

. ஒவ்வொரு நாளும் என்னென்ன பாடங்களைப் படிக்க வேண்டும் என்பதை பட்டியல் தயாரித்துக் கொள்ளுங்கள்.

. எந்த கேள்விக்கான விடையை எத்தனை வரிகளுக்குள் எழுத வேண்டும் என்பதையும் கணக்கிட்டுக் கொள்ளுங்கள்.

. காலாண்டு, அரையாண்டு மற்றும் மாதத் தேர்வுகளின் கேள்வித்தாள்களைப் பார்த்தும், பாடப் புத்தகங்களின் கடைசிப் பக்கத்தில் கொடுத்துள்ள மாதிரி வினாத்தாள் கேள்விகளுக்கும் விடைகளைப் படித்துக் கொள்ளுங்கள். கடந்த ஆண்டுகளின் முழு ஆண்டு வினாத்தாள்கள் கிடைத்தால், அதையும் சேர்த்து தயார் செய்யுங்கள். அதோடு, தமிழக பெற்றோர் ஆசிரியர் கழகம் வெளியிடும் வினா-வங்கிப் புத்தகங்களும் கிடைத்தால் வாங்கிப் படியுங்கள்.

. படிக்கும்போது சிலர் படுத்துக்கொண்டு படிப்பார்கள்... அது கூடாது. நிமிர்ந்து உட்கார்ந்தே படிக்க வேண்டும்.

. முதலில் பெரிய வினா-விடைகளையும் அடுத்து, குறு வினா-விடைகளையும் படிப்பது நல்லது. நன்கு தெரிந்ததையே மீண்டும் மீண்டும் படித்துக் கொண்டிருக்க வேண்டாம்.

. விடை இவ்வளவு பெரிதாக இருக்கிறதே... என்று நினைத்துக் கொண்டே படிக்காதீர்கள்.

. செய்யுள், 'போயம்' போன்றவற்றை எழுதிப் பாருங்கள். தலைப்பு மற்றும் பாடலை எழுதியவர் பெயர் அவசியம் தெரிந்து வைத்துக்கொள்ள வேண்டும். அறிவியலில் படங்களை வரைந்து, பாகங்களை குறித்துப் பார்த்துக் கொள்ளுங்கள்.

. ஆங்கிலத்திலும் தமிழிலும் எழுத்துப் பிழை இல்லாமல் எழுத, கடினமான வார்த்தைகளை எழுதிப் பாருங்கள்.

. படிக்கும்போது படிப்பைத் தவிர வேறு எதிலும் நினைவு செல்லாமல் மனம் ஒரு நிலைப்பட்டு படிக்க வேண்டும்.

. 'நாம் நன்றாகப் படிக்கிறோம், நிறைய மார்க்குகள் வாங்குவோம், எல்லாரும் நம்மைப் பாராட்டுவார்கள்... மேல் வகுப்பில் எளிதாய்ச் சேர்ந்துவிடலாம்' என்ற 'பாஸிட்டிவ்' ஆன எண்ணங்களே உங்கள் மனதில் இருக்க வேண்டும்.

. வீட்டுக்கு வரும் போன் அழைப்புகளை நீங்கள் எடுத்து பேச வேண்டாம். வீட்டுக்கான வெளி வேலைகளில் கவனம் செலுத்த வேண்டாம்.

படிக்கும் நேரத்தைத் தேர்ந்தெடுங்கள்

. விடியற்காலை நான்கு மணிக்கு எழுந்து படியுங்கள். அப்போது படித்தால் நினைவில் நிற்கும். இரவில் அதிக நேரம் படிப்பதோ அல்லது நடு இரவில் எழுந்து விடியும் வரை படிப்பதோ வேண்டாம்.

. நண்பர் வீட்டுக்குப் போய் படிக்கிறேன் என்று நேரத்தை வீணாக்க வேண்டாம்.

. கணக்குப் பாடத்தை நாள்தோறும் 1.30 மணி நேரம் செய்து பாருங்கள்.

. யாராலும் நீண்டநேரம் தொடர்ந்து படிக்க முடியாது. எனவே, இரண்டு மணி நேரத்துக்கு ஒருமுறை சிறிது இடைவெளி விடுங்கள். அது குளிக்கும் நேரம், சாப்பிடும் நேரங்களாக இருக்குமாறு செய்வது நல்லது.

. சிலர், இன்று ஒருநாள் விட்டுவிட்டு நாளை படித்துக்கொள்ளலாம் என்று இருப்பார்கள். அடுத்த நாள் கரண்ட் கட்டாகலாம் அல்லது நெருங்கிய உறவினர் வந்துவிடலாம். எனவே, முன்கூட்டியே படித்து முடிப்பது நல்லது.

உடல் ஆரோக்கியம்

. தினமும் உடற்பயிற்சி செய்யும் பழக்கமுடையவர்கள், தியானம் செய்பவர்கள் தேர்வுக்காக நிறுத்தி வைக்க வேண்டாம். உடற்பயிற்சியும், தியானமும் நல்லது.

. வயிறு முட்ட சாப்பிடாதீர்கள். இன்னும் கொஞ்சம் சாப்பிடலாம் என்று தோன்றும் போதே நிறுத்திக் கொள்ளுங்கள்.

. ஃபிரிட்ஜ் தண்ணீரை அடிக்கடி குடிக்காதீர்கள்.

. தலைவலி, வயிற்றுவலி வந்தால் கடைகளில் மாத்திரை வாங்கி விழுங்காமல், டாக்டரை பாருங்கள்.

. ஞாபக சக்தியை அதிகரிப்பதற்காக என்று டாக்டரின் ஆலோசனை இல்லாமல் வீண் முயற்சிகள் எடுக்க வேண்டாம்.

. சோர்வு ஏற்படும் நேரங்களில் குளுக்கோஸ், ஆரஞ்சு, எலுமிச்சை சாறுகளை அருந்தவும்.

. அலர்ஜி, அடிக்கடி ஜலதோஷம், கண் எரிச்சல் போன்ற தொந்தரவுகள் உள்ளவர்கள்... முன்கூட்டியே டாக்டரை அணுகி மருத்துவம் பார்த்துக் கொள்வது நல்லது.

பொழுதுபோக்கு அம்சங்கள்

. பொழுதுபோக்குவதற்கு இது தகுந்த காலமல்ல. காலத்தை 'பொன்' போல பாவிக்க வேண்டிய கட்டாயத்தில் நீங்கள் இருக்கிறீர்கள்.

. டி.வி பார்ப்பதை நிறுத்தி விடுங்கள்.

. சினிமா பற்றிய விவாதங்கள் வேண்டாமே!

. கம்ப்யூட்டரில் விளையாடுவது, நண்பர்களுக்கு மின்னஞ்சல் அனுப்புவது, தேவையில்லாமல் எஸ்.எம்.எஸ் அனுப்புவது போன்றவற்றைத் தவிர்க்கவும்.

உணவு

. உணவில் காரம் அதிகம் சேர்க்காதீர்கள்.

. வறுத்த கறி வகைகளைக் குறைத்துக் கொள்ளுங்கள்.

. எண்ணெய்ப் பலகாரங்களைத் தவிர்த்து விடுங்கள்.

. வேகவைத்த காய்கறிகள், இட்லி நல்லது.

. பச்சைக் காய்கறிகளை தினமும் சாப்பிடுங்கள்.

. கீரையை அவசியம் சேர்த்துக் கொள்ளுங்கள்.

. நொறுக்குத்தீனி தின்னாதீர்கள். சிலர் படிக்கும்போது தின்றுகொண்டே படிப்பார்கள்... இது கூடாது.

. ஐஸ்கிரீம் மற்றும் குளிர்பானங்கள் இப்போதைக்கு வேண்டாம்.

. தண்ணீர் அதிகம் குடியுங்கள்.

. ஆப்பிள், சப்போட்டா, ஆரஞ்சு, திராட்சை போன்ற பழங்களை சாப்பிடுங்கள். பழச்சாறுகளில் சர்க்கரை சேர்க்காமல் அருந்தவும்.

. கொழுப்புச் சத்து மற்றும் ஃபாஸ்ட் ஃபுட் உணவுகளைத் தவிர்க்கவும்.

பெற்றோர்களுக்கு

. உங்கள் மகன் அல்லது மகள் படிப்பதற்கு ஏற்ற சூழ்நிலையை உருவாக்கிக் கொடுங்கள்.

. அதிக மதிப்பெண் எடுத்த வேறு மாணவர்களோடு ஒப்பிட்டு, உங்கள் பிள்ளையைத் தாழ்த்தாதீர்கள்.

. அவர்கள் படிக்கும் நேரங்களில் வீட்டு வேலைகள் செய்யச் சொல்லி இடையூறு செய்யாதீர்கள்.

. ஃபங்ஷன் என்ற பெயரில் ஒரு வாரம் பத்து நாள் வெளியூர்களில் போய் தங்காதீர்கள்.

. அடிக்கடி உடலுக்குத் தொந்தரவு தரும் பிரச்னை இருந்தால், நாட்களைத் தள்ளிப் போடாமல் டாக்டரிடம் அழைத்துச் செல்லுங்கள்.

. சத்தான உணவை ஸ்பெஷலாக செய்து கொடுங்கள்.

. விழிப்பு, படிப்பு, உணவு, தூக்கம், வெற்றி எல்லாவற்றிலும் உங்கள் பங்களிப்பு இருக்கட்டும்.

. இப்போதே படிக்கத் தயாராகுங்கள் சுட்டீஸ்!

.

எக்ஸாம்? சும்மா ஊ...தி தள்ளலாம் வங்க!

Vikatan Correspondent