ஊரின் மிக முக்கியமான பள்ளிகளில் ஒன்றான சில்வர்லைன்ஸ் கான்வென்ட், அன்று உச்சக்கட்ட டென்ஷனில் இருந்தது. போலீஸ் படை இங்கும் அங்குமாக ஓடிக்கொண்டிருக்க, பள்ளி ஊழியர்கள் எல்லோரது முகத்திலும் ஒருவித பதற்றம்...

அந்த பள்ளியின் மாணவ தலைவனான சதீஷ், தன் ஆசிரியரின் செல்போனில் பேசிக்கொண்டிருந்தான். "ஹலோ... விக்கி! டேய்.... இங்கே ஒரு பிரச்னைடா... எனக்கு ஹெல்ப் பண்ணுடா... ப்ளீஸ்!" என்றான் டென்ஷனும் அழுகையுமாக. எதிர்முனையில், "என்னடா... என்ன ஆச்சு? இப்போ உங்க ஸ்கூல்லே பங்க்ஷனாச்சே..." என்றது விக்கியின் குரல். "ஆமாண்டா! அங்கேதான் பிரச்னை. எங்க சீஃப் கெஸ்ட்டோட பத்து வயசு பையனை காணோம்டா! யாரோ கிட்நாப் பண்ணிட்டாங்க. ஒரே டென்ஷனா இருக்கு. உடனே வாங்கப்பா... ப்ளீஸ்!" என்றான் சதீஷ். "கவலைப் படாதே சதீஷ்... உன்னோட லக்... நாங்க உன்னோட ஸ்கூல் பக்கத்திலேதான் ஒரு வேலையா வந்திருக்கோம். உடனே வந்திடறோம்!" என்றான் விக்கி.

அரசு வேலையாக நம் நாட்டுக்கு விஜயம் செய்திருந்த சிர்சினியா நாட்டு வெளியுறவு அமைச்சர் இன்று மாலை இந்த பள்ளியில் ஏற்பாடு செய்யப்பட்டிருந்த கலந்துரையாடல் நிகழ்ச்சியில் கலந்துகொண்டார். தன் மனைவி மற்றும் பத்து வயது மகனுடன் கலந்துகொண்ட அமைச்சருக்கு... முதலில் வரவேற்கும் நிகழ்ச்சியாக பள்ளி மைதானத்தில் பரதம், கம்பாட்டம், ஜிம்னாஸ்டிக்ஸ், பஃபூன்களின் காமெடி ஷோ என நடத்தப்பட்டன. மேடையில் இருந்தபடி அமைச்சரும் அவரது குடும்பமும் இதை ரசித்துப்பார்த்தது. ஆர்வ மிகுதியில் அமைச்சரின் மகன் அம்மா தடுத்தும் கேட்காமல் கீழே இறங்கி மைதானத்துக்குள் செல்ல, அவனுடன் செக்யூரிட்டி ஆட்களும் ஓடினார்கள். சுட்டிகளோடு சுட்டியாக மைதானத்தில் ஆட்டம் போட்ட அமைச்சரின் மகனை எல்லோரும் ரசித்தார்கள். பஃபூன் ஷோ ஆரம்பித்த கொஞ்ச நேரத்தில் எல்லாம் திடீர் பரபரப்பு... கூட்டத்துக்குள் விளையாடிக்கொண்டிருந்த அமைச்சரின் மகன் மிஸ்ஸிங்!

நேற்றுதான் விக்கி சைலா ஜீபா மூவரும் எதேச்சையாக அந்த பள்ளிப் பக்கம் போயிருந்தார்கள். பள்ளியின் மைதானத்திலிருந்து உற்சாக குரல்கள் வர, என்ன விஷயம் என விசாரித்து உள்ளே நுழைந்திருக்கிறார்கள். உள்ளேயே நீண்ட நேரம் ரிகர்சலை ரசித்தபடி, போன வேலையையே மறந்திருக்கிறார்கள். மறுநாள் நிகழ்ச்சி எப்படி நடக்க வேண்டுமோ அது அப்படியே ஒருமுறை நடத்திப் பார்க்கப்பட்டது. ரிகர்சலின் ஹைலைட்டே... அங்கே இருந்த ஐந்து பஃபூன்கள்தான். அவர்களது கோமாளித்தனங்கள் எல்லோரையும் சிரிக்க வைத்தது. ஒரு குட்டி பஃபூனும் அதில் இருந்தார். அவர் ஒரு பள்ளி மாணவனாகவும், அவரது அப்பா அம்மா அவரை ஸ்கூல் வேனில் அனுப்புவதாகவும்... முரண்டு பிடித்தபடி அந்த குட்டி பஃபூன் அழுதபடியே வேனில் போவது போல ஒரு காமெடி ஷோவும் நடத்தினார்கள். அந்த சமயம் ஜீபாவுக்கு ஏதோ செல்போனில் அழைப்பு வர, "அய்யோ! வந்த வேலையை மறந்துவிட்டோமே!" என்று மூவரும் தெறித்து வெளியே ஓடியிருக்கிறார்கள். இப்போது அதெல்லாம் நினைவுக்கு வந்தது மூவருக்கும்.

அடுத்த சில நிமிடங்களில், விக்கி சைலா ஜீபா மூவரும் அந்த பள்ளிக்குள் இருந்தார்கள். ஜீபா தன் பார்வையை மின்னலாக எல்லாத் திசைகளிலும் ஓட்டியது. பள்ளியில் இன்னும் பரபரப்பு குறையாமல் இருந்தது. மேடை அருகே ஒரு அறையில் அமைச்சர் அமர்ந்திருக்க, அவரைச் சூழ்ந்தபடி அதிகாரிகள் செல்போனிலும் ஒயர்லெஸ்ஸிலும் பேசியபடி இருந்தார்கள். அமைச்சரின் மனைவி அழுகையும் புலம்பலுமாக ஒரு பக்கம் அமர்ந்திருந்தார். அவரை பிரின்ஸிபாலும் ஆசிரியைகளும் சமாதானம் செய்தபடி இருந்தார்கள்.

நிகழ்ச்சிகள் நடந்த இடத்தில் மாணவர்கள் எல்லோரும் அப்படி அப்படியே உட்கார வைக்கப் பட்டிருந்தார்கள். அங்கே வந்த போலீஸ் அதிகாரி, "வா ஜீபா! எவ்வளவோ டைட் செக்யூரிட்டி போட்டும் இப்படி ஆயிடுச்சு..." என்று வருத்தப்பட்டார். "இவங்களை ஏன் அங்கிள் உட்கார வெச்சிருக்கீங்க?" என்று கேட்டாள் சைலா. "சம்பவம் நடந்தப்போ இருந்தவங்க யாரையும் இப்போதைக்கு வெளியே விட வேண்டாம்னு சொல்லி இருக்கேன்" என்றார் அதிகாரி. அப்படியா... என்பது போல ஜீபா தலையை ஆட்டியது. மைதானத்தில் பஃபூன்களும் உட்கார்ந்திருந்தார்கள். அவர்களோடு ஒரு வீடியோகிராபரும் அமர்ந்திருந்தார்.

அப்போதுதான் ஜீபா ஒரு விஷயத்தைக் கவனித்தது. பஃபூன்கள் நான்கு பேர்தான் இருந்தார்கள். முரண்டு பிடித்த குட்டி பஃபூன் அங்கே இல்லை. "நான் யோசிச்சதுதானே நீயும் யோசிச்சே ஜீபா?" என்று சிரித்தான் விக்கி. "ஆமாம்! இவங்க டிராமா ஆரம்பிச்ச பிறகுதான் இந்த சம்பவம் நடந்திருக்கு! சைலாவும் இதை கவனித்தாள். மூவருக்கும் பொறி தட்ட, கடகடவென மைதானத்துக்குள் இறங்கினார்கள். கூட்டத்தில் உட்கார்ந்திருந்த வீடியோகிராபரை அழைத்துவரச் சொன்னது ஜீபா. போலீஸ் அதிகாரி சொன்னார், "கேஸட் எங்க கிட்டேதான் இருக்கு. அதையும் பார்த்துட்டோம் ஜீபா... எதுவும் புலப்படலை... எல்லாமே பங்ஷன் மட்டும் ஃபோக்கஸ் ஆகியிருக்கு!"

"அந்த கேஸட்டை கொஞ்சம் கொடுங்க..." என்றது ஜீபா. "பையன் மிஸ்ஸாகி எவ்வளவு நேரம் ஆகியிருக்கும் சார்?" என்று கேட்டாள் சைலா. "சரியா பதினோரு நிமிஷம் ஆகுது..." என்றார் அதிகாரி. வீடியோ கேசட் வந்தது. ரீவைண்டு செய்து பஃபூன் நிகழ்ச்சியை ஓடவிட்டது ஜீபா. பஃபூன்கள் குட்டி பஃபூனை ஸ்கூல் வேனில் ஏற்றுகிறார்கள். ‘பள்ளி வாகனம்’ என எழுதப்பட்ட மினி வேனில் துள்ளி முரண்டு பிடித்து குட்டி பஃபூன் திணிக்கப்பட்டதும் வேன் கிளம்புகிறது.

"நேத்து ரிகர்சல்லே இருந்த குட்டி பஃபூன் கொஞ்சம் குண்டா குள்ளமா இருந்தாரே..." என்றது ஜீபா. "ஆமா! இதுலே ரொம்ப ஒல்லியா சின்ன பையனா... புரிஞ்சுடுச்சு ஜீபா!" என்றாள் சைலா. உடனே மூவரும் பரபரப்பானார்கள். "கேமரா லைனை மானிட்டரோடு கனெக்ட் பண்ணு... சீக்கிரம்!" என்று கேமரா மேனுக்கு சொன்ன ஜீபா, மின்னலாக கேமராவை உயரே உயரே உயர்த்தியது. போலீஸ் அதிகாரியிடம் விக்கி கத்தினான், "அந்த பஃபூன் களை விடாதீங்க... பிடிங்க!" சைலா சுருக்கமாக விஷயத்தைச் சொன்னாள். "பையனுக்கு பஃபூன் வேஷத்தை மாட்டி, ஸ்கூல் வேனில் ஏத்தி அனுப்பிட்டாங்க! அந்த வேன் ஸ்கூலோட பின் கேட் வழியா போயிருக்கு..."

உடனே ஜீபா, போலீஸ் அதிகாரியைப் பார்த்து, "நான் அந்த ரோடை வீடியோலே ட்ரேஸ் பண்ணிக் காட்டறேன்... மானிட்டரில் பார்த்து ஆர்டர்ஸை கொடுங்க சார்... க்விக்!" என்றது. கூட்டத்தில் உட்கார்ந்திருந்த பஃபூன்களைச் சுற்றி வளைத்தனர். பின் கேட் வழியாக போலீஸ் ஜீப்கள் பறந்தன. எல்லா போலீஸ் அதிகாரிகளும் ஜீபா அருகில் வந்து நின்றார்கள். விஷயம் கேள்விப்பட்டு, வெளியுறவு அமைச்சரும் அவரது மனைவியும் மானிட்டர் அருகில் வந்துவிட்டார்கள். அவருடன் பள்ளியின் பிரின்ஸிபாலும் கரஸ்பாண்டன்ட்டும் வந்து சேர்ந்தார்கள்.

கேட் வழியை அப்படியே ஜீபா கேமராவில் ஃபோக்கஸ் செய்தது. மானிட்டரில் அந்த காட்சிகள் தெரியத் தெரிய போலீஸ் அதிகாரிகள் ஒயர்லெஸ்ஸில் கட்டளைகளைப் பிறப்பித்துக்கொண்டே இருந்தார்கள். கேட்டைத் தாண்டி ஒரு புதர் மாதிரியான மறைவில் அந்த ‘பள்ளி வாகனம்’ நின்றிருப்பது மானிட்டரில் தெரிய, அதைச் சுற்றி வளைக்க உத்தரவு பறக்கிறது. போலீஸ் ஜீப்களைப் பார்த்ததும் சுதாரித்துக் கொண்டு, வேன் டிரைவர் வண்டியைக் கிளப்பி வேக மெடுக்கிறார். ஆனால், போலீஸ் ஜீப்பின் வேகத்துக்கு அந்த டப்பா வேனால் ஈடுகொடுக்க முடியாமல் சிக்குகிறார். நாலா பக்கமும் போலீஸ் ஜீப்கள் சூழ்ந்துகொள்ள, வேனை விட்டுவிட்டு இறங்கி ஓட எத்தனிக்கிறான் வேன் டிரைவர். அவனை கொத்தாகப் பிடித்து, குண்டுக்கட்டாக அள்ளி ஜீப்பில் போட்டது ஒரு டீம். இன்னொரு டீம் வேனுக்குள் ‘பஃபூன்’ வேஷத்தில் இருந்த அமைச்சர் மகனை பத்திரமாக மீட்டது.

இவை அனைத்தையும் ஜீபா ஜூம் செய்து படம் பிடிக்க, அதை மானிட்டரில் பார்த்தார்கள் எல்லோரும். தங்கள் உச்சக்கட்ட சந்தோஷத்தை கைத்தட்டியும் ஹோவென கத்தியும் கொண்டாடினார்கள்.

பஃபூன்கள் ஐந்து பேரும், வேன் டிரைவரும் கைது செய்யப்பட்டார்கள். நிகழ்ச்சி ஏற்பாடுகளைச் செய்த பள்ளியின் மேனேஜர், "இவங்களாதான் இங்கே வந்து, ‘நாங்க நிகழ்ச்சி நடத்தறோமே’ன்னு கேட்டாங்க. இவங்க பெர்ஃபாமன்ஸ் நல்லா இருந்ததால ஃபிக்ஸ் பண்ணேன்... இப்படி நடந்ததுக்கு ரொம்ப ஸாரி..." என்று வருத்தப்பட்டார்.

"ரொம்ப நல்ல்ல்லா இருந்துச்சு இவங்க ‘பெர்ஃபாமன்ஸ¨’..." என்று கிண்டலாகச் சொன்னான் விக்கி. எல்லோரும் சிரித்தார்கள்.

"என் மகன் திரும்பக் கிடைச்சது உங்க திறமையாலதான் ஜீபா! ரொம்ப ரொம்ப தேங்க்ஸ்..." என்றார் பள்ளியின் பிரின்ஸிபால். அதை ஆமோதித்தவர்களாக அருகில் வந்து விக்கி, சைலா, ஜீபா மூவருக்கும் கைகொடுத்தார் அமைச்சர். அவரது மனைவி நன்றியோடு வணங்கினார்.

"எனக்கு இது வேணும்... எடுத்துக்கவா?" என்றது ஆங்கிலத்தில் ஒரு சுட்டியின் குரல். எல்லோரும் திரும்பிப் பார்த்தார்கள். போலீஸ் அதிகாரி கையில் இருந்த அமைச்சரின் மகன் கேட்டான்... அவன் கையில் பஃபூன்கள் தங்கள் மூக்கில் மாட்டிக்கொள்ளும் சிவப்பு நிற பழம் இருந்தது.

"தாராளமாக!" என்றார்கள் எல்லோரும். அவன் அதை மாட்டிக்கொள்ள, எல்லோரும் கைத்தட்டி ஆரவாரம் செய்தார்கள். அமைச்சர் தன் குடும்பத்தோடு பள்ளியிலிருந்து கிளம்ப, வாழ்த்தி வழியனுப்பினார்கள் எல்லோரும்.

(அடுத்த அதிரடி...)