ஹாய் சுட்டீஸ், டயட்டீஷியன் கிருஷ்ணமூர்த்தி, இந்த முறை வெண்டைக்காயின் சிறப்புகளையும் அதன் பயன்களையும் விளக்குகிறார்.

வெண்டைக்காயில் நார்ச்சத்து அதிகமாக இருக்கும்.கலோரியும், கார்போஹைட்ரேட்டும் கம்மி. கொழுப்புச்சத்தும் குறைவு. கால்சியமும், பாஸ்பரஸும் கொஞ்சம் கிடைக்கும். இதில் இரும்புச் சத்தும், பீட்டா கரோட்டினும் குறைவு. போலிக் ஆசிட் இருப்பதால், இரத்த விருத்திக்கு நல்லது.இதனால், சுட்டிகள் நிறைய சாப்பிடலாம்.

இது எல்லா சீசன்களிலும் கிடைக்கும் எளிய உணவாகும். சாஃப்டாக இருக்கும். காரம் குறைவாகச் செய்தால் கொஞ்சம் அதிகமாகவும் சாப்பிடலாம். உடல் பருமனாக இருப்பவர்கள் வெண்டையை அதிகம் சாப்பிடலாம். வெண்டைக்காயை சிப்ஸ் போலவும் செய்து சாப்பிடலாம்.

இந்த முறை வசந்தா விஜயராகவன் கொடுத்திருக்கிற இரண்டு ரெசிப்பியும் வெண்டைக்காயை வைத்துதான். உங்க மம்மிகிட்ட கேட்டா, கண்டிப்பா செஞ்சு கொடுப்பாங்க... டேஸ்ட் பண்ணுங்க..!

வெண்டைக்காய் பச்சடி!

தேவையானவை துண்டுகளாக நறுக்கிய வெண்டைக்காய் - ஒரு கப், கெட்டியான புளித் தண்ணீர் - கால் கப், கடுகு - ஒரு டீஸ்பூன், காய்ந்த மிளகாய் - 3, உப்பு, எண்ணெய் - தேவையான அளவு, வெல்லம் - கோலி அளவு உருண்டை, மிளகாய்த்தூள், பெருங்காயத்தூள் - அரை டீஸ்பூன்.

செய்முறை வாணலியை அடுப்பில் வைத்து, எண்ணை ஊற்றிக் காய்ந்ததும், கடுகைப் போடவும். கடுகு வெடித்ததும் காய்ந்த மிளகாய், பெருங்காயத்தூள் சேர்த்து வறுத்து, பொடியாக நறுக்கிய வெண்டைக் காயைச் சேர்த்து நன்றாக வதக்கவும். பிறகு புளித் தண்ணீர், தேவையான உப்பு, மஞ்சள்தூள் சேர்த்து கெட்டியாகும் வரை கொதிக்கவிடவும். இறக்கும் பொழுது சிறிய உருண்டை வெல்லம் சேர்த்து இறக்கவும். எல்லாவற்றுக்கும் தொட்டுக் கொள்ள ருசியான பச்சடி இது.

கிடைக்கும் சத்துக்கள்

கார்போஹைட்ரேட் - 45 கிராம்

ப்ரோட்டீன் - 7 கிராம்

கொழுப்பு - 18 கிராம்

ஆற்றல் - 370 கிலோ கலோரி

கால்சியம் - 235 மில்லி கி

இரும்பு - 7 மி.கி

பீட்டா கரோட்டின் - 155 மைக்ரோ கி

ஃபோலிக் ஆசிட் - 210 மை.கி

கொலின் - 10.5 கி

டயட்டீஷியன் கமென்ட்ஸ் இது நல்ல சைடு டிஷ். புளிப்பான டேஸ்ட்டுடன் இருக்கும். ஆற்றல், கார்போஹைட்ரேட், ஆகியவை கொஞ்சம் கிடைக்கும். கால்சியமும் மிதமாகக் கிடைக்கும். சப்பாத்தி, சாதம் போன்ற எல்லாவற்றுக்கும் சேர்த்துக் கொண்டு சாப்பிடலாம். எளிதாக செரிமானம் ஆகும். வயிற்றுக்கும் மிக நல்லது.

வெண்டை தளர் காரக் குழம்பு!

தேவையானவை குழம்புப் பொடி தயாரிக்க (துவரம் பருப்பு - 3 டீஸ்பூன், காய்ந்த மிளகாய் - 3, கடலைப் பருப்பு - 2 டீஸ்பூன், தனியா - 4 டீஸ்பூன், எண்ணை - தேவையான அளவு. இவை அனைத்தையும் வறுத்துப் பொடிக்கவும்). புளித் தண்ணீர் - ஒரு கப், 1 இஞ்ச் நீளத்துக்கு வெட்டிய வெண்டைக்காய் - 2 கப், பெருங்காயம், மஞ்சள்தூள் - தலா அரை டீஸ்பூன், உப்பு - தேவையான அளவு. கடுகு, உளுத்தம் பருப்பு, கடலைப் பருப்பு - தலா ஒரு டீஸ்பூன், கறிவேப்பிலை - சிறிதளவு.

செய்முறை பாத்திரத்தில் சிறிது எண்ணை விட்டுக் காய்ந்ததும், வெண்டைக் காய் துண்டங்களைப் போட்டு, 3 நிமிடம் வதக்கவும். பிறகு, புளித் தண்ணீரில் மஞ்சள் தூள் சேர்த்து, சிறிது நேரம் கொதிக்க விடவும். பிறகு உப்பு, வறுத்து அரைத்த குழம்புப் பொடி சேர்த்து, குழம்பு சிறிது கெட்டியாகும் வரை கொதிக்கவிடவும். எண்ணையில் கடுகு, பெருங்காயம், உளுத்தம் பருப்பு, கடலைப் பருப்பு, கறிவேப்பிலை தாளித்து, குழம்பில் சேர்க்கவும்.

கிடைக்கும் சத்துக்கள்

கார்போஹைட்ரேட் - 20 கிராம்

ப்ரோட்டீன் - 14 கிராம்

கொழுப்பு - 30 கிராம்

ஆற்றல் - 615 கிலோ கலோரி

கால்சியம் - 325 மில்லி கி

இரும்பு - 14.5 மி.கி

பீட்டா கரோட்டின் - 470 மைக்ரோ கி

ஃபோலிக் ஆசிட் - 155 மை.கி

டயட்டீஷியன் கமென்ட்ஸ் புரதச்சத்து கிடைக்கும். தாது உப்புக்களும் கொஞ்சம் கிடைக்கும். எல்லா சத்துக்களும் சமச்சீர் விகிதத்தில் கிடைக்கும். இது, சாதத்துடன் சேர்த்துச் சாப்பிட நல்ல காம்பினேஷனாக இருக்கும். காரம் குறைவாகச் சேர்த்தால், எல்லா வயதினரும் சாப்பிடலாம்.

படங்கள் து.மாரியப்பன்